Xiviko Xa Vahuweleri Va Mfumo

Xikwembu A Xi Yi Hi Nghohe

MALEMBE yo tlula 1 900 lama hundzeke, muapostola Petro u nyikele vumbhoni eka ndhuna ya nyimpi Korneliyo, a ku: “Ndza twisisa swinene sweswi leswaku Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” (Mintirho 10:34, 35) Korneliyo u kombise ku chava Xikwembu ni rirhandzu ra leswo lulama. U amukele vumbhoni lebyi nyikeriweke hi Petro, kutani a va Mukreste.

Nsinya wa nawu lowu fanaka wu tikomba wu ri ntiyiso ni namuntlha—Xikwembu a xi yi hi nghohe. Hi vona leswi entokotweni lowu humaka le Jarimani. Xiviko xi ri:

“Ensin’wini ya vandlha ra hina, ku ni govela lerikulu ra mavuthu ya Marhaxiya. Hi 1989, endzhakunyana ka loko Khumbi ra le Berlin ri wile, vakulu va vutise loko ku ri na muhuweleri la tivaka ku vulavula ririmi ra Xirhaxiya. Van’wana va hina a hi swi kota, kutani hi yile hi ya tirha ensin’wini leyi, laha vuyelo bya kona a byi tsakisa swinene. Hi lowu wun’wana wa mintokoto leyo tala.

“A ndzi ri na muhuweleri la nga khuvuriwangiki (loyi sweswi a khuvuriweke) loko ndzi vulavula ni ndhuna ya nyimpi. Ndhuna yi yingisele leswi a hi lava ku swi vula kutani yi hi rhamba leswaku hi ya vulavula ni masocha ya yona. Yi vule leswaku na vona va fanele ku twa hi ta Xikwembu na Bibele, kutani hi tshembise ku tlhela hi vuya.

“Hi kombele makwerhu wa xisati la kotaka ku vulavula Xirhaxiya hi ku rhelela leswaku a ya hi tolokela. Ekamareni leri va hlanganelaka eka rona kwale govelweni ra masocha, hi lunghisele tafula ra tibuku naswona hi kote ku vulavula ni masocha ya 68 ni ku hlamula swivutiso swa wona. Endzhaku ka swona va amukele tibuku ta 35 ni timagazini ta kwalomu ka 100 hi ntsako. Loko hi huma ekamareni ro hlanganela eka rona, hi vone mintlawa leyitsongo yi ri karhi yi burisana hi tibuku ta hina.

“Hi tshembise ku tlhela hi vuya hi July 4, 1992. Loko hi fika hi 10:50 ni mixo, murindzi wa nyangwa ya govela ra masovha u hi byele leswaku masocha a ma hi rindzerile. Ndhuna-nkulu yi hi nghenise ekamareni ro hlanganyela eka rona, kutani hi kume leswaku wansati, loyi eku sunguleni a amukeleke tibuku ta hina leswaku a ta ti yisa elayiburari ya yena, u tivise ta ku ta ka hina hi ku namarheta makhadi ya switiviso egoveleni. Vamakwerhu vanharhu va nyikele tinkulumo to koma hi ntirho wa hina wa misava hinkwayo naswona va kombise leswaku ha yini hi nga tiyisekaka hi Bibele. Kutani hi amukele swivutiso swa vayingiseri, hi hlamula hi ku tirhisa Bibele. Exikarhi ka swivutiso swa kona a ku ri ni lexi nge, Hi xihi xiyimo xa Timbhoni ta Yehovha entirhweni wa nyimpi, naswona xana va kona lava nga masocha exikarhi ka tona? Leswi swi nyike muhuweleri la nga khuvuriwangiki loyi a ndzi heleketeke enkarhini lowu nga hundza nkarhi wo hlamusela ntirho-vutomi wa yena wa malembe ya 25 evuthwini ra Jarimani Vuxa, laha a heteke malembe yo hetelela tanihi murhangeri wa vuthu ra le moyeni. U hlamusele ndlela leyi a dyondzeke hi Xikwembu na hi Bibele ha yona ni leswaku a a lava ku va un’wana wa Timbhoni ta Yehovha. Masocha ma tsakisiwe hi leswi ma swi tweke. Ku nga si hela timinete ta nkombo tibuku hinkwato leti hi teke na tona a ti ri emavokweni ya masocha, naswona vo tala a va lava Tibibele. Hi kote ku kuma Tibibele ta Xirhaxiya ta nkombo exitolo xo xavisa tibuku, leti va ti amukeleke hi ku tsaka. Ku vile ntsako wa xiviri ku nyika vanhu lava va nga ni ndlala ya moya marungula ya Bibele, naswona ha tshemba leswaku va ta ma tirhisa.”

Hakunene, Xikwembu a xi yi hi nghohe. Hi ku tirhisa Rito ra xona xi khutaza vanhu va timbilu letinene ku nga khathariseki leswaku i vamani naswona va le kwihi. Xi va rhamba leswaku va dyondza ha xona ni N’wana wa xona, Yesu Kreste naswona vo tala lava humaka eswiyin’weni hinkwaswo swa vutomi va endla tano.—Yohane 17:3.