Ku Hangalasa Nun’hwelo Wa Vutivi Bya Xikwembu
“Kambe a ku nkhensiwe Xikwembu lexi eka Kriste xi hi yisaka eku khaneni, minkarhi hinkwayo; kutani hi ku tirhisa hina, xi hangalasa hinkwako ku nun’hwela loku nandzihaka ka ku tiva Kriste.”—2 VAKORINTO 2:14.
1. Xana laha hi vulavula hi ku nun’hwela ka njhani naswona xana lunghelo ra ku ku hangalasa ri fanele ri langutiwa njhani?
NUN’HWETELA, nun’hwetela! M-m-m-m! Xana wa ku twa ku nun’hwela loku ko nandziha? Laha a hi vulavuli hi ku nun’hwela loku humaka eka swiluva leswi balekaka kambe, ematshan’weni ya sweswo, i ku nun’hwela ko fanekisela loku humaka eka matsalwa yo hlawuleka emisaveni. Matsalwa lawa a hi wona lama humaka eka vanhu ntsena kambe i nhlengeleto wa swiluva lowu huhuteriweke hi Loyi a vumbeke swiluva swo nun’hwela leswi khavisaka misava. Lunghelo ra ku hangalasa ku nun’hwela loku ko fanekisela ka vutivi bya Xikwembu i rifuwo lerikulu. Ina, i ntirho lowu nga wa nkoka swinene—lowu nga kumiwiki hi mani na mani, lowu nga endliwiki hi vanhu hinkwavo.
2. Xana vadyondzisiwa va Kriste va sungule rini ku hangalasa ku nun’hwela ko fanekisela naswona vuyelo byi ve byihi?
2 Rifuwo leri ra nkoka ri byarhisiwe vadyondzisiwa va Kriste loko va nghenisiwe entirhweni lowukulu eka Yehova Xikwembu hi siku ra Pentekosta hi lembe ra 33 ra Nguva ya hina leyi Tolovelekeke. Loko va tatiwe hi moya lowo kwetsima, va sungule ku hangalasa ku nun’hwela ko fanekisela, va twarisa “mintirho leyikulu ya Xikwembu.” (Mintirho 2:1-4, 11) Ha vona ku nun’hwela ka vutivi bya Xikwembu a ku ta ya eka van’wana, hayi ntsena eka Vayuda lava yimbisiweke va ntumbuluko kambe ni le ka matiko, swivongo, vanhu ni tindzimi leti nga yimbangiki. (Mintirho 10:34, 35) Vadyondzisiwa va ntiyiso va langute ntirho lowu tanihi lowu nga wa nkoka ku tlula rifuwo rihi na rihi ra swilo leswi vonekaka leri vanhu va tihlengeletelaka rona.
3. Xana ntirho wa ku hangalasa ku nun’hwela ka vutivi bya Xikwembu wu yisiwa emahlweni hi mpimo wo tanihi kwihi naswona hi xihi xivutiso lexi hi faneleke hi tivutisa xona?
3 Namuntlha, ntirho lowukulu wa ku hangalasa ku nun’hwela ka vutivi bya Xikwembu wa karhi wa endliwa emisaveni hinkwayo—hi mpimo lowu tlulaka lowu tshameke wu va kona ematin’wini ya munhu. Wu katsa ku nyikela vumbhoni eka vanhu hinkwavo hi Mfumo wa Xikwembu lowu sweswi wu simekiweke ehansi ka Hosi leyi xi yi hlawuleke, Yesu Kriste. (Matewu 6:10; Mintirho 1:8) Xana u teka ntirho wa ku twarisa Hosi ni Mfumo wa yona tanihi hi rifuwo leri nga ni nxavo lowukulu? Yesu Kriste, la rhangeleke ku chumayeriwa ka mahungu lamanene ya Mfumo wolowo, u wu teke hi ndlela yoleyo, a andlala ntila.—Matewu 4:17; 6:19-21.
Ku Nun’hwerisa Ndlela Ya Ku Khana
4. Hi ku ya hi 2 Vakorinto 2:14, xana Xikwembu sweswi xi ma rhangela njhani malandza ya xona emisaveni, naswona xana marito ya Pawulo ma kombetela eka mukhuva wihi wa khale?
4 Ha yini ku tirhela Xikwembu ku ri nchumu wo wu tlangela? Xivangelo xin’wana hi leswaku hambi ku ri sweswi lava va tirhelaka Yehova va na lunghelo leri xiyekaka ra ku kongomisiwa hi Xikwembu eka ku Khana lokukulu. Hi ku ya hi New International Version, 2 Vakorinto 2:14 yi ri: “A ku nkhensiwe Xikwembu, lexi hi minkarhi hinkwayo xi hi fambisaka hi ku khana eka Kriste naswona hi ku tirhisa hina xi hangalasa ku nun’hwela ka vutivi bya xona kun’wana ni kun’wana [“xi endla vutivi bya hina ha xona byi hangalaka emisaveni hinkwayo ku fana ni xinun’hwerisi lexi rhandzekaka!” Phillips].” Marito lawa ya muapostola Pawulo ma vonaka ma kombetela eka mukhuva wa khale wa ku va ni minkhano ya ku hlula.a
5, 6. (a) A ku humelela yini hi nkarhi wa ku khana ka ku hlula eRhoma wa khale naswona xana ku nun’hwela ko nandziha a ku vula yini eka vanhu vo hambana-hambana? (b) Hi kwihi ku tirha ka moya ka xifaniso lexi nga eka 2 Vakorinto 2:14-16?
5 Emasikwini ya riphabliki ra Rhoma, kun’wana ka ku dzuneka lokukulu swinene loku Huvo ya tiko yi nga ku nyikaka ndhuna ya nyimpi leyi hluleke a ku ri ku yi pfumelela yi tlangela ku hlula ka yona hi ku khana ka manyunyu. Nxaxamelo wolowo wa le Rhoma a wu famba kantsongo hi le Via Triumphalis, wu gonya wu jikela etempeleni ya Jupiter ehenhla ka Capitoline Hill. Tihosi, tihosana ni tindhuna ta nyimpi leti endliweke mahlonga enyimpini, ni vana va vona ni vaheleketi va vona, va byisiwa hi nxaxamelo, hakanyingi va byamburisiwa, leswaku va tsongahatiwa ni ku khomisiwa tingana.
6 Loko nxanxamelo wu hundza hi le mutini wa Rhoma, vaaki a va haxa swiluva emahlweni ka golonyi ya muhluri, ivi va hisa mirhi ya risuna va nun’hwerisa ndlela hinkwayo. Ku nun’hwela loku ko nandziha ku kombisa swidlodlo ni vutomi lebyi sirhelelekeke swinene eka masocha lama hluleke. Kambe ku vula rifu eka mahlonga lama nga tsetseleriwangiki lawa ma nga ta herisiwa eku heleni ka ku khana. Leswi swi tisa ku twisisa eka nhlamuselo ya moya ya Pawulo ya xifaniso eka 2 Vakorinto 2:14-16. Xifaniso xexo xi kombisa Pawulo ni Vakriste-kulobye tanihi malandza lama tinyiketeleke ya Xikwembu, ‘swin’we na Kriste,’ hinkwavo va landzela nxaxamelo wa Xikwembu wa ku hlula naswona va rhangeriwa hi xona eka ku khana lokukulu endleleni leyi nun’hwerisiweke.
Ku Nun’hwela Ka Vutomi Kumbe Ku Nun’hwa Ka Rifu
7, 8. (a) Xana Timbhoni ta Yehova ti ku hangalasa njhani ku nun’hwela ko nandziha ka vutivi bya Xikwembu? (b) Loko Timbhoni ti hangalasa ku nun’hwela ko fanekisela, hi yihi nhlamulo ya lava ponisiwaka? (c) Hi yihi nhlamulo ya lava lovaka?
7 Hi ku hangalasa swinene mintiyiso ya Bibele kun’wana ni kun’wana malunghana ni Mfumo wa Xikwembu ehansi ka Kriste, Timbhoni ta Yehova hinkwako ti hangalasa, ti twarisa ni ku tivisa ku nun’hwela ko nandziha ka vutivi bya Xikwembu xa tintswalo lexi ntiyiso wa xona wu va ntshunxeke eka vukhongeri byo hemba. Va macha hi ndlela yo hlula entirhweni wa Yehova. Magandzelo ya vona ya ntirho tanihi Timbhoni ta yena ni ta Hosi ya yena ma fana ni mirhi ya risuna leyi tsakisaka eka Yehova. Xisweswo, hi nga twisisa leswaku muapostola a a vula yini loko a te: “Eka Xikwembu hi ku nun’hwela ko nandziha ka Kriste exikarhi ka lava va ponisiwaka ni le xikarhi ka lava lovaka; eka lavo hetelela i ku nun’hwa loku sukaka eku feni ku ya eku feni, eka lavo sungula i ku nun’hwela loku sukaka evuton’wini ku ya evuton’wini [“ku nun’hwela ka nkoka loku tisaka vutomi,” The New English Bible; “ku nun’hwela loku phyuphyisaka ka vutomi hi byoxe,” Phillips].”—2 Vakorinto 2:15, 16.
8 Vanhu lava tshembekaka lava nga ni xiyimo xo fana ni xa tinyimpfu va twa ku nandziha ka vutivi bya Yehova loku hangalasiwaka hi Timbhoni ta yena. Eka vanhu vo tano, ntirho wo nyikela vumbhoni wu na ku nun’hwela ka rihanyo ni vutomi, ka ntiyiso lowu hanyisaka, lowu nyikaka vutomi. Va nyikela ku nkhensa eka Yehova ni Hosi ya yena, loyi va hlanganyelaka eku khaneni ka yena naswona hi matimba va huwelela va ku: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!” (Nhlavutelo 7:10) Va hefemula moya wa ntiyiso wa Mfumo, lowu wu nga ku nun’hwela loku phyuphyisaka ka vutomi loku yisaka evuton’wini. Kambe Sathana ni mademona ya yena va hambukise matimba ya ku nun’hwetela eka lava nga evukhongerini bya mavunwa, lerova va khoma tinhompfu ta vona naswona hi rivengo va ala ntiyiso. Eka “lava lovaka,” ntiyiso ni vabyarhi va wona lava tshembekaka va humesa ku nun’hwa ka rifu loku yisaka eku feni. Kumbe hi laha New International Version yi swi vekaka ha kona: “Eka volavo hi ku nun’hwa ka rifu.” Ku hundzuluxela ka Phillips ku swi vekisa xileswi: “Eka lavo hetelela swi tikomba onge i ku nun’hwa loku dlayaka ka ku avanyisiwa.”
9. Hi xihi xivutiso lexi Pawulo sweswi a xi vutisaka naswona xana a wu ta hlamurisa ku yini naswona ha yini?
9 “Xana i mani loyi a faneriwaka hi ntirho hinkwawo lowu ke?” muapostola wa vutisa. (2 Vakorinto 2:16) Hi leswaku, “kutani i mani la nga fanelekaka ku tirha hi ndlela leyi?” (The Jerusalem Bible) “Naswona i mani la faneriwaka hi ntirho wo tanihi lowu?” (Weymouth) Nhlamulo ya Matsalwa yi ri: I Timbhoni ta Yehova! Ha yini? Hikuva i vanhu lava tinyiketeleke ntsena lava tsembekaka, lava tiyimiseleke, lava nga laviki ku vuyeriwa ka vutianakanyi ni lava vulavulaka ntiyiso, hi ku kongoma va ri hava vunghana ni vukhongeri bya mavunwa, lava fanelekaka eka ntirho lowu wa ku hangalasa ku nun’hwela ka vutivi bya Xikwembu.—Vakolosa 1:3-6, 13; 2 Timotiya 2:15.
10. Ha yini vafundhisi va nga wu fanelekeli ntirho wo hangalasa ku nun’hwela ka vutivi bya Xikwembu?
10 Vafundhisi va Vujagana, lava lavaka vito lerinene emisaveni, va tsandzeka ku faneleka ni ku lulamela ntirho lowu wo pfumala vutianakanyi. Ha yini? Hikuva va tsandzeka ku fikelela swilaveko leswi kombisiweke hi marito ya Pawulo: “Hikuva a hi fani ni lavo tala, lava endlaka bindzu lero biha hi Rito ra Xikwembu; kambe hi vulavula kukotisa vanhu va timbilu leto tenga, kukota lava rhumiweke hi Xikwembu; hi vulavula emahlweni ka Xikwembu hi ri va ka Kriste.” (2 Vakorinto 2:17) Kumbe hi laha New International Version yi swi vekaka ha kona: “Ku hambana ni vo tala, a hi endli bindzu hi rito ra Xikwembu leswaku hi kuma vuyelo. Hi laha ku hambaneke, ha Kriste hi vulavula emahlweni ka Xikwembu hi ku tiyimisela, ku fana ni vanhu lava rhumiweke hi Xikwembu.”
11, 12. (a) Ha yini Timbhoni ti nga ri “[va]endli [va] bindzu hi rito ra Xikwembu” hi ku amukela minyikelo? (b) Ku hambana ni minkandziyiso leyi thyakisiweke ya Vukriste leyi xaviweke hi vo tala, xana Timbhoni ta Yehova ti nyikela yini?
11 Timbhoni ta Yehova ti rhumiwe hi Xikwembu, naswona ti endla ntirho wa tona wa ku nyikela vumbhoni hi langutelo ra Xikwembu. Hambi loko va nyikela tibuku leti pfunaka ni tibuku tin’wana leti hlamuselaka Rito ra Xikwembu ivi va amukela munyikelo wa ku tirhandzela wa ntirho wa misava hinkwayo wa ku chumayela hi Mfumo, xiendlo xo tano a xi bindzuli kumbe ku thyakisa Rito ra Xikwembu. Kahle-khale, minyikelo yo tano yo va mpfuno eku hangalaseni ka vutivi bya Xikwembu eka van’wana.
12 Vo tala swinene namuntlha, hambi va swi tiva kumbe e-e, va xave minkandziyiso leyi thyakisiweke ya Vukriste, hi mhaka ya leswi yi pfumelelanaka ni ku navela ka vona ka vutianakanyi naswona yi nga lwisaniki ni mahanyelo ya vona. Va pfumela leswaku Xikwembu xa va amukela hi mhaka ya leswi va tivulaka lava xi rhandzaka etimbilwini ta vona. Hambi swi ri tano, loko Rito ra Xikwembu ri kombisiwa ri ri leri lwisanaka ni tidyondzo ni mahanyelo ya vona, va hundzula Matsalwa leswaku va tlakusa mavonelo ya munhu hi xiyexe ehenhla ka ku twisisa loku faneleke ka Bibele. (Matewu 15:8, 9; 2 Petro 3:16) Kambe Timbhoni ta Yehova ti nyikela ntiyiso wo tenga lowu nga thyakisiwangiki wo huma eBibeleni, xisweswo ti humesa ku nun’hwela ko nandziha loku amukelekaka eka Xikwembu ni le ka vagandzeri va xona va ntiyiso. Xisweswo va bakanya mikhuva ni swihingakanyo hinkwaswo swa vukhongeri swa ku kuma vutivi bya ntiyiso bya Xikwembu.
13. I vamani handle ka Vakriste lava totiweke, lava nga eka ku khana ka ku hlula ka Xikwembu naswona xana va endla yini kun’wana ni kun’wana laha va yaka kona?
13 Entiyisweni, ku hlanganyela eku khaneleni ka ku hlula ka Xikwembu swin’we na Kriste i lunghelo leri nga pimekiki leri nga tsakeriwiki hi Vakriste lava totiweke ntsena kambe na hi “ntshungu lowukulu” wa “tinyimpfu tin’wana” na sweswi, hikuva ku hlula ka Mfumo ku tshinele. (Nhlavutelo 7:4, 9; Yohane 10:16) Loko hi ri karhi hi langutele ku hlula kun’wana ka Hosi ya hina leyi hlulaka, kun’wana ni kun’wana laha hi yaka kona hi hangalasa vutivi lebyi nyikaka vutomi bya Xikwembu ku fana ni ka xinun’hwerisi kumbe murhi wa risuna wa nkoka, eka lava timbilu ta vona ti navelaka ntiyiso ni ku lulama. Mawaku lunghelo ronghasi eka lava fanelekelaka ntirho lowu lowu xiyekaka!—Yohane 17:3; Vakolosa 3:16, 17.
Ku Nyikiwa Mpfumelelo Wo Nun’hwerisa Vanhu
14. Ha yini lava va hangalasaka ku nun’hwela ka vutivi bya Xikwembu va nga boheki ku va ni xitifikheti xa pfumelelo xo huma eka vanhu?
14 Kambe xana lava hangalasaka ku nun’hwela ka vutivi bya Xikwembu ni bya Mfumo wa xona va lava tidiploma kumbe switifikheti swa mpfumelelo wo huma evanhwini? Doo! Ana se hi rhumiwile kumbe ku hlawuriwa, tanihi Timbhoni ta La Nge Henhla ka vuako hinkwabyo. Hikwalaho, a hi fanelanga hi kanakana ku ya ensin’wini hi ya hangalasa ku nun’hwela ka mahungu lamanene ya Mfumo wa Xikwembu. Tsundzukani leswaku Yehova wa hi rhangela. Vutirheli bya Yesu byi hetisiwile ku nga khathariseki “ku kaneta lo’ko nghasi ka v̌adyohi.” (Vaheveru 12:3, BX) Hambi swi ri tano, rhekhodo ya Yesu ya ntirho wa nsimu, hi laha yi kumekaka ha kona eBibeleni, ya ha ri ntiyiso, naswona ntirho wa yena wa le nsin’wini wa n’wi bumabumela nakambe wa n’wi seketela tanihi mutirheli wa ntiyiso wa Yehova Xikwembu.
15. Xana muapostola Pawulo u swi kombise njhani leswaku Vakriste va ntiyiso a va boheki ku va ni ‘mapapila yo titivisa’?
15 Muapostola Pawulo u hlangavetane ni xiyimo xo tano lexi tlhontlhaka esikwini ra yena hi ku nyikela mhaka leyi: “Xana ho tlhela hi sungula ku titivisa ke? Xana hi fanele ku kuma mapapila lama hi tivisaka eka n’wina, kumbe lama humaka eka n’wina ku fana ni leswi van’wana va endlisaka swona ke? E-e! Hi n’wina mi nga papila ra hina, leri tsariweke etimbilwini ta hina, leri tiviwaka ni leri nga hlayiwaka hi vanhu hinkwavo. Swa vonaka swinene leswaku n’wina mi papila ra Kriste, leri humesiweke hi hina, leri tsariweke ku nga ri hi inki kambe hi Moya wa Xikwembu lexi hanyaka; a ri tsariwanga ematambeni ya maribye, kambe ri tsariwile etimbilwini ta vanhu.”—2 Vakorinto 3:1-3.
16. I papila ra muxaka muni leri Timbhoni ta Yehova ti ri nyikelaka tanihi vumbhoni byo titivisa leswaku vutirheli bya vona byi huma eka Xikwembu?
16 Valawuri va misava a va wu xiyi ntirho wa hina tanihi Timbhoni ta Yehova. Kambe ntirho wa hina wa ku hangalasa ku nun’hwela ka vutivi bya Yehova a wu tivulavulele! Ntirho lowu a wu nge suriwi, hambi loko vavanuna van’wana va ala ku byi hlaya vumbhoni lebyi bya xitiyisekiso xa vutirheli bya hina. Vafundhisi va humesa maphepha ya vona ya xitiyisekiso yo huma eka tihuvo ta vufundhisi. Hambi swi ri tano, wolawo i maphepha lama nga vuliki nchumu, i marito ya vanhu. Timbhoni ta Yehova, handle ko tshaha nseketelo eRitweni ra Xikwembu, ti xiyeka tanihi switiyisekiso hi nyama ni ngati. Ntshungu lowukulu wa tinyimpfu tin’wana lowu fikeleriweke hi mahungu lamanene ya Mfumo na wona wu hlengeleteriwe etlhelweni ra xinene ra Hosi ya Yehova. (Matewu 25:33, 34) Hinkwaswo leswi i mapapila ya hina ya xibumabumelo, papila leri hina tanihi Timbhoni ta Yehova hi ri rhwalaka etimbilwini ni le mianakanyweni ya hina ni leri hi nga ri kombisaka hi ku tiyiseka. Lava va seketelaka vuhosi bya vuako hinkwabyo bya Xikwembu ivi va hlanganyela eku tirheleni ka Xikwembu swin’we ni Timbhoni ta Yehova hi voxe i mapapila ya xibumabumelo lawa swi nga balekelekiki ku ma hlaya ni ku tiviwa hi vanhu hinkwavo.
17. Xana papila ‘ra hina ra Kriste’ ri tsariwe njhani, naswona ha yini Pawulo a vula leswaku ri tsariwe etimbilwini?
17 Kavula, leswi swi endla vanhu va vukhongeri bya mavunwa va hlundzuka ni ku va ni mavondzo loko va ri hlaya. Hambi swi ri tano, ntshungu lowukulu lowu andzaka wa tinyimpfu tin’wana i papila ra xibumabumelo leri humaka eka Yesu Kriste, Murisi Lonene, loyi a tirhisaka Timbhoni hinkwato ta Yehova entirhweni wa yena wa vurisi. Hi hina xo tsala xa kona, kumbe switirho leswi nga vanhu, leswi a swi tirhisaka ku tsala papila leri. Papila leri a ri tsariwanga hi inki leyi nga suriwaka, kambe ri tsariwe hi matimba kumbe moya lowu tirhaka wa Xikwembu, lowu tirhaka eka hina. A swi fani ni le mhakeni ya Muxe loko nawu wa Milawu ya Khume wu tsariwa hi rintiho ra Xikwembu eswiphambatini swimbirhi swa ribye. Papila ra hina ri tsariwe eswiphambatini swa nyama swa timbilu ta vanhu, tanihi leswi vutirheli bya hina bya moya byi humesaka ku cinca ka mianakanyo ni mbilu eka lava amukelaka ku nun’hwela ka mahungu lamanene.
18. I vuyelo byihi lebyi endlaka lava amukelaka mahungu lamanene papila ra xibumabumelo?
18 Ntirho wa hina wa Rito ra Xikwembu wu tsakise vaamukeri lava tlangelaka va mahungu lamanene naswona wu tise ku cinca loku xiyekaka. Xiboho xa vona xo gandzela Xikwembu xi tikombise xi nga ri xiyimo xa xitshuketa lexi vangeriweke hi mintlhaveko leyi vangiweke hi ku bokoloka ka muevhangeli. Ematshan’weni ya sweswo, xi yimela ku hundzuka ka vutomi bya vona loku sekeriweke ehenhla ka mintiyiso leyi tengeke ya Bibele leyo Kwetsima. Ku rhandza Xikwembu xa ntiyiso, Yehova, ku va susumetela ku ‘hluvula vumunhu bya vona bya khale ni ku navela ka byona loku kanganyisaka ivi va ambala vumunhu lebyintshwa,’ lebyi kombisaka “mihandzu ya Moya.” (Vaefesa 4:20-24; Vagalatiya 5:22, 23) Hikwalaho, vuyelo byi va endla papila ra xibumabumelo. Ri vulavula kahle ku tlula papila rihi na rihi leri tsariweke hi voko ra hina kumbe hi nhlengeletano yihi na yihi leyi yi nga hi rhumaka.
19. Xana Pawulo u ku hlamusela njhani ku faneleka ka “malandza ya ntwanano lowuntshwa,” naswona ntirho wa vona wu khumbe ntshungu lowukulu hi ndlela yihi?
19 Eka 2 Vakorinto 3:4-6 Pawulo u ya emahlweni: “Hi nga vula sweswo hikuva hi ni ku tshemba koloko emahlweni ka Xikwembu hikwalaho ka Kriste. Hina hi hexe a hi na matimba yo tirha ntirho lowu; hi nga ka hi nga vuli leswaku hi na lexi xi humaka eka hina, kambe matimba ya hina ma huma eka Xikwembu. Hi xona lexi xi hi nyikeke hinkwaswo leswi a hi swi pfumala, loko xi hi endlile malandza ya ntwanano lowuntshwa.” Hambi leswi ku ngo va ntsena lava va masalela lama totiweke lava nga “malandza ya ntwanano lowuntshwa,” ntirho wa vona wu khumbe ntshungu lowukulu wa tinyimpfu tin’wana, naswona wu ta tlhela wu khumba swirho swa ntsandza-vahlayi swa tinyimpfu tin’wana to tano leti ta ha ta hlengeletiwaka. Loku hi kona ku tiyiseka loku Timbhoni hinkwato ta Yehova ti nga na kona ha Yesu Kriste eka Yehova Xikwembu. Masalela hi ku tlangela ma khutaza ntshungu lowukulu wa tinyimpfu tin’wana leswaku wu hlanganyela hi mbilu hinkwayo eka vutirheli lebyi ‘tsalaka papila’ lebyi Yesu a byi vhumbeke eka Matewu 24:14 na Matewu 28:19, 20.
20. (a) Xana xiviko xa Yearbook xi komba yini mayelana ni lava hangalasaka ku nun’hwela ka vutivi bya Xikwembu? (b) Xana i yini lexi hinkwerhu ka hina hi nga xi vulaka mayelana ni ku faneleka ka hina eka vutirheli lebyi byi tsalaka papila?
20 Leswi hi leswi va swi endleke hi laha swi voniwaka ha kona eka xiviko xa 1990 Yearbook leyi eka yona Timbhoni ta Yehova ti kombisiwaka ti ri leti hangalasaka ku nun’hwela ka vutivi bya Xikwembu ematikweni ya 212. Va fikelela nhlayo leyi tlulaka 3 787 000 ya vahuweleri lava chivirikaka, naswona n’wexemu ntsena va vike tiawara to ringana 835 000 000 eku chumayeleni ka mahungu lamanene ya Mfumo. Eka Xilalelo xa Hosi n’wexemu, 9 479 064 a va ri kona. Masalela lama totiweke ni swirho swa ntshungu lowukulu wa tinyimpfu tin’wana va nga vula va ku: “Matimba ya hina ma huma eka Xikwembu.” Kumbe hi laha The Jerusalem Bible yi swi vekaka ha kona: “Ku faneleka ka hina hinkwako ku huma eka Xikwembu.”
21. Xana hinkwerhu hi fanele hi endla yini naswona ha yini?
21 Hikwalaho, hangalasani ku nun’hwela ko nandziha ni loku nyikaka vutomi ka vutivi bya Xikwembu etindhawini hinkwato! Tatani moya wa nsimu ya bandlha ra ka n’wina hi ku nun’hwela ka vutivi bya Yehova. Kutani, tanihi Ndhuna ya nyimpi ya le tilweni leyi hlulaka, u ta mi rhangela eku khaneni ka yena loko Timbhoni ta yena hinkwato ti ya emahlweni evutirhelini bya manguva lawa bya ku dzunisa!
[Nhlamuselo ya le hansi]
a Leswaku u kuma vuxokoxoko lebyi engetelekeke, vona Insight on the Scriptures, Vholumo 2, matluka 1128-9, leyi humesiweke hi Watchtower Bible and Tract Society of New York, Inc.
Xana A Wu Ta Hlamurisa Ku Yini?
◻ Hi xihi xifaniso lexi Pawulo a xi tirhisaka eka 2 Vakorinto 2:14-16?
◻ Hi byihi vuyelo bya ku hangalasa ku nun’hwela ka vutivi bya Xikwembu eka van’wana?
◻ I vamani ntsena lava fanelekaka eka ntirho lowu naswona ha yini?
◻ Ha yini swinun’hwerisi swa vanhu swi nga lavi mapapila lama tsariweke hi voko ya xibumabumelo entirhweni wa vona?