Ku Nkhensa Leswi Hi Nyikiweke Swona

¹ “Xikwembu xi kombisa erivaleni rirhandzu ra xona eka hina, hileswi Kriste a nga hi fela loko ha ha ri vadyohi.” (Rhom. 5:⁠8) Mawaku ndlela leyi hinkwerhu hi faneleke ku khensa ha yona hikwalaho ka gandzelo leri tlakukeke leri Yehovha Xikwembu ni N’wana wa yena va hi endleleke rona! Hi ngati ya Kreste leyi halatiweke, hi nyikiwe nkarhi wo kuma vutomi lebyi nga heriki, lebyi ku nga riki na munhu loyi a nga hi nyikaka byona.

² Xana hi nga ku kombisa njhani ku tlangela ka hina? Ku ni vanhu vo tala lava nga ni torha ra vutivi bya ntiyiso, lebyi nga kumiwaka ntsena eka Rito ra Xikwembu lero Kwetsima. I ku rhandza ka Yehovha leswaku va tiva ntiyiso. (1 Tim. 2:⁠4) Hi kombisa ku tlangela ka hina ntiyiso hi ku ‘twarisa mahungu lamanene ya Mfumo wa Xikwembu.’ (Lk. 4:​43) Ku hlanganyela hi mbilu hinkwayo entirhweni lowu swi kombisa leswaku hi tlangela leswaku Kreste u hi ferile ni leswaku hi lava ku n’wi tekelela, hi ku yingisa hi ku tshembeka eka xileriso xa yena xo endla van’wana vadyondzisiwa.​—⁠Mt. 28:​19, 20.

³ Xana hi tihi tindlela tin’wana to chumayela leti hi pfulekeleke? Xana hi nga swi kota ku tsarisa tanihi maphayona ya nkarhinyana nkarhi na nkarhi? Endzhaku ko kunguhata, van’wana va nga ha swi kota ku sungula ntirho wa vuphayona bya nkarhi hinkwawo. Hi ku yi tirhisa kahle minkarhi leyi leyinene, hi nga andzisa ntsengo wa nkarhi lowu hi wu hetaka eku hangalaseni ka mahungu lamanene ya Mfumo. Eminkarhini leyi hundzeke u nga ha va u ehlekete ku tsarisa, kambe u kuma leswaku ku ni swihinga. Kumbexana swiyimo swa wena swi cincile. Loko swi ri tano, xana u tshame u anakanyisisa kahle hi ku nghenela ntirho wa vuphayona kumbe ku tirha tanihi phayona ra nkarhinyana?

⁴ Ku khensa ka hina ku ya ku kula loko hi languta leswi humelelaka laha hi nga kona. Ku ni ku andza ka madzolonga, rivengo ni mpfilumpfilu emisaveni hinkwayo. Pawulo u yi hlamusele kahle minkarhi leyi ya hina tanihi yo “nonon’hwa” ni ‘leyi tikaka ku langutana na yona.’ (2 Tim. 3:⁠1) Exikarhi ka swiyimo leswi leswi khomisaka gome, hi ni ndzalo ya mahungu lamanene lawa hi nga ma avelaka van’wana. Hi ni timagazini timbirhi letinene, ku nga Xihondzo xo Rindza ni Xalamuka! Hi April hi ta fambisa swikhokhelo swa Xihondzo xo Rindza. Laha vanhu va nga xi amukeriki, hi nga va siyela timagazini timbirhi. Nakambe hi ni tibroxara leti nga ni tinhloko-mhaka to hlaya. Minkandziyiso leyi yi nga tisa ku phyuphya ka xiviri eka lava yi hlayaka. Ku khensa leswi hi nyikiweke swona ku fanele ku hi susumetela ku tsakela hi ku swi avela van’wana.​—⁠Hev. 13:⁠16.

⁵ Swi nga ha endleka leswaku endhawini leyi u tshamaka eka yona, vanhu va kombisa ku tsakela kutsongo eka swilo swa moya. Ku hambana ni sweswo, ku ni masimu man’wana lama vekaka mihandzu. Ku tsakela lokukulu ku karhi ka kumiwa ensin’wini ya hina ya vantima. Loko u kota ku vulavula tindzimi leti engetelekeke ta vantima, xana u nga swi kota ku tirha endhawini ya tiko leri laha ku nga ni xilaveko xa xiviri xa mpfuno wa wena? Mulanguteri wa wena wa xifundzha a nga ha va ni swiringanyeto swo karhi malunghana ni mhaka leyi, kumbe u nga ha tsalela hofisi ya rhavi.

⁶ Ku ni swivangelo swo tala swo nkhensa leswi hi nyikiweke swona, entiyisweni i ndzalo ya swilo leswinene. Ku nkhensa ka hina Yehovha ku nga ha kombisiwa kahle hi ku tivisa van’wana vito ni swikongomelo swa yena.​—⁠Esa. 12:​4, 5.