Xana Minkarhi Hinkwayo Ku Ta Va Ni Tinyimpi?

HI JULY 1, 1916, endhawini ya vurimi leyi tsakisaka ya Picardy eN’walungwini wa Furwa, Nyimpi yo Sungula ya Somme yi sungurile. Endzhaku ka minhlaselo leyikulu ya tibomo leti hoxiwaka ni ku hlasela ka le moyeni, mavuthu ya le Britain ni ya le Furwa ya humese lexi ya tshembeke leswaku xi ta va ku hluriwa loku xiyekaka ka mavuthu ya Jarimani lama ngheneke lama kongomaneke na vona. Kambe a ku vanga na ku hlula. Ematshan’wini ya sweswo, hi siku ro sungula, masocha ya le Britain ya 20 000 ma dlayiwile. Loko mavhiki ma ya emahlweni, nyimpi yi ye emahlweni nakambe ku nga vi na ku hlula. Hi October timpfula ta matimba ti hundzule rivala ra nyimpi ri va lwandle ra ndzhope. Exikarhi ka November Allies u engeteleke hi tikhilomitara ta nhungu ntsena. Sweswi, vutomi bya Majarimani ya 450 000, Mafurwa ya 200 000 ni bya Manghezi ya 420 000 a byi lahlekile. Masocha lama tlulaka miliyoni, yo tala ya wona a ya ri majaha, ma lovile enyimpini yoleyo!

Leswi a ko va mhangu ntsena eka nyimpi yo sungula ya misava. Naswona nyimpi yo sungula ya misava a yo va yin’wana ntsena—hambi leswi a yi ri yo biha swinene ku fikela nkarhi wolowo—ya tinyimpi ta ntsandza-vahlayi leti lwiweke evurungurwini hinkwabyo. Oho ku herisiwa ka vutomi bya vanhu ka vuhunguki swonghasi!

Ha yini vanhu va phikelela ku dlayana hi ndlela leyi? Ku ni swivangelo swo tala leswi katsekaka, leswi exikarhi ka swona hi nga boxaka vutianakanyi, ku navela, makwanga, kun’we ni ku navela loko biha ka matimba ni xikhundla. Xivangelo xin’wana xa nyimpi ku ve vutiko. Hakunene, nyimpi yi kombisa ku pakanisa ka nkambisiso wa vurunguri bya vanhu lebyi kumiwaka eBibeleni: “V̌anhu v̌a fuma henhla ka v̌aṅwana ku v̌a endla ŝo biha.”—Eklesiasta 8:9.

Vukhongeri na byona hakanyingi byi hlohlotele nyimpi. Tinyimpi ta nkutsulo ta le Malembeni ya le Xikarhi (Middle Ages) a ti lwiwa hi matiko ya vukhongeri hi xikongomelo lexi vonekaka xa vukhongeri: ku tlherisela Palestina eka Vujagana. Eka tinyimpi ta misava hatimbirhi ta lembe xidzana leri, vafundhisi vo huma eka mintlawa yo hambana-hambana va ringetile ku tirhisa ku titwa ka vukhongeri ka masocha ku ya endla ma navela swinene ku dlaya tintangha ta vona eka tlhelo lerin’wana. Naswona minkwetlembetano yin’wana leyi humelelaka sweswi yi na xivumbeko lexi tiyeke xa vukhongeri.

Vuthala Bya Ntshembo

Xana wu kona ntshembo wa leswaku siku rin’wana tinyimpi ti ta hela? Ina, wu kona. Yesu Kriste u vuriwa “Hosana ya ku Rhula.” Loko a te emisaveni, u hanye hi ku pfumelelana ni vito leri, a dyondzisa vanhu ku rhandza vaakelani va vona tanihi loko va tirhandza. U va byele ni leswaku va rhandza valala va vona. (Esaya 9:6; Matewu 5:44; 22:39) Hikwalaho, lava yingiseke tidyondzo ta yena eka lembe xidzana ro sungula va ve ni xinakulobye xa matiko hinkwawo, xo rhula. A swi nga ehleketiwi eka vona ku tlhontlhelana nyimpi. Hambi swi ri tano, khombo ra kona, ripfumelo leri tengeke ra Vakriste lava vo sungula endzhakunyana ri thyakisiwile. Hi ku famba ka nkarhi, tikereke ti tihlanganise ni tipolitiki naswona mavoko ya vona ma tele hi ngati ya tinyimpi ta matiko.

Endzhaku ka nkarhi wo leha, moya wa ku cinca wu sungule ku hunga eYuropa. Swi tikombe onge vanhu a va sungula ku karhala hi ku lwa loku nga heriki. Hi 1899 naswona nakambe hi 1907, mintsombano ya matiko hinkwawo yi khomiwile eHague, Netherlands. Entsombanweni wa 1899, ku amukeriwile ntwanano wa “Ku Lulamisiwa Ko Rhula Ka Madzolonga Ya Matiko Hinkwawo.” Kutani loko lembe xidzana ra vu-20 ri sungula, vo tala a va tshemba leswaku misava hakantsongo-ntsongo yi ta antswisa mboyamelo wa yona wa ku pfuxa nyimpi. Hambi swi ri tano, mintshembo yo tano yi herisiwile hi swibamu swa nyimpi yo sungula ya misava. Xana leswi a swi vula leswaku ntshembo wa vanhu wa ku rhula a wu nge hetiseki ke?