Xiviko Xa Vahuweleri Va Mfumo

Mpfuno Eka ‘Lava Nga Ni Torha’ Erussia

YESU u te: “Ku katekile lava nga ni ndlala ni torha ra leswo lulama, hikuva va ta xurha.” (Matewu 5:6) Mintokoto leyi landzelaka yi kombisa ndlela leyi Timbhoni ta Yehovha ti pfunaka ha yona ku tima torha ra moya eka vo tala eRussia, laha ntshunxeko wa vukhongeri a wu siveriwile ku ringana malembe yo tlula 70.

▪ Wansati la vitaniwaka Valentina a a ri ni swivutiso swa nkoka swa Bibele leswi ku nga hela malembe yo tala swi nga si hlamuriwa. Hi xikombiso, a a ti vutisa: ‘Xana Yesu a a khongela eka mani?’ A a anakanya leswaku Yesu u fanele a khongele eka un’wana la tlakukeke eka yena naswona a lava ku tiva vito ra Munhu loyi.

U endzele Kereke ya Orthodox ya le Russia. Hambiswiritano, a nga yi kumanga nhlamulo ya swivutiso swakwe eka vukhongeri byebyo. Hi ku ka a nga eneriseki, u ye ekerekeni ya Protestente kambe ni kwalaho a nga yi kumanga nhlamulo leyi twalaka. Hi ku ka a nga ha tivi kun’wana laha a nga yaka kona, Valentina u sungule ku hlaya Bibele, a ringeta ku tikumela tinhlamulo hi yexe—kambe swi tsandza. Hiloko a khongelela mpfuno.

Endzhaku ka nkarhi, Timbhoni ta Yehovha ti gongondzile enyangweni yakwe. Ti n’wi kombe eBibeleni leswaku vito ra Xikwembu i Yehovha. Eku heteleleni u n’wi tivile loyi Yesu a a khongela eka yena! U sungule ku dyondza Bibele nkarhi na nkarhi ni Timbhoni. Minkarhi yo tala a a tshama vusiku hinkwabyo a ri karhi a hlaya tibuku leti humesiwaka hi Sosayiti ya Watch Tower, a kamba ni tindzimana ta Bibele. Ku nga ri khale Valentina u swi vonile leswaku u wu kumile ntiyiso. Ku nga si hela tin’hweti tinharhu u sungule ku hlanganyela entirhweni wo chumayela, naswona tin’hweti timbirhi endzhaku ka sweswo, u khuvuriwile. Ku hisekela ka yena ku kuma ntiyiso ku hakeriwile.

▪ Mbhoni a yi famba hi bazi yi ya eku chumayeleni endhawini ya le kule. Hi nkarhi wa riendzo yi vulavule ni wanhwana hi switshembiso swa Bibele, kambe nhwana loyi a a nga swi tsakeli. Endzhaku ka tin’hweti timbirhi Mbhoni leyi yi teke riendzo ra vumbirhi yi ya endhawini leyi fanaka leswaku yi ya nyikela nkulumo ya le rivaleni. Endzhaku ka nkulumo yi tshinelele muendzi kutani yi n’wi vutisa yi ku: “Xana u kona loyi ana se a vulavuleke na wena hi mahungu lamanene ya Bibele?” Wanuna loyi a hlamula a ku, “Ina, hi wena.” Mbhoni a yi anakanya leswaku wo vungunya. Kambe jaha leri ri hlamusele leswaku tin’hweti timbirhi leti hundzeke ri twe Mbhoni leyi yi ri karhi yi vulavula ni wanhwana luyani ebazini. “A ndzi lava ku twa leswi engetelekeke, kambe hiloko u xika ebazini, kutani ndzi anakanya leswaku a ndzi nge he tlheli ndzi ti vona Timbhoni ta Yehovha nakambe. Kutani entirhweni ndzi hlangane ni wanuna loyi a dyondzaka Bibele ni Timbhoni. Hi swona swi endleke ndzi va laha!”

Hiloko wanuna loyi ni nsati wakwe va sungula ku dyondza Bibele. Endzhaku ka xinkarhana, u swi xiyile leswaku ntirho wakwe wu lwisana ni misinya ya milawu ya Bibele. Hi ku lava ku va ni ripfalo lerinene emahlweni ka Xikwembu, u cince ntirho wakwe. Sweswi u byela van’wana hi Mfumo wa Xikwembu nkarhi wun’wana ni wun’wana lowu a wu kumaka. Nsati wakwe na yena u karhi u endla nhluvuko edyondzweni yakwe ya Bibele.

Timbhoni ta Yehovha ensin’wini yo anama ya le Russia, ta tsaka leswi ti hoxaka xandla eku byeleni ka vanhu hinkwavo va timbilu letinene ti ku: “‘Tana!’ Loyi a nga ni torha a a te; ni loyi a swi navelaka a a nwe mati ya vutomi a nga hakeli.”—Nhlavutelo 22:17.