Xiviko Xa Vahuweleri Va Mfumo

“A Va Nga Rhuteli”

KU SUKELA emasikwini ya Yesu Kreste ni vaapostola va yena, varhangeri va vukhongeri va ringete matshalatshala ya vona hinkwawo leswaku va kavanyeta ku chumayeriwa ka mahungu lamanene ya Mfumo wa Xikwembu. Vaapostola va ‘lerisiwe swinene’ ni hi ku phindha-phindha hi valawuri va le Yerusalema leswaku “va nga tshuki va dyondzisa hi vito ra Yesu.” (Mintirho 5:27, 28, 40) Hambi swi ri tano, mhaka ya Bibele yi hlamusela leswaku “rito ra Xikwembu ri [ye] emahlweni swinene; na yona nhlayo ya vadyondzisiwa yi ya yi andza ngopfu eYerusalema.”—Mintirho 6:7.

Endzhaku ka magidi mambirhi ya malembe ha ha kuma varhangeri va vukhongeri eIsrayele lava hlohlotelaka valawuri va kwalaho ku kavanyeta ntirho wa Vakreste va ntiyiso etikweni rolero. Hi ku va ehansi ka ntshikilelo lowu vangiwaka hi swirho leswi hisekelaka vukhongeri etlhelo, hi November 1987, valawuri va ndhawu yoleyo ya Tel Aviv, eIsrayele va lerise Timbhoni leswaku ti tshika ku khoma mihlangano ya Vukreste eHolweni ya Mfumo leyi a yi ri ehofisini ya rhavi ra Sosayiti ya Watch Tower. Xileriso lexi xi sungule ku tirha hi October 1989. Hi ku landza xileriso lexi, Timbhoni ti hlanganyele emiakweni leyi hirisiwaka endhawini yoleyo ku ringana malembe manharhu loko Holo ya tona ya Mfumo yi titshamela yi nga tirhisiwi nikantsongo.

Hi nkarhi lowu fanaka, mhaka yi yisiwe eka Huvo-nkulu ya Vuavanyisi ya le Israyele. Swirho swa hofisi ya gqweta ra tiko swi kambisise mhaka leyi tisiweke hi Timbhoni ivi swi vula leswaku a ku nga ri na xivangelo xo ya emahlweni ni ku tenga mhaka ya vona, hi ku va yi sekeriwe eka xihlawuhlawu xa vukhongeri. Hikwalaho, valawuri va kwalaho va boheke ku cinca xiboho xa vona, Timbhoni ta Yehovha hi ntsako ti tlhelela eHolweni ya tona ya Mfumo.

Xana ntirho wo chumayela ntiyiso wa Bibele wu kavanyetekile emalembeni wolawo? Nikatsongo! Hi nkarhi lowu Holo ya Mfumo yi pfariweke ha wona, a ku ri ni mavandlha mambirhi eTel Aviv ni ntlawa wa dyondzo ya Bibele edorobeni ra le kusuhi ra Lod. Endzhaku ka malembe manharhu, loko Holo ya Mfumo yi pfuriwe nakambe, Timbhoni ta Yehovha ti andze ti va mavandlha ya mune naswona ntlawa lowuntshwa wa dyondzo ya Bibele a wu hlanganyela eBerexeba.

Ku andza eIsrayele a ku humeleli eka mintlawa ya tindzimi letikulu ntsena, ku nga Xiarabu ni Xiheveru. Ku ve ni nhlayo leyikulu ya vahlapfa lava fiketelaka va huma laha khale a ku ri Soviet Union, kutani Timbhoni ta Yehovha leti vulavulaka Xirhaxiya sweswi ti khomekile hi ku avelana na vona mahungu lamanene. Minhlangano ya ririmi ra Xirhaxiya ya khomiwa emavandlheni manharhu; vanhu vo tlula dzana va ha ku hlengeletana sweswinyana enhlengeletanweni ya Xirhaxiya.

Handle ko kanakana, vanhu va vukhongeri, la va nga ni xihlawuhlawu va ta ya emahlweni ni tsima ra vona ro lwisana ni vugandzeri bya ntiyiso. Kambe vahuweleri va Mfumo va ya emahlweni va tekelela Vakreste va lembe-xidzana ro sungula lava, ku nga khathariseki nkaneto, “a va nga rhuteli ku dyondzisa ni ku twarisa Evhangeli eTempeleni ne mindyangwini ya vanhu, va ku: ‘Mesiya, hi yena Yesu.’”—Mintirho 5:42.