Xiviko Xa Vahuweleri Va Mfumo

Ku Tshembeka Ku Yisa Vutirheli Bya Hina eMahlweni

KU TSHEMBEKA i xilaveko lexikulu xa Vakreste. Muapostola Pawulo u tsale leswi eka Vaheveru 13:18: “Hi titwa swinene leswaku hi ni ripfalo leri tengeke, hi ri karhi hi navela ku endla leswi lulameke minkarhi hinkwayo.” Ku tshembeka ka hina ‘ku sasekisa dyondzo ya Muponisi wa hina, Xikwembu, eka swilo hinkwaswo.’ (Tito 2:10) Ku tshembeka, swin’we ni ku chumayela hi Mfumo, ka Vakreste vambirhi le mfun’weni wa Tonga le Pacific Dzonga ku nyika vumbhoni lebyi tiyeke. Rhavi ra hofisi ya Sosayiti ya Watch Tower le Samoa Vupela-dyambu ra vika:

“Ku ringana malembe yo tala, mpatswa wa Timbhoni wu vulavule hi Mfumo wa Xikwembu eka vanhu va le migangeni ya mune exihlaleni kambe a ku vanga na vuyelo lebyinene. Kutani, loko nuna a vabya, nsati a a fanele ku byala khokhonati, a yi tsema ni ku yi omisa, leyi a va kuma ha yona mali. Loko ku fika nkarhi wa leswaku khokhonati yi langutiwa hi vaxavi, saka ra un’wanyana a ri hlangane ni masaka yakwe ya ntlhanu. Vanhu va n’wi kuce leswaku a fihla saka lerin’wana ivi a ri teka tanihi nkateko lowu humaka eka Xikwembu. Kambe, makwerhu loyi wa xisati u arile naswona hambi loko a hakeriwa mali ya masaka ya tsevu, u amukele mali leyi lulameleke yena ntsena. Ku tshembeka kakwe ku voniwile.

“Endzhakunyana, loko nuna a teka riendzo a ya eka xihlala xin’wana, n’wini wa xitolo u kombele leswaku a n’wi xavela swilo swin’wana. Mbhoni yi endle tano ivi yi vuya ni mali leyi salaka ya nuna loyi. Wanuna u hlamarile. U vule leswaku a ku ri ro sungula munhu a vuyisa cinci. Van’wana lava a nga kombela leswaku va n’wi xavela swilo a va nga yi vuyisi cinci. Siku rin’wana, loko Mbhoni leyi yi lava xin’wana eka xitolo xa wanuna loyi, wanuna loyi u n’wi nyike xilotlelo xa xitolo, a n’wi byela leswaku a teka lexi a xi lavaka kutani a siya mali exitolo. Van’wana lava nga kona va vutisa n’wini wa xitolo leswaku ha yini a nyika Mbhoni xilotlelo xa xitolo kambe vona a nga va nyiki. N’wini wa xitolo u hlamusele leswaku Mbhoni leyi hi yona ntsena leyi a yi tshembeka emugangeni hinkwawo.

“Lava tshamaka emugangeni lowu va vulavula hi mahanyelo lamanene ya mpatswa lowu. Timbhoni ti tiviwa hi ku tshembeka ka tona, xiyimo xa tona xa vukala-tlhelo eka tipolitki, ni ku veka vumbhoni hi Mfumo wa Xikwembu, leswi kombaka ku hambana exikarhi ka ripfumelo ra vaaki va muganga ni leswi Bibele yi swi dyondzisaka. Sweswi, loko ku tlakuka swivutiso leswi khumbaka Bibele, vanhu hakanyingi va ya eka Timbhoni leswaku va kuma tinhlamulo. Nuna wa kona siku rin’wana u pfuke ni vusiku, a ya eka nhlangano wa le mugangeni ivi a hlamula swivutiso leswi a swi vutisiwile eka mhaka yin’wana ya Bibele. Loko a ya eka swilahlo swa le mugangeni wolowo, hakanyingi a a komberiwa ku kombisa leswi Bibele yi swi vulaka hi rifu, naswona marito yakwe a ma amukeriwa.”

Kutani ku tshembeka ka mpatswa lowu wa Timbhoni ni ku chumayela ka vona hi Mfumo swi nyika vumbhoni lebyinene eka xihlala lexi xo xonga xa Pacific Dzonga. Va ni tshembo wa leswaku van’wana va ta dyondza Bibele ivi va yimela ntiyiso. Loko va swi endla, Yehovha Xikwembu u ta va katekisa hakunene.—Yohane 8:32.