Ndlela Leyi Yehova A Yisaka Ntirho Wa Yena eMahlweni Ha Yona

EKA makume ya malembe ya sweswinyana, Timbhoni ta Yehova ti tokote ku andza loku xiyekaka. Emalembeni ya khume ntsena lama hundzeke, va engeteleke ku sukela eka mabandlha ya 42 600 ku ya eka ntsengo wa 60 192 ematikweni ya 212. Hikwalaho ka leswi, van’wana va vutisile: Xana ntirho wa Timbhoni wu seketeriwa njhani hi tlhelo ra timali? Sosayiti ya Watch Tower yi tsakela ku hlamula leswi ni swivutiso leswi yelanaka na swona eka xihloko lexi.

Xana Timbhoni ta Yehova ti tirhisa vukhume?

E-e. Eka Israyele wa khale, vukhume byi lerisiwe ehansi ka Nawu wa Muxe leswaku ku sekeriwa vatirhi va tempele ya Xikwembu, Valevhi ni vaprista. (Tinhlayo 18:21, 24-29) Lava a va nga ri na matiko ya swivongo ka hambana ni miti yin’wana, kutani va lave nseketelo lowu wu hlawulekeke. Ku engetela kwalaho, Vaisrayele lava tshembekaka a a va ntshunxekile ku nyikela minyikelo yo tirhandzela eka mintirho leyi hlawulekeke, yo tanihi ku akiwa ka tabernakele kutani endzhaku, ku va tempele.—Eksoda 25:1-8; 1 Tikronika 29:3-7.

Hambi swi ri tano, loko Yesu a file, Bibele yi vula leswaku “ú herisile Nawu lowu nga ni swileriso ni swinawa-nawana.” (Vaefesa 2:15; Vakolosa 2:13, 14) Hi marito man’wana, emahlweni ya Xikwembu Nawu a a wu nga ha bohi eka Vayuda kumbe Vakriste. Hikwalaho, kun’we ni swivumbeko swin’wana swa Nawu, swo tanihi magandzelo ya nkarhi na nkarhi etempeleni, vukhume a a byi nga ha laveki eka vatshembeki.

Exikarhi ka Vakriste, ku nyika ku susumeteriwa hi rirhandzu, hayi hi nawu. Muapostola Pawulo u hlamusele nsinya wa nawu loko a lulamisa nhlengo wa Vakriste lava pfumalaka eYudiya. U te: “Un’wana ni un’wana a a nyike hilaha a pimaniseke hakona embilwini ya yena, a humesa hi ku ntshunxeka, ku nga ri hi ku vilela, hikuva Xikwembu xi rhandza loyi a nyikaka a tsakile.” (2 Vakorinto 9:7) Ndlela leyi ya Matsalwa yo nyika hi ku tirhandzela yi tirhisiwa hi Timbhoni ta Yehova.

Xana mi kuma mpfuno eka swinkhubyana swa ku tlakusa mali, tivhilopo ta nhlengo, bulo ra swa timali ni tindlela leti fanaka to tlakusa mali?

E-e, Vakriste va ntiyiso a va boheki ku susumetiwa kumbe ku kuceteriwa ku nyikela hi ku kombisiwa tihakelo. Mintlawa ya vukhongeri leyi kumaka mpfuno eka bingo, mabindzu yo pfuna kereke, ku gembula hi mathikithi, vutihungasi lebyi bindzulaka, ku hakeleriwa ka switulu swo hlawuleka kumbe ku fambisiwa ka swibye swa nhlengo, yi kombisa leswaku a va va nyikanga vanhu va vona swakudya swa moya, kutani moya wa Xikwembu a wu va susumeteli vanhu va vona ku nyikela timali hi ku tirhandzela. Leswi fanaka swi nga ha vuriwa hi lava kumaka mpfuno eka mukhuva wa nkarhi lowu hundzeke wa vukhume.—Matewu 10:8.

Mintirho yo fana ni ku akiwa ka Tiholo ta Mfumo letintshwa ni tihofisi ta marhavi, kun’we ni ku kurisiwa ka yindlu-nkulu ya misava eBrooklyn ni le Patterson, New York, mi yi seketela njhani hi tlhelo ra timali?

Yehova u chululela moya wa yena lowo kwetsima ehenhla ka Timbhoni ta yena, a va pfuna “ku endla leswo lulama, va tala rifuwo ra mintirho leyinene, va hanana, va tiva ni ku pambulela van’wana. Hi mukhuva lowu va tihlengeletela xuma lexinene, lexi tiyeke, xa minkarhi leyi taka, leswaku va ta amukela vutomi bya xiviri.” (1 Timotiya 6:18, 19) Moya lowu wu susumetela Timbhoni ta Yehova ku seketela ntirho wa Mfumo hi ndlela yin’wana ni yin’wana.

Hi xikombiso, hi 1989, Timbhoni ta 3 787 188 ematikweni ya 212 ti hete tiawara ta 835 426-538 eku dyondziseni Rito ra Xikwembu eka van’wana. Naswona va fambise tidyondzo ta le makaya ta Bibele ta nkarhi na nkarhi ta 3 419 745 ni vanhu lava tsakelaka. Mali yihi na yihi leyi tirhisiweke entirhweni lowu yi humesiwe hi vanhu lava va wu endlaka. Yehova u hakele ntirho lowu wa rirhandzu hi ku andza ka 263 855 ka Timbhoni letintshwa leti khuvuriweke.

Moya lowu fanaka wo nyika wu susumetela Timbhoni ni vanhu lava tsakelaka ku seketela ntirho hi tlhelo ra timali. Handle ko pfuna ku hakelela swikweleti swa nkarhi na nkarhi swa bandlha ra vona ra kwalaho, va seketela ntirho wihi na wihi wo aka lowu wu nga ha fanelaka, tanihi ku pfuxeta kumbe ku kurisa Holo ya vona ya Mfumo kumbe Holo ya Nhlengeletano kumbe ku aka leyintshwa. Lembe rin’wana ni rin’wana, hikwalaho ka ku andza ka xihatla, nhlayo leyikulu ya Tiholo ta Mfumo yi fanele ku akiwa, tin’wana ti durha hambi ku ri madzana ya magidi ya tirhandi. Mali ya swona yi humesiwa hi Timbhoni ta kwalaho hi ku tirhisa minyikelo ni ntirho wa vona wo tirhandzela.

Ku tlula kwalaho, ematikweni yo tala vugandliselo bya rhavi ni miako ya tihofisi kun’we ni miako yo tshama eka yona yi lave ku kurisiwa—kumbe ku akiwa leyintshwa—leswaku ku rhurheriwa vatirhi lava engetelekeke ni switirho leswi laviwaka hi nhlengeletano leyi kulaka. Leswi na swona swi sekeriwa hi minyikelo ni ntirho wo tirhandzela, ku fana ni leswi mintirho yo aka no pfuxeta eBrooklyn ni le Patterson, New York yi nga tano. Laha swi kotekaka kona, Timbhoni ta kwalaho ti seketela ku aka hi tlhelo ra timali. Etimhakeni tin’wana, Sosayiti ya Watch Tower yi lunghiselela leswaku marhavi ma kuma mpfuno—hi tlhelo ra timali na hi xivumbeko xa vatirhi lava nga ni vutshila—lava humaka eka matiko man’wana. Xisweswo, ehansi ka nkongomiso wa Sosayiti, swa ‘aviwa.’—2 Vakorinto 8:14.

Ha yini mi nga fambisi swibedlhele kumbe tikliniki ivi mi nghenela ntirho wa xilamulela-mhangu ni mintirho yin’wana ya ntshamisano hi laha mintlawa yo tala ya vukhongeri yi endlaka ha kona?

Timbhoni ta Yehova ti hlamula hi xihatla eka makhombo lama vangiweke hi nyimpi kumbe mhangu ya ntumbuluko loko va swi kota. Entiyisweni, hi ntolovelo va le xikarhi ka lavo sungula ku humelela ni swakudya, swiambalo ni vatirhi vo tirhandzela ku pfuna ku aka hi vuntshwa. Hambi swi ri tano, Timbhoni ta Yehova a ti fambisi swibedlhele kumbe tikliniki, hambi ku ri ku lawula tindzawulo ta ndzilo kumbe mavuthu ya maphorisa, leswi naswona swi nga swa ku hlayisa vutomi.

I vatirheli lava tinyiketeleke va evhangeli, naswona xiavelo xa vona i ku chumayela ni ku dyondzisa mahungu lamanene ya Mfumo wa Xikwembu emisaveni hinkwayo leswaku byi va vumbhoni makumu ma nga si fika. (Matewu 24:14) Hi laha Yesu a vuleke ha kona, ntshovelo i wukulu kutani vatirhi a hi vangani. Swi ta va leswi nga rivalelekiki ku honisa ntirho lowu wa nkoka swinene, u ya endla mintirho yin’wana, ku nga khathariseki leswaku yi dzuneka ku fikela kwihi.—Matewu 9:37, 38.

Hi laha swi endlekaka ha kona, Timbhoni ta Yehova to tala i vadokodela, vaongori ni vapfuni eswibedlhele. Kambe va languta ntirho lowu tanihi lowu engetelaka eka ntirho lowukulu, vutirheli bya Vukriste.

Xana va kona exikarhi ka vatirhi kumbe swirho swa Sosayiti ya Watch Tower lava bindzulaka hi mintirho ya n’wina leyikulu yo gandlisa?

Doo! Hi nawu, Sosayiti a hi nhlangano wa bindzu. A ku na vakhomi va xitoko, ku avelana mali, kumbe miholo. Mutirheli un’wana ni un’wana eyindlu-nkulu, ku katsa ni muungameri ni vakongomisi va Sosayiti, va endle xiboho xa nawu xa vusweti. U amukela swakudya, byetlelo, ni vuongori lebyi faneleke bya mirhi, kun’we ni mali leyintsongo ya leswi tirhisiweke hi mali ya yena. Loko Mbhoni yi famba hikwalaho ka ntirho wa Sosayiti, mali ya yena yo famba ha yona hakanyingi ya pfariwa.

Ku engetela kwalaho, a ku kona emisaveni laha vatirheli va hina va hakerisaka hikwalaho ko fambisa micato, minkhuvulo kumbe swilahlo. Naswona ku hava tihakelo kumbe minhlengo yo nghena ha yona eka tinkulumo ta le rivaleni kumbe emintsombanweni.

Tanihi leswi swibya swa nhlengo swi nga fambisiwiki, mabandlha ya kwalaho ma yi kuma njhani minyikelo yo hakela timali ta wona?

Mabokisi ya munyikelo ya vekiwa eTiholweni ta Mfumo leswaku vanhu va kota ku endla minyikelo yo tirhandzela loko va swi tsakela. (2 Tihosi 12:9) Minyikelo hinkwayo, hambi yi ri leyikulu kumbe leyintsongo, ya tlangeriwa. (Marka 12:42-44) Kan’we hi n’hweti, mulanguteri loyi a khathalelaka timali ta bandlha hi ku komisa u hlaya xitatimendhe ebandlheni a va tsundzuxa hi ntsengo wa minyikelo leyi amukeriweke, mali leyi tirhisiweke ni minyikelo leyi endliweke hi bandlha eka Sosayiti ya Watch Tower ku seketela ntirho wo chumayela wa misava hinkwayo ni mintirho yin’wana.

Loko vanhu va twisisa lunghiselelo leri, va ntshunxekile ku hlanganyela loko va swi tsakela, un’wana ni un’wana “leswi a swi bindzuriseke.” (1 Vakorinto 16:2) Leri i endlelo ra rin’wana ni rin’wana ra mabandlha yo tlula 60 000 emisaveni hinkwayo.

Hi Pentekosta Vakriste vo sungula a va ri ni swilo leswi fanaka hinkwavo. Xana Timbhoni ta Yehova ta swi endla sweswo?

Xiyimo xa mhangu xi tlhekekile endzhaku ka Pentekosta ya 33 C.E. loko Vayuda lava humaka etindhawini ta le kule lava a va ha ku hundzuleriwa eka Vukriste va sale eYerusalema ku ya kuma ku voningeriwa kun’wana ka moya. A va lava tindlu ni swakudya swa nkarhinyana; hikwalaho, Vakriste va kwalaho va fambise nxaviso wa nhundzu hi ku tirhandzela ni ku pambulelana loku tolovekeke ka xuma leswaku xi anela nkarhi wo leha wa vunakulobye. (Mintirho 2:1, 38-47; 4:32-37) A nga kona loyi a susumeteriweke ku xavisa kumbe ku nyikela. (Mintirho 5:1-4) Ku va ni swilo leswi swi fanaka a ku nga ri vukhomanisi, hi laha van’wana va anakanyaka ha kona. A ku ri lunghiselelo ra xinkarhana ntsena. Loko Vakriste va tlhelele emakaya ya vona vini, swi herisiwile.

Xana mi dyondzisa leswaku ku nyikela ka leswi vonakaka i ndlela yo rivaleriwa ka xidyoho?

Nikantsongo! Bibele yi ri: “Ma swi tiva leswaku mi kutsuriwile eka tindlela leti nga pfuniki nchumu, leti mi ti kumeke eka vatata wa n’wina; mi kutsuriwile ku nga ri hi swilo leswi onhakaka ku fana ni silivhere kumbe nsuku, kambe hi ngati ya nkoka ya Kriste, leyi fanaka ni ya xinyimpfana lexi nga riki na vulema kumbe xivati.”—1 Petro 1:18, 19.

Timbhoni ta Yehova ti veka ripfumelo eka gandzelo ra nkutsulo ra Yesu leswaku ti ponisiwa. A va endli minyikelo ya ku tirhandzela hi ku langutela leswaku leswi swi ta va ponisa. Hambi swi ri tano, va swi tiva leswaku mali leyi xiyekaka ya laveka leswaku ku hangalasiwa mahungu lamanene ya misava leyintshwa yo lulama ya Xikwembu. (2 Petro 3:13) Naswona va vona ku seketela ka ku huwelela loku, ku ri lunghelo leri nyikiwaka hi Yehova.

Loko a endla munyikelo lowukulu etempeleni ya Yehova leyi n’wana wa yena Solomini a a ta yi aka, Hosi Davhida u khongerile: “Eka wena Yehova ku v̌e v̌ukulu, ni matimba, ni ku twala, ni ku kwetsima, ni v̌uhosi, hikuv̌a hikwaŝo le’ŝi nge tilweni ne misav̌eni, ŝi na wena; . . . Hikuv̌a nḍi mani šana, ni tiko ra nga i rihi šana, leŝaku hi tiv̌a ku humesa ŝilo leŝi? Hikuv̌a hikwaŝo ŝi huma ka wena, kutani leŝi hi ku humeselaka ŝona hi nyikiwile hi v̌oko ra wena.”—1 Tikronika 29:11, 14.

Namuntlha, Timbhoni ta Yehova ni vanhu van’wana lava voyameleke eku lulameni va titwa hi ndlela leyi Davhida a titweke ha yona. Va tsaka ku va ni lunghelo ro endla minyikelo yo seketela ntirho wo dzunisa Yehova, va xiya leswaku xin’wana ni xin’wana lexi va xi nyikelaka entirhweni wa yena xi huma eka yena. Yehova u katekisa moya lowu, naswona leyi hi yona ndlela leyi a yisaka ntirho wa yena emahlweni ha yona.

[Bokisi leri nga eka tluka 23]

NDLELA LEYI VAN’WANA VA NYIKELAKA HA YONA ENTIRHWENI WA MFUMO

◻ TINYIKO: Minyikelo ya ku tirhandzela ya mali yi nga ha rhumeriwa hi ku kongoma eka Watch Tower Bible and Tract Society of Pennsylvania, 25 Columbia Heights, Brooklyn, New York 11201, kumbe eka hofisi ya kwalaho ya rhavi ya Sosayiti. Nhundzu yo tanihi ndhawu ya xiviri, kun’we ni swin’wetsin’wetsi kumbe swin’wana swa nkoka naswona swi nga ha nyikeriwa. Papila ro koma leri kombisaka leswaku sweswo i munyikelo lowu heleleke ri fanele ku fambisana ni minyikelo leyi.

◻ LUNGHISELELO RA MINYIKELO YA KU YA HI SWIYIMO: Mali yi nga ha nyikiwa Watch Tower Society ku yi hlayisa, ku ri ni lunghiselelo ra leswaku loko ku va ni xilaveko xa munhu hi xiyexe, yi ta tlheriseriwa eka loyi a yi nyikeleke.

◻ NDZINDZA-KHOMBO: Watch Tower Society yi nga ha tsariwa tanihi leyi nga ta vuyeriwa eka fambiselo ra ndzindza-khombo wa vutomi kumbe eku kunguhateni ka ku wisa/phenceni. Sosayiti yi fanele ku tivisiwa hi malunghiselelo wahi na wahi yo tano.

◻ SWIBOHO: Nhundzu kumbe mali swi nga ha hundziseriwa eka Watch Tower Society hi ku tirhisa xiboho xa le nawini lexi humesiweke. Kopi yi fanele ku rhumeriwa eka Sosayiti. (Laha Afrika Dzonga swiboho swi nga endliwa eka Jehovah’s Witnesses of South Africa.)

Ku kuma rungula ni switsundzuxo leswi engetelekeke malunghana ni timhaka to tano, tsalela Treasurer’s Office, Watch Tower Bible and Tract Society of Pennsylvania, Private Bag 2067, Krugersdorp, 1740, kumbe eka hofisi ya kwalaho ya rhavi ra Sosayiti.

[Xifaniso lexi nga eka tluka 24]

Xiphemu xa ndhawu yo dyondzisela Bibele eka yona ya Timbhoni ta Yehova xa akiwa ePatterson, New York

[Swifaniso leswi nga eka tluka 25]

Yehova u yisa ntirho wo aka emahlweni hi vanhu va yena lava endlaka minyikelo ya ku tirhandzela