Xiviko Xa Vahuweleri Va Mfumo

Yehova U Katekisa Ku Phikelela

TIMBHONI TA YEHOVA ti na rirhandzu leri enteke ra Yehova Xikwembu ni vutihlamuleri eka munhu-kulobye, leswi va susumetelaka ku ringeta ku nyika un’wana ni un’wana nkarhi wo twa mahungu lamanene ya Mfumo wa Xikwembu. (Matewu 24:14) Hi yona mhaka leyi makwerhu wa xisati a a tiyimisele ku chumayela masocha ni mindyangu ya vona egoveleni ra masocha ensin’wini ya ka vona.

Nkarhi wun’wana ni wun’wana loko a ringeta, a a aleriwa ku nghena hi mulanguteri la tihlamulelaka. Wa hlamusela a ku: “Kutani ndzi kunguhate ku vonana ni mutirhela-mfumo la lawulaka, ndhuna-nkulu. Loko ndzi bele matsalana wa yena riqingho, u arile ku ndzi hlanganisa ni ndhuna-nkulu. Ndzi kunguhate ku endzela ndhuna-nkulu ekaya ra yena, hikuva a a tshama kule ni govela. Loko ndzi yile, u ndzi vutise laha a ndzi huma kona. Nkateko wa kona, ndzi tswaleriwe eka xihlala-nkulu lexintsongo eFiji. Hi ku xixima u yingisele xikombelo xa mina kutani a vula leswaku u twile hi ta Timbhoni ta Yehova kambe a nga si tshama a twa ntirho wa hina wu hlamuseriwa eka yena. Swi ndzi nyike nkarhi lowunene swinene wa ku veka vumbhoni eka yena, naswona u amukele swipfuneto swinharhu swo dyondza Bibele eka mina. U ndzi byele leswaku ndzi va ehofisini ya yena egoveleni hi 9:00 a.m. hi Ravumbirhi la landzelaka. Loko mina na makwerhu un’wana wa xisati hi fika, varindzi ana se a va tivisiwile hi ku endza ka hina kutani va hi byela leswaku hi nyikiwe mpfumelelo wo chumayela egoveleni. Ndhuna ya varindzi yi te: ‘Sweswi ndzi tivisa vatirhela-mfumo hinkwavo leswaku hi Ravuntlhanu tinyangwa hinkwato ti fanele ku pfuleriwa n’wina, naswona hambi leswi hinkwerhu ka hina hi nga na vukhongeri byo hambana, bya n’wina byi nga ha va byona lebyi twarisaka xitsundzuxo xa Mfumo wa matilo ni ku hela ka misava.’

“Loko hi fika hi Ravuntlhanu,” u ya emahlweni, “movha wa masocha lowu nga ni xikurisa-mpfumawulo wu tsemakanye govela wu tivisa wu ku: ‘Vavasati vambirhi lava dyuhaleke va ta va va ri egoveleni va twarisa xitsundzuxo eka n’wina, kutani mi komberiwa ku pfula tinyangwa ta n’wina mi va yingisa. Tshikani ku kanetana na vona kumbe ku va ni rivengo.’ Hi tirhe govela ku sukela hi 8:30 a.m. ku ya eka 5:00 p.m., hi fambisa tibuku ta 100 ni timagazini ta 200. Vuyelo byi ve byihi? Maendzo yo tala yo vuyela ma endliwile naswona tidyondzo to tala ta Bibele ti sunguriwile.”

Ku suka eka xihlala xin’wana eSouth Pacific lexi a xa ha ku pfuleriwa ntirho wa ku chumayela hi maphayona yo hlawuleka ku ta ntokoto lowu tsakisaka. Maphayona lawa yo hlawuleka ya kanetiwa hi varhangeri va United Church. Hi nkarhi wa ku endza ka mulanguteri wa xifundza, va nonon’hweriwile hi ku endla riendzo ro vuyela, tanihi leswi hosi ya muti, leyi kuceteriweke hi varhangeri va kereke, yi aleke ku pfumelela Timbhoni ta Yehova ku nghena emutini lowu. Loko va fika, hosi a yi nga ri kona, kutani munhu la tsakelaka u vitaniwile kutani vumbhoni lebyinene byi nyikeriwile. Loko va suka, xikepe lexikulu xi voniwe xi ri karhi xi tshinela, naswona swi le rivaleni leswaku a xi ri na xiphiqo xa njhini, tanihi leswi vanhu a va ri karhi va hlambela. Ina, a ku ri hosi ya muti leyi a yi hlwerile ku ta yimisa riendzo ro vuyela. Loko ya tlhelela ekaya, maphayona ma byele mulanguteri wa xifundza hi Pidgin English ya ku: “Me fella thinkim might angel now breakim engine belong him.”

Kutani Yehova u katekise ku phikelela ka vamakwerhu lava eku yingiseni ka xileriso xa yena xo chumayela “Evangeli leyi ya Mfumo.”