Vanhu Va Yehova Va Tiyisiwa eRipfumelweni
“[Mabandlha ma] tiyisiwa eku pfumeleni, [ma] andza siku rin’wana ni rin’wana.”—MINTIRHO 16:5.
1. Xana Xikwembu xi n’wi tirhise njhani muapostola Pawulo?
YEHOVA XIKWEMBU u tirhise Sawulo wa Tarso tanihi “xitirho lexi [hlawuriweke].” Tanihi muapostola Pawulo, ‘u tokote swilo swo tala.’ Kambe hi ntirho wa yena ni wa van’wana, nhlengeletano ya Yehova yi tiphine hi vun’we ni ku andza loku hlamarisaka.—Mintirho 9:15, 16.
2. Ha yini swi ta va swa nkoka ku kambisisa Mintirho 13:1–16:5?
2 Vamatiko a va va Vakriste hi tinhlayo letikulu naswona nhlangano wa nkoka wa huvo leyi fumaka wu endle swo tala ku kurisa vun’we exikarhi ka vanhu va Xikwembu ni ku va tiyisa eripfumelweni. Swi nga pfuna swinene ku kambisisa mintirho leyi ni yin’wana leyi rhekhodiweke eka Mintirho 13:1–16:5, hi mhaka ya leswi Timbhoni ta Yehova sweswi ti tokotaka ku andza loku fanaka ni mikateko ya moya. (Esaya 60:22) (Eka dyondzo ya munhu hi xiyexe ya swihloko swa Mintirho eka nkandziyiso lowu, hi ringanyeta leswaku u hlaya tindzimana leti kombisiweke hi ntsalo lowu tshikileriweke leti humaka ebukwini leyi.)
Varhumiwa Va Teka Goza
3. Hi wihi ntirho lowu a wu endliwa hi “vaprofeta ni vadyondzisi” eAntiyoka?
3 Vavanuna lava rhumiweke hi bandlha eAntiyoka, Siriya, va pfune vapfumeri leswaku va tiya eripfumelweni. (13:1-5) Le Antiyoka a ku ri ni “vaprofeta ni vadyondzisi” Barnaba, Simiyoni (Nigere), Lukiyo wa Kirena, Manaheme na Sawulo wa Tarso. Vaprofeta va hlamusele Rito ra Xikwembu ni ku vhumba swiendlakalo, vadyondzisi vona a va nyikela swiletelo swa Matsalwa na ku hanya hi ndlela ya vukhongeri. (1 Vakorinto 13:8; 14:4) Barnaba na Sawulo va amukele xiavelo xo hlawuleka. Va teke Marka makwavo wa Barnaba, ivi va ya eKipra. (Vakolosa 4:10) Va chumayele emasinagogeni ehlalukweni ra le vuxeni bya Salami, kambe a ku na rhekhodo leyi kombisaka leswaku Vayuda va yingisile. Tanihi leswi vanhu volavo a va fuwile hi swilo leswi vonekaka, a va ta va na xilaveko xihi eka Mesiya?
4. Ku humelele yini loko varhumiwa va hambeta va chumayela eKipra?
4 Xikwembu xi katekise ntirho wun’wana wo nyikela vumbhoni eKipra. (13:6-12) Le Pafo, varhumiwa va hlangane ni mungoma ni muprofeta wa mavunwa loyi a a vitaniwa Bariyesu (Elima). Loko a ringeta ku sivela Muyimeri wa hosi, Sergiyo Pawulo ku twa rito ra Xikwembu, Sawulo u tatiwe hi moya lowo kwetsima ivi a ku: ‘Wena n’wana wa Diyavulosi, la teleke ku xisa ni vubihi, wena nala wa hinkwaswo leswi lulameke, xana u ta tshika rini ku hingakanya tindlela leto lulama ta Yehova ke?’ Kwalaho voko ra Xikwembu ra nxupulo ri pfala Elima mahlo swa xinkarhana kutani Sergiyo Pawulo “a pfumela, a hlamarisiwa hi ta [Yehova] leti a dyondzisiweke tona.”
5, 6. (a) Loko Pawulo a vulavule esinagogeni eAntiyoka wa Pisidiya, xana u vule yini mayelana na Yesu? (b) Xana nkulumo ya Pawulo yi ve na vuyelo byihi?
5 Loko va suka eKipra, vanghana lava va tlutele emutini wa Perge aAsia Minor. Hi loko Pawulo na Barnaba va ya en’walungwini va tsemakanya minkova ya tintshava, kumbexana ‘emakhombyeni ya milambu ni tinsula-voya,’ va ya eAntiyoka, Pisidiya. (2 Vakorinto 11:25, 26) Kwalaho Pawulo u vulavule esinagogeni. (13:13-41) U pfuxete ku tirhisana ka Xikwembu ni Vaisrayele ni ku kombisa Yesu rixaka ra Davhida, tanihi Muponisi. Hambi loko vafumi va Vayuda va lave leswaku Yesu a dlayiwa, xitshembiso lexi nyikiweke vakokwa wa vona xi hetisekile loko Xikwembu xi n’wi pfuxile. (Psalma 2:7; 16:10; Esaya 55:3) Pawulo u tsundzuxe vayingiseri vakwe leswaku va nga tshuki va sandza nyiko ya Xikwembu ya ku ponisiwa ha Kriste.—Habakuk 1:5, Septuagint.
6 Rungula ra Pawulo ri pfuxe ku tsakela, hi laha tinkulumo leti nyikeriwaka hi Timbhoni ta Yehova ti endlaka ha kona namuntlha. (13:42-52) Hi Savata leyi landzeleke ku lava ku va muti hinkwawo a wu hlengeletanile ku ta yingisa rito ra Xikwembu naswona leswi swi vange mavondzo eka Vayuda. Phela, hi vhiki rin’we ntsena, va vonake va hundzule Vamatiko vo tala ku tlula lava Vayuda a va ri na vona evuton’wini bya vona hinkwabyo! Leswi Vayuda va kaneteke Pawulo hi ndlela ya tingana, a ku ri nkarhi wa leswaku rivoningo ra moya ri voninga kun’wana naswona va byeriwe ku: ‘Tanihi leswi mi lahlaka rito ra Xikwembu ni leswi mi nga titekiki mi ri lava faneriwaka hi vutomi lebyi nga heriki, hi hundzukela eka vamatiko.’—Esaya 49:6.
7. Pawulo na Barnaba va titwise ku yini hi nxaniso?
7 Kutani Vamatiko va sungule ku tsaka naswona hinkwavo lava faneriwaka hi vutomi lebyi nga heriki va ve vapfumeri. Hambi swi ri tano, loko rito ra Xikwembu ri hangalasiwa etikweni hinkwaro, Vayuda va hlohlotela vavasati lavo chaviseka (kumbexana leswaku va hlohlotela vavanuna va vona kumbe van’wana) ni vakulukumba va muti leswaku va xanisa Pawulo na Barnaba ni ku va hlongolela ehandle ka mindzilakana ya vona. Kambe sweswo a swi va yimisanga varhumiwa. Va lo “phumunha ntshuri emilengeni ya [vona]” kutani va ya eIkoniya (Konya ya manguva lawa), muti lowukulu exifundza-nkulu xa Rhoma xa Galatiya. (Luka 9:5; 10:11) Ku vuriwa yini hi vadyondzisiwa lava siyiweke eAntiyoka wa Pisidiya? Leswi va tiyisiweke eripfumelweni “[va hambete] va tala hi ku tsaka ni Moya lowo Kwetsima.” Leswi swi hi pfuna ku vona leswaku nkaneto a wu nge wu hinganyeti nhluvuko wa moya.
Ku Tiya eRipfumelweni Ku Nga Khathariseki Nxaniso
8. Xana ku humelele yini hikwalaho ka ku nyikela vumbhoni hi ndlela leyi humelelaka eIkoniya?
8 Pawulo na Barnaba hi voxe va tikombise va tiyile eripfumelweni ku nga khathariseki nxaniso. (14:1-7) Loko va hlamula ku nyikela ka vona vumbhoni esinagogeni eIkoniya, Vayuda vo tala ni Magriki va ve vapfumeri. Loko Vayuda lava nga pfumeriki va hlohlotele Vamatiko ku lwisana ni lava ha ku pfumelaka, vatirhi volavo vambirhi va vulavule hi xivindzi hi matimba ya Xikwembu naswona xi kombise ku va amukela ka xona hi ku va nyika matimba yo endla mahlori. Leswi swi avanyise vahlaseri, van’wana a va ya eka Vayuda naswona van’wana eka vaapostola (lava rhumiweke). Vaapostola a va nga ri matoya, kambe loko va twe hi kungu ro khandliwa hi maribye, hi vutlhari va sukile va ya chumayela eLikawoniya, tiko ra Asia Minor eGalatiya dzonga. Hi ku va ni vutlhari, na hina hakanyingi hi nga tshama hi chivirika evutirhelini ku nga khathariseki nkaneto.—Matewu 10:23.
9, 10. (a) Xana vaaki va le Listra va endlise ku yini hi ku hanyisiwa ka munhu la lamaleke? (b) Pawulo na Barnaba va hlamurise ku yini eListra?
9 Muti wa Likawoniya wa Listra na wona wu kume vumbhoni. (14:8-18) Kwalaho Pawulo u hanyise munhu loyi a a lamarile ku sukela loko a velekiwa. Hi ku ka va nga swi xiyi leswaku singita a ri huma eka Yehova, mintshungu yi huwelerile yi ku: “Swikwembu swi tihundzurile swi fana ni vanhu, kutani swi xikele ka hina!” Tanihi leswi leswi swi vuriweke hi ririmi ra le Likawoniya, Barnaba na Pawulo a va nga swi tivi leswi a swi humelela. Tanihi leswi Pawulo a a ri yena loyi a a rhangela eku vulavuleni, vanhu va n’wi teke tanihi Hermesi (murhumiwa wa matimba wa swikwembu) kutani va anakanya leswaku Barnaba a a ri Zewusi, xikwembu lexikulu xa Magriki.
10 Muprista wa Zewusi u tise ni tinkuzi ni vuhlalu bya swiluva leswaku a ta endlela Pawulo na Barnaba magandzelo. Vaendzi, lava kumbexana a va vulavula Xigriki lexi tolovelekeke kumbe hi ku tirhisa toloki, hi ku hatlisa va hlamusele leswaku na vona a va ri vanhu lava nga ni ku tsana ni leswaku a va twarisa mahungu lamanene leswaku vanhu va ta tshika “mintirho leyi ya swa hava” (swikwembu kumbe swifaniso leswi nga hava vutomi) va ya eka Xikwembu lexi hanyaka. (1 Tihosi 16:13; Psalma 115:3-9; 146:6) Ina, khale Xikwembu a xi pfumelela matiko (kambe hayi Vaheveru) ku famba hi tindlela ta vona, hambi loko xi nga tshikanga ku tivisa vukona ni vunene bya xona ‘hi ku va nyika timpfula ni tinguva leti nga ni mihandzu, xi tata timbilu ta vona hi swakudya ni ku tsaka.’ (Psalma 147:8) Ku nga khathariseki ku anakanya ko tano, Barnaba na Pawulo swi va tikerile ku tshikisa mintshungu ku va endlela magandzelo. Kambe, varhumiwa a va ku amukelanga ku gandzeriwa tanihi swikwembu, hambi ku ri ku tirhisa matimba wolawo leswaku va simeka Vukriste endhawini yoleyo. I xikombiso lexinene, ngopfu-ngopfu loko hi voyamele eka ku navela ku nyikiwa xichavo hi leswi Yehova a hi pfumelelaka leswaku hi swi hetisisa entirhweni wa yena!
11. Xana hi nga dyondza yini eka marito lawa: “EMfun’weni wa Xikwembu, hi fanele hi nghena hi maxangu layo tala”?
11 Hi xitshuketa, nxaniso wu humese nhloko ya wona yo biha. (14:19-28) Njhani? Hi ku kuceteriwa hi Vayuda vo huma eAntiyoka wa Pisidiya ni le Ikoniya, mintshungu yi khandle Pawulo ivi yi n’wi kokela ehandle ka muti, hi ku anakanya leswaku u file. (2 Vakorinto 11:24, 25) Kambe loko vadyondzisiwa va n’wi rhendzela, u pfukile ivi a nghena eListra a nga voniwi kumbexana a pfariwe hi munyama. Siku leri tlhandlamaka, yena na Barnaba va ya eDerbe, laha vo hlayanyana va veke vadyondzisiwa. Loko va tlhele va endzela eListra, Ikoniya na Antiyoka, varhumiwa va tiyise vadyondzisiwa, va va khutaza ku tshama eripfumelweni ivi va ku: “EMfun’weni wa Xikwembu hi fanele ku nghena hi maxangu layo tala.” Tanihi Vakriste, na hina hi langutele ku tokota maxangu naswona a hi fanelanga ku ringeta ku ma balekela hi ku lan’wa ripfumelo ra hina. (2 Timotiya 3:12) Hi nkarhi wolowo, vakulu va hlawuriwile emabandlheni lawa papila ra Pawulo ro ya eka Vagalatiya ri tsaleriweke wona.
12. Loko riendzo ro sungula ra Pawulo ra vurhumiwa ri hela, xana varhumiwa lava vambirhi va endle yini?
12 Loko va tsemakanya hi le Pisidiya, Pawulo na Barnaba va vulavule rito ePerge, muti lowu dumeke wa le Pamfiliya. Hi ku famba ka nkarhi va tlhelele eAntiyoka, Siriya. Sweswi riendzo ra Pawulo ro sungula ri herile, varhumiwa lava vambirhi va tivise bandlha “hinkwaswo leswi Xikwembu xi swi endleke ha vona, ni hi laha xi nga pfulela vamatiko enyangwa yo nghena eku pfumeleni.” Nkarhi wun’wana wu hetiwe ni vadyondzisiwa va le Antiyoka, naswona handle ko kanakana leswi swi va tiyisile swinene eripfumelweni. Maendzo ya valanguteri lava famba-fambaka namuntlha ma ni vuyelo lebyi fanaka.
Mphikamakaneta Ya Nkoka Ya Tlhantlhiwa
13. Loko Vukriste byi nga ta aviwa byi va mintlawa ya Vaheveru ni Vamatiko, a ku laveka yini?
13 Ku tiya eripfumelweni a swi lava vun’we bya mianakanyo. (1 Vakorinto 1:10) Loko Vukriste byi nga ta avana byi va mintlawa ya Vaheveru ni Vamatiko, huvo leyi fumaka a yi fanele yi endla xiboho xa loko Vamatiko lava nghenaka enhlengeletanweni ya Xikwembu a va boheka ku hlayisa Nawu wa Muxe, ivi va yimbisiwa. (15:1-5) Vavanuna van’wana va le Yudiya ana se a va ri eSiriya wa Antiyoka naswona a va sungule ku dyondzisa vapfumeri va Vamatiko kwalaho leswaku loko vo ka va nga yimbi, a va nge ponisiwi. (Eksoda 12:48) Hikwalaho, Pawulo, Barnaba ni van’wana va rhumiwe eka vaapostola ni vakulukumba eYerusalema. Hambi ku ri kwalaho, vapfumeri lava a va ri Vafarisi lava kandziyisaka nawu, va sindzise leswaku Vamatiko va fanele va yimbisiwa, va hlayisa Nawu.
14. (a) Hambi loko ku kanetana ku humelerile enhlanganweni wa le Yerusalema, hi xihi xikombiso lexinene lexi andlariweke? (b) A wu ri wihi mongo wa mianakanya ya Petro eka xiendlakalo xexo?
14 Nhlangano wu endliwile leswaku ku tiyisiwa ku rhandza ka Xikwembu. (15:6-11) Ina, ku kanetana ku humelerile, kambe a ku vanga na dzolonga loko vavanuna lava nga ni ripfumelo ra matimba va tiphofula—mawaku xikombiso lexinene swonghasi eka vakulu namuntlha! Endzhakunyana Petro u te: ‘Xikwembu xi hlawule leswaku hi nomo wa mina Vamatiko [vo tanihi Korneliyo] va twa mahungu lamanene ivi va pfumela. Xi nyikele vumbhoni hi ku va nyika moya lowo kwetsima ivi xi susa ku hambana exikarhi ka hina na vona. [Mintirho 10:44-47] Sweswi ke, xana mi ringela yini Xikwembu hi ku tlhandleka mpingu [xikolokolo xo hlayisa Nawu] emakatleni ya vona lowu vatata wa hina, hambi ku ri hina, hi hlulekeke ku wu rhwala xana? Hina [Vayuda hi ku tswariwa] hi pfumela leswaku tintswalo ta Hosi Yesu hi tona ti hi ponisaka, ni le ka vona swi tano.’ Ku amukela ka Xikwembu Vamatiko lava nga yimbangiki ku kombise leswaku ku yimba ni ku hlayisa Nawu a swi bohi leswaku u kuma ku ponisiwa.—Vagalatiya 5:1.
15. Hi tihi tinhla ta xisekelo leti Yakobo a ti vuleke, naswona u ringanyete yini loko a tsalela Vakriste Vamatiko?
15 Bandlha ri miyerile loko Petro a gimeta, kambe swo tala a swi ta vuriwa. (15:12-21) Barnaba na Pawulo va vulavule hi swikombiso leswi Xikwembu xi swi endleke hi ku tirhisa vona exikarhi ka Vamatiko. Kutani mutshama-xitulu, Yakobo makwavo wa Yesu hi manana u te: ‘Simoni [vito ra Petro ra Xiheveru] wa ha ku hlamusela hi laha Xikwembu xi nga hundzuluxela nyingiso wa xona eka vamatiko leswaku xi tihumesela vanhu va vito ra xona.’ Yakobo u kombise leswaku ku pfuxetiwa ka “yindlu ya Davhida” loku vhumbiweke (ku pfuxetiwa ka vuhosi enxaxamelweni wa Davhida) a ku ri karhi ku hetiseka eku hlengeletiweni ka vadyondzisiwa va Yesu (vadyandzhaka va Mfumo) exikarhi ka Vayuda ni Vamatiko. (Amos 9:11, 12, Septuagint; Varhoma 8:17) Tanihi leswi Xikwembu a xi kongome leswi, vadyondzisiwa a va fanele va swi amukela. Loko Yakobo a tsalela Vakriste va Vamatiko u tsundzuxe leswaku va tshika (1) swilo leswi thyakisiweke hi swifaniso, (2) vuoswi, (3) ngati ni leswi tlimbiweke minkolo. Ku yirisa loku a ku ri le ka matsalwa ya Muxe lawa a ma hlayiwa esinagogeni siku rin’wana ni rin’wana ra Savata.—Genesa 9:3, 4; 12:15-17; 35:2, 4.
16. Xana papila ra huvo leyi fumaka ya lembe xidzana ro sungula ri nyikela nkongomiso ku ta fikela ni namuntlha ehenhleni ka tinhla tihi tinharhu?
16 Huvo leyi fumaka sweswi yi rhumele papila eka Vakriste va Vamatiko eAntiyoka, Siriya ni le Kilikiya. (15:22-35) Moya lowo kwetsima ni vatsari va mapapila va lerise ku tshika swilo leswi tlhaveriweke swifaniso; ngati (leyi nkarhi na nkarhi a yi dyiwa hi vanhu van’wana); swilo leswi tlimbiweke minkolo swi nga humesiwi ngati ya swona (vahedeni vo tala a va languta nyama yo tano tanihi nchumu wo nandziha); ni vuoswi (Xigriki, por·neiʹa leri vulaka vuxaka bya rimbewu lebyi nga riki enawini ehandle ka vukati bya Matsalwa). Hi ku tshika sweswo, a va ta humelela hi tlhelo ra moya, tanihi laha Timbhoni ta Yehova sweswi ti endlaka ha kona hi mhaka ya leswi ti fambisanaka ni “tifanelo leti.” Marito lama nge “Mi va ni rihanyo lerinene!” (NW) a ma vula ku “Salani hi ku rhula!” naswona a ku fanelanga ku fikeleriwa makumu ya leswaku swilaveko leswi ngopfu-ngopfu i swa timhaka ta rihanyo. Loko papila leri ri hlayiwile eAntiyoka, bandlha ri tsakile hikwalaho ka xikhutazo lexi ri xi nyikeleke. Hi nkarhi wolowo, vanhu va Xikwembu eAntiyoka na vona va tiyisiwile eripfumelweni hi marito lama khutazaka ya Pawulo, Silasi na Barnaba ni van’wana. Onge na hina hi nga lava tindlela to khutaza ni ku aka vapfumeri-kulorhi.
Riendzo Ra Vumbirhi Ra Vurhumiwa Ri Sungula
17. (a) Hi xihi xiphiqo lexi tlhekekeke loko ku kunguhatiwa riendzo ra vumbirhi ra vurhumiwa? (b) Xana Pawulo na Barnaba va ku tamerise ku yini ku holova ka vona?
17 Xiphiqo xi humelerile loko riendzo ra vumbirhi ra vurhumiwa ri kunguhatiwa. (15:36-41) Pawulo u ringanyete leswaku yena na Barnaba va tlhela va endzela mabandlha ya le Kipra ni ya le Asia Minor. Barnaba u pfumerile, kambe u lave ku famba ni makwavo Marka. Pawulo u arile hi mhaka ya leswi Marka a va balekeleke ePamfiliya. Hi loko “ku humelela mholovo exikarhi ka vona.” Kambe a nga kona exikarhi ka Pawulo na Barnaba la laveke ku tidzunisa hi ku ringeta ku katsa vakulu van’wana kumbe huvo leyi fumaka emhakeni ya vona vini. Vona xikombiso lexinene swonghasi!
18. Ku humelele yini eku hambaneni ka Pawulo na Barnaba, naswona hi nga pfunekisa ku yini eka mhaka leyi?
18 Hambi swi ri tano, ku holova loku ku vange ku hambana. Barnaba u teke Marka a famba na yena eKipra. Pawulo a ri na Silasi tanihi munghana wakwe “a tshemakanya matiko ya Siriya na Kilikiya, a ri karhi a tiyisa [mabandlha].” Barnaba a nga ha va a susumetiwe hi swiboho swa ndyangu, kambe a a fanele a xiye vuapostola ni ku hlawuriwa ka Pawulo tanihi “xitirho lexi [hlawuriweke].” (Mintirho 9:15) Ku vuriwa yini hi hina? Mhaka leyi yi fanele yi hi susumetela ku va ni xilaveko xo xiya vuhosi bya le tilweni ni ku tirhisana loku teleke ni “nandza la tshembekaka, wo tlhariha”!—Matewu 24:45-47.
Endla Nhluvuko Hi Ku Rhula
19. Hi xihi xikombiso lexi vantshwa va Vukriste va namuntlha va nga na xona eka Timotiya?
19 Ku holova loku a ku pfumeriwanga ku khumba ku rhula ka bandlha. Vanhu va Xikwembu va hambete va tiyisiwa eripfumelweni. (16:1-5) Pawulo na Silasi va ye eDerbe ni le Listra. Kwaloho a ku tshama Timotiya n’wana wa Yunika mupfumeri wa Muyuda ni nuna wa yena wa Mugriki la nga pfumeriki. Timotiya a a ri ntsongo, hikuva hambi ku ri endzhaku ka malembe ya 18 kumbe ya 20, a ha byeriwa ku: “Ku nga vi na loyi a solaka vuntshwa bya wena.” (1 Timotiya 4:12) Tanihi leswi “a a nkhenseka eka vamakwavo va le Listra ni va [kwalomu ka tikhilomitara ta 29] eIkoniya,” a a tiviwa kahle hikwalaho ka vutirheli bya yena lebyinene ni timfanelo ta ku chava Xikwembu. Vantshwa va Vukriste namuntlha va fanele va lava mpfuno wa Yehova leswaku va tiakela vito ro tano. Pawulo u yimbise Timotiya hi mhaka ya leswi a a ta ya emakaya ni le masinagogeni ya Vayuda lava a va swi tiva leswaku tata wa Timotiya a a ri Wamatiko, naswona vaapostola a va nga lavi nchumu wu sivela ku fikelela ka vona vavanuna ni vavasati va Vayuda lava a va lava ku dyondza hi Mesiya. Handle ko lwisana ni misinya ya milawu ya Bibele, Timbhoni ta Yehova namuntlha na tona ti endla hi laha ti nga kotaka ha kona ku endla leswaku mahungu lamanene ma amukeleka eka tinxaka hinkwato ta vanhu.—1 Vakorinto 9:19-23.
20. Ku pfumelelana ni papila ra huvo leyi fumaka ya lembe xidzana ro sungula ku ve na vuyelo byihi naswona xana u ehleketa leswaku leswi swi fanele swi hi khumbisa ku yini?
20 Va ri na Timotiya tanihi muheleketi wa vona, Pawulo na Silasi va vule swileriso swa huvo leyi fumaka eka vadyondzisiwa leswaku va swi landzela. Vuyelo byi ve byihi? Handle ko kanakana a kombetela eSiriya, Kilikiya ni le Galatiya, Luka u tsarile: “[Mabandlha ma] tiyisiwa eku pfumeleni, [ma] andza siku rin’wana ni rin’wana.” Ina, ku landzelela papila ra huvo leyi fumaka swi tise vun’we ni ku humelela hi tlhelo ra moya. Mawaku xikombiso lexinene swonghasi enkarhini wa hina wo nonon’hwa, laha vanhu va Yehova va faneleke ku tshama va ri na vun’we naswona va tiyile eripfumelweni!
A Wu Ta Hlamurisa Ku Yini?
◻ Pawulo na Barnaba va titwise ku yini hi nxaniso?
◻ Xana hi nga dyondza yini eka marito lama nge: “EMfun’weni wa Xikwembu, hi fanele ku nghena hi maxangu layo tala”?
◻ Hi xihi xitsundzuxo lexi hi xi kumaka eka tinhla tinharhu eka papila leri rhumeriweke hi huvo leyi fumaka ya lembe xidzana ro sungula?
◻ Swilo leswi tiyiseke timbhoni ta Yehova ta lembe xidzana ro sungula eripfumelweni swi tirha njhani eka hina namuntlha?