Vantshwa Lava Tirhelaka Xikwembu

XANA u swi kuma swi nga tolovelekanga leswaku vantshwa lavanene va nyikela nkarhi wa vona, handle ka hakelo, va ta enyangweni wa wena ku ta vulavula hi Xikwembu? Xana swi tikomba swi hlamarisa, enkarhini wa ku nga kholwi loku kulaka, leswaku vana va tihlanganisa ni vatswari va vona eku vulavuleni hi ta switshembiso swa Bibele leswi hlamarisaka swa vumundzuku lebyi tsakisaka?a

Eka yo tala ya mavandla ya 60 000 ni ku tlula ya Timbhoni ta Yehova emisaveni hinkwayo, u ta kuma vantshwa vo tala. A va yi eka xikolo xa Tisonto kumbe eka ntlawa wa vuleteri bya vukhongeri bya vhiki na vhiki. Ku ri na sweswo, vantshwa lava va vuyeriwa naswona hambi ku ri ku hlanganyela eka minhlangano ya bandlha. Lavantsongo va nga nyikela tinhlamuselo leti olovaka. Vana lava nga emahlweni ka malembe ya kondlo-a-ndzi-dyi va hlanganyela eka Xikolo xa Vutirheli bya le Tilweni. Vana vo tala va kondlo-a-ndzi-dyi va heta masiku yo wisa ya xikolo va ri ku pfuneni ka vaakelani ku dyondza hi ta Xikwembu na hi switshembiso swa xona leswi hlamarisaka swa vumundzuku.

Hakunene a ku na nchumu lexi xi nga xintshwa mayelana ni ntirho wo tano wa vantshwa. Bibele yi vulavula hi vantshwa vo tshembeka va xinuna ni va xisati, kun’we ni vantshwa ni vana lavantsongo, lava va vekeke swikombiso leswi xiyekaka eku tirheleni ka Xikwembu.

Buku ya Bibele ya Tipisalema yi vhumbe hi ‘ntlawa wa vantshwa’ tanihi lava va phyuphyisaka no tala tanihi “mbera,” entirhweni wa Xikwembu. Nakambe yi hlamusele hi “madžaha” ni “v̌anhwana” lava dzunisaka vito ra Xikwembu. (Psalma 110:3; 148:12, 13) Kumbexana, vantshwa van’wana a va ri exikarhi ka lava a va ri kona loko moya lowo kwetsima wa Xikwembu wu chululeriwa eka vapfumeri hi Pentekosta ya 33 C.E. Hi siku rero kwalomu ka 3 000 va amukele Rito naswona va khuvuriwile. Muapostola Petro u vule leswaku xiendlakalo lexi xo hlamarisa a ku ri ku hetiseka ka vuprofeta bya Yuwele: “Vana va n’wina va xinuna ni va xisati va ta vhumbha, vana va n’wina va majaha va ta vona swivono, lavo dyuhala va n’wina va ta lorha milorho.”—Mintirho 2:4-8, 16, 17, 41.

Swikombiso swin’wana swa Bibele swa vanhu lava tirheleke Yehova Xikwembu evuntshweni bya vona swi katsa Samuwele, Hosi Davhida wo lulama, vaprofeta va Bibele lava tivekaka kahle, Yeremiya na Daniyele, kun’we na Timotiya wo tshembeka. Nkandziyiso lowu wu khome swihloko swinharhu leswi bulaka hi swin’wana swa swikombiso leswi swa Bibele. Eka swihloko leswi u ta vona leswaku ha yini vantshwa, kun’we ni vanhu lava kuleke, va teka ku tirhela Xikwembu ku ri mhaka leyikulu ni mhaka leyi ha yona va hetaka nkarhi wo tala swinene va pfuna vaakelani va vona ku endla hi laha ku fanaka.

[Nhlamuselo ya le hansi]