Ndlela Leyi Moya Wa Xikwembu Wu Nga Ku Khumbaka Ha Yona

“EKU sunguleni, Xikwembu xi tumbuluxile matilo ni misava. Misava a yi nga ri na xivumbeko naswona a yi nga ri na nchumu, naswona munyama a wu funengeta vuandlalo bya xidziva lexikulu; naswona Moya wa Xikwembu a a wu hunga-hungela ehenhla ka mati.” (Genesa 1:1, 2, Revised Standard Version) Mhaka leyi ya Matsalwa yi kandziyisa ndlela leyi xiyekaka, leyi un’wana ni un’wana la hanyaka a pfunekeke ha yona eka moya lowo kwetsima. Moya wolowo a wu tirha hi nkarhi wa ku tumbuluxa, naswona hi mpfuno wa ntirho wa wona, misava yi hundzuke kaya leri tsakisaka ra vanhu.

Kambe vanhu va nga pfuneka hi laha ku engetelekeke ngopfu hi moya lowo kwetsima. Xivuriso lexi huhuteriweke xi ri: “Hunḍukani hi ku tshinya ka mina! Maŝiv̌o, nḍi ta mi tšhelela moya wa mina, nḍi mi dyonḍisa timhaka ta mina.” (Swivuriso 1:23) Esikwini rerhu, “timhaka” leti hlengeletiweke ta Xikwembu ta kumeka eBibeleni yo Kwetsima, leyi tsariweke hi vavanuna lava “susumetiweke hi Moya lowo Kwetsima.” (2 Petro 1:21; Marka 12:36; 2 Timotiya 3:16) Loko munhu la titsongahataka a hlaya Bibele masiku hinkwawo, u kuma mpfuno eka moya lowo kwetsima.

Moya Lowo Kwetsima Ni Ntirho Wo Chumayela

Loko un’wana wa Timbhoni ta Yehova a ta ekaya ra wena leswaku a ta vulavula hi mahungu lamanene ya Mfumo, moya lowo kwetsima wu nga khumba vutomi bya wena hi ndlela yin’wana. Xana hi swi tivisa ku yini leswi ke? Kunene, loko Yesu Kriste a sungula ku chumayela mahungu lamanene, u tirhise marito ya muprofeta Esaya eka yena, lama nge: “Moya wa [Yehova] wu le ka mina, hikuva [u] ndzi hlawurile ku ya byela swisiwana emahungu lamanene; . . . ni ku twarisa lembe lerinene ra [Yehova].” (Luka 4:18, 19; Esaya 61:1, 2) Ee, Yesu a a totiwe hi moya lowo kwetsima leswaku a chumayela mahungu lamanene.

Ku tlula kwalaho, Yesu u vhumbe leswaku ku chumayeriwa ka mahungu lamanene a a ku ta ya emahlweni loko a file. U profetile a ku: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Nkarhinyana loko Yesu a nga si tlhandlukela etilweni, u nyike valandzeri vakwe xileriso lexi: “Yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20) Hikwalaho, loko Kriste a tlhandlukele etilweni, vadyondzisiwa vakwe va yise ntirho wa moya lowu pfumeleriweke wa ku chumayela ni ku dyondzisa emahlweni. Namuntlha Timbhoni ta Yehova ti tekelela vadyondzisiwa volavo vo sungula hi ku chumayela mahungu lamanene emisaveni hinkwayo.

Nkhuvulo Ni Moya Lowo Kwetsima

Loko munhu a amukela mahungu lamanene hi ku swi tsakela, Yesu u ri u fanele ku khuvuriwa “hi vito ra Tatana, ni ra N’wana, ni ra Moya lowo Kwetsima.” Hikwalaho vadyondzisiwa lavantshwa va khumbeka nakambe eka moya lowo kwetsima. Xiga, “hi vito ra,” entiyisweni xi vula “hi mpfumelelo wa” kumbe “ku xiya xikhundla xa.”a Hikwalaho, ku va loyi a khuvuriweke hi vito ra Tatana swi vula ku amukela vukulukumba bya Xikwembu evuton’wini bya hina handle ko tipfinyinga. Nkhuvulo evitweni ra N’wana wu vula ku amukela Yesu tanihi Mukutsuri, Musunguri ni Hosi. Naswona nkhuvulo evitweni ra moya lowo kwetsima wu katsa ku titshega hi moya ni ku tinyiketa ematimbeni ya wona.b

Moya Lowo Kwetsima eVuton’wini Bya Wena

Lexi vavisaka, ku nga tshembeki, rigangu-gangu, vukari ni vuhomboloki lebyi tolovelekeke lebyi hi byi vonaka ematikweni ya “Vukriste,” swi seketela mhaka ya leswaku vo tala va lava va vulaka leswaku i Vakriste, kahle-kahle va landzula moya lowo kwetsima. Kambe lava va titsongahataka eka wona va katekisiwa ngopfu. Hikuva va teka leswi va swi hlayaka eBibeleni leyi huhuteriweke hi moya swi ri swa nkoka ivi va swi tirhisa evuton’wini bya vona. Xisweswo, va ni vutlhari, ku twisisa ka vuavanyisi lokunene, vutivi, ni vuswikoti byo ehleketa. (Swivuriso 1:1-4) Leti i timfanelo ta nkoka eminkarhini ya hina leyi karhataka.

Nakambe moya lowo kwetsima wu pfuna vanhu vo tano leswaku va hlula swirhalanganya leswi nonon’hwaka. Eminkarhini ya khale, Xikwembu xi kombise vanhu ndlela leyi a a va ta kota ku hetisisa ntirho wo nonon’hwa ha yona. Yehova u vule leswaku a a wu nga ta endliwa “hi nyimpi ni matimba, kambe hi Moya wa [yena].” (Zakaria 4:6) Loko hi tinyiketa eka Xikwembu ni moya wa xona, hi ta tlhela hi pfuniwa leswaku hi hetisisa mintirho ni ku hlula swihinga leswi handle ka xona a swi ta va leswikulu eka hina.—Matewu 6:33; Vafilipiya 4:13.

Nakambe, moya wa Xikwembu wu hi pfuna leswaku hi tiphina hi ntshunxeko lowu nga riki kona emisaveni hinkwayo. Muapostola Pawulo u tsarile a ku: “Laha Moya wa [Yehova] wu nga kona, ku ntshunxeka ku kona.” (2 Vakorinto 3:17) Lava va tinyiketaka ka moya wa Xikwembu va tsakela ntsako wa ntshunxeko eka vukhongeri bya mavunwa, vukholwa-hava, ku chava vumundzuku ni swilo swin’wana swo tala leswi va endlaka mahlonga. Kunene moya wa Xikwembu i matimba ya leswinene! Wu nga n’wi hundzula munhu. Bibele ya swi khumba leswi loko yi ku: “Mihandzu ya Moya i rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma. Ku hava nawu lowu lwaka ni leswo tano.” (Vagalatiya 5:22, 23) Vona ndlela leyi misava a a yi ta va leyi hambaneke ha yona loko un’wana ni un’wana a a titsongahatela nsusumeto wa moya wa Xikwembu!

Tanihi ntlawa, Vakriste va ntiyiso va tlhela va tiphina hi “vun’we lebyi nyikiwaka hi Moya, [ni ku] hanyisana hi ku rhula.” (Vaefesa 4:3) Vun’we ni ku rhula i swilo leswi kalaka ngopfu namuntlha. Kambe laha moya wa Xikwembu wu tirhaka kona swi kona. Hakunene, exikarhi ka Timbhoni ta Yehova ku rhula loku tiyeke ka moya lowo kwetsima ku hlanganise vanhu va tinxaka hinkwato ni va tindzimi hinkwato, ni va matiko hinkwawo ‘enhlengeletanweni ya vumakwavo’ bya ntiyiso.—1 Petro 2:17.

Wena Ni Moya Wa Xikwembu

Xana wa wu vona mpfuno wa ku va ni nyiko ya vutlhari ya Xikwembu ni ku tiphina hi ntshunxeko wa ntiyiso? Xana a a ku nga ta va vutlhari ku va ni mpfuno wa Xikwembu eku tlhantlheni ka swirhalanganya ni ku hlakulela rirhandzu, ntsako, ku rhula, ku lehisa mbilu, vunene, ku hanana, ku tshembeka, ni musa, ni ku tikhoma? Kutani ke, tinyikete ematimbeni ya moya lowo kwetsima wa Xikwembu. Kambe, xana munhu a nga swi endlisa ku yini leswi?

Pfumelela Bibele, Rito ra Xikwembu, leswaku yi kucetela mianakanyo ni mbilu ya wena. Tinhlanganise ni lava pfumelelaka moya lowo kwetsima leswaku wu kucetela vutomi bya vona. Teka magoza sweswi leswaku u dyondza ni ku endla ku rhandza ka Xikwembu. Kutani ke, “ingi Xikwembu lexi ku langutela ku humaka ka xona xi nga mi tata hi ku tsaka hinkwako ni ku rhula hinkwako eku pfumeleni, leswaku, hi matimba ya Moya lowo Kwetsima, ku langutela ku mi talela, ku va ku khapa.”—Varhoma 15:13.

[Tinhlamuselo ta le hansi]