Swiendlakalo-nkulu Swa N’wexemu

NHLENGELETANO ya Yehovha ya la misaveni yi ye emahlweni yi kula elembeni ra ntirho ra n’wexemu. Mikateko ya Xikwembu yi lo dlaa, erivaleni, hi leswi Timbhoni ta Yehovha leti tlulaka tsevu wa timiliyoni ematikweni ya 235 ti kombiseke ku tshembeka ka tona eka xona ni ku va ni ripfumelo eka xitshembiso xa xona xa ku tisa misava leyintshwa yo lulama. Timiliyoni leti a to va vanhu lava vulaka hi nomu ntsena leswaku i malandza ya Xikwembu, kambe i vanhu lava hisekelaka ku chumayela mahungu lamanene ya Mfumo wa Xikwembu, hilaha Yesu a profeteke hakona eka Matewu 24:14. Hi ku pfumelelana ni ndzimana ya lembe ya 2001, ti ya emahlweni ti ‘yime ti hetisekile naswona ti ri ni ku khorwiseka loku tiyeke hi ku rhandza ka Xikwembu hinkwako.’—Kol. 4:12.

Ku ni swilo swo tala leswi tsakisaka leswi endlekeke eka vanhu va Xikwembu elembeni hinkwaro. Kutani a hi tweni swi nga ri swingani swa swona.

Mintsombano Leyi Letelaka Vadyondzisi Va Rito Ra Xikwembu

Xin’wana xa swiendlakalo leswi nga rivalekiki elembeni i Ntsombano wa Muganga wa Timbhoni ta Yehovha wa “Vadyondzisi Va Rito Ra Xikwembu,” lowu khomiweke etindhawini to tala emisaveni hinkwayo ku sukela exikarhi ka lembe ra 2001 ku ya emasungulweni ya lembe ra 2002. Vanhu lava a va ri kona a va tele ngopfu. Nhloko-mhaka ya ntsombano yi hlamuseriwe hi xivulavuri esikwini ro sungula ra ntsombano lowu wa masiku manharhu. Xi te: “Yesu a a nga swi lavanga ku nyika ntlawa lowu tlakukeke wa vativi va Matsalwa vutihlamuleri bya ku pfuna van’wana leswaku va kuma vutivi. U byele vadyondzisiwa vakwe a ku: ‘Leswi ndzi mi byelaka swona emunyameni, swi vuleni eku vonakaleni; naswona leswi mi swi twaka swi hleveteriwa, swi chumayeleni mi ri ehenhla ka tindlu.’ Yesu a a swi hisekela swinene ku vulavula ni vanhu vo tala lava kumekaka, hi vutivi bya Xikwembu. Hi ku ya hi yena, vutivi bya Matsalwa a byi fanele byi byeriwa van’wana, a byi nga fanelanga byi furhekiwa.”

Nongonoko wa ntsombano wu katse tinkulumo leti hlamuseleke leswi vuriwaka hi vuprofeta bya Bibele ni ndlela leyi Vakreste va faneleke va tirhisa nkongomiso wa Matsalwa evuton’wini bya vona ha yona. Hi Sonto a ku ri ni drama ya xikhale leyi nhloko-mhaka ya yona a yi ku, Xixima Vulawuri Bya Yehovha. Drama yoleyo yi kandziyise rungula ra le Bibeleni ra ku tshembeka ka vana va Kora, lava nga landzelangiki ku xandzuka ka tata wa vona emananga.

Entsombanweni lowu ku humesiwe minkandziyiso yimbirhi. Wo sungula i Vholumo ya Vumbirhi ya buku leyi nge Vuprofeta Bya Esaya—I Rivoningo Eka Vanhu Hinkwavo. Wa vumbirhi i broxara leyi nge A Satisfying Life—How to Attain It. Nakambe, ku humesiwe xiphephana lexintshwa lexi nge—Xana U Ni Moya Lowu Nga Fiki?

Hi August ku khomiwe mintsombano yo hlawuleka eFurwa ni le Italiya. Le Furwa mintsombano leyi yo hlawuleka yi khomiwe eParis, eLyons ni le Bordeaux, kutani lava veke kona eka yona hinkwayo a va ri 160 045. Mintsombano leyi yi va khutaze swinene vamakwerhu va le Furwa, lava vahleri va mahungu va tsaleke mavunwa ha vona. Makwerhu un’wana u te: “Minkarhi yin’wana hi vona onge hi lwa hi ri hexe, kambe endzhaku ko endzeriwa hi magidi ya vamakwerhu lava nga Vakreste, hi kume matimba ya ku ya emahlweni.”

Le Italiya mintsombano yo hlawuleka yi khomiwe eRome, eMilan, eTurin ni le Bari. Emadorobeni man’wana ya ntlhanu xiyenge xa nongonoko wa ntsombano xi yingisiwe hi riqingho. Nhlayo leyi heleleke ya lava veke kona eka mintsombano leyi ya kaye a yi ri 289 133. Eka ntsombano ha wun’we lowu khomiweke eFurwa ni le Italiya, vayingiseri va hlayeriwe xiboho lexi tiyisaka nhlana. Lava teke entsombanweni va huma ematikweni yo tala va amukele xiboho xexo hi mandla mambirhi! Endzhaku ka sweswo va be mavoko nkarhi wo leha.

Ku Chumayela eMisaveni Hinkwayo Hi Kingdom News No. 36

Hi October na November 2000, ku fambisiwe kwalomu ka magidi ya timiliyoni ta Kingdom News No. 36 hi tindzimi ta 189 emisaveni hinkwayo. Rungula ra Matsalwa leri vulavulaka hi Ku Fuma ka Kreste Yesu ka Gidi ra Malembe swin’we ni swifaniso swa mivalavala swa Kingdom News leyi, swi endle leswaku vanhu vo tala va yi tsakela. Loko u ri Mbhoni ya Yehovha, a swi kanakanisi leswaku u hlanganyerile etsimeni leri. Hi leswi swin’wana swa swiviko leswi humaka etindhawini to hambana-hambana ta misava, malunghana ni tsima leri.

Hambileswi xirhami xa le Alaska xi vuyisaka n’wana evukatini, Timbhoni ta kwalaho a ti tshikanga ku chumayela. Mulanguteri la ungamelaka Vandlha ra North Pole u te: “Hambileswi ku nga xixika, vini van’wana va miti va yima ehandle emajarateni ya vona va hlaya Kingdom News No. 36. Rungula leri nga rharhanganangiki leri kombisaka ku hambana eka ndlela leyi swilo swi nga xiswona namuntlha ni mikateko leyi vanhu va nga ta yi kuma, ra rhandzeka.”

Le Albania ku rhambiwe mavandlha ya 15 emadorobeni ma nga ri mangani leswaku ma endzela swimitana leswi nga le handle ka doroba. Vamakwerhu va xinuna ni va xisati va amukele xirhambo lexi hi nkhinkhi ni ntsako lowukulu. Swimitana swa 56, leswi nga ni vaaki va kwalomu ka 50 000 swi fikeleriwile ro sungula.

Rhavi ra le Angola ra vika: “Hikwalaho ka ku hiseka ni ku tiyimisela ka vahuweleri, tsima ra ku fambisa Kingdom News No. 36 ri humelele hi ndlela leyi hlamarisaka ensin’wini ya ka hina. Sweswo swi ve tano hambileswi ku nga ni swiphiqo leswi tikaka swa ikhonomi ni nyimpi leyi hambetaka yi kavanyeta mavandlha etikweni hinkwaro. Vanhu vo tala va amukele Kingdom News hi mandla mambirhi loko va nyikiwa yona. Hikwalaho ka sweswo, hi November, rhavi ra Angola ri vike nhlohlorhi leyi nga si tshamaka yi fikeleriwa ya 94 026 ya tidyondzo ta Bibele, ku nga ku engeteleka ka tidyondzo ta 10 000 ku tlula en’hwetini leyi hundzeke.”

Loko Timbhoni ti ya eximutanini xin’wana le Cameroon, ti wise xiputsa xa ti-Kingdom News No. 36, ti nga swi vonanga. Wanuna un’wana la voneke Timbhoni loko ti ri karhi ti fambisa Kingdom News, u vone xiputsa lexi etlhelo ka patu loko a khome ndlela yo ya emasin’wini. U xi tekile kutani a sungula ku fambisa ti-Kingdom News No. 36 teto! U ti fambise kukondza ku sala mune wa tona. Loko vanhu va kombela leta mune, u arile a ku: “A ndzi nge tirheli mahala; leti i ta ndyangu wa mina. Loko Timbhoni ti ta, ti ta mi nyika ta n’wina.”

Le Colombia, Timbhoni ti tlhelele eka wansati la amukeleke Kingdom News No. 36. Wansati loyi u vule leswaku minkarhi hinkwayo a a ala ku vulavula ni Timbhoni ta Yehovha. Kambe, endzhaku ko hlaya Kingdom News No. 36, u xiye leswaku u lahlekeriwa hi swilo leswinene ngopfu. Hiloko a nkhinsama hi matsolo, a kombela leswaku Xikwembu xi n’wi rivalela. Endzhaku ka sweswo, u tihlanganise ni Timbhoni kutani sweswi, u karhi u dyondza Bibele.

Eximutanini xin’wana le Congo (eKinshasa), phorisa leri ambaleke yunifomo ri hlaye Kingdom News No. 36 hi ku lava ku twa leswi yi swi tameleke. Endzhakunyana ri kume Timbhoni kutani ri ti byela leswaku rungula ra yona ri ni matimba naswona ra chavelela. Hiloko ri famba swa xinkarhana kutani ri vuya ri ambale kahle naswona ri khome Bibele hi voko. Ri te: “Ndzi lava ku famba ndzi hangalasa rungula leri na n’wina hikuva i ra nkoka naswona ri fanele ku hangalasiwa hi xihatla!” Timbhoni ti ri hlamusele hi musa leswaku ri fanele ku rhanga hi ku dyondza Bibele. Ri pfumerile naswona dyondzo yoleyo yi famba kahle.

Nhwanyana la vuriwaka Joy u kume Kingdom News No. 36 ehansi ka nyangwa wa yindlu ya yena le Greece. Loko a heta ku yi hlaya, u hatle a bela hahani wa yena riqingho, la nga Mbhoni ya Yehovha. U n’wi byele leswaku rungula leri ri khumbe mbilu ya yena naswona u lava ku bula ni Timbhoni ta Yehovha. Hiloko hahani wa yena a kombela makwerhu wa xisati la nga phayona ro hlawuleka endhawini yoleyo kutani a ya eka nhwanyana loyi. Va hlamarile ku kuma leswaku va tivana. Joy u byele phayona leri leswaku hambileswi a nga ni Bibele, a nga swi koti ku kuma Matsalwa lama vulavulaka hi ndlela leyi a nga swi tlhantlhaka ha yona swiphiqo leswi a langutaneke na swona. U hatle a pfumela ku dyondzeriwa Bibele.

Mbhoni yin’wana le Korea yi fambisele wansati un’wana Kingdom News No. 36, loyi a a dyisa n’wana wa yena wa jaha mbitsi hi leswi a nga Mbhoni ya Yehovha. Endzhaku ka masiku manharhu, Mbhoni leyi yi n’wi endzerile ku ta n’wi hlamusela hi leswi Bibele yi swi vulaka hi Paradeyisi. Wansati loyi u ri tsakerile rungula rero kutani a sungula ku dyondzeriwa Bibele. N’wana wa yena u vule a khavaxele mihloti a ku: “A ndzi pfumeli leswaku manana u sungule ku dyondzeriwa Bibele.” U karhi u endla nhluvuko.

Exikarhi ka tiko ra Liberia, Timbhoni tin’wana a ti ri karhi ti famba hi ximutana ni ximutana ti fambisa Kingdom News, kutani ti lahleka ivi ti hetelela ti fike epurasini leri nga lo tiyimela roxe ekhwatini. Loko Timbhoni ti byela varimi leswaku ti lahlekile, jaha rin’wana ri te: “I moya wa Xikwembu lowu mi tiseke haleno leswaku hi ta kuma swiphephana swa hina.”

Vanhu va le Netherlands va amukele Kingdom News No. 36 hi malwandla. Ku fambisiwe swiphephana leswi tlulaka timiliyoni timbirhi hi ku tsopeta ka tihlo. Rhavi ra le Selters, eJarimani, ri kandziyise swiphephana leswi engetelekeke swa 100 000 kambe mavandlha ma lave leswi engetelekeke. Edorobeni ra Helmond, Mbhoni yin’wana yi byele n’wini wa muti leswaku xiphephana lexi xi karhi xi fambisiwa emisaveni hinkwayo. Hiloko wanuna loyi a ku: “Yimanyana.” Kutani a nghena endlwini ivi a bela munghana wakwe wa le Furwa riqingho ku vona loko leswi muhuweleri a swi vulaka ku ri ntiyiso. U vutise munghana wa yena a ku: “Ndzi endzeriwe hi Mbhoni ya Yehovha naswona yi khome xiphephana lexi yi vulaka leswaku xi karhi xi fambisiwa emisaveni hinkwayo. Xana u xi kumile?” Munghana wa yena u hlamule a ku: “Ina, se ku hundze timinete ta khume ndzi xi kumile.” Hiloko a veka riqingho kutani a tlhelela eka muhuweleri ivi a amukela xiphephana xa yena.

Rhavi ra le Rhaxiya ri amukela papila leri tsakisaka, leri tsariweke hi muntshwa la nga eka ntangha ntlhanu. U tsarile: “Xewani. Ndzi tsake ngopfu loko ndzi kuma xiphephana lexi vulavula hi gidi ra malembe lerintshwa, ebokisini ra ka hina ra poso! Nchumu lowu hi tsakiseke ngopfu elembeni leri i xiphephana lexi mi hi nyikeke xona! Hi kombela mi hi rhumelela rungula leri engetelekeke.”

Tsima ra ku fambisa Kingdom News No. 36 a ri pfunanga vanhu lava tolovelekeke ntsena kambe ri pfune ni Timbhoni hi toxe. Mbhoni yin’wana ya le Saipan yi te: “Ndzi swi tsakele hi mbilu hinkwayo ku fambisa Kingdom News. Ndzi khuvuriwe hi 1998, kutani a ku ri ro sungula ndzi hlanganyela evutirhelini bya muxaka lowu. Byi ndzi khutaze ku ringeta ku chumayela nimadyambu kutani sweswo swi ndzi pfulele ndlela yo vulavula ni vanhu lava engetelekeke. Hikwalaho ka ntirho lowu, ripfumelo ra mina ri tiyisiwile naswona ndzi titwa ndzi ri ekusuhi na Yehovha.”

Timbhoni ti ye ti ya fambisa Kingdom News No. 36 endhawini leyi nga ekule ya Malaita, le Solomon Islands. Endzhaku ko famba tiawara leti tlulaka ntlhanu, ti fike eximutanini xin’wana, lexi mufundhisi wa kwalaho a ti amukeleke a tlhela a kombisa ku tsakela lokukulu. U vule leswaku se ku hundze kaye wa malembe va nga si endzeriwa hi muyimeri wa kereke ya ka vona kumbe va kombiwa leswaku va khathaleriwa. Kambe, vanhu lava nga va tiviki va endle matshalatshala ya ku tsemakanya tintshava leswaku va ta va pfuna ku twisisa leswi Bibele yi swi vulaka. Ku sunguriwe tidyondzo ta Bibele ni mindyangu hinkwayo ya ximutana xexo. Vamakwerhu a va hamba va endzela ximutana xexo endzhaku ka mavhiki man’wana ni man’wana mambirhi kutani ku nga ri khale, tidyondzo ta khume a ti endla nhluvuko lowunene. Mufundhisi yoloye u vule leswaku loko un’wana wa vamakwerhu o sala leswaku a ta va pfuna, ku nga khomeriwa minhlangano ekerekeni ya kwalaho. Sweswi phayona ro hlawuleka ri hambeta ri endzela vanhu volavo. Eka xiviko xo hetelela lexi amukeriweke, muyimeri wa kereke yoleyo u endzele ximutana xexo kutani a byela vanhu va kwalaho leswaku u ta va nyika swakudya loko vo pfumela ku tshika ku dyondza ni Timbhoni ta Yehovha. Kambe, hinkwavo va vule leswaku va nge tshiki ku dyondza Bibele.

Loko Timbhoni tin’wana ti endzele etindhawini ta le kule le Venezuela, ti fambisele muvalangisi wa tona, Kingdom News No. 36, la nga Muindiya la nga Mupemón. Leswi a tsakisiweke hi xiphephana xa yena, u xi hlaye hi ku phindha-phindha. Loko xi neriwa hi mpfula a a xi aneka leswaku xi oma. U kombele swiphephana leswi engetelekeke leswaku a ta swi nyika varikwavo loko a va endzerile.

Timhaka Ta Swa Le Nawini Eka Lembe Ra Ntirho

Ivailo Stefanov, u ale ku ya enyimpini le Bulgaria hi leswi ripfalo ra yena a ri nga n’wi pfumeleli. Hikwalaho, u gweviwe lembe ni hafu ekhotsweni. Hikokwalaho ka leswi ntshunxeko wa yena wa vukhongeri wu nga xiximiwangiki, Makwerhu Stefanov u hundzisele nandzu lowu eHubyeni ya le Yuropa ya Timfanelo ta Vanhu. Loko huvo yi tivisa leswaku ku fanele ku kaneriwa hi nandzu wolowo, valawuri va le Bulgaria va endle malunghiselelo ya leswaku nandzu wolowo wu suriwa, kutani sweswo swi endla leswaku Makwerhu Stefanov a rivaleriwa nandzu wa yena ku katsa ni milandzu ya Timbhoni tin’wana leti a ti voniwe nandzu lowu fanaka ni wa yena. Hi May 3, 2001, huvo yi xi amukerile xiboho xexo. Valawuri va le Bulgaria va tlhele va pfumela ku hunguta nkarhi wa xigwevo lexin’wana, lexi munhu a a xi kuma loko a ale ku ya enyimpini, lexi nkarhi wa xona a wu phindhiwe kambirhi loko wu pimanisiwa ni wa ku sindzisiwa ku ya enyimpini.

Le Quebec, eCanada, doroba ra Blainville ri simeke nawu-mbisi lowu vulaka leswaku vanhu lava fambaka hi yindlu ni yindlu hi timhaka leti khumbanaka ni vukhongeri, va fanele va rhanga va kuma mpfumelelo. Mpfumelelo wa kona a wu lava leswaku ntirho wo famba hi yindlu ni yindlu wu fanele wu endliwa ku sukela hi Musumbhunuku ku ya fika hi Ravuntlhanu, wu teka tin’hweti timbirhi naswona wu nge pfuxetiwi ku fikela loko ku hundze tin’hweti ta 12. Hi April 17, 2001, huvo leyi tlakukeke ya le Quebec yi vule leswaku nawu-mbisi wolowo a wu tirhi evutirhelini bya le rivaleni lebyi endliwaka hi Timbhoni ta Yehovha. Muavanyisi u vule leswaku Timbhoni ta Yehovha a ti katseki emhakeni ya ku kuma mpfumelelo naswona ntirho wa tona wa vukhongeri wa ku famba hi yindlu ni yindlu a wu pimeriwanga tiawara, masiku, tin’hweti kumbe malembe. U vule leswaku vutirheli bya Timbhoni ta Yehovha i “ntirho wa Vukreste lowu endleriwaka ku pfuna vanhu” naswona u kume leswaku minkandziyiso ya tona “ya pfuna, yi vulavula hi timhaka to kota vukhongeri, Bibele, swidzidzirisi, vundzendzele, dyondzo ya vantshwa, swiphiqo swa vukati ni ku dlaya vukati.” Muavanyisi u vule leswaku ku pimanisa Timbhoni ni vaxavisi, i “ndzhukano, i ku tiyisa ehansi, i ku ti twisa ku vava ni ku ti poyila.”

Hi February 22, 2001, Huvo leyi Tlakukeke ya le Tbilisi, eGeorgia, yi endle xiboho xa ku sula ku tsarisiwa ka tinhlangano timbirhi ta le nawini, leti tirhisiwaka hi Timbhoni ta Yehovha ta kwalaho: ku nga Union of Jehovah’s Witnesses of Georgia na Representation of the Watch Tower Society in Georgia. Huvo leyi yi swi veke erivaleni leswaku xiboho lexi a xi nga yirisi ntirho wa Timbhoni ta Yehovha. Ku ri na sweswo, Timbhoni ta Yehovha ti nga ya emahlweni ni mintirho ya tona ya vukhongeri, ku katsa ni ku khoma minhlangano, ku amukela minkandziyiso leyi humaka ematikweni ya le handle ni ku hirha kumbe ku kuma tindhawu leti vitaniwaka hi vito ra tona. Hambiswiritano, vanhu va vukhongeri lava hisekelaka etlhelo va swi honisile leswi huvo yi swi vuleke kutani va ya emahlweni ni minhlaselo ya tihanyi, leyi nhlangano ya timfanelo ta vanhu yi yi hlamuseleke tanihi hi “ku fuma hi tihanyi.” Hi June 29, 2001, Timbhoni ta Yehovha ti yise xivilelo eHubyeni ya le Yuropa ya Timfanelo ta Vanhu, ti rila hi leswi hulumendhe yi nga endliki nchumu hi madzolonga lama nga lawulekiki, kutani hi July 2, huvo yi lerise leswaku xivilelo lexi xi yimeriwa hi milenge. Lexi tsakisaka hi leswaku hi May 30, 2001, Ndzawulo ya swa Mindzilakana eGeorgia yi ntshunxe kwalomu ka 20 wa tithani ta minkandziyiso ya hina ya Bibele leyi a yi pfaleriwe swi nga ri enawini hi March 14, 2001. Minkandziyiso leyi yi hatle yi yisiwa emavandlheni ya le Georgia.

Hi 1997, Huvo ya Milawu ya Muganga ya le Berlin, eJarimani, yi ale ku nyika Timbhoni ta Yehovha mpfumelelo wa le nawini wa leswaku ti tekiwa tanihi nhlengeletano ya le nawini. Loko huvo yi nyika xivangelo xa ku ala ka yona yi vule leswaku Timbhoni ta Yehovha a ti tshembekanga hi ku helela eka Mfumo hi leswi ti nga hlanganyeliki eka nhlawulo wa swa tipolitiki. Timbhoni ti endle xirilo emhakeni leyi. Hi December 19, 2000, Huvo ya Milawu ya Muganga ya le Jarimani yi vule leswaku a swi kali swi lava leswaku vutshembeki byo tano byi vonaka. Hambiswiritano, nandzu wolowo wu tlheriseriwe etihubyeni ta miganga leswaku ti ya kambisisa xikombelo xa ku lava ku tekiwa tanihi nhlengeletano ya le nawini, enkarhini lowu, ku kambisisiwa loko Timbhoni ta Yehovha ti tlula milawu ya timfanelo ta vanhu. Sweswi nyingiso wu yisiwe eka leswi ti swi pfumelaka etimhakeni leti khumbaka ngati, ku kurisa vana, ku susa vanhu eku hlanganyeleni ni vuxaka emindyangwini.

Ku ta fikela sweswinyana, Timbhoni leti tlulaka 3 500 eGreece a ti ri ni milandzu ya ku tlula nawu hi leswi ti tshameke ti pfaleriwa hikwalaho ka vukala-tlhelo bya tona. Milandzu yo tano a yi sivela Timbhoni ku va ti nga thoriwi emintirhweni ya tiko, eminhlanganweni ya ta vuhlayiseki ni le tibanki. Tin’wana a ti nyikiwanga ni mpfumelelo wa ku tirha mintirho yo karhi. Nawu lowa ha ku simekiwaka eGreece wu tiyisekisa leswaku Timbhoni teto ti nga ha tekiwi tanihi leti nga tshama ti tlula nawu. A swi kanakanisi leswaku xiboho lexinene lexi endliweke hi Huvo ya le Yuropa ya Timfanelo ta Vanhu eka nandzu wa Thlimmenos v. Greece, emhakeni ya ku ala ka munhu un’we ku sindzisiwa ku va socha, xi pfule ndlela ya ku simekiwa ka nawu lowu lowuntshwa.

Huvo ya Muganga ya le Kobe eJapani, yi endle xiboho lexinene hi March 30, 2001, eka nandzu lowu a wu khumba Mbhoni ya Yehovha. Makwerhu wa xisati u tlhakisiwile kutani a sindzisiwa ku tshama masiku ya 17 hi xikongomelo xa leswaku a “hundzuka” eka tidyondzo ta yena ta vukhongeri. Huvo yi vule leswaku muhehli—ku nga mufundhisi wa kereke ya Baptist—u bohe kungu ni khale ka nuna wa makwerhu loyi swin’we ni swirho swa ndyangu wa nuna, leswaku va hehla makwerhu loyi hi mavunwa. Muhehli u lerisiwe ku n’wi hakela ti-yen ta 400 000 (R32 100).

Huvo leyi Tlakukeke ya le Romania yi vule handle ko tipfinyinga eka swiboho swimbirhi leswaku Nhlengeletano ya Vukhongeri ya Timbhoni ta Yehovha i vukhongeri lebyi nga enawini nileswaku byi fanele ku nyikiwa timfanelo hinkwato ta nawu leti nyikiwaka vukhongeri byin’wana. Matsalana wa Mfumo wa Timhaka ta Vukhongeri u ringete ku hundzula swiboho sweswo kambe a ba ehansi. Hi April 2, 2001, Huvo leyi Tlakukeke yi yime hi leswi yi swi vuleke eka swiboho swa yona swo sungula. Ku ta fikela sweswi, Matsalana wa Mfumo wa Timhaka ta Vukhongeri a nga si swi amukela hi ku helela leswaku Timbhoni ta Yehovha ti tsarisiwe ximfumo, hambileswi Huvo leyi Tlakukeke yi n’wi leriseke ku endla tano.

Hi February 23, 2001, muavanyisi u hetelele a wu surile nandzu wa leswaku Timbhoni ta Yehovha ti yirisiwa eMoscow, le Rhaxiya, endzhaku ka loko wu teke malembe ya tsevu wu ri karhi wu kambisisiwa ni malembe manharhu wu ri karhi wu tengiwa. Hambiswiritano, ntsako wa vamakwerhu a wu tlhaveriwanga hi dyambu hikuva hi May 30, 2001, Huvo ya Doroba ya le Moscow yi sule xiboho xa tihuvo letitsongo kutani yi lerisa leswaku nandzu wolowo wu tlhela wu tshameriwa ehansi. Leri ku ta va ku ri ra vutsevu ku sukela hi 1996 leswaku Timbhoni ta Yehovha ti tiyimela eka swihehlo leswi fanaka swa mavunwa, leswi nga riki na xisekelo.

Xiboho lexi endliweke hi Huvo leyi Tlakukeke ya le Pennsylvania eUnited States, hi February 21, 2001, xi nyike muvabyi matimba yo tihlawulela leswi nga endliwaka emirini wa yena xi tlhela xi nyika magqweta ya ta rihanyo matimba lama engetelekeke. Xiboho xa kona a xi khumba nandzu wa Maria Duran, loyi a swi vuleke hi ku phindha-phindha leswaku a nge pfuki a pfumele ku pomperiwa ngati. Hambileswi Maria a tekeke magoza ya ku tisirhelela, nuna wa yena la nga riki Mbhoni u seketeriwe hi madokodela ya Maria ni xibedlhele leswaku va kuma xileriso xa huvo, xa leswaku nuna wa yena a va muyimeri wa yena eka swiyimo swa xitshuketa, hambileswi Maria a vuleke hi ku kongoma leswaku u hlawule muyimeri la nga mupfumeri-kulobye. Huvo leyi tlakukeke yi xi surile xileriso xexo xa huvo, yi vula leswaku hambiloko munghana wa vukati, maxaka kumbe madokodela ma kanetana ni muvabyi, swileriso swa muvabyi malunghana ni vutshunguri ni ku tihlawulela muyimeri, swi fanele swi xiximiwa.

Xilaveko Xa Tiholo Ta Mfumo Leti Engetelekeke

Ematikweni yo tala a swi tika ku aka Tiholo ta Mfumo naswona a swi tala ku teka nkarhi wo leha. Mavandlha man’wana a ma heta tin’hweti to hlaya—kumbe malembe—ma hlanganyela emiakweni leyi hirhiweke loko tiholo ti ri karhi ti akiwa. Etikweni rin’wana ra le Afrika, xinyenyana lexi vuriwaka hokwe xi ake xisaka etimbalelweni ta Holo ya Mfumo leyi a yi nga si hela. Ku nga ri khale xi sungule ku yimbelela tinsimu ta Mfumo naswona vanhu a va nga ri na mhaka na xona. Ntirho wo aka a wu nonoka lerova xinyenyana lexi xi sungula ku encenyeta mufambisi wa Dyondzo ya Xihondzo xo Rindza, hambi ku ri ku vitana vamakwerhu hi mavito! Eku heteleleni, Holo ya Mfumo yi herile kutani xi boheka ku rhurha.

Namuntlha, Tiholo ta Mfumo ti hetiwa hi rivilo lerikulu hi leswi ku nga ni ndlela leyintshwa leyi hlamarisaka yo aka. Ematikweni yo tala lama ha hluvukaka, swi teka mavhiki manharhu kumbe ya mune leswaku Tiholo ta Mfumo ti akiwa ti tlhela ti nyiketeriwa! Eka lembe ra ntirho ra n’wexemu ku akiwe Tiholo ta Mfumo letintshwa ta 1 074 eAfrika ntsena—ku nga xiringaniso xa kwalomu ka mune wa tona hi siku!

Entiyisweni pakani ya ndlela leyintshwa yo aka Tiholo ta Mfumo yi ni swikongomelo swimbirhi. Xo sungula i ku pfala xilaveko lexi nga kona sweswi xa tiholo. Rhavi ra le Afrika Dzonga ri tsale ri ku: “Leri i tsima leri hlamarisaka leri hi tshembaka leswaku ri ta hi pfuna ku aka Tiholo ta Mfumo to tala ematikweni lama ti lavekaka hi mahlo-ngati.” Xa vumbirhi, i ku tiyiseka leswaku xilaveko xa Tiholo ta Mfumo enkarhini lowu taka xi ta fikeleriwa, hi ku sungula ku letela Timbhoni ta kwalaho leti nga ni vuswikoti. Hi xikombiso, le Benin, ntirho wo aka wu khathaleriwa hi vamakwerhu va kwalaho hi ku helela naswona va ta swi kota ku langutana ni xilaveko xa Tiholo ta Mfumo enkarhini lowu taka.

Tindzawulo ta ntlhanu ta Swifundzha to Aka Tiholo ta Mfumo ti pfuneta ku hlela ntirho wo aka emarhavini ya le Yuropa Vuxa, Afrika, Asiya, Oceania, Amerika Xikarhi na Dzonga ni le swihlaleni swa Kharibiya, hi ku pfumelelana ni nkongomiso wa nhlengeletano naswona ti khomisane ni Ndzawulo yo Mpfampfarhuta ni yo Aka ya le Brooklyn. Tindzawulo leti ti tirhisana swinene ni Tikomiti ta Rhavi leswaku ti ti pfuna ku yi tirhisa hi xitalo minkongomiso ni malunghiselelo lama nga kona sweswi. Hi xikombiso, ku simekiwe Ndzawulo yo Aka Tiholo ta Mfumo erhavini rin’wana ni rin’wana leswaku yi kongomisa ntirho wo aka ensin’wini ya rona. Ndzawulo leyi yi tlhela yi pfuna mavandlha loko swi ta emhakeni yo hlawula ndhawu leyi ku nga ta akiwa eka yona naswona yi mpfampfarhuta tipulani leti pfumelelanaka ni milawu yo aka ni swo aka hi swona endhawini yoleyo.

Ematikweni ya 92 lama nga ni vusweti lebyikulu ni lama kayivelaka vatirhi lava nga ni vutshila byo aka, ku rhumeriwe vatirhi va ku tirhandzela lava tlulaka 4 000, lava nga ta tirha nkarhi wo leha ni lava nga ta tirha swa xinkarhana, lava sweswi va vumbaka Mintlawa yo Aka Tiholo ta Mfumo ya 352. Lexi pfuneke leswaku mintlawa leyi yi humelela i ku tisiwa ka vamakwerhu lava akaka Tiholo ta Mfumo, lava nga xiphemu xa ntirho wo hlawuleka wa nkarhi hinkwawo, lowu pfulekelaka vamakwerhu vo karhi lava fanelekaka ematikweni yo karhi. Ku engetela kwalaho, vamakwerhu va 152 lava humaka ematikweni man’wana va letela vamakwerhu va ndhawu leyi va averiweke eka yona leswaku va rhangela etsimeni ro aka. Leswi ku aka Holo ya Mfumo ku nga ntirho wa vandlha hinkwaro, swirho swa vandlha swi tinyiketela ku endla vunyingi bya ntirho wolowo.

Xana vanhu va angurisa ku yini etsimeni leri ro aka lerintshwa? Le Trujillo, eVenezuela, ka ha ku akiwa Holo ya Mfumo yo sungula eSara Linda. Muhuweleri un’wana u vule leswi a ri karhi a khavaxele mihloti: “Swa tsakisa ku vona leswaku Yehovha a nga hi rivalanga. Phela doroba ra ka hina a ri kona ni le mepeni!”

Makwerhu wa xisati le Rio de Janeiro, eBrazil, u susumeteleke ku tsala a ku: “Ku hele khume ra malembe ndzi famba mune wa tikhilomitara ku ya eminhlanganweni, ndzi tsemakanya xibulohwana lexi chavisaka, niloko ndzi tikile. Eku heteleleni, leswi a ndzi swi navela swi hetisekile. Ku akiwe Holo ya Mfumo endhawini ya ka hina! Swichudeni swo tala swa Bibele swi sungule ku va kona eminhlanganweni. Tatana loyi a nga tshama a dyondzeriwa ivi a sungula ku ndzi kaneta hi ku famba ka nkarhi, u sungule ku hlanganyela nakambe naswona a nga si tshama a xwa ku sukela loko holo leyi yi nyiketeriwile. Vhiki leri u sungule ku dyondzeriwa nakambe.” Munhu un’wana la nga riki Mbhoni la voneke leswi u ri: “Ndzi ni malembe ya 60 hi vukhale kambe a ndzi si tshama ndzi vona nchumu lowu fanaka ni lowu! Timbhoni ti tirha swin’we hi ku hatlisa naswona ti tsakile. Ndzi thoriwe ku veka xitina eka masipala wa doroba naswona loko ntirho wu nga heli, u ta twa munhu un’wana a ku: ‘Kumbexana hi fanele ku vitana Timbhoni ta Yehovha ti ta hi pfuna!’”

Nkulu un’wana wa le Ukraine u ri: “Hi kote ku aka Holo ya Mfumo leyi hi ringaneke hi n’hweti yin’we ntsena, hikwalaho a ku hundzanga nkarhi wo leha hi ri ekule ni mindyangu ya hina swin’we ni vutihlamuleri bya vandlha.” Makwerhu un’wana wa xisati wa kwalaho u engetele a ku: “Hi tsake ngopfu. Hi tivonele hi ya hina ndlela leyi Yehovha a pfunaka vanhu va yena ha yona. Enkarhini lowu hundzeke, a hi nga lorhi leswaku hi ta kala hi va ni Holo ya Mfumo leyi nga ya hina, hi leswi hi nga swisiwana.”

Le Malawi, vanhu lava tsakelaka va swi tsakela swinene ku hlanganyela na hina loko ku ri ni ndhawu leyi fanelekaka ya ku hlanganyela eka yona. Vandlha ra Nafisi ri ri: “Sweswi hi ni Holo yo saseka ya Mfumo leyi nyikelaka vumbhoni lebyinene. Hikwalaho ka yona, hi kota ku sungula tidyondzo letintshwa ta Bibele loko hi ri karhi hi chumayela. Vanhu va le ku hlamaleni hinkwako. Va bula hi Holo ya hina ya Mfumo eswikolweni, entirhweni kumbe emakaya ya vona.”

Varhangeri va tiko le Mozambhiki na vona va yi tsakela swinene ndlela leyi ya ku akiwa ka Tiholo ta Mfumo. Vamakwerhu va ye va ya kombela ndhawu yo aka Holo ya Mfumo ehosini yin’wana. Loko yi va nyika mpfumelelo yi te: “Ndzi twile hi ku akiwa ka Tiholo ta Mfumo etindhawini tin’wana kutani ndzi tivutisa leswaku ha yini yi nga ri kona endhawini ya mina. Ndza mi nkhensa Timbhoni ta Yehovha ku va mi kunguhate ku aka Holo ya Mfumo ya la ka hina!”

Xana matsima lama hlelekeke kahle ma wu khumbisa ku yini moya wa ku tinyiketela evandlheni? Un’wana wa vaaki eZimbabwe, u ri: “Endzhaku ko famba mpfhuka wo leha empfuleni, hi fike endhawini ya le makaya, laha a ku ta akiwa kona Holo ya Mfumo. Hi kume vamakwerhu va hi rindzile ehansi ka murhi, va ri karhi va orha ndzilo. Hambileswi a ku na mpfula, va hi pfuxele va ri karhi va n’wayitela. Vamakwerhu va 60 evandlheni rero va lunghiselele ku ta ka hina hi ku cela masungulo ya muako. Ntirho lowu va wu endle tolo ka kona, va sungula hi awara ya mune nimixo va ya heta hi awara ya tsevu nimadyambu.”

Etikweni leri fanaka, Vandlha ra Zongoro a ri nga ri na yona Holo ya Mfumo. Nathan Muchinguri u ve evandlheni rero ku sukela loko a khuvuriwa hi 1924. U hete malembe yo tala a ri karhi a hundzuluxela minkandziyiso ya Bibele hi Xishona. Leswi a a nga tshami eBethele, rhavi ri lave ku n’wi pfuna hi mali yo tihanyisa, kambe u yi arile. Nilokoswiritano, u vule leswaku mbilu ya yena yi nga rhula loko o hlanganyela eHolweni ya Mfumo a nga si fa a ya etilweni. Hi April 8, 2001, Makwerhu Muchinguri la nga ni malembe ya 93 hi vukhale u vone ku hetiseka ka leswi a a swi navela. Vandlha ra Zongoro ri sungule ku hlanganyela ro sungula eHolweni ya rona ya Mfumo. A ku ri siku ra ku tlangeriwa ka Xilalelo xa Hosi.

Ku sukela loko nongonoko lowu wu sungula hi November 1999, ku akiwe Tiholo ta Mfumo letintshwa ta 2 097 ematikweni ya 92—ku nga xiringaniso xa tiholo ta 22 hi vhiki! Minyikelo ya ku tirhandzela ya vamakwerhu emisaveni hinkwayo yi endla leswaku “ku ringana-ringana” loku ku koteka, leswaku ‘vandlha leri nga ni swo tala ri nga kumi swo tala ngopfu naswona vandlha leri nga ni switsanana ri nga kumi leswitsanana ngopfu.’ (2 Kor. 8:14, 15) Xana Yehovha wa ma katekisa matshalatshala lama endliwaka emisaveni hinkwayo? Xiya leswi: Endzhaku ka n’hweti loko ku akiwe Holo ya Mfumo leyi fanelekaka eka to tala ta tindhawu leti, nhlayo ya lava vaka kona eminhlanganweni yi phindheka kambirhi.

Tivhidiyo Tinharhu Leti Kombisaka Vutshunguri Ni Vuhandzuri Leswi Nga Tirhisiki Ngati

Ndzawulo leyi endlaka Tikhasete ni Tivhidiyo yi tirhisane ni vamakwerhu va le Jarimani ni va le matikweni man’wana ku humesa tivhidiyo tinharhu, leti kombisaka ndlela leyinene ni leyi humelelaka ya ku tshungula ni ku handzula handle ko tirhisa ngati. Eka tivhidiyo toleto tinharhu, madokodela lama tivekaka ya ta vuhandzuri ma kombise ndlela leyinene leyi munhu a nga handzuriwaka ha yona ku nga tirhisiwanga ngati. Vito ra vhidiyo yo sungula hi leri nge Transfusion-Alternative Strategies—Simple, Safe, Effective. Ngopfu-ngopfu a yi endleriwe madokodela ni lava va ha dyondzelaka ta vutshunguri. Ku tirhisiwe swifaniso swa khompyuta leswi tshukatshuka, ku kombisa ndlela leyi swiaki swa ngati swi tirhaka ha yona.

Loko vhidiyo yo sungula yi hela, a ku ri nkarhi wa leswaku yi faneleka ku nghenela mphikizano wa vu-34, lowu khomiwaka lembe ni lembe, lowu vuriwaka Nkhuvo wa Tifilimi ni Tivhidiyo wa Misava Hinkwayo eUnited States. Tifilimi ni tivhidiyo leti ngheneleke mphikizano lowu a ti ri 1 500, ti endliwe ematikweni ya 33. Vhidiyo leyi, leyi nge Transfusion Alternatives yi tekiwe yi ri ya xiyimo xa le henhla eka swiyenge swinharhu. Eka swiyenge swimbirhi—ku nga xiyenge xa ku Kambisisiwa ka Rungula ni xa Madyondziselo ya Xiyimo xa le Henhla—vhidiyo leyi yi teke xiyimo xa vumbirhi kutani yi nyikiwa sagwadi leri vuriwaka Silver Screen Award. Eka xiyenge xa vunharhu, ku nga xa Timhaka ta Sweswinyana, vhidiyo leyi yi teke xiyimo xo sungula kutani yi nyikiwa sagwadi leri vuriwaka Gold Camera Award. Masagwadi lawa ma kombisa leswaku vakamberi va tifilimi va wu vona ntikelo, ku kongoma ni vutshila bya vanhu lava endleke vhidiyo yoleyo, kutani sweswo swi endla leswaku rungula ra yona ri va ni ntikelo.

Vhidiyo ya vumbirhi hi leyi nge Transfusion-Alternative Health Care—Meeting Patient Needs and Rights. Yi endleriwe vahlengeleti va mahungu ya swa vutshunguri, vatirhela-mfumo va ta rihanyo, vapfuni va tiko ni lava tirhaka etihubyeni. Vhidiyo leyi yi hlamusela ndlela leyi vavabyi va faneleke va khathaleriwa ha yona hi nkarhi lowu fanaka ku nga honisiwi timfanelo ta vona ta le nawini. Ku engetela kwalaho, yi kombisa ndlela leyi vuhandzuri lebyi nga tirhisiki ngati byi chipeke ha yona.

Vhidiyo ya vunharhu hi leyi nge No Blood—Medicine Meets the Challenge. Leswi vhidiyo leyi yi endleriwe vanhu lava tolovelekeke, ana se yi kombisiwe eka switichi swa thelevhixini le United States. A swi kanakanisi leswaku marito ya swibumabumelo lama vuriweke hi vanhu lava dyondzekeke, lava nga riki Timbhoni, lava ku vulavuriweke na vona eka vhidiyo leyi, ma ta va mpfuno lowukulu eku dyondziseni ka vanhu hi nkoka wa vuhandzuri lebyi nga tirhisiki ngati ni ku hunguta mavonelo yo biha ya vanhu lava nga riki na vutivi.

Marhavi Lamantshwa Ma Tisa Ku Dzuneka Eka Xikwembu

Swiviko leswi landzelaka i swa ku nyiketeriwa ka marhavi ya ntlhanu eka lembe ra ntirho ra n’wexemu. A hi tekeni riendzo hi mahlo ya mianakanyo, hi rhanga eAmerika Dzonga, laha ku nyiketeriweke miako leyintshwa ya rhavi eVenezuela ni le Uruguay. Kutani hi ta hundzela eUkraine, le Yuropa Vuxa, laha ku hundzeke malembe lama tlulaka 50 ntirho wa Timbhoni ta Yehovha wu yirisiwile. Hi ta kongoma eMalawi, edzongeni wa Afrika, laha Timbhoni ti tiyiseleke malembe yo tala ti yirisiwile ti ri karhi ti xanisiwa. Hi ta ya gimeta riendzo ra hina eBarbados, ku nga xihlala xo saseka le Kharibiya.

VENEZUELA: Hi March 3, 2001, vaendzi va kwalomu ka 1 600, lava humaka ematikweni ya 22 a va hlengeletane ejarateni leri sasekisiweke, leri nga 80 wa tikhilomitara ku suka entsindza, ku nga Caracas, leswaku va ta va kona eku nyiketeriweni ka muako lowuntshwa wa rhavi. Hi n’hweti ya March ku va ku omile etikweni naswona Tintshava ta Aragua a ti ome ti tlhela ti kwalala, kambe ritlangi ni mirhi ya ncindzu leyi rhendzeleke miako ya rhavi a swi ri swa rihlaza hikwalaho ko cheletiwa hi mati lama humaka eswihlobyeni swa kwalaho. Vapfhumba—lava ambaleke kahle naswona vo tala va hakarhe tikhamera—a va ri karhi va rhendzeleka ni rivala, va nghena ni ku huma emiakweni, va hlamarile naswona va tsakile.

Rhavi ro sungula ra le Venezuela ri khanguriwe hi September 1946 ka ha ri ni vahuweleri va 19 ntsena lava a va chumayela mahungu lamanene etikweni rero. Eka hafu ya lembe-xidzana leyi landzeleke, miako yo hlayanyana ya rhavi leri yi kurisiwile hi leswi ku veke ni xilaveko xa leswaku yi kurisiwa. Sweswi rhavi leri lerintshwa ri khathalela vahuweleri va 88 541 va mahungu lamanene eVenezuela.

Vo tala lava veke kona loko ku nyiketeriwa rhavi leri, va hoxe xandla eku akiweke ka rona loku tekeke malembe ya tsevu. Makwerhu un’wana la humaka etikweni rin’wana, la hlanganyeleke eku akeni u te: “A swi khutaza ku vona leswaku vamakwerhu a va tiyimisele ku famba mpfhuka wo leha leswaku va ta hlanganyela eku akeni. Hi xikombiso, vamakwerhu va vandlha rin’wana va hirhe bazi kutani va suka hi 11:00 p.m., va famba vusiku hinkwabyo leswaku va ta fika hi 6:00 a.m., hiloko va fihlula ivi va tirha na hina siku hinkwaro kutani va tlhela va teka riendzo ra tiawara ta nkombo va muka.” Vunakulobye loko ka ha akiwa a byi tsakisa hikuva vamakwerhu a va tirha swin’we hi vun’we.—Ps. 133:1.

Gerrit Lösch wa Huvo leyi Fumaka u nyikele nkulumo yo nyiketela rhavi leyi nge “Ku Andza Ku Yisa Ku Dzuneka Eka Yehovha.” Hi siku leri tlhandlamaka, nhlayo leyikulu ya vanhu va kwalomu ka 113 260, lava a va katsa Timbhoni ni vanhu lava tsakelaka, lava a va huma etindhawini hinkwato ta tiko, a va hlengeletane edorobeni ra Valencia leswaku va ta yingisela nongonoko wun’wana lowu tsakisaka, ku katsa ni nkatsakanyo wa ku nyiketeriwa ka rhavi.a

URUGUAY: “Mawaku vanhu lava tsakisaka swonghasi! Kunene swa tsakisa ku vona vavanuna ni vavasati vo tarisa xileswi, va ri karhi va tirha hi matimba va tsakile swinene. Sweswo swi koteka ntsena loko vanhu va ri ni langutelo lerinene naswona va nga lavi ku vuyeriwa hi swilo leswi vonakaka. Ha mi bumabumela, khomisani xisweswo!” Lawa i man’wana ya marito lama vuriweke hi vanhu vo tala lava endzeleke muako wa rhavi ra le Uruguay loko wa ha akiwa.

Moya wa ku hiseka ni wa ntirhisano, lowu kombisiweke hi Timbhoni ta Yehovha loko ka ha akiwa, wu kombisiwe ni le malembeni yo tala lama hundzeke loko vanhu va Yehovha va ri karhi va endla ntirho wa vona wo dyondzisa. Emalembeni ya 60 lama hundzeke, Timbhoni a ti nga talanga eUruguay naswona a ti katsa ni maphayona ya tsevu lama nga Majarimani, lama a ma famba-famba etikweni hi swikanyakanya. Sweswi, Timbhoni ta Yehovha eUruguay ti vumba nhlengeletano leyi tiyeke, leyi tivekaka ni leyi xiximekaka, naswona muhuweleri un’we u langutane ni vaaki va 287 kasi hi xiringaniso vandlha ha rin’we ri ni vakulu va ntlhanu. Laha ku nga ni ku andza ku tlhela ku va ni xilaveko xo andzisa miako ya rhavi.

Loko ku nyiketeriwa rhavi hi March 31, 2001, ku nkhensiwe Timbhoni to tala leti nyiketeleke hi vutshila ni ntokoto wa tona eka muako lowu. Nongonoko wa ku nyiketela rhavi wu katse ni ku vulavurisana ni khale ka varhumiwa lava nga tshama va tirha eUruguay. Va tile va huma ematikweni ya le kule leswaku va ta va kona loko ku nyiketeriwa rhavi leri. Makwerhu Lösch u nyikele nkulumo ya ku nyiketeriwa ka rhavi. U kandziyise leswaku xikongomelo-nkulu xa ntirho wa ku chumayela i ku tisa ku dzuneka ni ku vangama eka Yehovha.b

UKRAINE: Se ku hundze malembe lama tlulaka 110 ku ri ni vachumayeri va mahungu lamanene eUkraine. Hambiswiritano eka makume ya malembe lama hundzeke ku ve ni ku andza ka xihatla. Ku andza ka nhlayo ya vahuweleri hi tiphesente ta 530 hi va-1990 ku endle leswaku ku va ni xilaveko xa xihatla xo aka rhavi. Leswaku ku fikeleriwa xilaveko lexi, ku hlawuriwe ndhawu yo saseka ya le matiko-xikaya leyi nga kwalomu ka tikhilomitara ta ntlhanu en’walungwini wa Lvov leswaku ku ta akiwa rhavi. Muako wolowo wu ni makamara ya 104, tihofisi ta manguva lawa, khixi, ndhawu yo hlantswela, ndhawu yo lunghisela mimovha ni leyi ku hlayisiwaka tibuku eka yona.

Malembe mambirhi ni tin’hweti tinharhu endzhaku ka loko vamakwerhu va nyikiwe mpfumelelo wo aka, va hundzule ndhawu leyi a yi ri kampa ya vantshwa yi va muako wo saseka wa rhavi. Muako lowu wu akiwe ekhwatini leri vamakwerhu a va khomela minhlangano eka rona loko ntirho wa ha yirisiwile.

Valawuri va kwalaho va lave leswaku pato leri yaka erhavini ri endliwa hi switina. Vamakwerhu va hirhe khampani ya kwalaho leswaku yi endla ntirho wolowo, va yi byela leswaku pato rero leri leheke timitara ta 1 200, ri fanele ri va ri herile eku heleni ka October 2000. Xivangelo hi leswaku hi ntolovelo gamboko yi sungula ku na hi November. Khampani leyi yi tsandzekile ku heta ntirho wolowo hi nkarhi lowu va pfumelelaneke ha wona. Kambe, leswi maxelo a ma ha ri manene leswaku pato ri akiwa, vamakwerhu va endle xiboho xa ku pfuna khampani leyi ku hetisa ntirho lowu. Munhu un’wana ni un’wana u tirhe hi matimba naswona eku heteleleni hi Mugqivela, December 16, 2000, pato ri herile. Vusiku byebyo ndhawu yoleyo yi funengetiwe hi gamboko. Loko u vutisa vaaki va kwalaho leswaku ha yini xixikana xa lembe rero ra 2000 a xi kufumela xi tlhela xi leha hi ndlela leyi nga tolovelekangiki, va hlamula va ku: “Hikuva Timbhoni ta Yehovha a ti fanele ti heta ku endla pato.”

Rhavi leri ri nyiketeriwe hi May 19, 2001. Vamakwerhu lava humaka ematikweni lama tlulaka 35 va ve kona enongonokweni lowu, laha tinkulumo ta kona ti nyikeriweke hi Theodore Jaracz na Gerrit Lösch va Huvo leyi Fumaka. Hi siku leri landzelaka vanhu va 72 023 a va hlengeletane eswitediyamu leswikulu ngopfu eLvov ni le Kiev ku ta yingisela nongonoko wo hlawuleka. Vo tala lava tirheke makume ya malembe loko ntirho wa ha yirisiwile a va ri kona. A va tsakile ku vona rhavi ro sasekisa xileswi, leri nga ta yisa xichavo ni ku dzuneka lokukulu eka Yehovha.c

MALAWI: Loko dyambu se ri rhengile hi Mugqivela wa May 19, 2001, Timbhoni ta le Malawi leti tlulaka 2 200 ti hlengeletanile ni vaendzi va 200 lava humaka ematikweni ya 21, ehansi ka ndzhuti lowu endliweke hi ku dzima timhandzi to leha ta mibiligomu ivi ku fuleriwa hi misengele ni byanyi lebyi omeke. Loko se ku mphimerile, a swi nga olovi ku vona marito ya buku ya tinsimu loko ku yimbeleriwa risimu ro pfala. Muyimbelerisi u yime eplatifomo yo saseka, a rhangela vayingiseri loko ku yimbeleriwa Risimu ra 56 hi mayimbelelelo ya la Afrika—ku nga landzeriwi khasete ya tinsimu. Vayingiseri a va nga tirhisi tibuku ta tinsimu; a va tiva marito ya risimu hi nhloko. Sweswo swi khumbe mintlhaveko ya vaendzi lava humaka ematikweni man’wana loko va yingisela malandza lawa yo tshembeka ya Yehovha, lawa yo tala ya wona ma nga ni malembe ya 40 kumbe ku tlula, ma khuvuriwile ni lama xanisiweke hikwalaho ka ripfumelo ra wona.

Loko vamakwerhu va ri karhi va valanga miako ya rhavi mixo wolowo, va sungule ku yimbelela tinsimu ta Mfumo xikan’we ni ku xeweta munhu un’wana ni un’wana loyi a va hlangana na yena. Emahlweni ka sweswo, vatirhela-mfumo va le rivaleni ra swihaha-mpfhuka va pfumele ku tlanga Vholumo 1 ya Kingdom Melodies eka xikurisa-marito xa vona, leswaku ku amukeriwa vaendzi lava humaka ematikweni man’wana. Kunene koloko ku ve ku amukeriwa hi malwandla ka le tilweni! Vuyimbeleri byebyo bya ha tlangiwa ni sweswi erivaleni rero ra swihaha-mpfhuka.

Sébastien Johnson, loyi a a ri mufamberi wa marhavi eMalawi, u vutise xivutiso lexi nge: “Xana U Tikombisa U Ri La Tlangelaka eNtirhweni Wa Yehovha?” Loko Makwerhu Johnson a ri karhi a tlhuvutsa Mikiya 6:6-8, u kombise leswaku Yehovha a nga koxi swo tala eka hina. Xivulavuri xi khutaze leswaku ku hlayiwa Bibele siku ni siku ni ku tirhisa minkongomiso ya yona leyinene. Guy Pierce, wa Huvo leyi Fumaka, u nyiketele rhavi, naswona nkulumo ya yena a yi ri ni nhloko-mhaka leyi nge “Khana U Tlhela U Tsaka Hi Leswi Yehovha A Swi Endlaka.” Makwerhu Pierce u te: “Ntirho wa n’wina ni ku heta nkarhi wo leha mi tshembekile, swi veke xisekelo xa ku andza loku hi ku vonaka namuntlha. Hambetani mi endla hinkwaswo leswi nga emandleni ya n’wina entirhweni wa n’wina wo kwetsima lowu mi wu endlelaka Xikwembu Lexi Nge Henhla-henhla, Yehovha.”

Hi Sonto, May 20, exitediyamu xa le Lilongwe, vanhu va 17 378 va tsundzuxiwe leswaku nhlayo ya vahuweleri eMalawi a yi ri 30 000 loko ku yirisiwa ka ntirho ku herisiwa hi 1993. Namuntlha ku ni kwalomu ka Timbhoni ta 50 000 eMalawi! Ina, ku nyiketeriwa ka muako lowuntshwa wa Bethele ku nge rivaleki nikatsongo, a ku ri siku ra ku hlula ka Yehovha!d

BARBADOS: Rhavi lerintshwa ra le Barbados ni Holo ya Mfumo leyi akiweke etlhelo ka rona swi rhendzeriwe hi ritlangi ni swimilana leswi nga ni swiluva endhawini leyi tlakukeke leyi ringanaka hekitara yin’we naswona munhu u kota ku vona vuxongi bya Lwandle ra Kharibiya leri nga ekusuhi ni kwalaho. Miako leyi yo saseka leyi tekeke tin’hweti ta 18 ku akiwa, yi kumeka exifundzheni lexi rhuleke eProspect le St. James, ku nga tikhilomitara ta mune ku suka entsindza wa Barbados lowu vuriwaka Bridgetown.

Eka muako lowu lowuntshwa, ku tshama swirho swa ndyangu wa Bethele swa khume. Wu ni makamara ya nhungu yo tshama eka wona, tihofisi ni kamara ro dyela. Nakambe wu ni Holo ya Mfumo leyi rhurhelaka vanhu va 275. Muako lowu wu siva lowo sungula lowu a wu ri eka mpfhuka wa kwalomu ka khume ra timinete ku ya exikarhi ka Bridgetown. Loko muako lowu wa khale—lowu a wu kumeka laha ku rhuleke etlhelo ka ntsindza wa doroba ra Barbados—wu sungula ku tirhisiwa hi 1969, nhlayo leyi heleleke ya vahuweleri va swihlala leswikulu swa rhavi leri ni swin’wana swo hlayanyana leswitsongo a yi ri kwalomu ka 1 200. Hi lembe ra 2000 nhlayo leyi yi engeteleke yi ya fika eka vahuweleri va 2 390, emavandlheni ya 25 ni ntlawa wun’we lowu nga woxe. Hi nkarhi wolowo ndhawu ya rhavi a yi ri yitsongo ku va yi nga langutana ni ku andza ka nhlayo ya mavandlha naswona a yi nga ha ri na kona ku rhula loku yi tshameke yi va na kona, ku ri na sweswo yi hundzuke ndhawu ya mabindzu leyi nga ni pongo.

Hi Mugqivela, June 2, 2001, vaendzi lava rhambiweke va 676 lava humaka eswihlaleni leswi nga le hansi ka rhavi ra Barbados xikan’we ni vaendzi lava humaka ematikweni man’wana ya 15, va tsakele nongonoko wa ku nyiketeriwa ka rhavi rero, lowu katseke ni matimu ya ntirho eBarbados. Lexi nga rivalekiki enongonokweni wolowo i nkulumo leyi John E. Barr wa Huvo leyi Fumaka a yi nyikeleke hi ku hiseka lokukulu, leyi a yi ku “Ku Tsakisa Mbilu Ya Yehovha.” Leswaku lava nga rhambiwangiki va vuyeriwa enongonokweni wa ku nyiketeriwa ka rhavi, ku khomiwe nhlangano wo hlawuleka hi siku leri landzelaka. Lava veke kona a va ri 3 332.e

Miako yo tano ya rhavi yi ni swirho swa 20 133 emisaveni hinkwayo leswi nga vatirheli lava hlawuriweke. Hinkwavo va le hansi ka Xiboho xa Malandza yo Hlawuleka ya Nkarhi Hinkwawo.

[Tinhlamuselo ta le hansi]

[Swifaniso leswi nga eka tluka 6]

Mintsombano ya Muganga ya “Vadyondzisi Va Rito Ra Xikwembu” yi katse ku humesiwa ka “Vuhundzuluxeri Bya Misava Leyintshwa” eHong Kong, hi Xichayina lexi tolovelekeke ni lexi olovisiweke

[Swifaniso leswi nga eka tluka 11]

Kwalomu ka hafu ya gidi ra timiliyoni ta swiphephana swa “Kingdom News” No. 36 swi fambisiwile emisaveni hinkwayo

[Xifaniso lexi nga eka tluka 13]

Huvo ya le Yuropa ya Timfanelo ta Vanhu, eStrasbourg, le Furwa

[Xifaniso lexi nga eka tluka 21]

Makwerhu Muchinguri ni Nsati emahlweni ka Holo ya ka vona ya Mfumo leyintshwa

[Xifaniso lexi nga eka tluka 22]

Masagwadi manharhu lama kumiweke hi vhidiyo leyi nge “Transfusion-Alternative Strategies—Simple, Safe, Effective”

[Swifaniso leswi nga eka tluka 28, 29]

Marhavi lama ha ku nyiketeriwaka

(1) Malawi

(2) Barbados

(3) Uruguay

(4) Venezuela

(5) Ukraine