Vun’we Byi Tiyile Ha Kriste

Tinhla-nkulu Leti Humaka Eka Vaefesa

EKU sunguleni hi 52 C.E., muapostola Pawulo a a chumayela aEfesa. Doroba-nkulu leri ro fuwa ra mabindzu ra le Asia Minor nakambe a a ri ri ntsindza wa vukhongeri bya mavunwa. Kambe Vukriste byi ndlandlamukile kwalaho endzhaku ka ku tlhelela ka Pawulo aEfesa, kumbexana hi xixika xa 52/53 C.E. U nyikele tinkulumo ta siku na siku eholweni ya le xikolweni ni ku nyikela vumbhoni hi yindlu na yindlu hi nkarhi wa ku tshama kakwe ka kwalomu ka malembe manharhu.—Mintirho 19:8-10; 20:20, 21, 31.

Loko a ha khotsiwile eRhoma kwalomu ka 60-61 C.E., Pawulo u tsalele Vakriste va le Efesa. Mhaka-nkulu ya papila rakwe i vun’we ha Yesu Kriste. Entiyisweni, ri ni swikombo swa 13 eka ‘vun’we na Kriste,’ ku tlula rihi na rihi ra mapapila lawa Pawulo a ma tsaleke. Ku fana ni Vaefesa, hi nga pfuneka emaritweni ya Pawulo mayelana ni xiphemu xa Kriste, hi papalata ku tikhoma ko biha ni ku lwisana ni matimba ya mimoya leyo biha.

Vun’we I Xikongomelo Xa Xikwembu

Xo sungula, Pawulo u hlamusela ndlela leyi ha yona Xikwembu xi nga ta tisa vun’we ha Kriste. (1:1-23) Yehova u kunguhate ku tlhela a hlanganisa swilo hinkwaswo ndhawu yin’we ematilweni ni le misaveni hi ku tirhisa “vukongomisi” (NW) (ndlela yo kongomisa timhaka). Ha Kriste, Xikwembu xi ta tihlengeletela hi xoxe lava hlawuriweke ku ya hanya etilweni ni van’wana lava nga ta hanya emisaveni. Namuntlha, Xikwembu xi hlanganise lava totiweke ni “ntshungu lowukulu,” naswona ku ‘hlengeletiwa ka swilo hinkwaswo emisaveni’ ku ta ya emahlweni ku kondza lava nge masirheni va twa rito ra Yesu ivi va huma. (Nhlavutelo 7:9; Yohane 5:28, 29) Hi fanele ku swi nkhensa leswi, hi laha Pawulo a khongeleke ha kona leswaku Vaefesa va ta tlangela lunghiselelo ra Xikwembu eka vona.

Nyingiso wu ye mahlweni wu kongomisiwa eka Vakriste Vamatiko, lava a va file exidyohweni. (2:1–3:21) Hikwalaho ka Kriste, Nawu wu herisiwile ivi masungulo ma vekeriwa Vayuda ni Vamatiko leswaku va hlangana ni leswaku va va tempele ya Xikwembu leyi ku nga ta tshama moya eka yona. Ntirho wa Pawulo a wu ri ku tivisa xihundla xo kwetsima xa leswaku Vamatiko va nga ha hlangana na Kriste, loyi ha yena va nga tshinelelaka Xikwembu hi ku vulavula loku ntshunxekeke. Pawulo u tlhele a khongelela Vaefesa, laha a a kombela leswaku Yehova a va endla leswaku va tiyisiwa swinene hi ripfumelo ni rirhandzu.

Swilo Leswi Kondletelaka Vun’we

Pawulo u kombise leswaku Xikwembu xi nyikele swilo leswi hlanganisaka. (4:1-16) Exikarhi ka leswi ku na huvo ya moya ku nga bandlha. Huvo leyi yi tirha hi vun’we ehansi ka vufambisi bya Kriste. Naswona u ha vanhu tinyiko leswaku va pfuna hinkwavo leswaku va va un’we eripfumelweni.

Nakambe Yehova u endla swi koteka ku kombisa timfanelo ta Vukriste leti kondletelaka vun’we. (4:17–6:9) Hi ku va va ambale “munhu lontshwa,” Vakriste va papalata vuhomboloki byo tanihi ku vulavula loku thyakeke. Va famba hi vutlhari, va kombisa xichavo eka Kriste, ni ku kombisa ku titsongahata lokunene.

Nakambe, Xikwembu xi pfuna Vakriste ku lwisana ni matimba ya mimoya leyo biha leyi lavaka ku kavanyeta vun’we bya hina. (6:10-24) Swisirhelelo swa moya leswi humaka eka Xikwembu swi nyika nsirhelelo wo tano. Kutani a hi swi tirhiseni naswona hi khongela swinene, hi katsa ni vapfumeri-kulorhi eswikombelweni swa hina.

Mawaku xitsundzuxo xonghasi lexinene lexi Pawulo a xi nyikaka Vaefesa! Onge hi nga xi yingisa hi ku papalata ku tikhoma loko biha ni ku lwisana ni matimba ya mimoya leyo biha. Naswona a hi tlangeleni hi rirhandzu vun’we lebyi hi byi tsakelaka ha Yesu Kriste.

[Bokisi/Xifaniso lexi nga eka tluka 24]

Miseve Leyi Pfurhaka: Swisirhelelo swa moya swi katsa ‘xitlhangu xa ripfumelo’ lexi ha xona u nga herisaka kumbe ku timela “miseve hinkwayo leyi pfurhaka” ya Sathana. (Vaefesa 6:16) Miseve yin’wana leyi a a yi tirhisa hi Varhoma a ku ri mahlanga lama nga ni xikutsu xa nsimbi ehansi ka yinhla leyi tatiweke hi pharafini leyi pfurhaka. A yi susumetiwa evurheni byo debya leswaku ndzilo wu nga timeki, naswona ku wu chela hi mati a ku tlakusa malangavi ya ndzilo. Kambe switlhangu a a swi sirhelela masocha eka miseve yo tano, tanihi leswi ripfumelo eka Yehova ri endlaka malandza yakwe leswaku ma “kota ku timela . . . miseve hinkwayo leyi pfurhaka ya nyavuntshwaka.” Ina, ripfumelo ri hi pfuna leswaku hi lwisana ni swilo swo tano loko hi hlaseriwa hi mimoya leyo biha kun’we ni mindzingo ya ku endla leswi hambukeke, ni ku landzela ndlela ya vutomi ya swilo leswi vonakaka ni ku hluriwa hi ku chava ni ku kanakana.