U Nga Kuma Rifuwo Leri Tlulaka Nsuku!
NTIYISO lowu nga le Bibeleni wu nga ha fanisiwa ni nsuku, ni silivhere kumbe rifuwo leri fihliweke. Hambi loko a wu nga langutelanga nsuku kumbe silivhere ya xiviri, kumbexana wa swi xiya leswaku ku endla tano swi lava ntirho wa matimba ni ku tiyisela. Naswona hakanyingi mulanguteri u hlangavetana ni ku hetiwa matimba.
Hambi swi ri tano, ku hetiwa matimba ko tano a ku vi kona ni siku ni rin’we loko u lava rifuwo leri fihliweke eBibeleni. Xiya xitiyisekiso lexi lexi khutazaka: “Loko u ŝi lav̌a kukotisa mali, u hakuta kukotisa šuma leši fihliweke, hi laha u nga ta twisisa ku tšhav̌a ka Yehova, u ta kuma ku tiv̌a ka Šikwembu.” (Swivuriso 2:4, 5) Kambe u fanele ku lavisisa.
“Lavisisa Swinene U Ta Vona”
“Lavisisa swinene u ta vona leswaku ku hava muprofeta la humaka eGaleliya.” Lexi a ku ri xitsundzuxo lexi Vafarisi van’wana va Vayuda va lembe xidzana ro sungula va xi nyikeke Nikodema, na yena i Mufarisi. “Lavisisa swinene u ta vona.” I xitsundzuxo lexinene hakunene. A swi koteka ku lavisisa ivi u wu kuma ntiyiso—nchumu wa nkoka ku tlula nsuku.
Hambi swi ri tano, emhakeni yoleyo, lava va nyikeke xitsundzuxo xo “lavisisa swinene u ta vona” va tsandzekile ku endla tano. Njhani?
Vaprista lavakulu va rhumele vatirhela mfumo leswaku va ya khoma Yesu Kriste. Hi ku tsakisiwa hi ndlela ya yena yo dyondzisa, vatirhela mfumo a va vuyanga na yena. Hi loko Vafarisi va va vutisa: “Xana na n’wina mi xiseteriwile xana?” Nikodema a vulavulela henhla a ku: “Xana Nawu wa hina wu nga a-vanyisa munhu, a nga si yingisiwa, ni leswi a swi endleke swi nga si tiviwa xana?” Marito lawa ma seketele xitsundzuxo xa ku “lavisisa swinene u ta vona.”—Yohane 7:32, 45-52.
Xana vaprista ni Vafarisi va tsandzekise ku yini? A va nga swi tivi naswona a va nga pfumeli leswaku hambi leswi Yesu a kuriseriweke eGaleliya, u velekiwe eBetlehema. Muprofeta Mikiya u vhumbile: “E ka wena [Betlehema] ku ta huma loyi a nga ta v̌a hosi ya Israel.” (Mikea 5:2) Kutani vavanuna volavo lava rhangelaka va tsandzekile ku lavisisa swinene va ta vona switiyisekiso swa Yesu tanihi muprofeta loyi a a ta va mufumi eIsrayele. Leswi swi yise eka mimbuyelo yo vava, naswona swi komba ndlela leyi swi nga swa nkoka ha yona ku lavisisa kutani u kuma ntiyiso hinkwawo mayelana ni timhaka. Kambe, xana ntiyiso hakanyingi wu langutiwa njhani?
Ntiyiso Wu Thyakisiwile
“Ntiyiso lowu tengeke, tanihi nsuku lowu tengeke, wu kumiwe wu nga faneleki leswaku wu nga hangalasiwa hikuva vanhu va kume swi olova swinene ku thyakisa ntiyiso ku tlula ku tibasisa,” ku vule mutsari wa lembe-xidzana ra vu-19. Languta ndlela leyi marito lawa ma ha tiyiseke ha kona malunghana ni xivandla xa vukhongeri bya misava! Loyi a hlohlotelaka ku thyakisiwa loku ka ntiyiso i “tata wa mavunwa,” Sathana Diyavulosi. (Yohane 8:44; Nhlavutelo 12:9) U tirhisa vukhongeri bya mavunwa leswaku a thyakisa tidyondzo ta ntiyiso eka swivutiso swa nkoka swo fana ni leswi: Xana Xikwembu i mani? Hi byihi vuxaka bya Yesu na xona? Xana misava ni vanhu swi kongome kwihi?
Vaprista ni Vafarisi a va ta va va wu lavisisile ntiyiso va tlhela va wu kuma. A va ta va va kume rifuwo leri tlulaka nsuku swinene. Ina, a va ta va va kume ntiyiso hinkwawo mayelana na Yesu hi ‘ku n’wi yingisela ni ku tiva leswi a a swi endla,’ hi laha Nikodema a ringanyeteke ha kona. Loko a va tiyimiserile eku endleni ka leswi, handle ko kanakana Yesu a a ta va a va hlamusele swilo, hi laha a endleke ha kona eka vadyondzisiwa va yena. (Marka 4:34) Kambe, hi kwihi laha namuntlha hi nga kumaka ntiyiso lowo tenga? Entiyisweni, xana xi kona xitiyisekiso xo karhi xa leswaku hi nga wu lavisisa hi tlhela hi wu kuma ntiyiso hinkwawo?
[Xifaniso lexi nga eka tluka 4]
Varhangeri va vukhongeri a va ta va va kume ntiyiso hinkwawo mayelana na Yesu hi ‘ku n’wi yingisela’