Vutomi Endzhaku Ka Rifu—Swivutiso Leswi Nga Hlamuriwangiki

“LOKO munhu la hanyeke kahle a fa a nga tlhela a hanya?” (Yobo 14:14, NW) Xivutiso lexi, lexi vutisiweke eka malembe xidzana yo tala lama hundzeke hi mupatriarka Yobo, xi kambisisiwile hi vanhu eka vandla rin’wana ni rin’wana ra vanhu hi malembe yo tala, naswona a ku nga ri na ku kayivela ka tinhlamulo leti nyikeriweke.

Magriki ya khale ma vule leswaku mimoya-xiviri (souls) ya lava feke yi ya emahlweni yi hanya. Leyi a a yi rhwariwa yi pela nambu wa Styx ku ya eka xivandla lexikulu lexi nge hansi ka misava lexi vuriwaka tiko ra le hansi. Laha va avanyisi va avanyisaka mimoya-xiviri yi ya eku xanisiweni ekhotsweni ra makhumbi yo leha kumbe yi ya entsakweni eParadeyisini. Vanhu van’wana va khale a va ehleketa leswaku mimoya-xiviri a yi va tinyeleti kumbe tinyeleti ta mincila. Nakambe van’wana a va ehlekete leswaku mimoya-xiviri ya hatima naswona a yi kokeriwa henhla en’wetini; n’hweti yin’wana ni yin’wana loko n’weti wu hlangana, a yi hundziseriwa edyambyini.

Namuntlha, mianakanyo leyi khumbaka vutomi bya le ndzhaku ka rifu yi ya emahlweni yi andza. Mahindu ni Mabudha va tshembela eka ku tswariwa nakambe. Mamoslem ma dyondzisa leswaku moya-xiviri wu pona rifu ra miri naswona eku avanyiseni ka makumu wu ta ya eparadeyisini kumbe etiheleni. Maprotestente yo tala ma dyondzisiwa leswaku mimoya-xiviri yi ya emahlweni yi hanya endzhaku ka rifu, leswaku yi tokota ntsako wa le tilweni kumbe nxaniso wa malangavi ya tihele. Eka mianakanyo leyi Vukhatoliki byi engetela Limbo ni pagatori.

Etindhawini tin’wana, mintshembo malunghana ni leswi vuriwaka mimoya-xiviri i ku hlangana loku nga tolovelekangiki ka mikhuva ya kwalaho ni Vukriste bya nomu. Hi xikombiso, i ntolovelo exikarhi ka Makhatoliki ni Maprotestente yo tala eAfrika Vupela-dyambu ku pfala swivoni loko un’wana a fa leswaku ku nga vi na munhu loyi a nga ta vona moya wa munhu loyi a feke. Masiku ya makume mune endzhaku ka rifu ra la rhandzekaka, ndyangu ni vanghana va ta hlangana ku ta tlangela ku tlhandluka ka moya-xiviri wu ya etilweni. Endzhaku ka sweswo, hi ntolovelo hi Khisimusi kumbe hi Siku ra Lembe Lerintshwa, maxaka ma ta endzela sirha kutani ma chela swakunwa swa xihoko esirheni. Va tlhela va vulavula ni mufi, va kombela mpfuno ni ku vula timhaka ta ndyangu.

Entiyisweni, a ku na ku twanana exikarhi ka vukhongeri bya misava eka leswaku hakunene i yini lexi humelelaka endzhaku ka rifu. Hambi swi ri tano, ku ni ntwanano wa misava hinkwayo eka mhaka yin’we ya xisekelo: ku nga fi ka moya wa munhu. Tidyondzo to tala ta mayelana ni vutomi endzhaku ka rifu ko va ntsena ku hundzuka-hundzuka ka mhaka leyi ya xisekelo.

Hambi swi ri tano, swivutiso swin’wana leswi tlhontlhaka swa tlhekeka: Hi kwihi laha miehleketo ya leswaku moya a wu fi yi taka hi kona? Ya dyondzisiwa eMatsalweni? Loko swi ri tano, ha yini hambi lava nga riki na ripfumelo ra Vukriste va yi dyondzisa? Leswi a hi swivutiso leswi faneleke ku honisiwa. Ku nga khathariseki leswaku hi yihi mianakanyo ya vukhongeri bya wena, rifu i mhaka leyi ku faneleke ku langutaniwa na yona. Kutani xisweswo timhaka leti ta ku khumba hi munhu hi xiyexe. Kutani ke, ha ku rhamba leswaku u kambisisa timhaka leti hi miehleketo leyi pfulekeke.