Yima U Tiyile eNtshunxekweni Wa Vukriste!

Tinhla-nkulu Leti Humaka Eka Vagalatiya

YEHOVA i Xikwembu xa ntshunxeko. (2 Vakorinto 3:17) N’wana wa xona, Yesu Kriste, u te: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Naswona hi ku tekelela Kriste, muapostola Pawulo u chumayele mahungu lamanene ya ntshunxeko.—Varhoma 6:18; 8:21.

Hi ku vula rungula rero ro nyika ntshunxeko, Pawulo u simeke mabandlha ya le Galatiya (xifundza-nkulu xa Rhoma le Asia Minor) eka riendzo rakwe ro sungula ra vurhumiwa (47-48 C.E.). Vagalatiya a va xi tiva xiboho xa huvo leyi fumaka xa leswaku ku yimba a ku laveki eka Vakriste. (Mintirho 15:22-29) Kambe lava a va amukela mikhuva ya Vayuda a va lava ku va tshikilela hi ku va sindzisa leswaku va yimba. Kutani Pawulo u kandziyise ntshunxeko wa Vukriste epapileni leri a tsaleleke Vagalatiya a ri eKorinto kumbe eAntiyoka wa Siriya kwalomu ka 50-52 C.E. Hi xikombiso, u te: “Hi ntshunxiwile hileswi Kriste a hi ntshunxeke. Hikokwalaho, yimani mi tiya, mi nga ha tlheli mi tiveka ehansi ka mpingu wa vuhlonga.”—Vagalatiya 5:1.

Pawulo A Lwela Vuapostola Byakwe

Xo sungula Pawulo u kombise leswaku vuapostola byakwe a byi huma eka “Yesu Kriste ni Xikwembu.” (1:1–2:14) Hikwalaho ka nhlavutelo, Pawulo (na Barnaba kun’we na Tito) va ye eYerusalema malunghana ni mphikamakaneta ya ku yimba. Kwalaho, Yakobo, Kefasi (Petro), na Yohane va swi xiyile leswaku se a a nyikiwe matimba ya ku va muapostola etinxakeni. Kutani loko endzhaku Petro a tihambanise ni vapfumeri Vamatiko le Antiyoka hikuva a chava Vakriste va Vayuda va le Yerusalema, Pawulo u n’wi tshinyile.

U Vuriwa Njhani Leswaku U Lulamile?

Nakambe muapostola u endle yinhla leyi tiyeke ya leswaku munhu wihi na wihi a nga vuriwa la lulameke hi ku pfumela eka Yesu Kriste ntsena. (2:15–3:29) Vagalatiya va amukele moya wa Xikwembu, ku nga ri hikwalaho ka mintirho ya nawu, kambe hikokwalaho ka ku amukela mahungu lamanene hi ripfumelo. Vana va xiviri va Abrahama va ni ripfumelo, kambe vanhu lava ringetaka ku tikombisa va ri lava lulameke hi leswi va “hlayisaka nawu, va le ku rhukaniweni.” Ha yini? Hikuva Nawu a va nge wu hlayisi hi ku hetiseka. Kahle-kahle, Nawu wu paluxe swidyoho, naswona a wu ri ‘murisi la yisaka eka Kriste.’

Yima U Tiya!

Hi rifu ra yena, Kriste u ‘ntshunxe lava a va ri hansi ka nawu.’ Kambe valandzeri vakwe va fanele va yima va tiyile entshunxekweni wa Vukriste. (4:1–6:18) Kutani Vagalatiya a va fanele ku alela wihi na wihi la ringetaka ku va hambukisa leswaku va amukela mpingu wa vuhlonga. Ku tlula kwalaho, a va nga ta tirhisa ntshunxeko wa vona hi vusopfa kambe a va fanele va papalata “mintirho ya ntumbuluko wa nyama” ivi va kombisa mihandzu ya moya wa Xikwembu. Lava va lavaka ku va nghenisa evuhlongeni bya Nawu va lave ku “tikomba va ri lavanene hi ku tidzunisa hi swilo swa laha misaveni,” va papalata nxaniso, kutani va va ni xivangelo xo tinyungubyisa. Hambi swi ri tano, Pawulo u kombe leswaku ku yimba ni ku nga yimbi a swi tirhi. Ku ri na sweswo, “mhaka leyikulu i ku va xivumbiwa lexintshwa.” U khongelele ku rhula ni tintswalo leswaku swi va ehenhla ka Israyele wa moya, volavo va xivumbiwa lexintshwa.

Papila ra Pawulo eka Vagalatiya ri va pfune leswaku va alela lava va lavaka ku va endla mahlonga emoyeni. Onge ri nga tlhela ri pfuna na hina leswaku hi kombisa mihandzu ya moya ni ku yima hi tiya entsunxekweni wa Vukriste.

[Bokisi/Xifaniso lexi nga eka tluka 23]

Mimfungho Leyi Tshikileriweke: “Ndzi nga ha karhatiwi hi munhu,” ku tsale Pawulo, “hikuva timbanga leti ndzi nga na tona emirini, i mfungho wa leswaku ndzi hlonga ra Yesu.” (Vagalatiya 6:17) Exikarhi ka vahedeni van’wana va khale, mahlonga a ma fungheriwa ku kombisa vini va wona. Mimpfampfarhuto yo hambana-hambana a yi hisiwa kumbe ku tsariwa emirini wa vona. Handle ko kanakana, ku xanisa miri loku endliweke ko tala emirini wa Pawulo hikwalaho ka ntirho wa yena wa Vukrite ku siye swivati swo karhi, leswi tiyisekisaka ku tivula kakwe tanihi hlonga ro tshembeka ra Kriste, loyi a xanisiweke hikwalaho ka Yena. (2 Vakorinto 11:23-27) Leswi swi nga ha va swi ve “mfungho” lowu Pawulo a kombeteleke eka wona, kumbe a nga ha va a a ehleketa hi vutomi lebyi a byi hanya tanihi Mukriste, a kombisa mihandzu ya moya wa Xikwembu ni ku hetisisa ntirho wakwe.

[Xifaniso]

Mahlonga ya Rhoma a ma sindzisiwa ku tirhela vini va wona, kambe Pawulo a a ri hlonga ra ku tirhandzela, leri tsakeke ra Yesu Kriste