Aka Ku Tshemba Yehova—Hi Ku Dyondza Rito Ra Yena Hi Ku Chivirika

“Hlayisani timbilwini ta ṅwina e marito lawa hikwawo, lawa nḍi endlaka v̌umboni namuntlha ha wona e mahlweni ka ṅwina; . . . Hikuv̌a a hi rito [ra] hav̌a e ka ṅwina; kambe i v̌utomi bya ṅwina.”—DEUTERONOMA 32:46, 47.

1, 2. (a) I langutelo rihi leri a ri kongomane na Israyele loko va hlengeletane eswitsungeni swa Moab? (b) I xikhutazo xihi lexi Muxe a xi nyikeke tiko?

RIENDZO ra vona ro leha ra le mananga a ri tshinelele makumu ya rona. I Yordani lowu rhendzelekaka ntsena lowu manuku wu hambaniseke rixaka ni Tiko leri Tshembisiweke leri a ri rindzeriwe nkarhi wo leha. Hambi swi ri tano, eka Muxe, murhangeri wa tiko, ku langutela ka Israyele ka ku nghena etikweni rero ku tise langutelo lerinene. A a tsundzuka ndlela leyi tiko ri nga tshama ri karhateka ha yona hikwalaho ka ku pfumala ka rona ku tshemba Yehova kutani xisweswo ri arisiwa ku nghena eKanana.—Tinhlayo 13:25–14:30.

² Muxe xisweswo u lerise tiko ku hlengeletana eswitsungeni leswi rhendzelekaka swa Moab. Endzhaku ko pfuxeta matimu ya vona ya tiko ni ku phindha Nawu wa Xikwembu, Muxe u nyikele leswi vuriweke vuphati bya yena lebyi antswaka. Hi ririmi ra swiphato leswinene, u khutaze Israyele ku tshemba ni ku yingisa Yehova, “Šikwembu šo ṭhembeka, ši nga ri na nanḍu; Ši ni v̌unene, ši lulamile.” Loko a dlayelela, Muxe u khongoterile a ku: “Hlayisani timbilwini ta ṅwina e marito lawa hikwawo, lawa nḍi endlaka v̌umboni namuntlha ha wona e mahlweni ka ṅwina; mi ta ma lerisela v̌ana v̌a ṅwina; v̌a ta yingisa ni ku endla hi marito hikwawo ya nawu lowu. Hikuv̌a a hi rito [ra] hav̌a e ka ṅwina; kambe i v̌utomi bya ṅwina.”—Deuteronoma 32:4, 46, 47.

‘Ku Hlayisa Rito Ra Xikwembu eTimbilwini Ta Vona’

3, 4. (a) Xana Vaisrayele a va fanele ku ‘hlayisa yini etimbilwini ta vona,’ naswona leswi a swi katsa yini? (b) Tinxaka ta le ndzhakunyana ti tirhise ndzayo ya Muxe hi ndlela yihi ke?

³ Muxe u tsundzuxe Vaisrayele ku ‘veka timbilu ta vona’ ku nga ri eka risimu ra yena leri tlhavulaka ntsena kambe eka matsalwa hinkwawo lamo hlawuleka. A va fanele ku “hlayisa swinene” (Knox), “ku tiyiseka leswaku va yingisa” (Today’s English Version), kumbe “ku anakanyisisa hi” (The Living Bible) Nawu wa Xikwembu. A ku ta va hi ku tolovelana na wona swinene laha a va ta ‘lerisa vana va vona ku khathalela ku endla marito hinkwawo ya nawu lowu.’ Eka Deuteronoma 6:6-8, Muxe u tsarile a ku: “Milawu le’yi nḍi ku nyikaka namuntlha yi ta v̌a e mbilwini ya wena. U ta yi dyonḍisa v̌ana v̌a wena. . . . U ta yi bohelela e v̌okweni ra wena, ši v̌a šiṭunḍušo ša wena, ni šikombiso e šikari ka mahlo ya wena.”

⁴ Muhlamuseri wa Bibele W. H. Davey u hlamusela ndlela leyi ha yona eminkarhini ya le ndzhaku, marito lawa “a ma hlamuseriwa hi ku kongoma hi Vayuda, naswona vukongomisi lebyi a ma ri na byona byi hundzuluxiwile byi tirhiseriwa vukholwa-hava. Tindzimana tin’wana . . . a ti tsariwe emadzobyeni, ivi ma ambariwa evokweni ni le mombyeni hi nkarhi wa xikhongelo.” Tinguvu letikulu leti nga ni matsalwa, kumbe madzovo lama nga ni matsalwa, a swi ambariwa enkarhini wa Yesu naswona swa ha tirhisiwa hi mintlawa yin’wana ya Vayuda namuntlha. (Matewu 23:5) Kambe, Davey wa engetela a ku: “Vanhu hi vuhunguki bya vona va tianerise hi ku famba va khome kopi ya marito ntsena ya nawu, ematshan’wini yo kombisa ku yingisa xileriso lexi nga ka yona evuton’wini bya vona.”

5. Ku tirhisiwa lokunene ka marito ya Muxe eka Deuteronoma 6:6-8 a ku ri kwihi ke?

⁵ E-e, a ku nga ri emavokweni ni le mimombyeni ya vona ya xiviri laha Nawu wa Xikwembu a wu fanele ku tshama kona kambe ‘etimbilwini ta vona.’ Hi ku kuma, hayi vutivi ntsena kambe ku wu tlangela loku enteke, Nawu wolowo minkarhi hinkwayo a wu ta xiyiwa, onge hi loko wu tsariwe exiphambatini emahlweni ka vona kumbe wu boheleriwe emavokweni ya vona.

Malunghiselelo Yo Dyondza Nawu Wa Xikwembu

6, 7. (a) I malunghiselelo wahi lawa Yehova a ma endleke ku tolovelanisa Vaisrayele ni Nawu wa Muxe? (b) Nakambe a swi ta va swi koteke hi ndlela yihi leswaku vanhu va Xikwembu eminkarhini ya khale va dyondzisiwa Rito ra Xikwembu?

⁶ Kambe, xana Vaisrayele a va ta yi dyondza njhani milawu ya kwalomu ka 600 ya Nawu? Tikopi ta wona handle ko kanakana a ti kala eku sunguleni. Hosi ya Israyele leyi a yi ta landzela a yi fanele yi “tiṭalela e bukwini e nawu lowo . . . , o ta hlaya kona e masiku hikwawo ya ku hanya ka yena, leŝaku a dyonḍa e ku tšhav̌a Yehova, Šikwembu ša yena, ni ku hlayisa marito hikwawo ya nawu lowo.” (Deuteronoma 17:18, 19) Xikwembu xi lunghiselele Nawu lowu leswaku wu hlayiwa lembe rin’wana na rin’wana ra vunkombo eNkhubyeni wa Mitsonga. (Deuteronoma 31:10-13) Hambi leswi nkarhi wo tano handle ko tipfinyinga a wu phyuphyisa, a swi nga tolovelekanga ku nyikela vutivi hi vuxokoxoko.

⁷ Nakambe Yehova u lunghiselele rixaka ra Levhi leswaku ri ‘dyondzisa ku lerisa ka Xikwembu eka Yakobo ni nawu wa Xikwembu eka Israyele.’ (Deuteronoma 33:8, 10; ringanisa Malakia 2:7.) Hi makhamba man’wana, Valevhi va tamele matsima yo dyondzisa lama hlayiseke tiko hinkwaro. (2 Tikronika 17:7-9; Nehemia 8:7-9) Hi nkarhi lowu faneleke, swa tikomba leswaku swiyenge swa Rito ra Xikwembu a swi kumeka ni le ka vanhu hinkwavo.a Kutani ke, mupisalema u swi kotile ku tsala a ku: ‘Ku katekile munhu . . . loyi a titsakelaka enawini wa Yehova, a wu anakanya nhlekanhi ni vusiku.’ (Psalma 1:1, 2) Xikhutazo xa Muxe xo ‘hlayisa Rito ra Xikwembu etimbilwini ta vona’ xisweswo xi vange xileriso xa ku endla dyondzo yo gingiriteka ya Bibele.

‘Ku Nyikela Timbilu Ta Hina’ eRitweni Ra Xikwembu Namuntlha

8. Xana Israyele ri hlayise xitsundzuxo xa Muxe ku fika kwihi, naswona hi vuyelo byihi ke?

⁸ Israyele u hlulekile ku hlayisa xikhutazo xa Muxe. Loko tiko eku heteleleni ri simeke mfumo wa rona, entiyisweni to tala ta tihosi ta rona ti hlulekile ku ‘titsalela buku ya nawu ni ku yi hlaya masiku hinkwawo ya ku hanya ka tona.’ Hi lembe xidzana ra vunkombo B.C.E., emasikwini ya Hosi Yosiyasi, ‘buku ya nawu leyi fanaka’ yi thumbiwile. (2 Tihosi 22:8-13) Xikombiso lexi khomisaka tingana etlhelweni ra varhangeri va tiko handle ko tipfinyinga xi vangele ku nghena ka xihatla ka tiko evugwineheni. Ku pfumelelana ni xitsundzuxo xa Muxe, nhlomulo wa tiko wu humelerile hi 607 B.C.E.—Deuteronoma 28:15-37; 32:23-35.

9. Xana xiyimo xa Vakriste namuntlha xi fana ni lexiya xa Vaisrayele va khale hi ndlela yihi?

⁹ Ku fana ni Vaisrayele va khale, Vakriste namuntlha va yime endzilikaneni wa tiko leri tshembisiweke—misava leyintshwa ya Xikwembu yo lulama. (2 Petro 3:13) Swiendlakalo leswi chavisaka swi le nyangweni: ku huweleriwa ka “ku rhula ni nsirhelelo,” ku wa ka “Babilona Lonkulu,” ku hlasela ka ‘Gogo wa Magogo.’ Swiendlakalo leswi swi ta veka ntshembo wa hina eka Yehova endzingweni. Manuku ke, i swa xihatla leswaku hi ‘nyiketela timbilu ta hina rito ra Xikwembu’ sweswi!—1 Vatesalonika 5:3; Nhlavutelo, ndzima 18; Ezekiel, ndzima 38.

10. Ha yini van’wana va nga ha tsanaka edyondzweni ya munhu hi xiyexe?

¹⁰ Hambi swi ri tano, ku endla tano ku nga va mphikamakaneta ya xiviri ‘eminkarhini yo nonon’hwa.’ (2 Timotiya 3:1) Vutihlamuleri bya ntirho wo tihanyisa, ku wundla vana, xikolo ni bya bandlha hinkwaswo swi nga lava swo tala enkarhini wa hina. Hikwalaho, hi nga voyamela eku tisirheleleni ivi hi tsana eku dyondzeni ka hina ka Bibele, hi anakanya leswaku ‘Ndzi endla leswi ndzi nga swi kotaka.’ Hambi swi ri tano, Bibele yi tsundzuxa Vakriste ku: “Endla tifanelo leti; va tinyiketela eka tona.’ (1 Timotiya 4:15, 16) Manuku a hi xiyeni swivangelo swin’wana swa matimba swo endla tano.

Ku Tiyisa Vuxaka Bya Hina Na Xikwembu

11, 12. (a) Xana ku kuma vutivi lebyikulu lebyi engetelekeke bya Xikwembu ku n’wi khumbe njhani Yobo? (b) Ha yini xivono xa hina xa Xikwembu xi nga ha vaka lexi twisisekaka ku tlula esikwini ra Yobo?

¹¹ Yobo a a ri munhu loyi a a “tšhav̌a Šikwembu, a tinga ŝo biha.” Kambe endzhaku ka loko Yehova a ye emahlweni a tikombisa exidzedzeni, Yobo u te: “Tindlev̌e ta mina ti yingisile timhaka ta wena; kambe ŝeŝi mahlo ya mina ma ku v̌ona.” (Yobo 1:1; 42:5) Xana hi nga “vona” Xikwembu namuntlha, hi leswaku, hi endla leswi tlulaka ku xi tolovela ntsena, hi tiva swivumbeko swo tala swa vumunhu bya xona swinene ke? Hakunene hi nga swi kota! Hi ku tirhisa matluka ya Bibele, Yehova u hlavutele swo tala ha yena ku tlula leswi a swi tiveka hambi ku ri eka Yobo.

¹² Hi ni langutelo leri nga erivaleni ra vuento bya rirhandzu ra Xikwembu, hi ku tiva leswaku “xi rhandzile misava swonghasi, xi ko xi nyika N’wana wa xona la nga un’we.” (Yohane 3:16) Hi vuprofeta bya Bible, hi na nxaxamelo wa mintirho ya Xikwembu—entiyisweni ku ya fika emakumu ya Gidi ra Malembe! (Nhlavutelo, tindzima 18-22) Hi na rhekhodo ya ku tirhisana ka Xikwembu ni bandlha ra Vukriste: ku tisa ka xona Vamatiko, ku hlawula ka xona “nandza lowo tshembeka, lowa vutlhari” ku phamela vanhu va xona, ku vitana ka xona “ntshungu lowukulu” lowu nga ni ntshembo wo hanya hi laha ku nga heriki aParadeyisini emisaveni. (Matewu 24:45; Nhlavutelo 7:9, 14-17; Vaefesa 3:3-6) Endzhaku ko hlometela swilo leswi enteke swa Xikwembu ni ku anakanyisisa hi mintirho ya xona leyi hlamarisaka hikwalaho ka hina, hi boheka ku huwelela hi ku: “Oo! ku enta ka vuhosi, ni vutlhari, ni vutivi bya Xikwembu!”—Varhoma 11:33.

13. Xana hi nga ‘lava Xikwembu’ hi ndlela yihi, naswona hi yihi mimpfuno ya ku endla tano?

¹³ Mupisalema u te: “Nḍi ku [lave] hi mbilu ya mina hikwayo.” Hi nga endla leswi fanaka hi ku endla ku xiyisisa ka siku na siku ka mhaka ya Matsalwa; swi tirha swinene ku tiyisa rirhandzu ra hina na Yehova. Dyondzo yo chivirika na yona ya pfuna ku endla leswaku ndlela ya hina yi va ‘leyi tiyisiweke swinene leswaku hi kota ku hlayisa swileriso swa Xikwembu.’—Psalma 119:5, 10.

Ku Dyondza Ku Hi Pfuna Ku Lwela Ripfumelo Ra Hina

14. Kombisa nkoka wo ‘tiyimisela ku tihlamulela’ hi ntshembo wa hina wa Vukriste.

¹⁴ “N’wina Timbhoni a ndzi mi lavi emutini wa mina!” ku vule wanuna un’wana wa le Ghana eka vambirhi lava endzeleke muti wa yena. U ye emahlweni a sola Timbhoni hikwalaho ka “ku ka ti nga amukeli mimpompelo ya ngati ni ku ka ti nga losi mijeko ya tiko.” Ku kaneta ko tano ku hlanganiwa na kona ngopfu evutirhelini bya nsimu. Vona ndzhukano—ni ku tsongahatiwa—leswi a swi ta va swona loko hi hluleka ‘ku tihlamulela eka un’wana ni un’wana loyi a hi vutisaka ehenhla ka ku tshemba loku hi nga na kona’! (1 Petro 3:15) Nkateko wa kona, Timbhoni ti swi kotile ku tirhisa Bibele hi laha ku humelelaka ku hlamusela langutelo leri faneleke ra ngati ni ndlela leyi Mukriste a ringanisaka ku xixima mimfungho ya tiko ha yona ni ku papalata swifaniso. Vuyelo ke? Wanuna loyi u tsakisiwile hi tinhlamulo ta vona leti kongomeke. Namuntlha, yena na nsati wa yena i Timbhoni leti khuvuriweke.

15. Dyondzo ya munhu hi xiyexe yi hi hlomisela vutirheli bya hina hi ndlela yihi?

¹⁵ Pawulo wa khutaza: “Endla hi matimba ku vonaka u ri la nkhensekaka emahlweni ka Xikwembu, mutirhi loyi a nga fanelangiki hi ku khomiwa hi tingana, loyi a tamelaka Rito ra ntiyiso hi ndlela leyinene.” Dyondzo ya munhu hi xiyexe yi ta hi pfuna ku nga ri ku tshama egondzweni ra vutomi hi hexe ntsena kambe ni ku ‘va lava hetisekeke hi xitalo, hi tilulamisela hi laha ku heleleke’ ku pfuna van’wana ku endla tano.—2 Timotiya 2:15; 3:17.

Ku Lwa Ni Mintlhamu Ya Sathana

16. Hi yihi mintlhamu yin’wana ya Sathana leyi kongomanaka na vanhu va Yehova?

¹⁶ Namuntlha, ku navetisa ku hi hlasela hi leswi kokaka mahlo eka “ku navela ka miri, ni ku navela ka mahlo, ni ku tikurisa hi swa vutomi lebyi.” (1 Yohane 2:16) Rigangugangu ri dzunisiwa hi vuhaxi bya mahungu naswona hakanyingi ri kurisiwa hi matimba hi vatirhi-kulobye ni lava nghenaka swin’we xikolo. Tibuku leti hehlaka ta vagwinehi ti nga rhumeriwa emitini ya hina handle ka xikombelo. Loko ku navela ka vona ku tiva ku tlhontlhiwile, vamakwerhu van’wana va hlaye buku yo tano leyi onhaka—ku onha ripfumelo ra vona. Ku tlhela ku va ni “moya lowu tirhaka na sweswi exikarhi ka vanhu lava nga yingisiki” wa vutianakanyi, wa swa nyama. Swi olova swinene swonghasi ku va la hlaseriwaka hi wona ni ku vumba moya lowo biha, wo tiarisa!—Vaefesa 2:2.

17, 18. Xana dyondzo ya munhu hi xiyexe yi nga hi siverisa ku yini ku tlhelela endzhaku?

¹⁷ Kavula, va nga ri vangani va tiyimisela ku phasiwa hi Sathana. Hikwalaho ke, hi ku honisa dyondzo ya munhu hi xiyexe, ku fana na xikwekwetsu lexi chupukeke eka switiyisi swa xona, va ‘tlhelela endzhaku’ hakantsongo-ntsongo ivi va va vahlaseriwa lavakulu va nhlaselo wa Sathana. (Vaheveru 2:1) Hi xikombiso; makwerhu un’wana wa xinuna lontshwa u sungule ku katseka evunghwavaveni ni nhwanyana lontsongo exikolweni. Wa tsundzuka: “Ndzi tshubule leswaku xivangelo-nkulu xa leswi a ku ri ntiyiso wa leswaku a ndzi sika emoyeni. A ndzi nga endli dyondzo ya munhu hi xiyexe. Hi yona mhaka leyi ndzi tsandzekeke ku hlula ndzingo.” Hambi swi ri tano, nongonoko wa dyondzo ya munhu hi xiyexe, wu pfune makwerhu loyi ku tiya emoyeni.

¹⁸ Sathana u tiyimisele ku hlasela vo tala va vanhu va Xikwembu hi laha a nga kotaka ha kona. Hi ku wundla mianakanyo ya hina nkarhi na nkarhi hi swilo leswinene leswi humaka eRitweni ra Xikwembu ni nandza wa xona la tshembekaka, hi nga papalata ku wela entlhan’wini. (Vafilipiya 4:8) Switsundzuxo swa ku papalata swilo leswi vonekaka, rigangugangu, mianakanyo ya vagwinehi ni moya lowo biha hinkwaswo swi tele eBibeleni ni le tibukwini ta Sosayiti ya Watch Tower. Loko hakunene hi yingisa swinene, hi nga ka hi nga tlheleli endzhaku.

Malunghiselelo Lama Humaka eNhlengeletanweni Ya Yehova Yo Hi Pfuna

19. Mutsheniwa wa Muetiyopiya u kombisa yini malunghana na xilaveko xa hina xa vukongomisi bya moya?

¹⁹ Ku dyondza i ntirho wo nonon’hwa. Hikwalaho hi nga nkhensa leswi nhlengeletano ya Yehova yi hi nyikaka mpfuno lowukulu. Emalembeni lama ha ku hundzaka van’wana va vule leswaku vanhu va fanele va pfumeleriwa ku tihlamuselela Bibele. Hambi swi ri tano, mutsheniwa wa Muetiyopiya, u xiye xilaveko xa yena xa vukongomisi bya moya erivaleni. Tanihi muproselita la yimbisiweke, a swi kanakanisi leswaku ana se a a ri na vutivi lebyi xiyekaka bya Bibele. Yona mhaka ya leswaku u ringete ku dyondza swin’wana swo enta tanihi vuprofeta bya Esaya 53 yi kombisa leswi. Hambi swi ri tano, loko a vutisiwe loko a twisisa leswi a a ri ku swi hlayeni, u pfumerile a ku: “Ndzi nga swi kotisa ku yini ku swi twisisa loko ndzi nga ri ni loyi a ndzi hlamuselaka xana?”—Mintirho 8:26-33.

20. (a) Hi wahi yan’wana ya malunghiselelo lama nhlengeletano ya Yehova yi ma endleke ku hi pfuna edyondzweni ya hina ya munhu hi xiyexe ya Bibele? (b) U titwa njhani hi malunghiselelo yo tano ke?

²⁰ Vanhu va Yehova hi ku fanana va lava vukongomisi bya moya namuntlha. Hi ku navela ku ‘twanana eku vulavuleni’ loko swi ta etimhakeni ta moya, va amukela mpfuno lowu nyikeriwaka hi nhlengeletano ya Yehova—naswona mawaku mpfuno lowonghasi lowu leswi swi nga wona! (1 Vakorinto 1:10) Hi na nxaxamelo wa nkarhi na nkarhi wa rungula leri humaka eka timagazini ta Xihondzo xo Rindza ni Awake! Hi na tibuku ni tibroxara to tala leti hlanganisaka nxaxamelo lowukulu wa tinhloko-mhaka ta Bibele. Vahlayi lava vulavulaka Xinghezi ngopfu-ngopfu va katekile ku va ni Watch Tower Publications Index 1930-1985, xitirho lexi nga pfunaka munhu ku ‘hambeta a lava vutlhari kukotisa mali ni kukotisa xuma lexi fihliweke.’—Swivuriso 2:2-4.

21. (a) Xana muapostola Pawulo u kombise ku tsakela dyondzo ya munhu hi xiyexe hi ndlela yihi? (b) Hi swihi swiringanyeto swin’wana swo pfuneta dyondzo ya munhu hi xiyexe?

²¹ Xana u tirhisa tibuku ta Sosayiti hi xitalo hi ku ti tirhisela ku dyondza ni ku lavisisa? Kumbe xana tibuku to tano ti tirha ku va swikhavisi swa tixelufu ntsena? Lexi tsakisaka, muapostola Pawulo u tshama a lerisa Timotiya ku ‘n’wi tisela . . . tibuku, ngopfu-ngopfu leto songiwa ta madzovo’ eRhoma; entiyisweni, Pawulo a a kombetela eka swiphemu swa Matsalwa ya Xiheveru. (2 Timotiya 4:13) A swi kanakanisi leswaku a a ti lavela ku ti tirhisa ku dyondza ni ku kambisisa. Loko u nga si endla tano, ha yini u nga sunguli ku hlengeleta layiburari ya wena n’wini ya tibuku ta le tilweni leswaku na wena u ta endla ndzavisiso? Hlayisa tibuku to tano ti ri leti kumekaka, ti landzelelana, ti hlelekile ni ku basa. Hlawula ndhawu yo dyondzela ka yona leyi holeke ni ku voningiwa kahle. Endla xiyimiso xa nkarhi na nkarhi xa dyondzo ya munhu hi xiyexe.

22. Ha yini ‘ku nyikela timbilu ta hina eka rito ra Xikwembu’ swi ri swa nkoka ngopfu namuntlha ku tlula rini na rini?

²² Ku fana ni Vaisrayele lava hlengeletiweke eswitsungeni leswi noneke swa Moab, hi yime endzilakaneni wa misava leyintshwa. Ku tlula rini na rini, hi fanele ku dyondza Rito ra Xikwembu hi ku chivirika kutani hi ‘londzovota nkarhi’ wo dyondza, kumbexana hi titsona swihungasi swin’wana, ku fana ni ku hlalela thelevhixini. (Vaefesa 5:16) “Mi fanele ku navela ntswamba lowu tengeke wa [rito],” ku khongotela Petro, “leswaku ha wona mi ta kota ku kula” ku nga ri ku ya fika eka ku va lava vupfeke ntsena kambe “mi ya eku ponisiweni.” (1 Petro 2:2; ringanisa Vaheveru 5:12-14.) Vutomi bya hina bya katseka. Kutani fularhela mboyamelo wun’wana ni wun’wana wo tsana edyondzweni ya munhu hi xiyexe. Yi tirhisi tanihi xitirho xo kurisa rirhandzu ra wena eka Xikwembu ni ntshembo wa wena eka xona; nakambe i ndlela yo kurisa ku tlangela ka wena ka nhlengeletano leyi a yi tirhisaka ku hi pfuna. Ina, ‘nyikela mbilu ya wena’ eRitweni ra Xikwembu, hi ku gingiriteka, nkarhi na nkarhi. ‘A hi rito ra hava eka wena, kambe ri vula vutomi bya wena.’

[Nhlamuselo ya le hansi]

Tinhla To Pfuxeta

◻ Ha yini Muxe a khongotele Vaisrayele ku ‘nyikela timbilu ta vona eRitweni ra Xikwembu,’ naswona a va fanele ku endla tano hi ndlela yihi?

◻ Xana dyondzo ya munhu hi xiyexe yi tiyisa vuxaka bya hina ni Xikwembu ni ku hi pfuna ku sirhelela ripfumelo ra hina hi ndlela yihi?

◻ I xiyenge xihi lexi dyondzo ya munhu hi xiyexe yi nga na xona eku lwisaneni ka hina ni mintlhamu ya Sathana?

◻ Nhlengeletano ya Yehova yi endle malunghiselelo wahi ya ku hi pfuna ku dyondza Rito ra Xikwembu?

[Xifaniso lexi nga eka tluka 11]

Ematshan’wini yo tsala nawu wa Xikwembu etimbilwini ta vona, Vayuda va bohelela tinguvu leti nga ni matsalwa