Xiviko Xa Vahuweleri Va Mfumo
Ku Lavisisa Ntiyiso Wa Bibele Ku Hakeriwile eIsrayele
VANHU lava engetelekaka eIsrayele ku fana na kun’wana va vona ku hluleka ka matshalatshala ya munhu yo tisa ku rhula loku khomelelaka ni ku nyika ntshembo wa vumundzuku. Timbhoni ta Yehova ta 370 etikweni rero ro saseka, ra matimu va yisa ntshembo lowu nyikaka vutomi eka lava va lavaka Xikwembu. (Esaya 55:2, 3) Swiviko leswi landzelaka leswi humaka eka hofisi ya rhavi ya Sosayiti ya Watch Tower eTel Aviv swi kombisa leswaku Xikwembu xi hakela lava va lavaka ntiyiso wa Bibele.
“Ku kavanyeta loku endliweke hi vahisekeri va vukhongeri lava nga lawulekiki ku herile, naswona matshalatshala ya vona ya khale yo kavanyeta minhlangano ya hina ma ya emahlweni ma vohla. Hi xikombiso, mpatswa lowu kuleke wa Marussia a wu hlanganyela ni ntlawa wa Maadventist kambe a va nga aneriseki hi leswi a va swi dyondza. A va nga voni vumbhoni bya ku xanisiwa lebyi ku profetiweke leswaku byi ta fungha Vukriste bya ntiyiso. Manuku siku rin’wana va kume magazini wa mahungu wa khale lowu cukumetiweke wa ririmi ra Xirhoma lowu a wu ri ni xiviko lexi vulavulaka hi minhlaselo ya ntlawa wa vukari le ndzhaku hi 1985 ehenhla ka muako wa hofisi ya rhavi ra Sosayiti na Holo ya Mfumo eTel Aviv. Loko ku tsakela ka vona ku pfuxiwile, va ye eTel Aviv ivi va famba-famba hi tiawara ta mune ku kondza loko va fike emuakweni lowu hlamuseriweke exihlokweni xa phepha-hungu. Va tiphine hi ku kuma tinhlamulo eka swin’wana swa swivutiso swa vona ivi va xwela nhlangano wa nimadyambu, laha a va tsakile ku hlangana ni Timbhoni tin’wana leti vulavulaka Xirussia. Ku sukela kwalaho, dyondzo ya Bibele ya nkarhi na nkarhi yi khomiwile na vona. Loko va ri karhi va dyondza leswi engetelekeke, va ya emahlweni va khorwiseka leswaku va kume lexi hakunene a va ri karhi va lava xona—ntiyiso!
“Eka khamba rin’wana, makwerhu wa xinuna u nyikele vumbhoni eka jaha leri nga ni ndyangu leri a ri nga pfumeli tin’wana ta tinhla leti a ringeteke ku ti hlamusela kutani a ri yanga emahlweni ri lava rungula ra Mfumo. Malembe ma nga ri mangani endzhakunyana, n’wana wa nhwanyana wa wanuna loyi u vabyile, naswona u byeriwile hi vanghana lava kholwaka swiyila-yila leswaku kumbexana xiphiqo lexi xi vangiwe hi mezuzah leyi namekiweke erimbeni ra yena. Va n’wi khutaze leswaku yi kambisisiwa hi mufundhisi. Leswi u kunguhate ku swi endla. Hi nkarhi lowu fanaka, u khongelele vukongomisi eka Xikwembu hi matimba leswaku a kuma ntiyiso.
“Loko a ri karhi a ya emutini wa mufundhisi, wanuna loyi kan’we-kan’we u bohe makungu yo ya teka mimpfanganiso ya mirhi eklinikini ya rihanyo. Loko a fika, a a fanele ku kuma mani a tshame kona handle ka Mbhoni leyi yi n’wi chumayeleke malembe yo hlayanyana emahlweni! Makwerhu u hlamusela leswaku a nga na makungu yo ya ekliniki madyambu wolawo ku kondza loko kan’we-kan’we a tsundzuke nchumu lowu a wu laveke. Makwerhu ni wanuna loyi va tshamile ehansi ivi va vulavula tiawara to hlayanyana madyambu wolawo, naswona dyondzo ya Bibele yi lunghiseleriwile ni jaha leri. U sungule ku va kona eminhlanganweni, nhluvuko wa yena a wu tiyile, naswona u joyine Xikolo xa Vutirheli bya le Tilweni. Hi ku hatlisa u sungule ku ya evutirhelini bya nsimu, naswona sweswi i makwerhu loyi a khuvuriweke. A nga kalanga a fika emutini wa mufundhisi!”
Ku lavisisa ka vanhu lava ntiyiso wa Bibele ku hakeriwe swinene, tanihi leswi va kumeke rifuwo ra nkoka swinene ku tlula nsuku lowunene.—Swivuriso 3:13-18.