Kombisa Leswaku Wa Nkhensa
1 Hambileswi hi hanyaka ‘eminkarhini ya mangava leyi swi nonon’hwaka ku langutana na yona,’ hi ni swivangelo swo tala swo nkhensa Yehovha. (2 Tim. 3:1) Xa nkoka ngopfu eka swona i nyiko ya risima leyi a hi nyikeke yona, ku nga N’wana wa yena. (Yoh. 3:16) Ku tlula kwalaho, loko vanhu va vukhongeri bya mavunwa va ri karhi va dlaya hi ndlala ya moya, hina hi le ku tiphineni hi ndzalo ya swakudya swa moya. (Esa. 65:13) Hi swirho swa ndyangu wun’we naswona hi vamakwerhu emisaveni hinkwayo. Hikwalaho hi ni lunghelo ro hlanganyela eku ndlandlamuxeni ka vugandzeri bya ntiyiso. (Esa. 2:3, 4; 60:4-10, 22) Leswi Yehovha a hi chululelaka mikateko, xana hi nga swi kombisa njhani leswaku ha n’wi nkhensa?—Kol. 3:15, 17.
2 Ntirho Lowu Tsakisaka Wa Mbilu Hinkwayo: Loko muapostola Pawulo a bula hi ku nyikela hi swilo leswi vonakaka u tsarile: “Xikwembu xi rhandza munyiki la tsakeke.” (2 Kor. 9:7) Nsinya lowu wa nawu wu tirha ni le ka ntirho lowu hi wu endlelaka Xikwembu. Hi kombisa ku nkhensa ka hina hi ku hisekela ntiyiso, ku va lava tsakeke eminhlanganweni ya Vukreste, ku hisekela nsimu ni ku tsakela ku endla ku rhandza ka Xikwembu.—Ps. 107:21, 22; 119:14; 122:1; Rhom. 12:8, 11.
3 Le Israyele wa khale a ku nga ri na Nawu lowu a wu lava leswaku ku humesiwa nhlayo yo karhi ya magandzelo. Mugandzeri ha un’we a a kombisa ku tlangela ka yena hi ku nyikela swo “ringana ni nkateko lowu Yehovha” a n’wi katekiseke ha wona. (Det. 16:16, 17) Hilaha ku fanaka ninamuntlha, timbilu ta hina leti tlangelaka ti ta hi susumetela ku endla leswi swiyimo swa hina swi hi pfumelelaka ku swi endla entirhweni wo chumayela hi Mfumo ni ku endla vadyondzisiwa. Van’wana va tirhisa masiku lawa va nga yiki entirhweni kumbe exikolweni leswaku va tirha nsimu nkarhi wo leha, hambi ku ri ku va maphayona ya nkarhinyana.
4 Mi Khapakhapa Hi Ku Nkhensa: Xikhongelo hi yona ndlela ya risima yo phofula ku nkhensa ka hina eka Yehovha. (1 Tes. 5:17, 18) Rito ra Xikwembu ri hi khutaza leswaku hi “khapakhapa ripfumelo hi ku nkhensa.” (Kol. 2:7) Minkarhi hinkwayo hi fanele hi nkhensa Yehovha eswikhongelweni swa hina swa siku ni siku hambiloko hi khomeke ngopfu kumbe hi tshikilelekile. (Filp. 4:6) Onge hi nga “fuwisiwa hi marito yo tala ya ku nkhensa Xikwembu,” hi ku ya ensin’wini ni hi ku khongela.—2 Kor. 9:12.