Sathana—I Wa Xiviri Ke?

XANA wa tshemba leswaku Sathana u kona? Loko swi ri tano, u tikomba u ri xiphemu xa ntlawa wuntsongo swinene. “Hi va-1980 ku tshemba Diyavulosi ku nyamalarile handle ka le xikarhi ka Makhatoliki lama sihalalaka, vanhu lava nga ni mimoya, Maprotestente lama sihalalaka, Orthodox ya le Vuxeni, Mamoslem—ni vangoma va nga ri vangani.” Ku vula buku leyi nge Mephistopheles—The Devil in the Modern World, hi Jeffrey Burton Russell.

Hambi swi ri tano, a hi un’wana ni un’wana la tshikeke ku tshemba leswaku Sathana i wa xiviri. Eka bulo ra sweswinyana eItaly Phophu John Paul II u te: “Diyavulosi wa ha hanya naswona wa tirha emisaveni.”

Xana phophu u tiyisile? Loko swi ri tano, Sathana u le xiyin’weni lexinene xo endla leswi a swi lavaka emisaveni. Loko vanhu va nga byi tshembi vukona bya yena, va nge n’wi kaneti. A swi hlamarisi leswi Cardinal Ratzinger, mulawuri lonkulu wa dyondzo ya Vatican, a nga te “Diyavulosi a nga tisirhelela hi xitirho xa yena lexi rhandzekaka, lexi nga tiviwiki.”

Xana Sathana u kona hakunene? Loko hi tshemba Bibele, hi fanele hi hlamula hi ku ina! Sathana u vuriwa hi vito minkarhi yo tala eka rhekhodo yoleyo leyi huhuteriweke. Hi xikombiso, mutsari wa Bibele Pawulo, loko a tsundzuxa hi “vaapostola va mavunwa” ni “vatirhi lava xisaka” eswivandleni swa bandlha ra Vukriste, u tsarile a ku: “Kutani a swi hlamarisi, hikuva na yena Sathana, ú tinyika nghohe ya ntsumi ya ku vonakala.” Pawulo u langute Sathana tanihi munhu wo tlhariha, la kanganyisaka.—2 Vakorinto 11:13, 14.

Manuku ke, ha yini vukona bya Sathana byi nga xiyiwi swinene hi vanhu vo tala namuntlha? Kumbexana, i xikombiso xa moya wa nguva leyi. Tanihi leswi hi hanyaka eka leswi van’wana va swi vitanaka nguva ya le ndzhaku ka Vukriste, dyondzo ya leswaku a ku na Xikwembu, dyondzo ya ntsako, rifuwo ni vukhomunisi swi sive ripfumelo ra vukhongeri eka vanhu vo tala. Timiliyoni ta vanhu a ta ha pfumeli eka Xikwembu, ti languta vukona bya xona tanihi lebyi nga riki bya nkoka eka tifilosofi ta vona vini. Naswona va fularhela Sathana, kun’we na Xikwembu. Vanhu van’wana va vukhongeri eVujaganini, hambi leswi va vulaka leswaku va pfumela eka Xikwembu, va vona leswaku ku pfumela eka Sathana a swi pfuni nchumu eka lembe xidzana leri ra vu-20.

Hambi swi ri tano, swi le rivaleni leswaku, ku ala Xikwembu a hi swintshwa. Kwalomu ka malembe ya 3 000 lama hundzeke, Davhida mutlhokovetseri wa Muheveru u tsarile a ku: “Šihunguki ši te e mbilwini ya šona: a ku na Šikwembu! V̌a borile; mitiro ya v̌ona yi ni manyala.” (Psalma 14:1; 53:1) Endhawini yin’wana u te: “Lo’wo biha, e ku tikuriseni ka yena, a ku: ‘A nga ka a nga v̌utisisi; Šikwembu a ši kona, hi kona ku anakanya ka yena hikwako.’” (Psalma 10:4) Hambi ku ri le ndzhaku, vanhu a va endla onge hi loko Xikwembu xi nga ri kona. Naswona makumu lama twalaka ma fanele ma ve leswaku loko Xikwembu xi nga ri kona, Sathana a nge vi kona.

Van’wana Va Ha Tshemba

Hambi swi ri tano, hi laha ana se swi xiyiweke ha kona, van’wana va ha ku amukela ku pfumela eka Diyavulosi wa xiviri. Ku ni lava pfumelaka eka dyondzo ya khale ya Zoroaster ya vukona bya milawu leyi lwisanaka, leyi nge vunene ni vubihi, Xikwembu na Diyavulosi, va fanele minkarhi hinkwayo va ve kona kun’we. Van’wana va vula ni leswaku vunene ni vubihi hinkwaswo i swiphemu swa Xikwembu xa vunharhu-un’we. Naswona ka ha ri na vo tala eVujaganini ni Vuislam lava tshembaka vukona bya Sathana. Hakunene, eka vo tala va lava, wa ha ri kona tanihi munhu wa moya la nga ni timpapa ni timhondzo ni ncila la langutelaka ndhawu leyi ‘mimoya liya yi nga fiki’ leyi averiweke “ndzilo wa tihele,” yi yaka kona ngopfu-ngopfu tanihi leswi a fanisiweke hi mintirho hi mukhavisi wa Mufurwa la dumeke Gustave Doré.

Entiyisweni, eka van’wana, ku pfumela eka Sathana ku ya mahlweni ku tlula kwalaho. Va n’wi gandzela—hi vito kumbe hi mihivani ya vusathana kumbe ya vudemona. Hi magidi ya malembe, vuloyi ni vungoma swi xaxametiwe ni vugandzeri bya Sathana. Hambi ku ri eka nguva ya hina, ya ku kanakana, vugandzeri bya Sathana bya ha ya emahlweni. Hikwalaho, hi nga si vulavula hi leswi Bibele yi swi vulaka hi Sathana hi yexe, a hi xiyeni tinhla tin’wana mayelana ni vugandzeri bya Sathana bya manguva lawa.

[Xifaniso lexi nga eka tluka 3]

Xifaniso xa Mabuddha xa “tihele” ta vusathana