Ha Yini U Va La Nkhensaka?

LANGUTA exifunengetweni xa magazini lowu. Entiyisweni, xi hi tsundzuxa leswaku ku na swilo swo tala swo saseka leswi nga sivaka ku biha ni thyaka leri hi ri vonaka matlhelo hinkwawo.

Wa swi tlangela swilo swo saseka ke? Ehleketa hi nkwangulatilo ni ku saseka ka wona, mivala yo hambana-hambana leyi tsakisaka endzhaku ka mpfula ya matimba. Anakanya hi boboma ra mati lama khulukaka hi xitalo. Kumbe u ringeta ku vona swiharhi leswi tlangaka ni vana va swona. Ehleketa hi ntanga lowu tsakisaka wa swiluva kumbe ndzalo ya mavele. Ina, leswi i swilo leswi hi ntolovelo swi voniwaka hi vanhu vo tala. Kambe swi na vuyelo byihi eka wena xana?

Swi Honisiwa Hi Ku Olova

Hi ntolovelo, loko xilo xi tokotiwa nkarhi na nkarhi, xi ya xi toloveleka swinene—naswona swa olova ku xi honisa. Ku tsandzeka loku ku nga ha vonaka ku ri loku vulavuriwaka ha kona swinene eka lembe xidzana ra vu-20 leri tsutsumaka swinene. Kambe ku tsandzeka ku tinyika nkarhi wo anakanyisisa kumbe ku xiya minkateko ni swivangelo swa ku nkhensa hi minkarhi hinkwayo swi ve ku hluleka ka vanhu lava nga hetisekangiki.

Hi tlhelo rin’wana, mupisalema Davhida, ehansi ko huhuteriwa, hakanyingi u kombise ku nkhensa hi risimu. Marito lama kongomisiweke eka Xikwembu eka rin’wana ra tinsimu ta Davhida i xikombiso lexi hlawulekeke xa ku nkhensa:

“Loko nḍi hlalela matilo, e ntiro wa tintiho ta wena,

Ni [n’weti], ni tinyeleti leti u ti lungiseke;

Nḍi ku: Munhu wa-ku-fa i yini, leŝaku u ṅwi anakanya?

Ni ṅwana wa munhu, leŝaku u ṅwi enḍela šana?

U ṅwi fumisile mitiro ya mav̌oko ya wena;

U v̌ekile hikwaŝo e hansi ka mikonḍo ya yena;

E tinyimpfu ni tihomu,

Ni ŝiharhi ŝa nhov̌a;

Ni tinyanyana ta tilo, ni tinhlampfi ta lwandle,

Ni hikwaŝo le’ŝi famba fambaka e tindleleni ta malwandle.

Oho Yehova, Hosi ya hina! V̌ito ra wena ri kwetsimile ŝonghasi e misav̌eni hikwayo!”—Psalma 8:3, 4, 6-9.

Ku Nkhensa Ku Nga Herisa Ku Karhateka

Ku nkhensa ka mupisalema ka swilo leswo saseka ku pfune ku siva ku karhateka kwihi na kwihi loku tisiweke hi ku vona swilo leswi nga tsakisiki kumbe swiyimo swo nonon’hwa. Na wena u nga va ni ntokoto lowu fanaka. Njhani? Hi ku lwela ku tlangela hi xitalo swilo swo tala swo tsakisa leswi hi rhendzeleke. Hi ndlela leyi, u nga engetela ntsako wa wena ni wa lava ku rhendzeleke.

Kutani ha yini u nga pfumeleli swilo swo saseka ni swihlamariso leswi u swi vonaka swi ku susumetela ku nkhensa Muvumbi wa hina lonene ku suka embilwini ke? Sweswi kambisisa swivangelo swin’wana leswi engetelekeke swo va la nkhensaka.