Xiviko Xa Vahuweleri Va Mfumo

◻ ‘NXANISO lowukulu’ eka bandlha ra Vukriste ro sungula wu tirhe ku hangalasa vadyondzisiwa vo tala va Kriste. (Mintirho 8:1) Hambi swi ri tano, nxaniso lowu wu tswale mihandzu hikuva lava va hangalasiweke “a va famba-famba hinkwako, va ri karhi va twarisa evhangeli.” (Mintirho 8:4) Filipi u ye emahlweni a chumayela, naswona “[mintshungu] yi yingisa swinene leswi a swi vulaka.” (Mintirho 8:6) Tanihi leswi nxaniso a wu tswala mihandzu eka lembe xidzana ro sungula, swi tano ni le ximutanini xa le n’walungu wa Thailand.

Phayona leri hlawulekeke ra Timbhoni ta Yehova ri sungule ku chumayela eximutanini lexi, kambe eku sunguleni vaaki a va nga yingisi. Hambi swi ri tano, loko a vulavule ni mufundhisi wa kwalaho, vanhu va hlengeletanile va yingisela. Van’wana va fikelele laha va xiyaka leswaku Mbhoni a yi tiva Bibele ku tlula mufundhisi wa vona, kutani va sungule ku dyondza Bibele na phayona hambi leswi van’wana va va karhateke. Yan’wana ya masekwa ya vona ya dlayiwile, vutomi bya phayona byi xungetiwile, naswona yindlu ya wanuna un’wana la tsakelaka yi hisiwile. Wanuna u te: “Va nga ha hisa yindlu ya mina, kambe va nga ka va nga hisi mbilu ya mina.” Lava a va dyondza na Mbhoni a va famba mpfhuka wo leha hi basikiri ku va kona eka minhlangano eHolweni ya Mfumo. Mune wa vona va khuvuriwile, naswona van’wana va tsevu va ha va kona eminhlanganweni kun’we na vona.

Hakelo Ya Vutshembeki

◻ Vamakwerhu eZambia va tiendlele ndhuma leyinene hi vutshembeki, naswona leswi swi tise mikateko eka vona, kun’we ni ku pfuna van’wana ku tiva ntiyiso. Nkulu, loyi a nga phayona ra nkarhi hinkwawo, a a famba hi bazi kutani a twa Mbhoni ebazini yi vulavula ni van’wana hi ku pfuxiwa. Mukhandziyi u n’wi vutisile: “Ha yini n’wina Timbhoni mi vula leswaku vukhongeri bya n’wina hi byona ntsena byi nga bya ntiyiso?” Makwerhu u joyine ku vulavurisana kutani a byela mukhandziyi leswaku Yehova u ta hakela Timbhoni ta yena hikuva ti dyondzisa ntiyiso lowu nga eBibeleni.

Endzhaku ka xikarhi ka vusiku eka riendzo leri ro leha, bazi ri fike laha masocha ma siveke pato kona. A yi na swinene. Socha ri nghene ebazini kutani ri vutisa loko ku ri na Timbhoni ta Yehova leti khandziyeke. A ku ri na tinharhu. Kutani ri ku: “Swi lulamile, Timbhoni a ti tshamise sweswo, n’wina hinkwenu humelani ehandle ni minkwama ya n’wina.” Hinkwavo va humela ehandle empfuleni, endzhaku ko sechiwa, va vuye ni mindzhwalo ya vona naswona timpahla ta vona ti tsakamile.

Loko va tlhelela ebazini, socha ri te: “Xivangelo xo tshika Timbhoni ti sala hi leswaku i vanhu lava tshembekaka. Hi ve na ntokoto wo tala ivi hi kuma leswaku hi vona ntsena lava tshembekaka; loko hi va vutisa leswi swi nga eminkwameni ya vona, va hi byela ntiyiso.” Loko bazi ri famba, makwerhu u vutisile: “Hi byihi vukhongeri bya ntiyiso?” Munhu un’wana u hlamurile: “Hi lebyi kalaka byi nga tsakamisiwanga hi mpfula.”

Ina, vutshembeki byi pfuna ku hlawula vukhongeri bya ntiyiso, naswona entiyisweni byi na tihakelo ta byona!