Lunghela Siku Ra Yehova!

Tinhla-nkulu Leti Humaka Eka Vatesalonika Vo Sungula

SIKU ra Yehova! Vakriste va le Tesalonika wa khale a a va ehleketa leswaku ro va kwala. Xana a a va tiyisile? Xana ri ta fika rini? Yoleyo a ku ri mhaka yin’wana ya nkoka leyi tsariweke epapileni ro sungula ra muapostola Pawulo ro ya eka Vatesalonika, leri a ri rhumeleke a ri eKorinto kwalomu ka lembe ra vu-50 ra Nguva ya hina leyi Tolovelekeke.

Pawulo na Silasi va simeke bandlha eTesalonika ntsindza wa vulawuri wa xifundzha-nkulu xa Rhoma eMakedoniya. (Mintirho 17:1-4) Endzhaku, epapileni rakwe ro sungula leri yeke eka Vatesalonika, Pawulo u nyikele xibumabumelo ni xitsundzuxo, ivi a hlamusela siku ra Yehova. Na hina hi nga pfuneka eka papila leri, ngopfu leswi siku ra Yehova ri nga le kusuhi ngopfu.

Bumabumela Naswona U Khutaza

Pawulo u sungule a bumabumela Vatesalonika. (1:1-10) Xibumabumelo a xi fanela hikwalaho ka ntirho wa vona wo tshembeka ni ku tiyisela. Naswona a swi nkhenseka hi leswaku, hambi va xanisekile ngopfu, kambe va “amukerile Rito ra Xikwembu hi ku tsaka loku nyikiwaka hi Moya lowo Kwetsima.” Xana wa va bumabumela van’wana hi laha Pawulo a endleke ha kona?

Muapostola u veke xikombiso lexinene. (2:1-12) Hambi leswi a hambanisiwile ni vanhu van’wana le Filipiya, ‘Xikwembu xi n’wi nyikile matimba yo tivisa mahungu lamanene’ eka Vatesalonika. U fularhele ku tikukumuxa ni makwanga ni ku lava ku dzuneka. Pawulo a a nga ri ndzhwalo wo tika kambe a a ri kahle eka vona hi laha manana la an’wisaka a nga ha kona eka n’wana wakwe. Mawaku xikombiso xonghasi eka vakulu namuntlha!

Marito ya Pawulo nakambe ma khutaze Vatesalonika leswaku va yima va tiyile loko va xanisiwa. (2:13–3:13) Va tiyiselele nxaniso wa vanhu va ka vona, naswona Timotiya u tisele Pawulo xiviko lexinene mayelana ni xiyimo xa vona xa moya. Muapostola u khongelele leswaku va tala hi rirhandzu ni leswaku timbilu ta vona ti tiyisiwa. Hi ku fanana, sweswi Timbhoni ta Yehova ti khongelela vapfumeri-kulobye lava xanisiwaka, ni ku va khutaza loko swi koteka, ni ku tsaka hi swiviko swa ku tshembeka ka vona.

Tshama U Xalamukile eMoyeni!

Vatesalonika nakambe va kume xitsundzuxo. (4:1-18) A va fanele ku famba hi ku hetiseka endleleni leyi tsakisaka Xikwembu, va kombisa rirhandzu lerikulu ra vumakwerhu ni ku tirha hi mandla ya vona leswaku va fikelela swilaveko swa vona. Ku tlula kwalaho, a a va fanela ku chavelelana hi ntshembo wa leswaku hi nkarhi wa vukona bya Yesu vapfumeri lava tswariweke hi moya lava feke, va ta pfuxiwa ku sungula ivi va hlanganisiwa na yena. Endzhaku ka swona, vatotiwa lava poneke, eku feni ni le ku pfuxiweni ka vona eku feni va ta hlangana na Kriste swin’we ni lava ana se va pfuxeriweke ku ya hanya etilweni.

Nakambe Pawulo u hlamusela siku ra Yehova ivi a nyika xitsundzuxo nakambe. (5:1-28) Siku ra Yehova a a ri ta tanihi khamba, kun’we ni ndzoviso lowu tiyeke wa xitshuketa endzhaku ka ku huwelela loku nge: “Ku rhulile, ku hava xo karhata.” Kutani Vatesalonika a a va fanele ku tshama va xalamukile emoyeni, va sirheleriwe hi ‘xisirhelelo xa xifuva’ xa ripfumelo ni rirhandzu na hi ntshembo wa ku ponisiwa tanihi xihuku. A va fanele va xixima swinene lava va rhangelaka ebandlheni naswona a a va fanele va papalata vuhomboloki, hi laha hi faneleke ku endla ha kona.

Papila ra Pawulo ro sungula leri yeke eka Vatesalonika ri fanele ri hi susumetela ku bumabumela ni ku khutaza vapfumeri-kulorhi. Nakambe ri fanele ri hi susumetela ni ku va xikombiso hi ku tikhoma na hi langutelo. Hakunene, switsundzuxo swa yena swi nga hi pfuna ku lunghela siku ra Yehova.

[Bokisi/Xifaniso lexi nga eka tluka 22]

Xisirhelelo Xa Xifuva Ni Xihuku: Loko a khongotela hi ku xalamuka emoyeni, Pawulo wa tsala: “A hi tikhomeni, hi ambala ku pfumela ni rirhandzu xi va xisirhelelo xa hina exifuveni, kutani enhlokweni hi ambala ku langutela ka ku ponisiwa, xi va xihuku xa hina.” (1 Vatesalonika 5:8) Xisirhelelo xa xifuva a a ku ri xisirhelelo lexi haveriwaka hi socha, lexi nga ni magegetsu, ni tinketana, kumbe nsimbi yo tiya. Hi ku fanana, xisirhelelo xa xifuva xi hi sirhelela emoyeni. Naswona ku vuriwa yini hi xihuku xa khale? Lexi hakanyingi a xi endliwa hi nsimbi, a ku ri xisirhelela-nhloko xa le nyimpini lexi a xi endleriwe ku sirhelela mulwi hi nkarhi wa nyimpi. Tanihi xihuku loko xi sirhelela nhloko ya nhenha, ni ntshembo wa ku ponisiwa wu sirhelela matimba ya nyama, xisweswo wu endla Mukriste a kota ku hlayisa vutshembeki. Vona ndlela leyi swi nga swa nkoka ha yona leswaku vanhu va Yehova va ambala xihavelo xo tano xa moya!—Vaefesa 6:11-17.