Mahungu Ya TV—Hi Wahi Lama Nga Mahungu Hakunene?

Endzhaku ko kambisisa vundzeni ni ndlela leyi mahungu ma haxiwaka ha yona eka switichi swa TV swa 102 etindhawini ta 52 ta le madorobeni lamakulu eUnited States, ntlawa lowu langutelaka vuhaxi wu kume leswaku mahungu lama nga ya nkoka eminongonokweni ya mahungu ma endla 41,3 wa tiphesente ntsena. I yini leswin’wana leswi haxiwaka?

Hi xiringaniso, nkarhi lowu ringanaka 30,4 wa tiphesente eka lowu tirhisiwaka ku haxa mahungu ya TV endhawini yoleyo wu tirhiseriwa ku navetisa timhaka ta mabindzu. Entiyisweni, vakambisisi van’wana va switichi leswi va kume leswaku nkarhi wo tala wu tirhiseriwa ku navetisa ku ri ni ku haxa mahungu. Tlhandlakambirhi, hakanyingi minkarhi ya vuhaxi yi tele hi swilo leswi nga riki swa nkoka, hi ku vula ka xiviko lexi katsakanyaka leswi kumiweke hi nkambisiso lowu.a Ehansi ka xihloko lexi nge “Swilo Leswi Nga Riki Swa Nkoka,” xiviko lexi xi veka swilo leswi landzelaka entlaweni wun’we, “mabulo lama nga vuliki nchumu lawa ma nghenaka loko vahaxi va nyiketana tintambhu, vunavetisi bya swilo ni bya switori leswi nga ta landzela, mahungu lama ‘ngo hundzisa nkarhi ntsena’ kumbe lama nga misavu ni mahungu lama vulavulaka hi vanhu lava dumeke.” Xikombiso xa mahungu lama ngo hundzisa nkarhi ntsena hi lexi: “Mphikizano Wa Vanhu Lavakulu Lava Nga Tiviki Ku Yimbelela,” “Muviki U Khandziya Roller Coaster Hi Ndlela Leyi ‘Tsakisaka, Leyi Hlamarisaka,’” na “Vanhu Vo Tala Va Xava Tisangweji Leti Endliweke eSwitolo.”

Hi tihi timhaka leti endlaka mahungu ya xiviri? Eka TV, ku tele timhaka leti vulavulaka hi vugevenga, timhaka leti ti endla 26,9 wa tiphesente eka mahungu lama haxiwaka. “‘Mahungu lama vulavulaka hi madzolonga, hi wona ma rhangaka emahlweni,’ ma lo vuya emahungwini ya TV . . . Swi nga ha endleka leswaku vugevenga byi hungutekile eUnited States emalembeni ma nga ri mangani lama hundzeke, kambe ku nga ri emahungwini ya thelevhixini ya kwalaho.” Ha yini? Hi ku ya hi vatsari va nkambisiso lowu, “timhaka ta vugevenga ta hlamarisa naswona ti koka nyingiso wa vanhu.”

Xin’wana lexi rhandziwaka ku fananyana ni vugevenga, i timhangu to fana ni ta ndzilo, ku tlumbana ka mimovha, tindhambhi ni ku buluka ka swilo (leswi endlaka 12,2 wa tiphesente ta mahungu), ku landzela mahungu ya mintlango (lama endlaka 11,4 wa tiphesente). Kutani ku landzela mahungu ya ta rihanyo (10,1 wa tiphesente), mahungu ya ta hulumendhe (8,7 wa tiphesente) ni mahungu ya ta ikhonomi (8,5 wa tiphesente). Tinhloko-mhaka to fana ni dyondzo, mbango, ntivo-vuxongi ni sayense a ti nyikiwi nyingiso lowukulu (ti endla 1,3 ku ya eka 3,6 wa tiphesente). Hi hala tlhelo, swiviko swa maxelo, swi endla xiringaniso xa khume wa tiphesente eka swihaxa-mahungu hinkwaswo. Valavisisi va ri: “Un’wana ni un’wana u lava ku vulavula hi maxelo ni hi mahungu ya TV.” Va engetela va ku: “Ku nga ha hetiwa nkarhi wo leha ku vulavuriwa hi maxelo yo hambana-hambana eka TV, maxelo lamanene ni yo biha, yo hisa ni yo titimela, ya mpfula ni ya dyandza.”

Xiviko lexi xi tlhela xi vula mhaka leyinene, leswaku vatsari va maphepha-hungu ni vahlaleri va swi vona swi fanerile leswaku ku va ni ku cinca. Hambiswiritano, nkambisiso wolowo wa pfumela leswaku ku cinca ko tano a ku nge ti hi ku olova hikuva “vuxavisi ni makwanga swi nga tshamela ku xungeta nkoka wa vutsari bya mahungu.”

[Nhlamuselo ya le hansi]