Amukela Bibele Hikwalaho Ka Leswi Yi Nga Xiswona
“Kutani mhaka leyi yi hi susumetaka ku nkhensa Xikwembu masiku hinkwawo, hi leyi: Loko hi mi tisele rito ra Xikwembu, mi ri yingisile ni ku ri amukela, ku nga ri kukota mahungu yo huma eka vanhu, kambe tanihi mahungu yo huma eka Xikwembu. Hakunene mahungu lawa ma huma eka xona, hikuva hi xona xi tirhaka hi matimba exikarhi ka n’wina lava pfumeleke.”—1 VATESALONIKA 2:13.
1. I rungula ra muxaka muni leri nga eBibeleni leri endlaka buku yoleyo yi va yo hlawuleka swinene?
BIBELE yo Kwetsima i buku leyi hundzuluxeriweke swinene ni leyi hangalasiweke hi xitalo emisaveni. Yi tiviwa swinene tanihi hi yin’wana ya tibuku ta risima. Hambi swi ri tano, xa nkoka swinene, Bibele yi nyikela nkongomiso lowu laviwaka hi xihatla hi vanhu va tinxaka hinkwato ni vamatiko hinkwawo, ku nga khathariseki ndhawu kumbe xiyimo xa vona evuton’wini. (Nhlavutelo 14:6, 7) Hi ndlela leyi enerisaka miehleketo kun’we ni mbilu, Bibele yi hlamula swivutiso leswi fanaka ni lexi: Hi xihi xikongomelo xa vutomi bya munhu? (Genesa 1:28; Nhlavutelo 4:11) Ha yini tihulumendhe ta vanhu ti tsandzeke ku tisa ku rhula ni nsirhelelo lowu khomelelaka? (Yeremiya 10:23; Nhlavutelo 13:1, 2) Ha yini vanhu va fa? (Genesa 2:15-17; 3:1-6; Varhoma 5:12) Exikarhi ka misava leyi nga ni maxangu, xana hi nga swi kota njhani ku langutana ni swiphiqo swa vutomi hi laha ku humelelaka? (Pisalema 119:105; Swivuriso 3:5, 6) Xana vumundzuku byi hi khomele yini?—Daniyele 2:44; Nhlavutelo 21:3-5.
2. Ha yini Bibele yi nyikela tinhlamulo ta swivutiso swa hina leti tshembekaka hi laha ku heleleke?
2 Ha yini Bibele yi hlamula swivutiso swo tano hi ndlela leyi amukelekaka? Hikuva i Rito ra Xikwembu. Xi tirhise vanhu ku yi tsala, kambe hi laha swi vekiweke erivaleni ha kona eka 2 Timotiya 3:16, “Matsalwa lawa hinkwawo ma huhutiwile hi Xikwembu.” A hi nhlamuselo leyi vuriweke hi munhu ya swiendlakalo swa vanhu. “Ku hava rito ni rin’we ra vaprofeta [vavhumbi va swilo leswi nga ta ta, milawu ya Xikwembu, mpimanyeto wa Bibele wa mahanyelo] leri teke hi ku titwa ka munhu, kambe vanhu lava susumetiweke hi Moya lowo Kwetsima, va vurile leswi humaka eka Xikwembu.”—2 Petro 1:21.
3. (a) Nyika swikombiso leswi kombisaka ndlela leyi Bibele yi langutiweke yi ri ya nkoka swinene ha yona ematikweni yo hambana-hambana. (b) Ha yini vanhu a va tiyimisele ku nghenisa vutomi bya vona ekhombyeni leswaku va hlaya Matsalwa?
3 Hikwalaho ko tlangela nkoka wa Bibele, vanhu vo tala va tivangele ku khotsiwa, hambi ku ri rifu hi ku yi hlaya ni ku va na yona. Leswi swi ve tano emalembeni lama hundzeke eSpain ra Vukhatoliki, laha vafundhisi a va chava leswaku nkucetelo wa vona a wu ta kandziyeriwa ehansi loko vanhu vo hlaya Bibele hi tindzimi ta vona vini; swi ve tano ni le Albania, laha ku endliweke marhengu ya tihanyi swinene ehansi ka mfumo wa lava alaka vukona bya Xikwembu leswaku va heta nkucetelo hinkwawo wa vukhongeri. Kambe, vanhu lava chavaka Xikwembu va hlayise tikopi ta Matsalwa, va ti hlaya, ivi va avelana tona. Hi nkarhi wa Nyimpi ya Vumbirhi ya Misava, ekampeni ya nxaniso eSachsenhausen, Bibele yi hundzisiwe hi vukheta ku suka exitokisini xin’wana ku ya eka xin’wana (hambi leswi leswi a swi yirisiwile), naswona lava va yi kumeke va nhlokohate swiphemu swo karhi leswaku va swi avela van’wana. Hi va-1950, endhawini leyi a yi vuriwa Jarimani Vuxa ya Vukhomonisi, Timbhoni ta Yehovha leti a ti khomiwile hikwalaho ka ripfumelo ra tona, ti tihoxe ekhombyeni ra ku lehisiwa ka ku pfaleriwa u ri wexe ekhotsweni nkarhi wo leha loko ti hundzisele swiphemu leswitsongo swa Bibele, ku suka eka mubohiwa un’wana ku ya eka un’wana leswaku swi hlayiwa ni vusiku. Ha yini va swi endlile? Hikuva a va swi xiya leswaku Bibele i Rito ra Xikwembu, naswona a va swi tiva leswaku “munhu a nga ka a nga hanyi hi v̌uŝa ntsena,” kambe “[u ta hanya, NW] hi hikwaŝo le’ŝi humaka e noṅwini wa Šikwembu.” (Deteronoma 8:3) Marito lawa, lama tsariweke eBibeleni, ma pfune Timbhoni toleto leswaku ti tshama ti hanyile hi tlhelo ra moya hambi leswi a ti khomiwe hi tihanyi to chavisa.
4. Xana Bibele yi fanele yi va ni ndhawu yihi evuton’wini bya hina?
4 Bibele a hi buku yo vekiwa evuhirhini leswaku yi ta kamberiwa loko munhu a swi rhandza, naswona a yi endleriwanga ku tirhisiwa ntsena loko vapfumeri-kulobye va hlanganele ku gandzela. Yi fanele yi tirhisiwa siku na siku ku hi voningela eswiyin’weni leswi hi hlangavetanaka na swona ni ku hi kombisa ndlela leyinene yo famba ha yona.—Pisalema 25:4, 5.
Yi Endleriwe Ku Hlayiwa Ni Ku Twisisiwa
5. (a) Loko swi koteka, i yini lexi un’wana ni un’wana wa hina a faneleke a va na xona? (b) EIsrayele wa khale, xana vanhu a va swi kumisa ku yini leswi Matsalwa ma swi tameleke? (c) Xana Pisalema 19:7-11 yi ri khumba njhani langutelo ra wena malunghana ni ku hlaya Bibele?
5 Esikwini ra hina, tikopi ta Bibele ti kumeka hi ku olova ematikweni yo tala, naswona hi khutaza muhlayi un’wana ni un’wana wa Xihondzo xo Rindza leswaku a tikumela kopi ya yena. Hi nkarhi lowu Bibele yi tsariweke ha wona, a ku ri hava michini yo kandziyisa. Hi ntolovelo vanhu a va ri hava tikopi ta vona vini. Kambe Yehovha u endle malunghiselelo ya leswaku malandza yakwe ma twa leswi a swi tsariwile. Xisweswo, hi laha Eksoda 24:7 yi vikaka ha kona, endzhaku ka loko Muxe a tsale ehansi leswi Yehovha a swi leriseke, u “tek[e] ni buku ya ntwanano, a hlaya e mahlweni ka tiko.” (Xiitaliki i xerhu.) Hi ku va va vone swikombiso leswi nga tolovelekangiki eNtshaveni ya Sinayi, va swi xiyile leswaku leswi Muxe a nga va hlayela swona a swi huma eka Xikwembu ni leswaku a va fanele va tiva rungula leri. (Eksoda 19:9, 16-19; 20:22) Na hina hi fanele ku tiva leswi tsariweke eRitweni ra Xikwembu.—Pisalema 19:7-11.
6. (a) Loko tiko ra Israyele ri nga si nghena eTikweni ra Xitshembiso, xana Muxe u endle yini? (b) Xana hi nga xi tekelela njhani xikombiso xa Muxe?
6 Loko tiko ra Israyele ri tilunghiselela ku pela Nambu wa Yordani ri nghena eTikweni ra Xitshembiso, xisweswo va tshika vutomi bya vona lebyi nga riki na xikongomelo emananga, a swi fanerile ha vona leswaku va pfuxeta Nawu wa Yehovha ni ndlela leyi a tirhisaneke na vona ha yona. Hi ku susumetiwa hi moya wa Xikwembu, Muxe u pfuxete Nawu na vona. U va tsundzuxe hi vuxokoxoko bya Nawu, naswona u tlhele a kandziyisa xisekelo xa misinya ya nawu ni mavonelo lawa a ma ta khumba vuxaka bya vona na Yehovha. (Deteronoma 4:9, 35; 7:7, 8; 8:10-14; 10:12, 13) Loko hina namuntlha hi sungula swiavelo leswintshwa kumbe ku langutana ni swiyimo leswintshwa evuton’wini, hi ta va hi endla kahle loko hi languta ndlela leyi ndzayo ya Matsalwa yi faneleke yi swi khumba ha yona leswi hi swi endlaka.
7. Endzhakunyana ka loko Vaisrayele va pele Yordani, xana ku endliwe yini ku kandziyisa Nawu wa Yehovha emiehleketweni ni le timbilwini ta vona?
7 Endzhakunyana ka loko Vaisrayele va pele Nambu wa Yordani, vanhu va tlhele va hlengeletana leswaku va pfuxeta leswi Yehovha a va byeleke swona ha Muxe. Tiko ri hlengeletane kwalomu ka 50 wa tikhilomitara en’walungwini wa Yerusalema. Ku ringana hafu ya rixaka leri a yi ri emahlweni ka Ntshava ya Ebali, naswona hafu ya rona a yi ri emahlweni ka Ntshava ya Gerizimi. Kwalaho Yoxuwa a “hlaya marito hikwawo ya nawu [ma twala, NW], e mikateko ni mirukano.” Kutani vavanuna, vavasati, ni vana, ku katsa ni vaaki lava nga valuveri, va twa ku pfuxetiwa loku nga enkarhini ka milawu ya ku tikhoma leyi nga ta endla leswaku va nga amukeriwi hi Yehovha ni mikateko leyi va nga ta yi kuma loko va yingisa Yehovha. (Yoxuwa 8:34, 35) A va fanele va twisisa kahle leswinene ni leswo biha hi ku ya hi langutelo ra Yehovha. Ku tlula kwalaho, a va fanele va kombisa etimbilwini ta vona ku rhandza leswinene ni ku venga leswo biha, hi laha un’wana ni un’wana wa hina a endlaka ha kona namuntlha.—Pisalema 97:10; 119:103, 104; Amosi 5:15.
8. Xana a ku ri wihi mpfuno wa ku hlaya Rito ra Xikwembu nkarhi na nkarhi etinhlengeletanweni to karhi ta tiko eIsrayele?
8 Ku tlhandlekela eku hlayeni ka Nawu enkarhini wolowo wa matimu, lunghiselelo ro hlaya Rito ra Xikwembu nkarhi na nkarhi ri hlamuseriwile eka Deteronoma 31:10-12. Hi lembe rin’wana ni rin’wana ra vunkombo, tiko hinkwaro a a ri fanele ri hlengeletana ku ta yingisa ku hlayiwa ka Rito ra Xikwembu. Leswi swi tirhe tanihi swakudya swa moya eka vona. Swi endle leswaku switshembiso swa Mbewu swi hanya emiehleketweni ni le timbilwini ta vona, xisweswo swi tirhe ku kongomisa lava tshembekaka eka Mesiya. Malunghiselelo ya ku wundliwa ka moya lama simekiweke loko Vaisrayele va ri emananga a ma helanga loko va nghena eTikweni ra Xitshembiso. (1 Vakorinto 10:3, 4) Ematshan’weni ya sweswo, Rito ra Xikwembu a ri fuwile hi ku katsa ni tinhlavutelo leti engetelekeke ta vuprofeta.
9. (a) Xana Vaisrayele a va hlaya Matsalwa ntsena loko va hlengeletane hi mintlawa leyikulu? Hlamusela. (b) Xana swiletelo swa Matsalwa a swi nyikeriwa njhani endyangwini ha wun’we, naswona hi xikongomelo xihi?
9 Mpfuxeto wa Rito ra Xikwembu a wu nga ta hikeriwa minkarhi leyi vanhu va hlanganeke va ri ntlawa lowukulu ntsena. Swiyenge swa Rito ra Xikwembu ni misinya ya milawu leyi a yi kumeka eka rona a ku fanele ku buriwa ha swona siku na siku. (Deteronoma 6:4-9) Etindhawini to tala namuntlha, swa koteka eka lavatsongo leswaku va va ni tikopi ta vona vini ta Bibele, naswona swi va pfuna ngopfu loko va endla tano. Kambe eIsrayele wa khale, a swi nga ri tano. Khale kwalomo, loko vatswari va nyikela nkongomiso lowu humaka eRitweni ra Xikwembu, a va fanele va titshega hi leswi va swi nhlokohateke, ni ntiyiso lowu va wu hlayiseke etimbilwini ta vona ku katsa ni swiphemu leswitsongo swa buku leswi va titsaleleke swona. Hi ku phindha-phindha ko tala, a va lwela ku nghenisa hakatsongo rirhandzu ra Yehovha ni ra tindlela ta yena eka vana va vona. Xikongomelo xa vona a ku nga ri ku tata miehleketo ya vana va vona hi vutivi, kambe a ku ri ku pfuna xirho xin’wana ni xin’wana xa ndyangu ku hanya hi ndlela leyi kombisaka rirhandzu ha Yehovha ni Rito rakwe.—Deteronoma 11:18, 19, 22, 23.
Ku Hlaya Tsalwa eMasinagogeni
10, 11. I xiyimiso xihi xa ku hlaya Matsalwa lexi a xi landzeriwa emasinagogeni, naswona Yesu u yi langute njhani minkarhi leyi?
10 Endzhaku ka nkarhi wo karhi loko Vayuda se va yisiwe evukhumbini eBabilona, ku akiwe masinagoga tanihi tindhawu ta vugandzeri. Leswaku Rito ra Xikwembu ri hlayiwa ni ku hlamuseriwa etindhawini leti to hlanganela eka tona, ku endliwe tikopi leti engetelekeke ta Matsalwa. Leswi hi swona swi vangeke leswaku ku sala kwalomu ka 6 000 wa tikopi ta khale leti tsariweke hi voko leti a ti tamele swiphemu swa Matsalwa ya Xiheveru.
11 Xiphemu xa nkoka xa nhlangano wa vugandzeri esinagogeni a ku ri ku hlayiwa ka Torah, leyi fanaka ni tibuku to sungula ta ntlhanu ta manguva lawa ta Bibele. Mintirho 15:21 yi vika leswaku eka lembe-xidzana ro sungula C.E., ku hlaya ko tano a ku endliwa hi Savata yin’wana ni yin’wana, naswona Mishnah yi kombisa leswaku hi lembe-xidzana ra vumbirhi, a ka ha ri ni ku hlayiwa ka Torah hi siku ra vumbirhi ni ra vuntlhanu ra vhiki. A ku averiwa vanhu vo hlayanyana eku hlayiweni ka swiphemu leswi averiweke, hi ku landzelelana ka swona. A ku ri mukhuva wa Vayuda lava a va tshama eBabilona ku hlaya Torah hinkwayo lembe na lembe; mukhuva wa le Palestina a ku ri ku hlela ku hlaya ku ringana malembe manharhu. Xiphemu xa Vuprofeta a xi hlayiwa ni ku hlamuseriwa. A ku ri ntolovelo wa Yesu ku va kona eminongonokweni ya Savata yo hlaya Bibele endhawini leyi a a tshama eka yona.—Luka 4:16-21.
N’wangulo Wa Munhu Hi Xiyexe Ni Ku Swi Tirhisa
12. (a) Loko Muxe a hlayela vanhu Nawu, xana vanhu va pfuneke njhani? (b) Xana vanhu va angurise ku yini?
12 Ku hlaya Matsalwa lama huhuteriweke a ku nga endleriwanga ku va mukhuva ntsena. A ku nga endleriwi ntsena ku susa torha ra vanhu ra ku lava ku tiva. Loko Muxe a hlayela Vaisrayele “buku ya ntwanano” erivaleni leri langutaneke na Ntshava ya Sinayi, a a endlela leswaku va ta tiva vutihlamuleri bya vona eka Xikwembu ni ku byi hetisisa. Xana a va ta byi hetisisa? Ku hlaya loku a ku lava n’wangulo. Vanhu va swi xiyile sweswo, ivi va vulavula va ku: “Hikwaŝo leŝi Yehova a ŝi v̌uleke hi ta ŝi yingisa, hi v̌a hi ŝi endla.”—Eksoda 24:7; ringanisa Eksoda 19:8; 24:3.
13. Loko Yoxuwa a hlaya mindzhukano ya ku nga yingisi, xana vanhu a va fanele va endla yini, hi xikongomelo xihi?
13 Endzhakunyana, loko Yoxuwa a hlayela tiko mikateko leyi tshembisiweke ni mindzhukano ya kona, a va fanele va hlamula. Endzhaku ka ndzhukano wun’wana ni wun’wana, a ku nyikiwa xileriso lexi nge: “Tiko hikwaro ri ta hlamula, ri ku: ‘Amen!’” (Deteronoma 27:4-26) Xisweswo, hi ku kambisisiwa ka yinhla yin’wana ni yin’wana, hinkwavo va pfumelelane ni leswi Yehovha a swi solaka leswaku swi hoxile. Ku fanele ku ve xiendlakalo lexi tsakisaka hakunene loko tiko hinkwaro ri huwelela ku pfumela ka rona!
14. Emasikwini ya Nehemiya, ha yini ku hlayiwa ka Nawu erivaleni ku vonake ku ri ka nkoka swinene?
14 Emasikwini ya Nehemiya, loko vanhu hinkwavo va hlengeletane eYerusalema ku yingisa Nawu, va swi xiyile leswaku a va nga swi landzeli hi ku hetiseka swiletelo leswi tsariweke eka wona. Hi nkarhi wolowo va tirhise leswi va swi dyondzeke xikan’we-kan’we. Vuyelo byi ve byihi? “Ku ṭaka ku v̌a lo’kukulu ngopfu.” (Nehemiya 8:13-17) Endzhaku ka vhiki ra ku hlaya ka Bibele ka siku na siku hi nkarhi wa nkhuvo, va xiye leswaku a ka ha laveka leswi engetelekeke. Va pfuxete hi vuenti matimu ya ndlela leyi Yehovha a tirhisaneke ha yona ni vanhu vakwe ku sukela emasikwini ya Abrahama ku ya emahlweni. Leswi hinkwaswo swi va susumetele ku endla xihlambanyo xo pfumelelana ni swilaveko swa Nawu, ku tshika ku tekana ni vanhu vambe, ni ku amukela vutihlamuleri byo hlayisa tempele ni ntirho wa yona.—Nehemiya, tindzima 8-10.
15. Xana swiletelo leswi nga eka Deteronoma 6:6-9 swi swi kombisisa ku yini leswaku emindyangwini, swiletelo swa Rito ra Xikwembu a swi fanelanga swi va mukhuva ntsena?
15 Hi ku fanana, endyangwini, ku dyondzisa Matsalwa a ku endleriwanga ku va mukhuva ntsena. Hi laha ana se hi swi voneke ha kona, hi ndlela yo fanekisela eka Deteronoma 6:6-9, vanhu a va byeriwa ku ‘bohelela rito ra Xikwembu tanihi mfungho emavokweni ya vona’—ivi va swi kombisa hi xikombiso ni swiendlo ku rhandza ka vona tindlela ta Yehovha. Naswona a va fanele va veka marito ya Xikwembu tanihi ‘xikombiso emimombyeni ya vona’—xisweswo minkarhi hinkwayo va ehleketa hi misinya ya milawu leyi nga eMatsalweni ivi va yi tirhisa tanihi xisekelo xa swiboho swa vona. (Vona mavekelo lama tirhisiweke eka Eksoda 13:9, 14-16.) A va fanele va yi ‘tsala etimhandzini ta tindlu ta vona ni le timbantini ta vona’—xisweswo va fungha tindlu ta vona ni miti ya vona tanihi tindhawu leti rito ra Xikwembu a ri xiximiwa ni ku tirhisiwa eka yona. Hi marito man’wana, vutomi bya vona a byi fanele byi nyikela vumbhoni byo tala bya leswaku va rhandza milawu leyo lulama ya Yehovha ya mahanyelo ni ku yi tirhisa. Vona ndlela leyi a swi ta va pfuna ha yona sweswo! Xana Rito ra Xikwembu ri ni ntikelo wo tano evuton’wini bya siku na siku bya vandyangu wa hina? Lexi khomisaka gome, Vayuda va hundzule hinkwaswo leswi swi va mukhuva ntsena, va ambala swibokisana leswi tameleke matsalwa onge hi loko swi ri switshungulo. Vugandzeri bya vona a byi nga ha humi embilwini naswona byi bakanyiwe hi Yehovha.—Esaya 29:13, 14; Matewu 15:7-9.
Vutihlamuleri Bya Lava Va Nga Exikhundleni Xa Vulanguteri
16. Ha yini ku hlaya ka Matsalwa ka nkarhi na nkarhi a ku ri ka nkoka eka Yoxuwa?
16 Malunghana ni ku hlaya Tsalwa, a ku yisiwa nyingiso wo hlawuleka eka lava a va ri valanguteri va tiko. Eka Yoxuwa, Yehovha u te: “U hisekela e ku endla hi nawu hikwawo.” Malunghana ni ku hetisisa vutihlamuleri byebyo, u byeriwe leswi: ‘U fanele u hlaya eka yona nhlikanhi ni vusiku, . . . xisweswo u ta endla ndlela ya wena yi humelela ivi u endla hi vutlharhi.’ (Yoxuwa 1:7, 8, ringanisa NW.) Hi laha swi nga tano eka mulanguteri un’wana ni un’wana wa Mukreste namuntlha, ku hlaya ka Yoxuwa Matsalwa nkarhi na nkarhi a ku ta n’wi pfuna ku vona kahle swileriso swo hambana-hambana leswi Yehovha a swi nyikeke vanhu Vakwe. Yoxuwa a fanele a tlhela a twisisa ndlela leyi Yehovha a tirhisaneke ha yona ni malandza Yakwe ehansi ka swiyimo swo hambana-hambana. Loko a ri karhi a hlaya mhaka ya xikongomelo xa Xikwembu, a swi ri swa nkoka eka yena ku ehleketa hi vutihlamuleri bya yena n’wini malunghana ni xikongomelo xexo.
17. (a) Leswaku tihosi ti ta vuyeriwa eku hlayeni ka Matsalwa hi laha Yehovha a vuleke ha kona, xana a ku laveka yini eku hlayeni ka tona? (b) Ha yini ku hlaya Bibele nkarhi na nkarhi ni ku anakanyisisa ku ri ka nkoka eka vakulu va Vakreste?
17 Yehovha u kongomise leswaku un’wana ni un’wana la nga hosi eka vanhu va Yena, loko a sungula ku fuma kakwe, a a fanele ku endla kopi ya Nawu wa Xikwembu, a tekelela eka kopi leyi hlayisiweke hi vaprista. Kutani a a fanele a “hlaya kona e masiku hikwawo ya ku hanya ka yena.” Xikongomelo xa kona a ku nga ri ku nhlokohata leswi tsariweke kona ntsena. Ku ri na sweswo, a ku ri leswaku a “dyonḍa e ku tšhav̌a Yehova, Šikwembu ša yena,” ni leswaku “mbilu ya yena yi nga ṭhuki yi tikurisa e henhla ka v̌amakwav̌o.” (Deteronoma 17:18-20) Leswi a swi lava leswaku a anakanyisisa hi vuenti hi leswi a a swi dyondza. Tihosi tin’wana a ti ehleketa leswaku ti khomeke ngopfu hi ntirho wa vulawuri lerova a ti nge swi endli sweswo, kutani tiko hinkwaro ri xaniseka hikwalaho ka ku honisa ka tona. Ntirho wa vakulu evandlheni ra Vukreste a hi wona lowuyani wa tihosi. Hambi swi ri tano, hi laha a swi ri ha kona hi tihosi, i swa nkoka leswaku vakulu va hlaya ni ku anakanyisisa hi Rito ra Xikwembu. Loko va endla tano swi ta va pfuna ku va ni langutelo lerinene eka lava va byarhisiweke ku va khathalela. Swi ta tlhela swi va pfuna ku hetisisa ntirho wa vona tanihi vadyondzisi hi ndlela leyi fundzhaka Xikwembu hakunene ivi yi tiyisa Vakreste-kulobye hi tlhelo ra moya.—Tito 1:9; ringanisa Yohane 7:16-18; ringanisa 1 Timotiya 1:6, 7.
18. Xana hi xihi xikombiso lexi vekiweke hi muapostola Pawulo lexi ku hlaya ka nkarhi na nkarhi ni ku dyondza Bibele ku nga hi pfunaka ku xi tekelela?
18 Muapostola Pawulo, mulanguteri wa Mukreste wa lembe-xidzana ro sungula, a ma tiva kahle Matsalwa lama huhuteriweke. Loko a nyikela vumbhoni eka vanhu va le Tesalonika wa khale, a a swi kota ku hlamulana na vona hi laha ku humelelaka hi ku tirhisa Matsalwa ivi a va pfuna ku twisisa nhlamuselo ya kona. (Mintirho 17:1-4) U fikelele timbilu ta vayingiseri lavanene. Xisweswo, vo tala lava n’wi tweke va hundzuke vapfumeri. (1 Vatesalonika 2:13) Hi ku va ni nongonoko wa wena wo hlaya ni ku dyondza Bibele, xana wa swi kota ku hlamulana ni vanhu hi laha ku humelelaka hi Matsalwa? Xana xiphemu xa vutomi bya wena lexi tirhiseriwaka ku hlaya Bibele ni ndlela leyi u ku endlaka ha yona swi nyikela vumbhoni bya leswaku hakunene u tlangela hi wexe leswi vuriwaka hi ku va ni Rito ra Xikwembu? Exihlokweni lexi landzelaka, hi ta kambisisa ndlela leyi nhlamulo leyinene yi nga nyikeriwaka ha yona eka swivutiso leswi hambi ku ri hi lava va tshamaka va khomekile swinene.
Xana U Nga Hlamurisa Ku Yini?
◻ Ha yini vanhu a va tiyimisele ku nghenisa vutomi ni ntshunxeko wa vona ekhombyeni leswaku va hlaya Bibele?
◻ Xana hi pfuneka njhani hi ku pfuxeta malunghiselelo lawa a ma endleriwe Vaisrayele va khale leswaku va twa Rito ra Xikwembu?
◻ Xana hi fanele ku endla yini hi leswi hi swi hlayaka eBibeleni?
◻ Ha yini ku hlaya ka Bibele ni ku anakanyisisa ha yona ku ri ka nkoka ngopfu-ngopfu eka vakulu va Vakreste?
[Xifaniso lexi nga eka tluka 9]
Yehovha u byele Yoxuwa a ku: ‘U fanele u yi hlaya hi laha ku twakalaka nhlikanhi ni vusiku’