Dzunisa Vito Leri Kwetsimaka Ra Yehova!
“Nomu wa mina a wu bumabumele Yehova, kutani ŝiv̌umbiwa hikwaŝo a ŝi v̌onge v̌ito ra yena le’ri hlawuriweke, hi masiku ni masiku la’ma nga heriki!”—PSALMA 145:21.
1, 2. (a) Sathana u tlhontlhe vuhosi bya Xikwembu hi ndlela yihi? (b) I swivutiso swihi leswi tlakusiwaka malunghana na Psalma 145:11-21?
YEHOVA handle ko kanakana i Hosi ya Hinkwako-nkwako. Kambe Sathana u tlhontlhe vululami ni ku faneleka ka vuhosi bya Xikwembu. (Genesa 2:16, 17; 3:1-5) Diyavulosi nakambe u tise ku kanakana eka vutshembeki bya malandza hinkwawo ya Xikwembu etilweni ni le misaveni. (Yobo 1:6-11; 2:1-5; Luka 22:31) Kutani Yehova u pfumelele nkarhi wa leswaku swivumbiwa hinkwaswo swo tlhariha swi vona mihandzu leyo biha ya ku xandzukela vuhosi bya yena ni ku kombisa laha swi yimaka kona etimhakeni leti.
2 Psalma 145 yi hi pfuna ku yima hi tiyile emfun’weni wa Xikwembu. Hi ndlela yihi? Davhida u vula yini mayelana ni vuhosi bya Yehova? Naswona Xikwembu xi va khoma hi ndlela yihi vayimeri va wona? Tinhlamulo leti pfunaka ti humelela eka Psalma 145:11-21.
Vulavula Hi Vuhosi Bya Yehova
3. Loko vuhosi bya Yehova byi rhandzeka eka hina, i yini lexi hi nga ta xi endla?
3 Vuhosi bya Yehova a byi ri bya nkoka ngopfu eka Davhida, loyi a nge te: “V̌a ta v̌ula ku kwetsima ka ku fuma ka wena, v̌a twarisa matimba ya wena. V̌a ta tiv̌isa v̌ana v̌a v̌anhu e mitiro ya wena, ni v̌ukulu bya ku kwetsima ka v̌uhosi bya wena.” (Psalma 145:11, 12) Vanhu va vulavula hi swilo leswi swi va tsakisaka. Wanuna u vulavula hi ndyangu wa yena, kaya ra yena, swa le masin’wini ya yena hi ndlela yoleyo. Yesu u te, “munhu lonene ú humesa leswinene exumeni lexinene xa mbilu ya yena.” (Luka 6:45) Loko vuhosi bya Xikwembu byi rhandzeka etimbilwini ta hina, hi ta khongelela Mfumo wa yena leswaku wu ta, naswona hi ta byela van’wana hi vululami, ku rhula ni vunene lebyi nga ta andza ehansi ka ku fuma ka wona. Hi ta dzunisa Yehova tanihi ‘Hosi leyi nga riki na ku hela,’ naswona hi ta vulavula hi nhlamuselo ya vuhosi bya yena hi Mfumo wa Vumesiya emavokweni ya N’wana wa yena la rhandzekaka, Yesu Kriste. (Nhlavutelo 15:3; Esaya 9:6, 7) Mawaku lunghelo leronghasi ro vulavula hi ku kwetsima ka matilo ka vuhosi bya Yehova, loku ku nga ri khale ku nga ta kombisiwa eku sasekeni ka paradeyisi ya la misaveni leyi teleke hi swivumbiwa leswi tsakeke hi ku helela!—Luka 23:43.
4. Hi wu kuma rini nkarhi wo vulavula hi “matimba” ya Yehova, naswona hi tiyisiwa njhani entirhweni wo tano?
4 Ku tlangela ku ta tlhela ku hi susumetela ku vulavula hi “matimba” ya Yehova. Hambi leswi ‘a nga tlakuka hi matimba,’ a nga ma tirhisi hi ndlela yo biha. (Yobo 37:23) U tirhise matimba ya yena ku vumba misava ni vanhu naswona u ta ya tirhisa ku herisa lavo biha. Hi na nkarhi wo vulavula hi matimba ya Xikwembu loko hi twarisa mahungu lamanene. Naswona xana a hi tlangeli leswi Xihlovo lexi xikulu xa matimba xi hi nyikaka matimba leswaku hi endla ntirho lowu? (Esaya 40:29-31) Ina, tanihi Timbhoni ta Yehova, ha seketeriwa entirhweni wo kwetsima hi matimba ni moya wa Xikwembu. Hi yona ntsena ndlela leyi mahungu ya Mfumo ma huweleriwaka ha yona hi ku humelela loku hlamarisaka emisaveni hinkwayo.—Psalma 28:7, 8; Zakaria 4:6.
5. Tanihi leswi mintshungu yi nga tiviki hi ta ‘mintirho ya matimba’ ya Yehova, hi fanele ku endla yini?
5 Ku na xilaveko xa ku va hi tivisa vana va vanhu hi ‘mintirho ya matimba’ ya Yehova, tanihi leswi Vaisrayele va byeleke vana va vona hi ndlela leyi Xikwembu xi va kutsuleke ha yona evuhlongeni aEgipta. (Eksoda 13:14-16) Vanhu va akela vanhu switsundzuxo, lava mintirho ya vona va yi langutaka tanihi leyi xiyekaka, kambe i vangani lava tivaka hi ta mitirho ya matimba ya Xikwembu? Hi laha mudyondzi un’wana a swi vekaka ha kona: “Va tsala mintirho ya tinghwazi ta vona ehenhla ka burasi, kambe mintirho leyi dzunekaka ya Yehova yi tsariwa ehenhla ka sava, naswona ku hundza ka nkarhi ku swi susa emiehleketweni ya sweswi.” Swiendlo sweswo a swi susiwi hakunene, hambi leswi swi nga tivekiki eka vanhu vo tala. Kutani entirhweni wa hina wa yindlu na yindlu, loko hi fambisa tidyondzo ta le kaya ta Bibele, ni le ka swiendlakalo swin’wana, a hi vulavuleni hi swiendlo swa matimba swa Xikwembu hi ku chivirika.
6. (a) Emalembeni yo tala lama hundzeke hi le ka xiendlakalo xihi laha moya wa ku gingiriteka lowu hi hetisisaka vutirheli bya hina ha wona wu kombisiweke kahle eka xona? (b) Hi ku landza mongo ku vuriwe yini hi 1922 mayelana ni ku huwelela Mfumo?
6 Nakambe hi fanele hi ku chivirika hi tivisa ku kwetsima ka vuhosi bya Xikwembu. Ku chivirika entirhweni wo tano wa Mfumo a ku ri loku xiyekaka hakunene loko, hi 1922, J. F. Rutherford, muungameri wa nkarhi wolowo wa Sosayiti ya Watch Tower, a vulavula ni vatsombani eCedar Point, Ohio, kutani a ku: “Ku sukela hi 1914 Hosi ya ku dzuneka yi le matimbeni ya yona . . . Mfumo wa tilo wu tshinele; Hosi ya fuma; mfumo wa Sathana wa wa; timiliyoni leti hanyaka sweswi a ti nge fi. Wa swi tshemba ke? . . . Kutani tlhelelani ensin’wini, Oho n’wina vana va Xikwembu lexi tlakukeke swinene! Hakarhani matlharhi ya n’wina! Mi tikhoma, mi hiteka, mi tlhariha, mi va ni xivindzi. Vanani timbhoni to tshembeka ni ta ntiyiso ta Hosi. Yanani emahlweni ni ku lwa ku kondza ntila wun’wana ni wun’wana wa Babilona wu nga ha vi kona. Twarisani mahungu lawa hinkwako-nkwako. Misava yi fanele ku swi tiva leswaku Yehova i Xikwembu ni leswaku Yesu Kriste i Mufumi wa vafumi ni Hosi ya tihosi. Leri i siku ra masiku hinkwawo. Vonani, Hosi ya fuma! Mi vayimeri va yona va le rivaleni. Hikwalaho twarisani, twarisani, twarisani Hosi ni mfumo wa yona.”
7. Hi fanele ku titwa hi ndlela yihi mayelana ni ntirho wa hina tanihi vahuweleri va Mfumo?
7 Mawaku ntsako wonghasi wo ‘ehleketa hi vito ra Xikwembu,’ ku byela van’wana hi vuhosi bya xona, ni ku twarisa Mfumo wa Vumesiya wa N’wana wa xona la rhandzekaka! (Malakia 3:16) Tanihi vahuweleri ni vayimeri va Mfumo, hi tlangela lunghelo ra hina ra ku twarisa mahungu lamanene ni ku hundzuluxela timbilu ta van’wana eka Xikwembu, Kriste ni Mfumo. Endzeni ka hina, ku fanele ku va ni ku navela lokukulu ka ku byela van’wana hi ku vangama lokukulu ka vuhosi bya Yehova.—Ringanisa Yeremia 20:9.
8. (a) Hi le ka yini laha vuhosi bya Yehova byi yimeriwaka kona namuntlha? (b) Ha yini ku nga vuriwaka leswaku Xikwembu xi ni vulawuri “e ku yisa tinšakeni le’ti nga heriki”?
8 Hi fanele ku susumeteleka ku huwelela Mfumo wa Xikwembu hi ku chivirika lokukulu, hikuva endzhaku Davhida u te: “Ina, ku fuma ka wena i ku fuma ka mikari hikwayo, ni v̌uhosi bya wena byi kona e ku yisa tinšakeni le’ti nga heriki.” (Psalma 145:13) Loko ku anakanyisisa ka mupisalema hi vuhosi bya Yehova ku ya emahlweni, u cince masivi ku suka eka “yena” ku ya eka “wena,” a a vula marito ya xikhongelo hi ku kongoma eka Xikwembu. Kavula, mfumo wa Yehova hi laha wu yimeleriweke ha kona eMfun’weni wa Vumesiya a wu sivi mfumo wa Xikwembu lowu nga heriki. Kahle-kahle loko vanhu lava yigisaka va endliwe lava hetisekeke, Kriste u ta nyikela Mfumo eka Tata wa yena. (1 Vakorinto 15:24-28) Kutani Xikwembu xi ni vulawuri “e ku yisa tinšakeni le’ti nga heriki.” Yehova a a ri Hosi loko Adamu a vumbiwile naswona u ta va ni vulawuri ehenhla ka vanhu vo lulama hi laha ku nga heriki.
9. Eka Psalma 145, i yini lexi xi nga vuriwaka mayelana ni ndzimana leyi sungulaka hi letere ra Xiheveru nun?
9 Eka nxaxamelo lowu wa Pisalema, ndzima ya Masorete yi tlula ndzimana leyi sungulaka hi letere ra Xiheveru nun. Kambe mayelana ni Septuagint ya Xigriki, Peshitta ya Syriac na Vulgate ya Xilatini, tsalwa rin’wana ra Xiheveru ri hlayeka hi ndlela leyi: “Yehova u tshembekile emaritweni ya yena hinkwawo, naswona u ni tintswalo [kumbe, “ku tshembeka”] emintirhweni ya yena hinkwayo.” (New World Translation of the Holy Scriptures—With References, nhlamuselo ya le hansi) Xikwembu xi hetisisa switshembiso swa xona hinkwaswo naswona xa tshembeka, xi ni rirhandzu ni tintswalo eka hinkwavo lava tlangelaka vunene bya xona.—Yoxuwa 23:14.
Nseketelo Wa Yehova A Wu Tsandzeki
10. Xikwembu xi ‘hi nyika nseketelo’ hi ndlela yihi?
10 Hosi ya hi laha ku nga Heriki a yi honisi khombo ra malandza ya yona. Xisweswo, Davhida u swi kotile ku: “Yehova o seketela hikwav̌o la’v̌a khunguv̌anyekaka, kutani o olola la’va koramisiweke.” (Psalma 145:14) Ku sukela emasikwini ya Avele, Yehova u seketele vagandzeri va Yena. Loko a hi siyiwe hi ri hexe, a hi ta hluleka ku rhwala mindzhwalo ya hina. Hi pfumala matimba lama aneleke yo byarha makhombo hinkwawo ya vutomi ni nxaniso lowu hi langutanaka na wona tanihi vanhu va Xikwembu, kambe Yehova wa hi seketela. Xivumbeko xa riendli ra Xiheveru leri tirhisiweke laha ri kombisa leswaku Xikwembu xi ya emahlweni xi ‘hi seketela.’ Swi nga xiyiwa leswaku Yohane Mukhuvuri ni N’wana wa Xikwembu hi xoxe va pfune ku pfuxa vadyohi lava tsaneke emahanyelweni. Loko vanhu lava va hudzukile kutani va va malandza ya Yehova, va tsakele mikateko leyi hlamarisaka ya nseketelo wa Xikwembu.—Matewu 21:28-32; Marka 2:15-17.
11. I tindlela tihi leti Yehova a ‘ololaka lava korhamisiweke’ ha tona?
11 Swa tiyisa ku tiva leswaku ‘Yehova u olola lava korhamisiweke’ hi maxangu yo hambana-hambana. U tsakisa lava nga ni gome exikarhi ka hina, u chavelela lava karhatekaka, kutani a hi pfuna ku vula rito ra yena hi xivindzi loko hi xanisiwa. (Mintirho 4:29-31) A nga pfumeleli leswaku mindzhwalo ya hina yi hi tshikilela ntsena loko hi amukela mpfuno wa yena. (Psalma 55:22) Kutani, ku fana ni ‘n’wana wa xisati wa Abrahama’ loyi a ‘khwanyanile’ kambe hi loyi a tshunguriwe hi Yesu emirini, hi fanele ku “dzunisa Xikwembu” loko hi rirhandzu a hi pfuxa emoyeni. (Luka 13:10-17) Lava totiweke lava a va korhamisiwe evuhlongeni bya Babilona va tlangerile loko Xikwembu xi va pfuxa hi 1919, naswona a xi ri karhi xi pfuxa “tinyimpfu tin’wana” leti tlangelaka ku sukela hi 1935.—Yohane 10:16.
12. Swi ta hi ndlela yihi leswaku “mahlo ya ŝiv̌umbiwa hikwaŝo ma [languta hi ntshembo]” eka Xikwembu?
12 Yehova a nga hluleki hi vanhu va yena, hi laha Davhida endzhaku a swi vekaka erivaleni ha kona loko a ku: “Mahlo ya ŝiv̌umbiwa hikwaŝo ma langutile ka wena, kutani u ŝi nyika ŝakudya hi nkari wa ŝona. U funungula šandla ša wena, u šurisa hikwaŝo le’ŝi hanyaka.” (Psalma 145:15, 16) Swi vonaka onge hi loko mahlo ya swivumbiwa hinkwaswo leswi hanyaka ma hundzukela eku tshembeni ka Hosi ya Hinkwako-nkwako. Tintsumi ti languta eka Xikwembu leswaku ti kuma vutomi lebyi hambetaka. Naswona tanihi leswi n’wana a langutaka eka mutswari leswaku a kuma swilo leswi lavekaka, hi languta eka Tata wa hina wa le tilweni. Entiyisweni, eka yena vanhu ni swiharhi hi ku fanana swi kuma ku wundliwa. A ku na un’wana loyi a nga anerisaka swilaveko swa swona. Xikwembu ‘xi swi nyika swakudya hi nkarhi wa swona,’ hi leswaku loko swi laveka.
13. I tindlela tihi leti Yehova a ‘pfulaka voko ra yena ha tona kutani a anerisa ku navela ka xilo xin’wana ni xin’wana lexi hanyaka’?
13 Xikwembu xi ‘pfula voko ra xona kutani xi anerisa ku navela ka xilo xin’wana ni xin’wana lexi hanyaka.’ (Psalma 104:10-28) I ntiyiso, swiharhi swin’wana swa fa hi ku kala swakudya. Vanhu vo tala va sika tanihi vahlaseriwa va vutianakanyi, ntshikilelo ni ku tirhisiwa loko biha ka rifuwo. Ku tlula kwalaho Yesu u vhumbe leswaku “tindlala” a ku ta va xivumbeko xa “xikombiso” xa vukona bya yena emasikwini lawa ya makumu. (Matewu 24:3, 7) Kambe ku hava ni xin’we xa leswi lexi humelelaka hikwalaho ka ku va Yehova a tsonana kumbe a hluleka ku phamela. Anakanya hi magidi ya timiliyoni ta swivumbiwa leswi wundliwaka! Ku tlula kwalaho, pisalema leyi yi nyikela xitiyisekiso xa leswaku ehansi ka ku fuma ka Mfumo, loko ‘munhu a nga fumi munhu leswaku a n’wi vavisa,’ Xikwembu xi ta anerisa swilaveko swa hina swa nyama ni swa moya. (Eklesiasta 8:9; Esaya 25:6) Hambi ku ri namuntlha a hi fanelanga ku va ni ndlala ya swakudya swa moya, hikuva Xikwembu xi swi nyikela hi vunyingi hi nkarhi lowu faneleke hi ku tirhisa “nandza la tshembekaka, wo tlhariha.” (Matewu 24:45-47; 1 Petro 2:2) Hi ku vulavula hi tlhelo ra moya, Timbhoni ta Yehova i vanhu lava phameriwaka ku antswa emisaveni. Xana u kombisa ku tlangela lokukulu ka ku hanana ko tano?
Yehova U Hlayisa Lava N’wi Rhandzaka
14. Hikwalaho ka yini Davhida a swi kotile ku: “Yehova o lulamile tindleleni ta yena hikwato, o ni tintŝalo e mitirweni ya yena hikwayo”?
14 Vuhunguki bya hina byi nga ‘hambukisa ndlela ya hina’ kutani byi hi tisela maxangu, kambe a hi fanelanga ku sola Xikwembu hikwalaho ka ku nonon’hwa loku. (Swivuriso 19:3) Davhida u kombisa leswaku ha yini loko a ku: “Yehova o lulamile tindleleni ta yena hikwato, o ni tintŝalo e mitirweni ya yena hikwayo.” (Psalma 145:17) Xikwembu minkarhi hinkwayo xi endla hi ndlela leyi kongomeke, leyi lulameke ni ya tintswalo. Ngopfu-ngopfu tintswalo ta yena ti kombisiwe eka lunghiselelo ra yena ra ku pona hi gandzelo ra Yesu ra nkutsulo. (Mintirho 2:21; 4:8-12) Yehova nakambe u ni “tintŝalo e mitirweni ya yena hikwayo,” minkarhi hinkwayo wa tshembeka, u ni rirhandzu naswona a nga yi hi nghohe. Kutani tanihi “v̌aetisi v̌a Šikwembu,” a hi veni lavanene, lava lulameke, lava nga ni tintswalo, lava nga yiki hi nghohe ni lava tshembekaka.—Vaefesa 5:1, 2, NW; Deuteronoma 32:4; Psalma 7:10; 25:8; Esaya 49:7; Mintirho 10:34, 35.
15. Hi ‘vitaneriwe eka Xikwembu hi xiviri’ hi ndlela yihi, naswona i yini leswi humeleleke hi ku endla ka hina tano”?
15 Tanihi leswi Xikwembu xi lulameke ni ku tshembeka, hi tshinetiwa eka xona. Ku tlula kwalaho, Davhida wa hi tiyisekisa a ku: “Yehova o le kusuhi ni hikwav̌o la’v̌a ṅwi khongelaka, ni ka hikwav̌o la’v̌a ṅwi khongelaka hi timbilu.” (Psalma 145:18) Loko hi khuvuriwa tanihi vapfumeri lava tinyiketeleke, hi vitane vito ra Yehova. (Mintirho 8:12; 18:8; Varhoma 10:10-15) Leswi xisweswo hi tshineleke ekusuhi ni Xikwembu, xi tshinela ekusuhi na hina. (Yakobo 4:8) Hi ‘huwelela eka yena hi xiviri’ hikuva hi endla tano hi ndlela ya ntiyiso, hi Yesu Kriste. Naswona Yehova u ta va ekusuhi loko hi n’wi gandzela “hi moya ni ntiyiso,” hi kombisa ‘ripfumelo leri nga hava vukanganyisi,’ kutani ‘hi hambeta hi tiyile onge hi loko hi vona Loyi a nga voniwiki.’ (Yohane 4:23, 24; 1 Timotiya 1:5; Vaheveru 11:27) Kutani a hi nge khongeleli swa hava kumbe hi boheka ku langutana ni misava ya Sathana hi ri hexe, kambe hi ta ya emahlweni hi tsakela mpfuno ni nkongomiso wa le henhla. (Psalma 65:2; 1 Yohane 5:19) Mawaku nsirhelelo lowu sweswo swi vulaka wona!
16. Hikwalaho ka yini Yehova a ‘nyika lava va n’wi chavaka leswi va swi rhandzaka’ naswona hi ndlela yihi?
16 Nakambe hi ni nsirhelelo wa ntiyiso, hikwalaho ka swilo swin’wana leswi Yehova a swi endlaka hikwalaho ka hina. Davhida u te: “O nyika la’v̌a ṅwi tšhav̌aka leŝi v̌a ŝi ranḍaka, o yingisa ŝirilo ŝa v̌ona, kutani wa v̌a kuṭula.” (Psalma 145:19) Yehova ‘u hi nyika leswi hi swi rhandzaka’ hikuva hi ni xichavo lexiku eka Xikwembu ni xichavo lexinene xa ku n’wi hlundzukisa. (Swivuriso 1:7) Mbilu ya hina leyi yingisaka yi hi susumetele ku tinyiketela eka Yehova naswona mavonelo ya hina hi lama nge, “Ku rhandza ka wena a ku endliwe.” Tanihi leswi ku nga ku rhandza ka yena leswaku hi twarisa mahungu ya Mfumo, u hetisisa ku navela ka hina ka ku endla ntirho wolowo. (Matewu 6:10; Marka 13:10) Xikwembu ‘xi hi nyika leswi hi swi rhandzaka’ hikuva a hi khongeli hi ri ni vutianakanyi kambe hi kombela swilo leswi twananaka ni ku rhandza ka yena. Xi nyika leswi nga malunghana ni ku rhandza ka xona naswona hi leswi swi hi pfunaka.—1 Yohane 3:21, 22; 5:14, 15; ringanisa Matewu 26:36-44.
17. Hikwalaho ka yini hi nga tiyisekaka leswaku ‘swirilo swa hina’ swa mpfuno swi ta twiwa hi Xikwembu?
17 Tanihi Timbhoni ta Yehova leti tshembekaka, hi nga ha tiyiseka nakambe leswaku ‘swirilo swa hina swa mpfuno’ swi nge weli etindleveni leti nga twiki. Xikwembu xi kutsule Davhida ekhombyeni naswona xi hlayise Yesu, hambi ku ri ku n’wi pfuxa eku feni. Ehansi ka nhlaselo wa valala, ngopfu-ngopfu hi nkarhi wa nhlaselo wa Gogo, hi nga ha tiyiseka leswaku Yehova u ta hi kutsula. (Ezekiel 38:1–39:16) Entiyisweni, hi nkarhi wihi ni wihi wa maxangu, ku fana na Davhida hi nga khongela hi ntshembo hi ku: “Yehova, nḍi ṭeṭelele, hikuv̌a nḍi le mahlomulweni. . . . Hikuv̌a nḍi twa ku sanḍa ka la’v̌o tala, ku ṭhuka ku nḍi renḍele šikari, loko v̌a hlamulana kun’we henhla ka mina; v̌a anakanya ku susa v̌utomi bya mina. Kambe nḍi v̌ekile ku ṭhemba ka mina eka wena, Yehova; ndzi ku: U Šikwembu ša nga!”—Psalma 31:9-14.
18. Hi pfuneka hi ndlela yihi hi ku tiva leswaku Yehova u ‘hlayisa hinkwavo lava n’wi rhandzaka’ kambe u ta ‘lovisa lavo biha?
18 Yehova Xikwembu nkarhi hinkwawo u tiyimisele ku hi pfuna. Hi laha Davhida a vulaka ha kona: “Yehova o lonḍov̌ota hinkwav̌o la’v̌a ṅwi ranḍaka, kambe wa lov̌isa la’v̌o biha hikwav̌o.” (Psalma 145:20) Ina, loko hi rhandza Xikwembu, xi ta hi katekisa ni ku hi hlayisa. (Tinhlayo 6:24-26) Xi ‘tlherisela lava tikurisaka hi mpimo lowukulu’ kambe xi hlayisa malandza ya xona lama titsongahataka, xi nga pfumeleli nchumu wu endleka lowu nga ta va vangela ku vaviseka ka nkarhi hinkwawo. Tanihi leswi Yehova a nga na hina, a hi veni ni xivindzi. (Psalma 31:20-24; Mintirho 11:19-21) ‘A ku na tlhari leri endleriweke ku hi vavisa leri nga ta humelela.’ (Esaya 54:17; Psalma 9:17; 11:4-7) Wolowo i ntokoto wa lava va kombisaka rirhandzu ra vona ra Xikwembu tanihi malandza ya xona yo tshembeka, lama tinyiketeleke. Tanihi ntlawa, Timbhoni ta Yehova ti ta hundza hi ku hlayiseka eku “xanisekeni lokukulu” loku tisiwaka ehenhla ka lavo biha. (Nhlavutelo 7:14) Naswona mawaku nkateko wonghasi lowu ku lulamisiwa ka mphikamakaneta leyikulu ka vuhosi bya Yehova bya hinkwako-nkwako wu nga ta va wona eka “hikwav̌o la’v̌a ṅwi ranḍaka”!
Hambeta U Dzunisa Vito Leri Kwetsimaka Ra Yehova
19. Hikwalaho ka yini milomu ya hina yi “dzunisa Yehova”?
19 Davhida u hetelela pisalema leyi yi nyanyulaka hi marito lawa: “Nomu wa mina a wu bumabumele Yehova, kutani ŝiv̌umbiwa hikwaŝo a ŝi v̌onge v̌ito ra yena le’ri hlawuriweke, hi masiku ni masiku la’ma nga heriki!” (Psalma 145:21) Tanihi Timbhoni ta Yehova, hi tlangela vukulukumba, vunene, vuhosi bya musa, nseketelo lowu nga tsandzekiki ni nkhathalelo wa vulanguteri lebyi nga karhaliki bya Xikwembu. Kutani ku fana na Davhida, milomu ya hina yi dzunisa Xikwembu. Hi susumeteleka ku n’wi nyika ku tinyiketela loku heleleke, hi n’wi nkhensa hi mikateko ya yena yo tala ni ku dzunisa ‘vito ra yena lero saseka.’—1 Tikronika 29:10-13; Eksoda 20:4-6.
20. Hi xikongomelo xa vutomi lebyi nga heriki, ku tiyimisela ka hina ku fanele ku va kwihi sweswi?
20 Tanihi leswi Yehova a hi katekisaka siku na siku, a hi n’wi dzuniseni nkarhi hinkwawo, kumbe hi vulavula leswinene hi yena. A hi twariseni mahungu lamanene hi ku chivirika leswaku hi dzunisa Xikwembu, hi byela van’wana leswaku ku nga ri khale ‘nyama hinkwayo yi ta dzunisa vito ra yena leri kwetsimaka.’ Vona ndlela leyi swi nga ta saseka ha yona ku hanya loko hinkwavo lava akeke misaveni—hakunene, hinkwaswo swivumbiwa swo tlhariha evuakweni hinkwabyo—swi ta yimbelela ku dzuneka eka Tata wa hina wa le tilweni! (Psalma 148:1-13) A ku dzunisiwe Yehova hikwalaho ko paluxa vito ra yena ni ku hi nyika lunghelo ra ku va Timbhoni ta yena. (Psalma 83:18; Esaya 43:10-12) Onge hi nga tikhoma hi mukhuva lowu lulamelaka lava khomaka vito rero hi ku kwetsima ni ku khongelela ku kwetsimisiwa ka rona. (Luka 11:2) A hi tirheleni Xikwembu hi ku tshembeka, leswaku eka mafambiselo ya xona lamantshwa, marito ya hina ma ta twiwa eka risimu ra lava va dzunisaka vito ra Yehova ro kwetsima hi laha ku nga heriki.
Hi Tihi Tinhlamulo Ta Wena Ke?
◻ Hi ta endla yini loko vuhosi bya Yehova byi rhandzeka eka hina?
◻ Hi le ka yini laha vuhosi bya Xikwembu byi yimeriwaka kona namuntlha?
◻ Yehova u va ‘olola hi ndlela yihi hinkwavo lava korhamisiweke’?
◻ I tindlela tihi leti Yehova a ‘pfulaka voko ra yena ha tona kutani a anerisa ku navela ka xilo xin’wana ni xinw’ana lexi hanyaka’?
◻ Hi nga dzunisa vito ra Yehova leri kwetsimaka hi ndlela yihi?
[Xifaniso lexi nga eka tluka 17]
Hi 1922 marito lama nge ‘twarisani Hosi ni Mfumo’ ma susumetele vayimeri va vuhosi bya Yehova ku endla ntirho lowukulu