Ku Nyikela Vumbhoni eTindhawini Ta Mabindzu—Endlelo Ra Le Japani

XILERISO xa Yesu Kriste xo kurisa ntirho wo nyikela vumbhoni ku ya “fika emakun’wini ya misava” xi fanele xi katsa tindhawu ta mabindzu. (Mintirho 1:8) Le Japani, ku nyikela vumbhoni bya Mfumo eka vanhu lava tirhaka eka tindzawulo ta mfumo ni tihofisi ta tikhampani letikulu swi tisa ntlhontlho hakunene. Vahuweleri va Mfumo ebandlheni rin’wana va kume mpfumelelo wo nyikela vumboni hi timagazini eka muako wa hofisi ya doroba hi nkarhi wa ku wisa wa swakudya swa nhlekanhi. Vahuweleri a va nga khongelanga eka Yehova leswaku a va nyika xivindzi ntsena, kambe a va khathalela ngopfu maambalelo ya vona ni mahanyelo nakambe hambi ku ri ku tirhisa tibeje leti kombisaka mavito ya vona ni ku va tivisa tanihi Timbhoni ta Yehova.

Mbhoni a yi kongoma mutirhi, yi ku: “Ndzi khomele, ndzi nyikiwile mpfumelelo wo vulavula ni vanhu lava nga laha. Xana u nga swi kota ku ndzi yingisela loko u ri karhi u dya?” Timbhoni a ti fanele ti kombisa vutlhari ni ku tirhisa marito lama “lungiweke hi munyu” (Vakolosa 4:6) Eka riendzo ra vona ro sungula, va fambise timagazini ta 39, kambe swi teke mune wa maendzo ku hlanganisa muako hinkwawo wa swithezi swa nhungu laha ku tirhaka vanhu va 1 500. Va fambise ntsengo wo tlula dzana ra timagazini naswona va kote ku sungula mintila ya timagazini ni ku endla maendzo yo vuyela.

Un’wana wa vahuweleri u endle riendzo ro vuyela eka mininjhere. Loko a twe tsalwa leri hlayiweke eka New World Translation, u te: “Bibele leyi swa olova ku yi twisisa. Leyi ndzi nga yi hlaya eku sunguleni a yi ri hi Xijapani xa khale kutani a swi nonon’hwa ku yi hlaya.” Kopi ya New World Translation yi yisiwe eka yena vhiki leri landzeleke.

Xana u nga endla leswi engetelekeke ensin’wini ya bandlha ra ka n’wina ku chumayela mahungu lamanene eka “vanhu hinkwavo,” ku katsa ni lava nga etindhawini ta mabindzu?—Ringanisa 1 Timotiya 2:4.