Hi Muxaka Lowu Nga Ni Ripfumelo

Ku Huwelela Mfumo Wa Xikwembu eSwihlaleni Swa Fiji

YESU KRESTE u tshame a vulavula hi magondzo mambirhi. Rin’wana ri anamile naswona ri yisa eku feni. Lerin’wana ri khumile kambe ri yisa evuton’wini. (Matewu 7:13, 14) Ku endlela leswaku vanhu va kota ku hlawula gondzo lerinene, Yehovha Xikwembu u endle leswaku mahungu lamanene ya Mfumo ma chumayeriwa emisaveni hinkwayo. (Matewu 24:14) Hikwalaho, kun’wana ni kun’wana vanhu va yingisa rungula ra Mfumo naswona van’wana va hlawula vutomi hi ku va “muxaka lowu nga ni ripfumelo eku londzovotiweni ka moya-xiviri wu hanya.” (Vaheveru 10:39) Ha ku rhamba leswaku u hlaya hi vutomi lebyi hlawuriweke hi vanhu van’wana va le Fiji ni le swihlaleni swin’wana swa le kusuhi swa Dzonga wa Pacific.

Va Tshembele Eka Yehovha

Mere a ha ri xinhwanyatana lexi nghenaka xikolo loko a sungula ku twa rungula ra Mfumo hi 1964. Hikwalaho ka leswi a a tshama exihlaleni lexi nga ekule, a a nga swi koti kahle ku hlangana ni Timbhoni ta Yehovha. Hambiswiritano, eku heteleleni u swi kotile ku kuma vutivi lebyi kongomeke bya Bibele. Hi nkarhi wolowo, se a a tekiwe hi wanuna loyi a ri ndhuna emugangeni wa ka vona. Hikwalaho ka leswi Mere a hlawuleke ku hanya hi misinya ya milawu ya Bibele, nuna wakwe ni maxaka va n’wi khome hi tihanyi naswona vanhu va muganga wa ka vona a va nga ri na mhaka na yena. Nilokoswiritano u khuvuriwile hi 1991.

Hi ku hatlisa endzhaku ka sweswo, langutelo ra Josua, nuna wa Mere, ri sungule ku cinca naswona u sungule ku hlanganyela eka dyondzo ya Bibele leyi Mere a yi fambisela vana va vona. Josua u tshike ku ya eKerekeni ya Methodist. Kambe, leswi a a ri ndhuna a a ya emahlweni ni ku khoma minhlangano ya muganga ya vhiki ni vhiki. Ematihlweni ya vanhu va muganga lowu, Josua a a nga tshembekanga hikuva Kereke ya Methodist a yi ri ya nkoka evuton’wini bya vanhu va muganga wa le Fiji. Hikwalaho, mufundhisi wa kwalaho u khongotele Josua ku tlhelela evukhongerini bya yena bya khale.

Hi xivindzi Josua u tiyisekise leswaku yena ni ndyangu wa yena va hlawule leswi va swi lavaka ni leswaku va tiyimisele ku gandzela Yehovha Xikwembu “hi moya ni ntiyiso.” (Yohane 4:24) Eka nhlangano lowu landzelaka wa muganga, hosi yi lerise leswaku Josua ni ndyangu wa yena va hlongoriwa emugangeni. Va nyikiwe masiku ya nkombo leswaku va huma exihlaleni va siya yindlu ya vona, masimu ya vona ni mintshovelo—ina, ku katsa ni leswi a va tihanyisa ha swona.

Vamakwerhu va moya exihlaleni xin’wana va pfune Josua ni ndyangu wa yena, va va nyika ndhawu yo tshama ni masimu. Josua ni n’wana wa yena lonkulu wa jaha se va khuvuriwile naswona jaha lerin’wana i muhuweleri la nga khuvuriwangiki wa mahungu lamanene. Mere wa ha ku nghenela vuphayona bya nkarhi hinkwawo (muhuweleri wa Mfumo wa nkarhi hinkwawo). Leswi va hlawuleke ku tirhela Yehovha swi va vangele ku lahlekeriwa hi xikhundlha ni nhundzu ya vona, kambe ku fana na muapostola Pawulo, sweswo va swi teke swi nga vuli nchumu loko swi pimanisiwa ni leswi va swi kumeke.—Vafilipiya 3:8.

Ku Hlawula Loku Katsaka Ripfalo

Ku hlawula ku pfumelelana ni ripfalo leri leteriweke hi Bibele swi lava ripfumelo ni xivindzi. Kunene sweswo swi ve tano hi Suraang nhwanyana la ha ku khuvuriwaka la tshamaka eTarawa, xin’wana xa swihlala swa le Kiribati. Suraang u kombele mpfumelelo wa leswaku a nga endli nchumu wo karhi lowu katsekaka entirhweni wa yena tanihi muongori exibedlhele. Xikombelo xa yena a xi amukeriwanga kahle kutani sweswo swi endle leswaku va n’wi rhumela ku ya khathalela tliliniki exihlaleni lexi nga le tlhelo laha a a hambanisiwe hi ku helela ni vapfumeri-kulobye.

Exihlaleni xexo swi tolovelekile leswaku vanhu lava ha ku fikaka va endlela “mimoya” ya kwalaho magandzelo. Vanhu volavo va kholwa leswaku loko u nga endli tano u ta fa. Leswi Suraang a aleke ku pfumelela mikhuva leyi ya vugandzeri bya swikwembu swa hava leswaku yi endliwa eka yena ni le ka vanghana va yena, vanhu va ndhawu yoleyo a va rindzele ku vona dimona leri hlundzukisiweke ri n’wi dlaya hi ku n’wi tlimbetela. Loko Suraang kumbe vanghana va yena va nga humeleriwanga hi khombo, ku pfuleke tindlela to tala ta ku nyikela vumbhoni lebyinene.

Kambe miringo ya Suraang a yi nga si hela. Man’wana ya majaha ya xihlala xexo ya swi rhandza ku gangisa vanhwanyana lava endzeke. Hambiswiritano, Suraang u arile ku rhandzana na vona kutani a tshama a tshembekile eka Xikwembu. Entiyisweni, u swi kotile ku va phayona ra nkarhi hinkwawo hambileswi ntirho wa yena wa vuongori a wu lava leswaku a tshama a lunghekele ku vitaniwa entirhweni nkarhi wun’wana ni wun’wana vusiku ni nhlikanhi.

Emahlweni ka nkhuvo wo fundzha Suraang loko a lunghiselela ku rhurha exihlaleni xexo, valanguteri va ximutana xolexo va vule leswaku a a ri murhumiwa wa xiviri wo sungula ku va endzela. Hikwalaho ko yima a tiyile eka misinya ya milawu ya Bibele, van’wana exihlaleni xexo va ri amukele kahle rungula ra Mfumo.

Mitlhontlho eNyameni

Leswi swimitana swin’wana swi nga ekule swi vula leswaku vanhu va Yehovha va fanele ku endla matshalatshala lamakulu leswaku va hlanganyela evutirhelini ni ku va kona eminhlanganweni ya Vukreste. Xiya xikombiso xa Timbhoni ta mune leti khuvuriweke—wanuna un’we ni vavasati vanharhu—leti hetaka tiawara to hlaya loko ti ya eminhlanganweni ni loko ti vuya. Riendzo ra tona ri katsa ku tsemakanya milambu minharhu loko ti ya niloko ti vuya. Loko nambu wu tele, makwerhu wa xinuna u teka mbita leyikulu a hoxa minkwama, tibuku ni swiambalo swo ya hi swona eminhlanganweni ivi a va wo sungula ku hlambela a tsemakanya nambu wolowo. Kutani a tlhela a hlambela leswaku a ta pfuna vamakwerhu lavanharhu va xisati.

Ntlawa wun’wana lowutsongo, lowu yaka eminhlanganweni exihlaleni lexi nga ekule xa Nonouti eKiribati wu langutana ni swiphiqo swin’wana leswi hambaneke. Yindlu leyi wu hlanganyelaka eka yona yi rhurhela vanhu va nkombo kumbe nhungu. Van’wana lava vaka kona eminhlanganweni va tshama ehandle kutani va hlometela hi le timbhoveni ta darada leyi nga kona. Ndhawu leyi yo hlanganyela yi lo tlangandla, eka vahundzi-va-ndlela va kwalaho lava yaka etikerekeni ta vona ta manyunyu. Ina, malandza ya Yehovha ma swi xiya leswaku swilo leswi navelekaka hakunene emahlweni ka Xikwembu i vanhu, hayi miako. (Hagayi 2:7) Makwerhu un’wana wa xisati la khuvuriweke exihlaleni lexi u kurile naswona a nga swi koti ku famba mpfhuka wo leha. Kambe, ku ni nhwanyana la ha riki muhuweleri la nga si khuvuriwaka, la n’wi pfunaka evutirhelini hi ku n’wi koka hi xigolonyana. Mayana ndlela leyi va kombisaka ku tlangela ntiyiso ha yona!

Vahuweleri lava tlulaka 2 100, lava nga eswihlaleni swa Fiji va tiyimisele ku ya emahlweni va huwelela mahungu lamanene ya Mfumo wa Xikwembu. Naswona va tiyiseka leswaku van’wana vo tala va ha ta va “muxaka lowu nga ni ripfumelo eku londzovotiweni ka moya-xiviri wu hanya.”

[Mepe lowu nga eka tluka 8]

(Leswaku u vona rungula leri hleriweke hi ku helela, vona nkandziyiso wa kona)

Australia

Fiji