Xana Bibele U Yi Tiva Swinene Ku Fikela Kwihi?

‘Buku ya Tomasi? Hakunene, yi le Bibeleni. Kambe buku ya Yonas a yi kona. Ndhawu leyi Kriste a velekeriweke eka yona ke? Oho, i Yerusalema—kumbe a a ku ri Nazareta? A ndzi tiyiseki swinene leswaku buku ya Esaya yi le ka xiphemu xo sungula xa Bibele kumbe xa vumbirhi. Nhlayo ya vaapostola ke? Entiyisweni a ndzi yi tivi.’

“VUYELO lebyi a byi nga ta va xihlamariso loko tifigara a a ti hlengeletiwe eka lava nga riki Vakriste ntsena,” ku vula magazini wa Christianity Today. “Lexi hlamarisaka—ni ku kavanyeta—i ntsengo wa ku honisiwa ka Matsalwa lowu wu kumiweke exikarhi ka Vakriste va ma-born-again.”

Hi xikombiso, tiphesente ta 22 ta Vakriste va nomu leti kamberiweke a a ti ehleketa leswaku buku ya Tomasi yi kona eBibeleni hakunene, kasi tiphesente ta 13 a a ti nga tiyiseki. Mayelana na Yonas, tiphesente ta 27 ti vule leswaku a yi kona eBibeleni, naswona tiphesente ta 12 a a ti nga ri na vutivi. Tiphesente ta tsevu ti tsandzeke ni ku vhumba laha Kriste a velekeriweke kona, kasi tiphesente ta 16 ti vule leswaku hi le Yerusalema, ivi tiphesente ta 8 ti ku i Nazareta. Tiphesente ta 13 leti teleke a ti nga ku tivi hi ku helela laha buku ya Esaya yi nga kumiwaka kona eBibeleni, kasi tiphesente ta 11 ti yi kombe eMatsalweni ya Vukriste ya Xigriki. (“Testamente Leyintshwa”). Naswona loko vo tala va tiva leswaku a a ku ri ni vaapostola va 12, tiphesente ta 12 ti nyike nhlayo yin’wana, leyi sukelaka eka 2 yi ya tlula eka 20, naswona tiphesente ta 10 a ti nga tivi nchumu.

Mhaka leyi a yi tika swinene a ku ri loko xiga lexi nge “Xikwembu xi pfuna lava tipfunaka” xi huma eBibeleni kumbe e-e. Ko va tiphesente ta 38 ntsena ta “Vakriste” lava va kambisisiweke lava a va swi tiva leswaku a xi nga ta kumeka kwihi na kwihi eBibeleni, kasi nhlayo leyikulu, tiphesente ta 42, ti ehlekete leswaku a xi tshahiwe eBibeleni. Lavan’wana hinkwavo a a va nga swi tivi.

“Ha yini ku ri ni ku honisiwa lokukulu konghasi ka Bibele?” ku vutisa Christianity Today. “Kumbexana swi vangiwa hi ku nga yi hlayi Bibele. Hafu ya Maamerika hinkwawo a ma yi hlayi Bibele. Vunyingi bya Vakriste va ma-born-again hinkwavo va hlaya Bibele kan’we kumbe kambirhi hi vhiki, kumbe ku nga yi hlayi ni kan’we. A swi hlamarisi loko Vakriste vo tala swonghasi va tiva leswintsongo mayelana ni Matsalwa!”