Ndlela Yo Tiva Vatirheli Va Ntiyiso Va Xikwembu

SWI humelele hi 1948. Vatirheli vambirhi, Timbhoni ta Yehova, a va famba hi bazi leri hlakaleke epatwini leri onhakeke, va suka edorobeni leri nga en’walungwini wa Spain va kongoma eTintshaveni ta Pyrenees. A va ri eriendzweni ra vona ku endzela mutirheli loyi a nga swakwe. Loko bazi ri yimile endhawini leyi nga ekusuhi ni muti lowu mutirheli loyi a a tshama kona, va n’wi vone a va yimerile ni mbhongolo ya yena. Kambe va tlhele va vona ntlawa lowu nga tolovelekangiki ekusuhana—Varindzi Va Tiko va mune lava hlomeke kahle ni muprista! Loko vatirheli lava va ri karhi va gonya ndlela leyi khandziyaka va kongoma emutini, un’wana wa Valanguteri u humese xibamu xa yena ivi a huwelela a ku, “Manos arriba!” (Mavoko ehenhla!) Vaendzi va khomiwile. Hikwalaho ka yini? Muprista u byele valanguteri leswaku vaendzi lava a va ri matherorisi—vunwa lebyi nyenyetsaka! Hikwalaho, vatirheli vanharhu hinkwavo va nghenisiwe ekhotsweni.

Xana leswi swi kombisa yini ke? Leswaku a hi hinkwavo lava tivulaka vaprista kumbe vatirheli lava ku nga vatirheli va ntiyiso va Xikwembu. Entiyisweni, hakanyingi ku ni ku hambana lokukulu exikarhi ka vatirheli va ntiyiso ni va mavunwa. Xana i swilaveko swihi swa xisekelo swa vatirheli va ntiyiso?

Swilaveko Swa Vatirheli Va Ntiyiso

Nhlamuselo ya xisekelo ya “ku tirhela” i “ku nyikela mpfuno kumbe ntirho.” Vatirheli va ntiyiso va Vukriste va fanele va va ni ripfumelo leri tiyeke ra leswaku Bibele i Rito ra Xikwembu leri huhuteriweke. (Yohane 17:17) Hambi swi ri tano, xilaveko xexo xa xisekelo a xi anelanga. Va fanele ku tlhela va va ni vutivi ni ku twisisa lokunene ka Bibele. Kambe a va fanelanga va tirhisa vutivi byebyo hi vutianakanyi—leswaku va pfuneka va ri voxe. Va fanele ku tlhela va va vachumayeri lava gingiritekaka va Evangeli—mahungu lamanene mayelana ni Mfumo wa Xikwembu ni ntshembo wa vutomi lebyi nga heriki emisaveni ya paradeyisi.—Yohane 17:3; Psalma 37:11, 29.

Kunene, mhaka ya leswaku Timbhoni ta Yehova ti le ku chumayeleni ka mahungu lamanene ya Mfumo ku nga ri eSpain ntsena kambe emisaveni hinkwayo yi hetisisa leswi Yesu a swi profeteleke nkarhi wa makumu ya mafambiselo lawa ya khale yo biha ya swilo. U te: “Kutani Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:14, 33, 34.

Xilaveko xin’wana xa xisekelo xa vatirheli va ntiyiso i xa leswaku, hi laha Yesu a vuleke ha kona, va fanele ku ka va ‘nga vi xiphemu xa misava’; hikwalaho, va fanele ku tintshunxa eka tipolitiki. (Yohane 15:19) Va fanele ku tlhela va titsongahata swinene, va va ni rirhandzu ni musa, minkarhi hinkwayo va tiyimisele ku pfuna vanhu lava fanelekaka lava nga ni xilaveko.—1 Vakorinto 13:1, 4; 1 Petro 5:6.

Leyi i mhaka ya nkoka swinene. Ku hambanisa exikarhi ka vatirheli va ntiyiso ni va mavunwa i mhaka ya vutomi ni rifu. I swa nkoka wo tano! Eka Nkulumo ya yena leyi dumeke ya le Ntshaveni, Yesu u tsundzuxile a ku: “Tivoneleni eka vaprofeta va mavunwa lava taka ka n’wina va ambale tanihi tinyimpfu, kasi etimbilwini ta vona, i timhisi leti bvanyengetaka.”—Matewu 7:15.

Hambi swi ri tano, vatirheli va ntiyiso va Xikwembu a vo va ni mintirho ni swilaveko ntsena kambe va tlhela va va ni malunghelo yo tala. Entiyisweni, tanihi ntlawa, i ntlawa lowu katekeke swinene, lowu humelelaka swinene, naswona lowu tsakeke swinene emisaveni namuntlha, hi laha u nga ta vona ha kona eka xihloko lexi landzelaka.