Xana Xikwembu Xi Ta Kala Xi Endla Swo Karhi Hi Vuhomboloki?

“A SWI twali.” Xichudeni lexintsongo a xi karhatekile swinene, xi hlundzukile swinene endzhaku ko tokota ku hombolokisiwa ka vululami hi ku kongoma. Xi ye emahlweni xi ku: “Loko Xikwembu xi ri kona hakunene, xana xi nga byi pfumelela njhani vuhomboloki byo tano?” Xana a a wu ta va u seketele nhwanyana loyi ke? Kumbexana. Kambe xana a wu ta va u xi hlamurile xiphiqo xakwe ke?

Loko wa ha ri xihlangi, minkarhi yin’wana u nga ha va u vone onge vatswari va wena va ku pfumelele u khomiwa hi ndlela yo biha. Kambe vuhomboloki byo tano bya le rivaleni a byi endlanga leswaku u anakanya leswaku a va nga ri kona, a swi tano ke? Hi ku fanana, ku pfumelela ka Xikwembu vuhomboloki a swi kombisi leswaku a xi kona.

Hambi swi ri tano, xichudeni lexintsongo xi vule leswaku leyi a ku ri mhaka leyi hambaneke. U kombetele leswaku tatana wa munhu loyi a nga hetisekangiki a nga va ni vuhomboloki hi yexe. Kumbe hikwalaho ka ku ka a nga tivi mintiyiso hinkwayo, a nga ha tsandzeka ku xiya vuhomboloki loko a byi vona. Ku tlula kwalaho, hikwalaho ka mindzilakana ya vumunhu, a nga pfumala matimba yo endla xo karhi hi vuhomboloki lebyi a byi vonaka. U tiyise leswaku a xi kona eka leswi lexi a xi ta tirha eka Xikwembu xo lulama lexi tivaka hinkwaswo ni lexi tlakukeke swinene.

Na wena u nga ha vona onge ku pfumelela vuhomboloki kahle-kahle a swi fambisani ni timfanelo ta Xikwembu. Kambe, xana swi nga ha endleka leswaku eka vutlhari bya xona lebyikulu, Xikwembu xi ri ni xivangelo lexi twalaka xo pfumelela vuhomboloki ku ringana nkarhinyana?

Vatsari va Bibele va xiya Xikwembu tanihi ‘murhandzi wa vunene ni vululami.’ Muxe u tsarile a ku: “Tindlela hikwato ta yena ti lulamile; i Šikwembu šo ṭhembeka, ši nga ri na nanḍu; ši ni v̌unene, ši lulamile.”—Psalma 33:5; Deuteronoma 32:4; Yobo 37:23.

Handle ko languta Yehova tanihi Xikwembu xo lulama lexi nga tsakeriki vuhomboloki, vatsari va Bibele va pfumela leswaku siku rin’wana u ta byi herisa. Hi xikombiso, Esaya u vhumbe xiyimo lexi: “V̌onani, Hosi yi ta fuma hi ku lulama, tihosana, na tona, ti ta risa hi ku lulama. Hi laha ku lulama ku nga ta tiakela e mananga, v̌unene byi ta ṭhama byi ri kona e ntangeni.” (Esaya 32:1, 16) Kambe rini? Naswona loko Xikwembu xi lava ku herisa vuhomboloki emisaveni, ha yini xi byi pfumelerile eku sunguleni?

Vuhomboloki—Ha Yini Byi Pfumeleriwile?

A ku ri ni nkarhi lowu vuhomboloki a byi nga ri kona evuakweni hinkwabyo. Vuhomboloki byi tiviwe eka vanhu ntsena endzhaku ka ku xandzuka ka Adamu na Evha ehansi ka nsusumeto wa Sathana Diyavulosi. Sathana a nga herisiwanga hi ku hatlisa endzhaku ka ku xandzuka. Hikwalaho ka xivangelo xa xona lexinene, Xikwembu xi pfumelele nkarhi wo karhi lowu munhu a a ta endla vuhomboloki ha wona, naswona leswi a swi ta va hi xikongomelo xo ringa lava tinyiketeleke eka xona, loko va ta tikombisa va tshembeka eka xona. Ku hlawula ka vona ku va vahlayisi va vutshembeki a ku ta va ku ala vuswikoti bya Sathana byo hundzula swivumbiwa hinkwaswo swa vanhu swi fularhela Xikwembu. Xisweswo vuhosi bya Xikwembu byi lweriwa, mintirho ya Sathana yi ta herisiwa naswona vuhomboloki hinkwabyo byi susiwa.

Hi nkarhi wolowo, loko Xikwembu hi ku sindzisa a xi lo sivela vanhu ku endla vubihi, a xi ta va xi va tekela lunghelo ra vona ro tihlawulela. Ematshan’wini ya sweswo, hi ku pfumelela vanhu leswaku va tokota mimbuyelo leyo biha ya magoza lama hoxeke ya van’wana, Xikwembu xi fanisa ndlela leyi a swi ri ni khombo ha yona leswaku Adamu na Evha va xandzukela milawu ya Xikwembu hi ndlela yo biha, va yi siva hi mimpimanyeto ya vona leyi hoxeke. Hi ku pfumelela vanhu ku tshovela leswi va swi byaleke, Xikwembu xi pfuna vanhu va timbilu letinene ku xiya nkoka wa ku endla swilo hi ndlela ya xona.—Yeremia 10:23; Vagalatiya 6:7.

Ku tlhandlekela kwalaho, mintirho ya vululami kumbe ya vuhomboloki leyi vanhu va yi endlaka yi nyikela vumbhoni lebyi yi paluxaka. Mintirho leyi yi nyika Xikwembu xisekelo lexinene xo avanyisa lava faneriwaka hi ku hanya emisaveni leyintshwa ehenhla ka misava loko vululami lebyi taleke byi kondleteriwile. Malunghana ni leswi ringanyetaka sweswo, ha hlaya: “Loko mubihi a hunḍuka e ku dyoheni ka yena, loko a hlayisa milawu ya mina hikwayo a hanya hi nawu ni ku lulama, kunene u ta hanya, a nga ka a nga fi.”—Ezekiel 18:21.

Vuhomboloki Byi Ta Hela Rini?

Ku tirhisana ka Yehova Xikwembu ni vanhu minkarhi hinkwayo a ku ri loko lulama naswona ku funghiwe hi ntwela-vusiwana. Lexi kombisaka sweswo, loko nandza wa Xikwembu la tshembekaka Abrahama a nga twisisi mhaka leyi ha yona xo karhi a xi humelela, u vule leswi mayelana ni Xikwembu: “A ŝi v̌e kule na wena ku lov̌isa l’a lulameke ŝiṅwe ni l’a hombolokeke, ŝi v̌a leŝaku l’a lulameke a endliwa leŝo nge u hombolokile! A ŝi v̌e kule na wena! Loyi a av̌anyisaka misav̌a hikwayo, a nga ka a nga av̌anyisi hi ku lulama šana?” (Genesa 18:25) Hi ku ta ka Kriste, timfanelo ta Xikwembu ta vululami ni ta ntwela-vusiwana ti kombisiwile. Lunghiselelo ra gandzelo ra nkutsulo ra Kriste Yesu ri pfulele un’wana ni un’wana ndlela, Muyuda ni la nga riki Muyuda hi laha ku fanaka, leswaku va kuma vutomi lebyi nga heriki. Leswi swi vangele muapostola Petro ku vula a ku: “Ndza twisisa swinene sweswi leswaku Xikwembu a xi yi hi nghohe ya vanhu; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.”—Mintirho 10:34, 35.

Timbhoni ta Yehova ta gingiriteka eku twariseni ka leswaku Hosi ya Vumesiya ya Xikwembu yi sungurile ku fuma ka yona ni leswaku nkarhi wu le kusuhi laha vululami byi nga ta kondleteriwa emisaveni ya hina hi mpimo lowu hetisekeke.a Leswi swi ta hetisisiwa loko Hosi yoleyo yi herisa misava ya sweswi yo homboloka naswona yi herisa matimba ya xikwembu xa yona lexi nga vonakiki, Sathana Diyavulosi. Bibele yi komba leswaku leswi swi ta humelela ku nga ri khale ‘enyimpini ya siku lerikulu ra Xikwembu xa Matimba Hinkwawo,’ leyi hi ntolovelo yi vitaniwaka Armagedoni.—Nhlavutelo 16:14, 16.

“Xikwembu a xi hombolokanga loko xi tisa vukarhi bya xona,” kutani Armagedoni yi ta va nyimpi yo lulama. (Varhoma 3:5) Endzhaku ka sweswo, Yesu ni vafumi-kulobye, vo tanihi vaapostola, va ta fuma va ri etilweni ku ringana malembe ya gidi. (Nhlavutelo 20:4) Timiliyoni ta vanhu leti tokoteke vuhomboloki enkarhini lowu hundzeke ti ta pfuxeriwa emafambiselweni lamantshwa emisaveni, kaya ro sungula ra vanhu, leswaku ti tokota vululami lebyi hetisekeke ro sungula evuton’wini bya tona.

“Xana Swa Twala Leswaku Xikwembu Xi Hombolokile Ke?”

Muapostola Pawulo u vutise sweswo malunghana ni mintirho yin’wana ya Xikwembu. Nhlamulo? “A swi tano,” Pawulo u tsarile. Loko a fanisa vanhu ni vumba lebyi vumbiweke hi muvumbi byi va xibya lexi fanelaka hi tihanyi kumbe musa, Pawulo u hlamuserile a ku: “Hambi loko Xikwembu xi tiyimiserile ku kombisa vukari bya xona ivi xi kombisa matimba ya xona, kambe hi ku leha mbilu xi tiyiselele vanhu lava xi hlundzukisaka, hambi swi ri tano vo tala va faneriwa hi ku herisiwa. Xa va tiyiselela hikwalaho ka vanhu lava van’wana, lava xi lavaka ku va kombisa musa, lava xi lavaka ku va kombisa ku fuwa ka ku kwetsima ka xona.”—Varhoma 9:14, 20-24, The Jerusalem Bible.

Tanihi xichudeni lexintsongo lexi boxiweke eku sunguleni, minkarhi yin’wana u nga swi kuma swi nonon’hwa ku twisisa mhaka leyi ha yona Xikwembu xi pfumelelaka vuhomboloki hinkwabyo kumbe xihoxo xo karhi. Kambe hi vamani hina—lava vumbiweke hi mavoko ya xona—ku kanakana ku tiyisela ni vutlhari bya xona eku endleni tano? Yehova Xikwembu u byele Yobo a ku: “Šana kunene u nga hanḍula ku lulama ka mina? Šana u ta nḍi kaneta e ku tibasiseni ke?”—Yobo 40:8.

A hi lavi ku va ni nandzu wo endla sweswo. Ematshan’wini ya sweswo, hi ta lava ku tsaka hi ku tiva leswaku hambi leswi vuhomboloki bya ha riki kona, Xikwembu xa vululami ku nga ri khale xi ta byi herisa emisaveni hinkwayo.

[Nhlamuselo ya le hansi]

[Xifaniso lexi nga eka tluka 23]

Mpfumelelo wa vuhomboloki a wu nge tirhisiwi nikantsongo ku kombisa leswaku Xikwembu a xi kona

Xana Xikwembu xi ni nandzu eka ku ala ka muchayeri la pyopyi-weke ku tirhisa timfa-nelo leti tolovelekeke ta mianakanyo, ku tikhoma ni ku ehleketelela van’wana ke?

Nkarhi wu tshinele laha vululami lebyi taleke byi nga ta kondleteriwa emisaveni ya hina