Ku “Laveka” Yini?

CODEX leyi ya W ya Tievhangeli yi ve na xiphemu eku hundzuluxeriweni ka marito lama vuriweke hi Yesu eka Marta, makwavo wa xisati wa munghana wa yena lonkulu Lazaro. Loko Yesu a endzele ndyangu lowu, Marta u ehlekete leswaku i swa nkoka swinene ku endlela Yesu swakudya leswinene, kambe hi tintswalo u ringanyete leswaku a landzela xikombiso xa makwavo Mariya, loyi a a tshame emilengeni ya yena a n’wi yingisela. U te: “Kasi xilo lexi lavekaka ngopfu i xin’we ntsena, kutani Mariya ú tihlawulele ku averiwa lokunene, loku a nga ta ka a nga tekeriwi kona.”—Luka 10:42.

Marito lawa ma hundzuluxela tsalwa ra Xigriki ra 1881 leri lunghiseleriweke hi Westcott na Hort, xisekelo xa New World Translation. Nhlamuselo ya le hansi eka Nkandziyiso lowu nga ni Tinhlamuselo wa 1984 wa Bibele leyi wu kombisa leswaku ku hundzuluxela loku a ku huma eka matsalwa ya Sinayi (א) na Vatican (B), lawa hamambirhi ku nga swikombiso swa tsalwa ra muxaka lowu fanaka. Kambe tsalwa ra le Alexandria (A) ri hlayeka hi ndlela leyi: “Kambe, i xilo xin’we xi nga xa nkoka. Etlhelweni ra yena . . . ” Hi laha nhlamuselo ya le hansi yi kombisaka ha kona, Codex W, kun’we na tipapirasi ta le Chester Beatty (P⁴⁵) na tipapirasi ta le Bodmer (P⁷⁵), leti hinkwato ti nga ta lembe xidzana ra vunharhu C.E., ti pfumelelana na ku hundzuluxela loku ka le ndzhaku. Kambe matsalwa lawa hinkwawo ya tiveke khale endzhaku ka loko Westcott na Hort va humese tsalwa ra vona hi lembe ra 1881, lerova va nga vi na nkarhi wo xiya ku hundzuluxela loku ku n’wana. Hambi swi ri tano, ku nga khathariseki ku hundzuluxela kwihi na kwihi ka tsalwa loku hi ku hlawulaka namuntlha, Yesu u hi byela erivaleni ku rhangisa swilo swa moya evuton’wini bya hina—xitsundzuxo lexi hi endlaka swinene ku xi landzela.