Vululami Bya Xikwembu—Xivangelo Xa Ntsako!

“TANANI mi yimbelela na hina . . . ‘Yehova wa fuma; misava a yi tsake.’” Marito lama a ya ri xiphemu xa risimu emilon’wini ya kwalomu ka 9 000 wa vapfhumba lava vulavulaka Xiarab, Xigriki, Xintariyana, Xiputukezi ni Xipaniya eNtsombanweni wa Muganga wa “Vululami Bya Xikwembu” eMontreal, Canada. Vatsombani va khitikanele erivaleni ra Olympic Stadium eminkarhini yo hetelela ya ntsombano lowu wa masiku ya mune ku hlanganyela eku yimbeleleni kun’we ni vapfhumba va 36 900 lava ana se a va ri exitediyamu.

Mintlawa leyin’wana ya tindzimi a yi ri kona enongonokweni wa ntsombano lowu fanaka etimbaleni ta le kusuhi ni le tindlwini ta mintlangu. Sweswi va tihlanganise ni vatsombani lava vulavulaka Xifurwa ni Xinghezi eku kombiseni ka vumakwerhu ni ku tshembeka leswi nyanyulaka—nchumu lowu nga xiyiwaka ntsena exikarhi ka malandza ya Xikwembu xa vululami bya ntiyiso, Yehova. Hikwalaho ka vuhomboloki lebyi hangalakeke emisaveni ya manguva lawa, nhloko-mhaka ya ntsombano—“Vululami Bya Xikwembu”—a yi ri enkarhini hakunene. Loko yi nghenisiwe enongonokweni hinkwawo, nhloko-mhaka leyi yi pfuxe ku tlangela ka hina ka mfanelo leyi yikulu ya Yehova Xikwembu.

‘Ku Katekile Lava Hlayisaka Vululami’

Leyi a ku ri nhloko-mhaka ya siku ro sungula ra ntsombano. (Psalma 106:3) Nkulumo ya mutshami wa xitulu ya ku hoyozela yi swi veke erivaleni leswaku vululami bya Xikwembu a ko va ku tirhisiwa loku nga nyawuriki loku nga enawini ka endlelo ra vuavanyisi. Ematshan’wini ya sweswo, i ku hlayisiwa ka leswi lulameke hi ndlela ya ku nga yi hi nghohe ni leyinene eka mimpimanyeto ya Xikwembu. Yehova u veka mimpimanyeto ya le henhla swinene naswona u hetisekile eka vululami hikuva u namarhela yona leyi. Hikwalaho, swi nga vuriwa leswaku “tindlela hikwato ta yena ti lulamile.”—Deuteronoma 32:4.

Leswi swi ye emahlweni swi kandziyisiwa eka nkulumo-nkulu, leyi nge “Vululami Byi Fungha Tindlela Ta Xikwembu Hinkwato.” Yehova a nga si tshama a hambuka eka mimpimanyeto ya yena yo lulama kambe u tirhise tindlela leti fanaka to lulama eku tirhisaneni ni vanhu hinkwavo lava nga hetisekangiki. (Malakia 3:6) Hambi leswi van’wana va nga ha lumbetaka Xikwembu hi ku hoxisa hi vuhomboloki hikwalaho ka leswi va vonaka ku pfumaleka lokukulu ka vululami evanhwini, a xi tihlamuleri hi ku hambuka ka vanhu lava hombolokeke.

Tanihi leswi Yehova a nga murhandzi wa vululami, u langutela leswaku hi tirhisa mfanelo leyi hi ku endla leswi lulameke ni leswinene. Hi fanele ku endla leswi eka vanhu-kulorhi ni le mindyangwini ya hina, ebandlheni ni le swivandleni hinkwaswo swa vugandzeri bya hina. Leswi swi tisa minkateko leyi fuweke, hi laha swi nga voniwaka ha kona eka leswi swi nyikeriweke enongonokweni hi nkarhi wa masiku manharhu lama saleke ya Ntsombano wa Muganga wa “Vululami Bya Xikwembu.”

‘Amukela Dyondzo Leyi Nyikaka Vutlhari’

Siku ravumbirhi ra ntsombano a ri ri na nhloko-mhaka leyi nga laha henhla, leyi sekeriweke eka Swivuriso 1:3. Hi khutaziwe ku “Amukela Ndzayo Kutani [Hi] Tlhariha,” yoleyo yi ve nhloko-mhaka ya xiphemu xo sungula xa nongonoko. Ndzayo leyi humaka eka Yehova yi fungha ndlela ya vutomi leyi katsaka ku basisiwa ka swivandla swa hina swa mianakanyo ni xivumbeko xa mahanyelo. Nakambe i xikombiso xa rirhandzu ra Xikwembu eka hina. (Vaheveru 12:4-11) Ndzayo yo tano yi hi hlayisa hi phaphamele mimpimanyeto leyi tlakukeke ya vululami—vululami bya Xikwembu.

Marito lama manene ya landzeriwe hi nkulumo leyi nge “Tengani eMianakanyweni Ni Le Mirini.” A yi nyanyula swonghasi! Yi kandziyise xilaveko xo tinyiketa eka Xikwembu tanihi vanhu lava tengeke, lava baseke ni ku kwetsima eka hina. Ha yini? Hikuva Yehova u basile ni ku kwetsima hi laha ku hlawulekeke—xiyimo lexi n’wi hlawulaka eka swikwembu hinkwaswo leswi thyakeke swa matiko. Loko a tsundzuka nkulumo leyi, makwerhu un’wana lontshwa u xiyile a ku: “Xin’wana ni xin’wana mayelana ni ku basa ka hina ka mianakanyo, mahanyelo, miri ni moya swi kambisisiwile. Maambalelo, ku tilunghisa, kaya, movha ni vumunhu hinkwaswo swi nyikiwe nyingiso.” Nkulu u xiyile a ku: “Ku tirhisa ndzayo yo tano swi ta endla leswaku vamakwerhu va hlawuleka swinene ku tlula rini na rini eka vanhu lava va va rhendzeleke naswona swi ta nyikela rihanyo ra mpimo wo karhi leri nga tiviwiki hi misava hinkwayo.”

Drama ya manguva lawa leyi nge “Ku Fungheriwa Ku Hlayiseka” yi engetele ku vona xihatla xo karhi enongonokweni, hikuva vululami bya Xikwembu byi fanele ku hetisisiwa ku nga ri khale. Nkulumo leyi yi khumbaka yi kombise hi matimba leswaku i swa xihatla eka hinkwavo ku pfula mahlo ya vona eka ntikelo wa minkarhi ya hina. Hakunene, loko vukhongeri bya mavunwa byi nga si herisiwa, hi fanele ku tsutsumela endhawini ya vuchavelo ivi hi fungheriwa ku pona hi laha ku heleleke.

Hi ndzhenga, nxaxamelo wa swivulavuri wu seketele xilaveko xa “Ku Laya Hi Vululami eNdyangwini.” Vavanuna kun’we na vatatana va tsundzuxiwe ku va ni nongonoko wa moya ekaya, va va xikombiso eka xikhongelo, ku dyondza ni le ntirhweni wo hlawuleka. Timfanelo ta vununa eka tatana ni ndlela leyi a tamelaka vunhloko ha yona byi na vuyelo lebyi dyondzisaka eka langutelo ra n’wana ra matimba, ya Xikwembu ni ya vanhu. Hikwalaho, vatatana va Vukriste va fanele va nga yi hi nghohe ni ku phikelela eku layeni ka vona. Va fanele ku kombisa ntwelo-vusiwana ni rirhandzu, xisweswo va hlayisa tindlela to vulavurisana ti pfulekile ni vana va vona.

Vatswari va khutaziwe ku twananisa vuleteri bya vona ni vana. I swa nkoka ku nyika vana vutlhari hi ku xiya ndlela yo dyondzisa ni leswi a faneleke ku swi dyondzisa leswaku a ta fikelela timbilu ta vona. Xikongomelo i ku endla leswaku ntiyiso wu kucetela ndyangu hinkwawo hi ndlela leyi tengeke.

Xivulavuri xo hetelela enxaxamelweni xi endle xikombelo lexi kufumelaka eka vana leswaku va endla leswi Yehova a swi languteleke eka vona elunghiselelweni ra ndyangu. Vantshwa va khutaziwe ku papalata moya wa ku xandzuka wa vandla ra namuntlha ra vutilawuri ni ku tsakela ndzayo leyi nyikaka vutlhari.

Eka switsundzuxo leswi sekeriweke eka Swivuriso 2:1-9, vatsombani va khutaziwe ku ‘Hambeta Va Handzisisa Ku Fana Ni Rifuwo Leri Fihliweke.’ Ku kombisiwe leswaku rifuwo ra moya ri nga kumiwa hi ku dyondza ni ku kambisisa hi ku chivirika. Loko xi vulavula hi nhloko-mhaka leyi nge “Tshemba Yehova Leswaku U Kuma Vutlhari,” xivulavuri lexi landzelaka xi hlamusele leswaku vutlhari i vuswikoti byo twisisa xiyimo, ku vona leswi tlulaka leswi nga erivaleni ni ku twisisa xilo xo karhi. (Matewu 13:13-15; Varhoma 3:11; Vaefesa 5:17) Siku leri leri nyanyulaka manuku ri fike emaninginingini loko Olympic Stadium xi hlanganisiwe hi riqingho ni madoroba-nkulu man’wana yo tala eCanada ni le United States. Nxaxamelo wa swiphemu swimbirhi, wu kandziyisiwe hi ku humesiwa ka buku ya tivholumo timbirhi leyi nge Insight on the Scriptures, leyi nga ni matluka yo tlula 2 500 lama nga ni tinhlokomhaka leti dyondzisaka ni swikombiso leswi nga ta entisa ku tlangela ka hina ka timhaka ta moya.

“Ku Avanyisa Ka Xona I Ka Ntiyiso, Ku Lulamile”

Hi siku ravunharhu, leri a ri ri na nhloko-mhaka leyi leyi sekeriweke eka Nhlavutelo 19:2, a ku ri na swo tala swa ku hi tsakisa. Nkulumo leyi nge “Ku Tenga Ka Mahanyelo I Vuxongi Bya Vantshwa” yi endle xikombelo xa matimba eka vantshwa. Va khutaziwe ku tlangela ku saseka loku yelanaka ni ku hlayisa mimpimanyeto ya Xikwembu ya ku basa ka miri, ka mahanyelo ni ka moya. Tinsimu leti khutazaka rimbewu, minongonoko leyi thyakeke ya thelevhixini, tibayiskopo ni tibuku ta swifaniso leswi nga ambalangiki ni ntshikilelo wa tintangha lowu hambetaka wu hlasela vantshwa va Vukriste. Hi ku ya hi xihlovo xin’wana, i muntshwa wo hlawuleka ntsena la nga vangiki ni vuxaka bya rimbewu bya le mahlweni ka vukati emalembeni ya 19 hi vukhale. Kambe vayingiseri va be mavoko hi ku tsaka loko xivulavuri xi nkhense magidi ya Timbhoni letintshwa leti ti tikombisaka ti ri leti hlawulekeke hi ku hlayisa mpimanyeto wa le henhla wa ku lulama. Vukati bya vanhu lavantshwa byi tele hi swiphiqo, naswona swi kombisiwile leswaku marito ya Pawulo mayelana ni ku teka hikwalaho ka ku “hisiwa hi ku navela” a ma kongomisiwanga eka vana va kondlo-a-ndzi-dyi kambe eka lava ‘va hundzeke vuxongi bya vuntshwa.’—1 Vakorinto 7:9, 36.

“Mi Nga Tihlanganisi Ni Lava Nga Pfumeriki” a ku ri nhloko-mhaka leyi landzelaka. Ku yingisa nawu wa Xikwembu wa ku teka ‘eHosini ntsena’ swi hi ponisa eka vuyelo lebyi vavisaka. (1 Vakorinto 7:39) Ku tlula kwalaho, ku hava lexi tiyisaka vukati swinene ku tlula ku tinyiketa kun’we eka Yehova ni ku namarhela mimpimanyeto ya yena yo lulama. Endzhakunyana hi pfuniwe ku vona ndlela leyi a hi fanele “Ku Endla Hi Ku Xixima Na Hi Ku Chava Xikwembu” ha yona.

Manuku ku te yinhla leyi nyanyulaka swinene—nkulumo leyi nge “Nkhuvulo Lowu Yisaka Eku Avanyisiweni Lokunene,” leyi landzeriweke hi ku nyuperisiwa ka vanhu lava ha ku tinyiketelaka. Ku kandziyisiwe leswaku a ku languteriwe leswi engetelekeke eka vona ku tlula ku susa thyaka ra miri ntsena. Ku tisola, ku hundzuka ni ntirho wo hlawuleka wa vutomi hinkwabyo swi fanele ku fambisana ni ku tinyiketa ni nkhuvulo wa vona loko va ta tsakela ku avanyisa lokunene ka Yehova.

Nongonoko wa nindzhenga a wu tsundzukeka hakunene. Nakambe hi ku hlanganisiwa ka riqingho, swirho swa Huvo leyi Fumaka ya Timbhoni ta Yehova swi nyanyule vayingiseri eAmerika N’walungu hi rungula leri nyanyulaka ra nxaxamelo lowu nge “Nkarhi Lowu Vekiweke Wu Kusuhi.” Hi makume ya malembe, Timbhoni leti totiweke ta Yehova ti twarise marungula ya ku avanyisa ka Xikwembu ehenhla ka Babilona Lonkulu, mfumo wa misava wa vukhongeri byo hemba. Hambi swi ri tano, eka ntsombano lowu, marungula lawa ya ve ya ntikelo swinene. Babilona Lonkulu u ve ni nandzu wa ku tlula milawu ya Yehova leyo lulama. U faneriwa hi ndzoviso, hikuva “swidyoho swa yena swi tlhandlekenele ku ya fika ehenhla etilweni, kutani Xikwembu xi tsundzukile ku homboloka ka yena.” Xisweswo, hi laha ntsumi ya Yehova yi twarisaka ha kona, “mintungu hinkwayo yi ta n’wi wela ehenhla hi siku rin’we, a kuma mavabyi yo chavisa, ni mahlomulo, ni ku sika, kutani u ta hisiwa hi ndzilo, hikuva [Yehova] Xikwembu, muavanyisi wa yena, u ni matimba lamakulu.”—Nhlavutelo 18:5, 8.

Loko xi vulavula ehenhla ka nhloko-mhaka leyi nge “‘Muoswi’ Lowo Biha—Ku Wa Ni Ku Lovisiwa Ka Yena,” xivulavuri xo hetelela xa nxaxamelo lowu xi kokele nyingiso eku chaputeni loku hlamarisaka ka Nhlavutelo. Ku chaputa loku ku fikeleriwa hi vukati bya Xinyimpfana, lexi xi hlanganaka ni mutekiwa wa xona, muti lowo kwetsima, eku katekiseni ka vanhu hi vutomi lebyi nga heriki. Vito ra Yehova ra hlawulekisiwa! Nxaxamelo wu hetelele hi mhaka leyi nyanyulaka ya leswaku nkarhi lowu vekiweke wu le kusuhi ku tlula ndlela leyi hi nga ha ehleketaka ha yona! Hakunene, ku chaputa loku hlamarisaka ka Nhlavutelo ku tshinele!

Loko vayingisi va ha ba mavoko, ku humelele buku yintshwa ya matluka ya 320 leyi nge Nhlavutelo—Ku Chaputa Ka Yona Loku Hlamarisaka Ku Tshinele! Mawaku xivangelo xo tsakisa swonghasi! Buku leyi hakunene yi ta va xitirho lexi humelelaka xa ku huwelela leswaku Babilona Lonkulu a avanyisiwile, leswaku sweswi matiko ma kongomane ni Armagedoni, ni leswaku Yehova u le kusuhi ni ku tisa ku avanyisa. Hinkwavo lava tlangelaka a va hlamule xirhambo xa “Moya ni Mutekiwa” xa ku ‘ta’ ematini ya vutomi. (Nhlavutelo 21:2, 9; 22:17) Buku leyi yintshwa leyi nyanyulaka leyi kandziyisiweke yi landzeriwe hi xivangelo xin’wana xa ntsako. Hi ku tiyimisela loku tsakisaka, vayingiseri lava tsombaneke handle ko kanakana va amukele xiboho lexi twalaka kahle ni lexi tiyeke lexi hlamuselaka ku papalata ka hina Babilona Lonkulu.

‘U Ta Lavisisa Ku Lulama’

Leyi sekeriweke eka Deuteronoma 16:20, leyi a ku ri nhloko-mhaka ya siku ro hetelela. Swivulavuri swa nimixo swi kandziyise yinhla ya leswaku ku pfuneka eka vululami bya Xikwembu, hi fanele hi va lava hambaneke ni misava. Xiya nkulumo leyi nge “Ku Hlayisa Ku Tenga Ka Moya eMisaveni Leyi Vabyaka.” Yi kombise ndlela leyi hi nga papalataka ku thyakisiwa hi misava leyi thyakeke emoyeni hi ku tihlayisa eka ku tsana ka nyama, nkucetelo wa misava ni “mano layo biha ya Diyavulosi.” (Vaefesa 6:11, 12; Varhoma 7:21-25; 1 Yohane 2:15-17) Nkulumo leyi nge “Xana Ripfumelo Ra Wena Ri Avanyisa Misava?” yi kombise leswaku loko hi ri na ripfumelo leri fanaka ni leriya ra Nowa, hi ta hlawuleka hi ri lava hambaneke ni misava. Esikwini ra Nowa, a ku ri ni ku hambana loku xiyekaka exikarhi ka vaponi va Ndhambi ni lava va loveke. Mhaka leyi i ntiyiso ni namuntlha.

Yinhla leyi ya nkoka yi kandziyisiwe edrameni ya Bibele leyi nge “Ku Avanyisa Ka Yehova Eka Vanhu Lavo Biha.” Yi fanise kahle vanhu lavo biha emasikwini ya Nowa na Lota ni lava va hanyaka enkarhini wa hina. Nowa na Lota va tikombe va ri lava hambaneke swinene, naswona ripfumelo ra vona ri avanyise vanhu lava a va hanya na vona. Xana hina hi hexe hi vonaka hi ri lava hambaneke eka vanhu namuntlha lava va khomekeke swinene hi swilo leswi vonekaka ni lava va nga varhandzi va leswo biha ke?

Nkulumo ya le rivaleni leyi nge, “Vululami Eka Hinkwavo Hi Muavanyisi Wa Xikwembu La Hlawuriweke,” a ku ri nkambisiso lowukulu wa nkulumo ya muapostola Pawulo eka vanhu va Athena eAreyopago kumbe Xitsunga xa Mars. Tanihi leswi hi rhendzeriweke hi vuhomboloki ni vukhongeri byo hemba, marito ya muapostola ya ni nhlamuselo leyikulu eka hina. Ngopfu-ngopfu hi ni xivangelo xo tsaka hikuva hi hanya enkarhini wa nkoka swinene wa ku avanyisa laha hi nga tekaka goza ra ku va lava amukeriwaka hi Xikwembu. Ina, hi laha Pawulo a vuleke ha kona, swikongomelo swa Yehova “swa ku avanyisa misava hi ku lulama hi wanuna [Yesu Kriste] loyi a n’wi hlawuleke, kutani u kombisile vanhu hinkwavo ku tiya ka mhaka leyi hi ku n’wi pfuxa exikarhi ka vafi.”—Mintirho 17:31, NW.

Loko nongonoko wu tshinelela makumu, hi khutaziwe ku ‘Hambeta Hi Landzelela Vululami Loko Makumu Ma Tshinela.’ Ntsombano lowu lowu fuweke wa masiku ya mune wu hi endle hi tiyimisela ku endla tano. Nongonoko nakambe wu hi nyanyule hi xivono xa vumakwerhu bya hina bya misava hinkwayo. Hi xikombiso, a swi nyanyula swonghasi ku yingisa varhumiwa lava endzeke lava a va ri karhi va tirha hi ku tshembeka eswiavelweni swa vona hi malembe layo tala!

Hi suke entsombanweni hi ri ni ku tiyimisela loku pfuxetiweke ko tshama hi hambanile ni misava leyi ni ku tihlayisa hi basile emoyeni, emahanyelweni, emianakanyweni ni le mirini. Loko hi ri karhi hi hlangana hi ku twanana hi risimu ro pfala, a hi tsakile ku yimbelela ku dzunisa ka Yehova, hi tlangela leswi vululami bya Xikwembu byi hi nyikaka xivangelo lexikulu xo tsaka.

Eka mintsombano leyi tlulaka 125 eUnited States ni le Canada ntsena, 1 440 932 a va ri kona naswona 19 878 va khuvuriwile

[Swifaniso leswi nga eka tluka 26]

1, 2. Buku leyi nge Insight on the Scriptures na leyi nge Nhlavutelo—Ku Chaputa Ka Yona Loku Hlamarisaka Ku Tshinele! ti ri karhi ti humesiwa eYankee Stadium, New York City, hi swirho swa Huvo leyi Fumaka J. E. Barr na W. L. Barry

3, 4. Swivono leswi humaka eka drama ya Bibele leyi nge “Ku Avanyisa Ka Yehova Eka Vanhu Lavo Biha”

5. Magidi ma khuvuriwile ku kombisa ku tinyiketela ka wona eka Yehova Xikwembu

6. Xivono lexi humaka eka drama ya manguva lawa leyi nge “Ku Fungheriwa Ku Pona”

7. Varhumiwa lava endzeke, vo tanihi John Cutforth wa Papua New Guinea, va avelane mintokoto ya vona ni vatsombani