Vutlhari Lebyi Yehova A Byi Nyikeke

“Kutani lava tlhariheke, la’v̌a nga šikari ka tiko, v̌a ta dyonḍisa la’v̌o tala.”—DANIEL 11:33.

1, 2. (a) Hambi leswi Vaisrayele va tokoteke tintswalo ta rirhandzu ta Xikwembu, ha yini va xandzukile? (b) I yini lexi a xi ta va mpfuno eka hina ku xi endla? (Yeremia 51:10)

VANHU va Israyele wa khale a va swi tiva leswaku Yehova a ku ri Xikwembu xi ri xin’we xa ntiyiso. Va byeriwe hi ta ntirhisano wa xona ni vatata wa vona, naswona va tokote tintswalo ta xona ta rirhandzu hi laha ku kongomeke. Kambe eka khamba leri tlulaka rin’we, va endle hi ku pfumaleka lokukulu ka vutlhari. Va ‘pfukele’ Yehova ni vayimeri va yena. Hikwalaho ka yini ke? Hikuva a va “riv̌ala” leswi a va endleleke swona. (Psalma 106:7, 13) A hi leswaku a va nga swi tivi swilo leswi; va hluleke ku anakanyisisa ha swona hi ndlela yo tlangela. Hikwalaho, va tikombe va ri ‘vanhu lava navelaka swilo leswo biha.’—1 Vakorinto 10:6.

² Esikwini ra hina, ndlela leyikulu leyi ha yona Yehova a hlawuleke timbhoni ta yena tanihi vanhu lava hambaneke i vuthlari lebyi a va nyikeke hi ku tirhisa nhlengeletano ya yena leyi vonekaka. Ku tlangela ka hina vini ka ndlela leyi ha yona Yehova a kongomisaka vanhu va yena ku nga tiyisiwa hi ku pfuxeta swin’wana swa swikombiso swa vutlhari byo tano. Xin’wana xa swona xi katsa xivindzi xa dyondzo ya hina—nhlamuselo ya Xikwembu hi xoxe.

Xana Xikwembu I Vunharhu-un’we?

3. Malembe lama tlulaka dzana lama hundzeke, i yini lexi pfuneke malandza ya Yehova ku xiya ntiyiso ehenhleni ka nhlamuselo ya Xikwembu? (1 Vakorinto 8:5, 6)

³ Vujagana byi tiyise hi matimba leswaku lava nga seketeriki ku pfumela eka Vunharhu-un’we i vakanganyisi. Kambe ematshan’wini yo chavisiwa hi vanhu, malandza ya Yehova ya xiye leswaku, a hi mikhuva ni milawu ya vanhu lava nga huhuteriwangiki, kambe i Matsalwa layo Kwetsima lama nyikaka mpimanyeto wo twisisa leswi nga ntiyiso. Loko swi aka ehenhla ka masungulo lawa, le ndzhaku hi 1882, swichudeni leswi swa Bibele leswi tinyiketeleke swi hlamusele kahle eka Xihondzo xo Rindza swi ku: “Vahlayi va hina va swi xiya leswaku loko hi ri karhi hi pfumela eka Yehova Xikwembu na Yesu, ni le ka Moya lowo kwetsima, hi yi ala tanihi mianakanyo leyi nga riki ya matsalwa hi ku helela, dyondzo ya leswaku leswi i Swikwembu swinharhu eka munhu un’we, kumbe Xikwembu xin’we eka vanhu vanharhu” hi laha van’wana va swi vekaka ha kona.—Yohane 5:19; 14:28; 20:17.

4. (a) Loko va endla vulavisisi, xana vanhu va Yehova va twisise yini loko ku tiwa eka xisekelo xa dyondzo ya Vunharhu-un’we ni vuyelo bya dyondzo yo tano? (b) Ha yini Yehova a nyike malandza ya yena vutlhari byo tano?

⁴ Varhandzi lava va ntiyiso wa Bibele va kambisisile swinene naswona va vone timitsu ta dyondzo ya Vunharhu-un’we evukhongerini lebyi nga riki bya Vukriste. Hi dyondzo ya rixaladza ya Matsalwa, va tlhele va xiya leswaku loko tindzimana tin’wana ta Bibele ti tikomba ti seketela mianakanyo ya Vunharhu-un’we, leswi a swi ri hikwalaho ka malangutelo lama hambukeke ya vahundzuluxeri, hayi hikwalaho ka leswi a swi ri kona ematsalweni ya ririmi ro sungula ya khale. Va xiye leswaku dyondzo leyi, yi endlaka onge yi xixima Yesu, kahle-kahle yi kanete tidyondzo ta yena ni ku delela Yehova. Xisweswo, nkandziyiso wa Xihondzo xo Rindza lowu ku kombeteriweke eka wona laha henhla wu te: “Tanihi valavi va ntiyiso swa hi boha, ku tirha hi ku tshembeka hi hexe na hi Rito ra Tata wa hina, leri kotaka ku hi tlharihisa hakunene. Hikwalaho, hi ku fularhela mikhuva ni milawu ya vanhu lava nga huhuteriwangiki ni mafambiselo yo homboloka, a hi namarheleni xivumbeko xa marito lama twisisekaka lama humaka eka Hosi ya hina ni le ka Vaapostola.” Hikwalaho ka leswi a va rhandza ntiyiso hakunene ni ku nyikela nyingiso hayi eka tindzimana ti nga ri tingani ta Bibele leti rhandzekaka ntsena kambe eRitweni ra Xikwembu hinkwaro, Yehova u va nyike vutlhari lebyi handle ka xihoxo byi va hambaniseke ni Vujagana.—2 Timotiya 3:16, 17; vona New World Translation Reference Bible, tluka 1580, xiyenge 6B.

Xivandla Lexi Faneleke Xa Vito Ra Xikwembu

5. I yini lexi a xi ri karhi xi susumeta mboyamelo wo ya eku suseni ka vito ra Xikwembu ra xiviri eku hundzuluxeleni ka Bibele? (Nhlavutelo 22:18, 19)

⁵ Xiya xikombiso xa vumbirhi: Loko ku hundzuluxela ka Bibele hi tinhlayo leti andzaka ku tumbete kumbe ku suse vito ra xiviri ra Xikwembu hi laha ku heleleke, Sosayiti ya Watch Tower yi kandziyise swinene nkoka wa vito rero. Vujagana byi vule leswaku ku susiwa ka vito leri nge Yehova a ku ta nyika Mahungu Lamanene ku naveleka loku engetelekeke emisaveni hinkwayo, kambe malandza ya Yehova lama totiweke ya swi xiyile leswaku a a ri mani muvangi wa kungu rero ro susa vito ra nkoka swinene eka hinkwawo eMatsalweni layo Kwetsima. (Ringanisa Yeremia 23:27.) Vanhu va Xikwembu va swi xiyile leswaku leswi a swi hlohloteriwa hi Diyavulosi leswaku a susa vito ra Xikwembu xa ntiyiso emianakanyweni ya vanhu.

6. Ku hambana ni ndlela ya Vujagana xana malandza ya ntiyiso ya Xikwembu ya endle yini ku kurisa vito ra xona? (Mintirho 15:14)

⁶ Ku hambana ni ndlela leyi landzeriwaka hi Vujagana, ku sukela elembeni ro sungula ra ku humesiwa ka xona (1879), Xihondzo xo Rindza xi tlakuse vito ra Xikwembu, YEHOVA. Hi 1926 magazini lowu wu humese xihloko lexi nge “I Mani La Nga Ta Xixima Yehova?” (Psalma 135:21) Hi 1931 swichudeni swa Bibele leswi a swi tirhisana na Sosayiti ya Watch Tower swi byarhe vito leri nge Timbhoni ta Yehova. (Esaya 43:10-12) Va tlhele va sungula ku twisisa hi laha ku teleke swinene nkoka lowukulu wa ku kwetsima ka vito ra Yehova. (Esaya 12:4, 5) Hi 1944 va sungule ku humesa Bibele ya American Standard Version leyi nghenisaka vito ra Yehova minkarhi leyi tlulaka 6 800. Hambi swi ri tano, malunghana ni ku humesiwa ka Bibele, loku xiyekeke swinene ku ve ku humesiwa ka New World Translation, ku sukela hi 1950. Yi nyika vito ra Xikwembu ndhawu ya rona leyi faneleke eka Matsalwa ya Xiheveru ni Matsalwa ya Vukriste ya Xigriki.

7. Xana ku kandziyisiwa loku vekiweke ehenhla ka vito ra Xikwembu ni hinkwaswo leswi fambisanaka na rona ku va khumbe njhani vanhu vo tala hi laha ku vuyerisaka?

⁷ Xisweswo ku kandziyisiwa loku vekiweke eritweni ra Xikwembu ra xiviri ku tsakise timiliyoni ta varhandzi va ku lulama emisaveni hinkwayo. Yi va pfune ku twisisa Xikwembu xa ntiyiso tanihi Munhu. Naswona tanihi leswi va sunguleke ku tiva tindlela ta yena, va swi kotile ku hanya hi ku twisisa, kumbe hi vutlhari.—Mikea 4:2, 5.

Xana Moya Wa Munhu A Wu Fi?

8. Eku sunguleni ka matimu ya tona ya manguva lawa xana Timbhoni ta Yehova ti dyondze yini ehenhleni ka moya (soul) ni xiyimo xa vafi?

⁸ Manuku i xikombiso xa vunharhu: Enkarhini wo sungula ematin’wini ya manguva lawa ya malandza ya Yehova, rirhandzu ra Rito ra Xikwembu ri pfule mahlo ya vona eka mintiyiso yin’wana ya nkoka. Ku tlula lembe xidzana leri hundzeke, “nandza lowo tshembeka, lowa vutlhari” u twisise kahle leswaku moya (soul) a hi moya (spirit) wo tlhariha lowu kotaka ku huma lowu tshamaka endzeni ka vanhu kambe leswaku i munhu hi yexe. (Matewu 24:45-47) Hi 1880 Xihondzo xo Rindza xi hlamusele marito ya ririmi ro sungula lama tsariweke ku Sheol na Hades eBibeleni naswona xi hetelele hi ku leswi swi vula sirha. Nakambe xi kombe leswaku vanhu lava a va yisiwa eGehena a va herisiwa, hayi ku xanisiwa.—Nakambe vona New World Translation Reference Bible, matluka 1573-5.

9. Hi 1894, Xihondzo xo Rindza xi vule yini malunghana ni masungulo ya dyondzo ya leswaku mimoya (souls) ya vanhu a yi fi hikwalaho ka ndzhaka?

⁹ Hi 1894 Xihondzo xo Rindza xi tlakuse xivutiso lexi nge, “Kutani yi huma kwihi mianakanyo leyi tivekaka ya leswaku vanhu hinkwavo va ni vukona lebyi nga hava ku fa, bya ntumbuluko, lebyi va byi kumeke tanihi ndzhaka ke?” Hi vutlhari, xi hlamurile xi ku: “Loko hi kambisisa tibuku ta matimu, hi kuma leswaku, hambi leswi dyondzo ya vukona lebyi nga hava ku fa bya munhu yi nga dyondzisiwiki hi timbhoni leti huhuteriweke ta Xikwembu, i xisekelo xa vukhongeri hinkwabyo bya vuhedeni. . . . Hikwalaho, a hi ntiyiso, leswaku Socrates na Plato hi vona vo sungula ku dyondzisa dyondzo yoleyo: a yi ri ni mudyondzisi wo sungula ku tlula vona, naswona la swi kotaka swinene. Hambi swi ri tano, vona va pholiche dyondzo yoleyo . . . kutani va endla filosofi hi yona, ivi xisweswo va yi endla leyi navetaka ni ku amukeleka eka ntlawa wa vanhu lava hluvukeke va siku ra vona ni ku fikela namuntlha. Rhekhodo yo sungula ya dyondzo leyi ya mavunwa yi kumeka eka matimu ya khale lama tivekaka eka munhu—Bibele. Mudyondzisi wa mavunwa a ku ri Sathana.”a

10. I vuyelo byihi lebyo biha lebyi humeke eka mavunwa ya vukhongeri ehenhleni ka moya (soul) ni xiyimo xa vafi, kambe ku endliwe yini ku pfuna vanhu lava anakanyaka?

¹⁰ Hi ku hangalasa vunwa bya leswaku vanhu hinkwavo va ni moya lowu nga fiki ni leswaku lavo biha va ta xanisiwa hi laha ku nga heriki endzilweni wa tihele, Sathana a nga ri yimelelanga kahle vito ra Xikwembu a tlhela a ri rhuketela. Muhleri wo sungula wa Xihondzo xo Rindza, C. T. Russell, u swi xiyile sweswo. U vone vanhu lava tlhariheke va ala mianakanyo ya ku xanisiwa hi laha ku nga heriki kambe, lexi vavisaka, va tlhele va ala Bibele hikuva a va anakanya leswaku a yi ri xihlovo xa dyondzo yoleyo leyi nga twisisekiki. Leswaku a susa ku phumela ka Malembe ya Munyama emianakanyweni ya vanhu lava twisisaka, hi laha a swi vekeke ha kona, Makwerhu Russell u nyikele nkulumo ya le rivaleni leyi hisaka leyi nge “Ku Ya Etiheleni U Tlhela U Vuya! Lava Va Nga Kona.”

11. (a) Loko vungoma byi humelela, i xitsundzuxo xihi lexi tivisiweke hi ntlawa wa “nandza lowo tshembeka”? (b) I vamani lava pfuniweke hi xitsundzuxo lexi, naswona hi ndlela yihi?

¹¹ Yoleyo a ku ri nguva leyi vungoma a byi humelela ha yona. Kambe hi vutlhari lebyi Yehova Xikwembu a endleke leswaku byi koteka hi Rito ra yena, ntlawa wa “nandza lowo tshembeka” wu swi twisisile leswaku mimoya leyi ehleketeleriwaka yi ri ya lava feke leyi vanhu a va vulavurisana na yona a ku ri mademona. Tinhlamuselo ta matimba ta Matsalwa ti nyikeriwile eka tinkulumo ta le rivaleni na hi xivumbeko lexi tsariweke ku pfula mahlo ya vanhu va timbilu letinene eka khombo ro katseka eka mikhuva ya vungoma. (Deuteronoma 18:10-12; Esaya 8:19) Hikwalaho ka vutlhari lebyi Yehova a byi nyikeke malandza ya yena, magidi yo tala ya vanhu emisaveni hinkwayo va tshunxekile eka nchavo wa vafi, eka ku tirhisiwa ka vungoma ni le ka mikhuva leyi thyakeke leyi fambisanaka ni vungoma.

Mahanyelo Ya Vukriste Emisaveni Leyo Nonon’hwa

12, 13. (a) Hlamusela Daniel 11:32, 33. (b) Xana hi yihi yin’wana ya mintiyiso ya xisekelo ya Bibele leyi nyikelaka masungulo ya ku twisisa loku phameriweke hi “la’v̌a tlhariheke”?

¹² Muprofeta Daniyele u kombe leswaku malandza ya Xikwembu a ya ta kombisa vutlhari mayelana ni mhaka yin’wana ya vumune, mhaka ya nkoka—vukala-tlhelo. Endzhaku ka ku hlamusela njhekanjhekisano exikarhi ka mintlawa leyi xiyekaka ya politiki ya misava hi vuxokoxoko, Daniel 11:32, 33 yi ri: “Kutani hi ku šengetela ka yena, o ta tikokela la’v̌a tlulaka šinakulobye.” Hi leswaku, hosi leyi lerisaka ya le n’walungu yi gwinehisa lava tivulaka Vakriste kambe lava rhandzaka misava, lava lavaka ku amukeriwa hi yona, kutani va nga wu xiximi ntwanano wa Yehova wa Mfumo lowu eka wona Yesu Kriste a nga ta fuma misava hinkwayo. Daniyele a ya emahlweni a ku: “Kambe tiko ra la’va tiv̌aka Šikwembu ša v̌ona, ri ta tiya, ri tira. Kutani la’v̌a tlhariheke, la’v̌a nga šikari ka tiko, v̌a ta dyonḍisa la’vo tala.”

¹³ Vutlhari lebyi lavekaka leswaku hi langutana ni swiyimo leswi hakanyingi swi nonon’hwaka leswi hi rhendzeleke hi vutlhari byi vumbiwa hi ku tlangela mintiyiso ya xisekelo ya Bibele. Hi nkongomiso wa Yehova, ntlawa wa “nandza lowo tshembeka” wu yi twisisile mintiyiso leyi. Wun’wana wa yona i ntiyiso wa leswaku, mufumi loyi a nga vonakiki wa misava leyi i Sathana Diyavulosi, hi laha Yesu a kombiseke ha kona. (Luka 4:5-8; Yohane 12:31) Ku pfumelelana ni ntiyiso lowu, 1 Yohane 5:19 yi tlhandlekela leswaku a hi ntlawa wun’we kumbe wun’wana kambe “misava hinkwayo [vanhu hinkwavo lava nga ehandle ka bandlha ra ntiyiso ra Vukriste] yi le hansi ka matimba ya Lowo biha.” (Nhlavutelo 12:9) Tanihi leswi Yesu a vuleke leswaku valandzeri va yena a va nga ta va “va misava,” leswi swi lava vukala-tlhelo bya Vukriste eka vona.—Yohane 17:16.

14. (a) Hi le ka timhaka tihi leti nga enkarhini leti nyingiso wa malandza ya Yehova wu kongomisiweke eka tona hi 1939 na 1941? (b) Vutlhari byo tano byi pfune Timbhoni ta Yehova ku endla hi vutlhari hi ndlela yihi?

¹⁴ Hikwalaho, a swi fanela leswaku loko mapapa ya Nyimpi ya Vumbirhi ya Misava ma dzwihala eYuropa, mphikamakaneta ya vukala-tlhelo bya Vukriste yi kandziyisiwa eka Xihondzo xo Rindza xa Xinghezi xa November 1, 1939. Leswi fanaka ni mhaka leyi i ntiyiso wun’wana wa masungulo—nkoka wa mphikamakaneta ya vuhosi bya vuako hinkwabyo ni xiphemu xa Mfumo wa Vumesiya eku lulamiseni ka mphikamakaneta leyi. Hi laha ku faneleke, hi 1941 mphikamakaneta leyi yi kombisiwile eka nkulumo entsombanweni wa Timbhoni ta Yehova eSt. Louis, Missouri, U.S.A., naswona elembeni leri landzeleke ebukwini leyi nge The New World. Mawaku nsirhelelo lowonghasi lowu vutlhari byo tano bya Xikwembu byi wu nyikeke malandza ya Yehova emisaveni leyi yi aveneke ni leyi nga ni tinyimpi! Hambi loko mafambiselo ya vukhongeri ya Vujagana ya aviwile hikwalaho ka leswi byi tipfumeleleke ku katseka eku himpfilitaneni ka matiko hinkwawo ni le ka minhlangano ya ntshunxeko yo wisa tihulumendhe, Timbhoni ta Yehova ematikweni hinkwawo ti ye emahlweni hi vun’we ti tinyiketela eku hangalaseni ka Mfumo wa Xikwembu tanihi ntshembo wu ri wun’we wa vanhu. Va tshame va khomekile entirhweni wa ku ponisa vutomi lowu Yesu Kriste a wu vhumbeke loko a te: “Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:14.

Ku Hetiseka Ka Vuprofeta Bya Bibele

15. Ha yini malandza ya Yehova ma ve ni vutlhari?

¹⁵ Ha yini malandza ya Yehova ya ve ni vutlhari byo tano? Hikuva va ni ntshembo lowu taleke eRitweni ra Xikwembu leri tsariweke, va ri yingisa, naswona moya wa Yehova wu le henhla ka vona. Nakambe leswi swi va pfune ku twisisa vuprofeta bya nkoka bya Bibele, naswona leyi i yinhla ya vuntlhanu leyi hi nga ta yi xiya.

16, 17. (a) Ha yini malembe lama tirhisiweke hi Timbhoni ta Yehova minkarhi yin’wana ya hambana ni lama ma nyikiweke hi van’wamatimu va misava? (b) Timbhoni ta Yehova ti pfunekise ku yini eku tshembeni ka tona Bibele loko ku tiwa eku hlayeleni ka lembe ra vu-20 ra Artakserkses ni nkarhi wa ku lovisiwa ka Yerusalema hi Vababilona?

¹⁶ Van’wamatimu va misava, hi ku titshega hi nhlamuselo ya vona ya leswi etimhakeni tin’wana swi nga swiphemu swa swiphambati leswi yimburiweke hi vayimburi, va endle makumu ya leswaku 464 B.C.E. a ku ri lembe ro sungula ra vuhosi bya Artakserkses Longimanus ni leswaku 604 B.C.E. a ku ri lembe ro sungula ra vuhosi bya Nebukadnetsar II. Loko sweswo a swi ri ntiyiso, lembe ra vu-20 ra Artakserkses a ri ta sungula hi 445 B.C.E., naswona lembe ra ku lovisiwa ka Yerusalema hi Vababilona (hi lembe ra vu-18 ra mfumo wa Nebukadnetsar) a ri ta va ra 587 B.C.E. Kambe loko xichudeni xa Bibele xi tirhisa malembe wolawo loko xi hlayela ku hetiseka ka vuprofeta, xi ta pfilunganyeka.

¹⁷ Timbhoni ta Yehova ti tsakele leswi swi tshuburiweke hi vayimburi tanihi leswi swi yelanaka ni Bibele. Hambi swi ri tano, laha nhlamuselo ya leswi swi tshuburiweke yi himpfilitanaka kona ni timhaka leti nga erivaleni leti nga le Bibeleni, hi amukela hi ku tiyiseka leswi Matsalwa layo Kwetsima ya swi vulaka, hambi hi le timhakeni leti yelanaka ni malembe kumbe mhaka yin’wana ni yin’wana. Hikwalaho, malandza ya Yehova ya swi xiye khale leswaku mpimo wa nkarhi wa vuprofeta lowu sunguleke hi lembe ra vu-20 ra Artakserkses a wu fanele ku hlayiwa ku sukela eka 455 B.C.E. kutani xisweswo, leswaku Daniel 9:24-27 yi kombetele kahle eka lembe ra 29 C.E. hi xixikana tanihi nkarhi wa ku totiwa ka Yesu tanihi Mesiya.b Hikwalaho ka xivangelo lexi fanaka, va xiye leswaku vuprofeta lebyi nga eka Daniel ndzima 4 malunghana ni “minkarhi ya ntlhanu na mimbirhi” yi sungule ku hlayiwa hi 607-606 B.C.E. ni leswaku byi kombetele eka 1914 C.E. hi xixikana tanihi lembe leri Kriste a vekiweke exiluvelweni etilweni ha rona tanihi Hosi leyi fumaka ni leswaku misava leyi yi nghene enkarhini wa yona wa makumu.c Kambe a va ta va va nga ku twisisanga ku hetiseka loku ku nyanyulaka ka vuprofeta loko a va lo kanakana eku tshembeni ka vona ku huhuteriwa ka Matsalwa layo Kwetsima. Xisweswo, vutlhari lebyi va byi kombiseke a byi fambisana hi laha ku kongomeke ni ku titshega ka vona eka Rito ra Xikwembu.

18. Esaya 65:13, 14 yi tshembisa yini loko ku tiwa eka xiyimo xa moya xa malandza ya Yehova lama tshembekaka?

¹⁸ Loko a hambanisa xiyimo xa moya xa malandza yakwe lama tshembekaka ni lexiya xa vanhu ni mintlawa leyi hundzulaka Matsalwa hi vomu leswaku ma twanana ni xin’wana ni xin’wana lexi tolovelekeke namuntlha, Yehova u ri: “Maŝiv̌o, malanḍa ya mina ma ta dya, kambe ṅwina mi ta v̌a ni ndlala; maŝiv̌o, malanḍa ya mina ma ta nwa, kambe ṅwina mi ta v̌a ni tora; maŝiv̌o, malanḍa ya mina ma ta ṭaka, kambe ṅwina mi ta v̌a ni tingana; maŝiv̌o, malanḍa ya mina ma ta yimbelela hi ku ṭaka ka timbilu ta wona, kambe ṅwina mi ta kolola e ku vavisekeni ka timbilu ta ṅwina, mi ta huwelela hi ku hela ka timbilu.”—Esaya 65:13, 14.

19. (a) Ngopfu-ngopfu, “nandza lowo tshembeka, lowa vutlhari” u tirhisa ndlela yihi ku nyikela tinhlamuselo ta Matsalwa? (b) I muxaka muni wa xiyimiso xa dyondzo lowu nga ta hi pfuna ku vuyeriwa hi laha ku teleke eka swakudya swa moya?

¹⁹ Hi laha mpfuxeto lowu wo koma wa matimu wu kombeke ha kona, i ku tirhisa tikholumo ta Xihondzo xo Rindza leswi tinhlamuselo ta mintiyiso ya nkoka ya Matsalwa hi lunghiseleriweke tona hi “nandza lowo tshembeka, lowa vutlhari” wa Yehova. Xihondzo xo Rindza i xitirho lexikulu lexi tirhisiweke hi ntlawa wa “nandza” eku nyikeleni ka swakudya swa moya. Xana u pfuneka hi laha ku teleke eka xona? Xana u hlaya nkandziyiso wun’wana ni wun’wana, naswona xana xiyimiso xa dyondzo ya wena xi katsa ku langutisa matsalwa lama kombisiweke kambe lama nga tshahiwangiki ke? Xana u tlhela u swi endla ntolovelo ku anakanyisisa ehenhleni ka leswi u swi dyondzeke, u aka ku swi tlangela, u xiya ndlela leyi swi faneleke swi khumba langutelo ra wena, ku navela ka wena, mintirho ya wena ya siku na siku, tipakani ta wena evuton’wini ha yona? Ku endla ka wena tano ku nga va mhaka leyikulu eku boheni ka wena makungu lama seketeriweke eku twisiseni ka xiviri loku Yehova a ri swakwe a ku nyikeke.

[Tinhlamuselo ta le hansi]

U Tsundzuka Yini Ke?

◻ Xana Xikwembu i Vunharhu-un’we, naswona ha yini u hlamula tano?

◻ Kahle-kahle vito ra Xikwembu ri kumeka kwihi?

◻ Xana moya wa munhu hi lowu nga fiki?

◻ I vutlhari byihi lebyi Yehova a byi nyikeleke ehenhleni ka mahanyelo ya Vukriste emisaveni leyi yo nonon’hwa?

◻ Timbhoni ta Yehova ti amukele vutlhari byihi malunghana ni ku hetiseka ka vuprofeta bya Bibele

[Swifaniso leswi nga eka tluka 18]

Hi ku tirhisa Xihondzo xo Rindza, “nandza lowo tshembeka, lowa vutlhari” u phamela vutlhari loko ku tiwa eka nhlamuselo ya Matsalwa ni ku tirhisiwa ka wona esikwini ra hina