“Loko Mi Ri Karhi Mi Endla Leswinene, Mi Nga Karhaleni”

Tinhla-nkulu Leti Humaka Eka Vatesalonika Va Vumbirhi

NKHATHALELO wa muapostola Pawulo eka Vakriste emutini wa Makedoniya eTesalonika wu n’wi susumetele ku va tsalela papila rakwe ra vumbirhi, kwalomu ka lembe ra 51 C.E. Van’wana ebandlheni a a va hoxisa va vula leswaku ku va kona ka Yesu Kriste a ku ri kusuhi swinene. Kumbexana ni papila leri hi xihoxo a ku vuriwa leswaku ri huma eka Pawulo ri hlamuseriwe tanihi leri nge “siku ra [Yehova]” ri fikile.—2 Vatesalonika 2:1, 2.

Hikwalaho, maehleketelo ya Vatesalonika van’wana a ya lava ndzulamiso. Epapileni rakwe ra vumbirhi, Pawulo u va bumabumerile hi ku kula ka ripfumelo ra vona, ni ku andza ka rirhandzu swin’we ni ku chivirika hi ku tshembeka. Kambe u tlhele a kombisa leswaku vugwinehi a a byi ta va kona Yesu a nga si fika. Hikwalaho a ku ri ni minkarhi yo nonon’hwa emahlweni, naswona papila ra muapostola a a ri ta va pfuna ku yingisa xitsundzuxo xakwe: “Loko mi ri karhi mi endla leswinene, mi nga karhaleni.” (2 Vatesalonika 3:13) Marito ya Pawulo ma nga hi pfuna hi ndlela leyi fanaka.

Ku Humelela Ni Vukona Bya Kriste

Xo sungula Pawulo u vulavule hi ku wisa emaxangwini. (1:1-12) Leswi a a swi ta endleka “siku Hosi Yesu a humelelaka hi le tilweni, swin’we ni tintsumi ta yena ta matimba.” Hi nkarhi wolowo, ndzoviso lowu nga heriki a a wu ta tisiwa ehenhla ka lava va nga yingisiki mahungu lamanene. Swa chavelela ku tsundzuka leswi, loko hi ri maxangwini emavokweni ya vaxanisi.

Nakambe, Pawulo u kombe leswaku “munhu lowo homboloka” a a ta paluxiwa loko Yesu a nga si fika. (2:1-17) Vatesalonika a a va nga ta nyanyuriwa hi mahungu man’wana ni man’wana lama ringanyetaka leswaku ana se “siku ra [Yehova] ri le ka vona. Xo sungula, vagwinehi a a va ta humelela naswona munhu lowo homboloka a a ta paluxiwa. Endzhaku ka swona, Yesu a a ta n’wi herisa, a endla tano exikombisweni xa vukona bya Yena. Hi nkarhi lowu fanaka, Pawulo u khongelela leswaku Xikwembu na Kriste va chavelela timbilu ta Vatesalonika ni ku va “nyika matimba ya ku endla ni ku vulavula hinkwaswo leswi nga swinene.”

Ku Tirhisana Ni Lava Pfilunganeke

Nakambe, eka marito man’wana ya Pawulo a a ku ri ni switsundzuxo swa ku tirhisana ni vanhu lava pfilunganeke. (3:1-18) U phofule ntshembo wa leswaku Hosi a a yi ta tiyisa Vatesalonika ni ku va hlayisa eka lowo biha, Sathana Diyavulosi. Kambe a a va fanela ku teka magoza leswaku va pfuneka hi voxe hi tlhelo ra moya. A va ta tihambanisa ni lavo homboloka, lava nghenelelaka timhaka leti nga va khumbiki ni lava alaka ku tirha. Pawulo u ri: “Un’wana ni un’wana loyi a nga laviki ku tirha, ni ku dya a nga dyi!” Vanhu vo tano a a va ta funghiwa, naswona a a ku nga ta va na xinakulobye na vona, hambi leswi a a va ta amukeriwa tanihi vamakwavo. Vakriste vo tshembeka va Vatesalonika a a va nga ta karhala ku endla leswinene, naswona Pawulo a a navela leswaku musa lowu nga fanelangiki wa Hosi Yesu Kriste wu va na vona hinkwavo.

Papila ra Pawulo ra vumbirhi eka Vatesalonika ri nyika Timbhoni ta Yehova ntshembo wa leswaku ku wisa emaxangwini ya vona ku ta fika loko Kriste ni tintsumi takwe va tisa ku avanyisa ehenhla ka lava va nga yingisiki mahungu lamanene. Nakambe swi tiyisa ripfumelo ku tiva leswaku “munhu lowo homboloka” (ntlawa wa vafundhisi va Vujagana) swin’we ni vukhongeri bya mavunwa hinkwabyo swi ta herisiwa. Hi nkarhi lowu, a hi yingiseni xitsundzuxo xa Pawulo xa ku nga karhali ku endla leswinene.

[Bokisi/Xifaniso lexi nga eka tluka 23]

Rito Ra Yehova Ri Famba Hi Ku Hatlisa: Pawulo u tsarile a ku: “Hambetani mi hi khongelela, leswaku rito ra Yehova ri tshamela ku famba hi ku hatlisa [kumbe, “ri tsutsuma”] ni ku kwetsimisiwa tanihi leswi entiyisweni ri nga xiswona eka n’wina.” (2 Vatesalonika 3:1; Kingdom Interlinear) Vadyondzisiwa van’wana va ringanyete leswaku muapostola a a ringanyeta hi ku gegisa a kombetela eka switsutsumi leswi fambaka hi ku hatlisa emphikizanweni. Kasi sweswo a hi ntiyiso, Pawulo u kombele swikhongelo swa Vakriste va le Tesalonika leswaku yena ni vatirhi-kulobye va ta hangalasa rito ra ntiyiso hi matimba, handle ko siveriwa. Hikwalaho ka leswi Xikwembu xi hlamulaka swikhongelo swo tano, rito ra xona ri “famba hi ku hatlisa” hi laha mahungu lamanene ma chumayeriwaka hi matimba ha kona emasikwini lawa ya makumu. Nakambe rito ra Yehova ra “Kwetsimisiwa,” ri xiximiwa swinene hi vapfumeri tanihi “matimba ya Xikwembu yo ponisa,” hi laha a a ri ri xiswona ha kona ka Vatesalonika lava ri amukeleke. (Varhoma 1:16; 1 Vatesalonika 2:13) Mayana ku tsaka loku hi nga na kona leswi Xikwembu xi katekisaka vahuweleri va Mfumo naswona xi kurisaka nhlayo ya vagandzeri va xona hi ku hatlisa!—Esaya 60:22.