Ririmi Leri Tengeke Ri Hlanganisa Ntshungu Lowukulu Wa Vagandzeri
RIRIMI leri tengeke leri nyikiweke hi Xikwembu i matimba ya vun’we bya Vukriste. Xikombiso xa sweswo a a xi ri erivaleni eka hinkwavo lava veke kona entsombanweni wa Timbhoni ta Yehova lowu khomiweke eWest Berlin ku sukela hi Ravumbirhi ku ya eka Ravuntlhanu, July 24 ku ya ka 27, 1990, tanihi leswi Timbhoni leti humaka ematikweni ya 64 lama hambaneke a ti ri kona.
Loko Mintsombano ya Muganga ya “Ku Chava Xikwembu” yi khomiwile ePoland hi ximumu xa 1989, magidi ya vapfhumba ma tile ma huma eRussia ni le Czechoslovakia, kambe i madzana ma nga ri mangani lawa a ma ri kona lama humaka aEast Germany. Mawaku ndlela leyi xiyimo xa misava xi cinceke ha yona hi tlhelo ra politiki ku sukela hi nkarhi wolowo! Sweswi, vapfhumba lava ringaniseriwaka eka 30 000 lava humaka aEast Germany va hlangane ni Timbhoni eXitediyamu xa Olympia eWest Berlin. Ntsombano a wu fana ni ya madzana leyi khomiweke eswiphen’wini swin’wana swa misava hi laha swi tolovelekeke, hi Ravumune ku ya eka Sonto.
Emaritweni ya yena ya ku amukela hi Ravumbirhi, mutshami wa xitulu u hlamusele xiphemu lexi mintsombano yi xi endleke ku sukela hi 1919 ku pfuna Timbhoni ta Yehova ku endla nhluvuko eku vulavuleni ka ririmi leri tengeke. Ntsombano lowu hi laha ku fanaka wu ta pfuna hinkwavo lava nga kona ku endla nhluvuko eka vuswikoti bya vona byo vulavula ririmi leri tengeke ni ku hanya ha rona. U tsundzuxe vatsombani leswaku hi ku tilunghisa ni ku tikhoma ka vona, vanhu va Yehova va kombisa nhluvuko lowu va wu endleke eku vulavuleni ka ririmi leri tengeke.
“Ririmi Leri Tengeke Eka Matiko Hinkwawo”
Hi laha ku faneleke, nkulumo-nkulu ya ntsombano yi kombise nhloko-mhaka leyi nga laha henhla. A yi sekeriwe eka Sofonia 3:9 (NW), laha Xikwembu xi tshembiseke: “Kutani ndzi ta hundzuluxela vanhu eka ririmi leri tengeke, leswaku hinkwavo va ta vitana vito ra Yehova, va ta n’wi tirhela hi mbilu yi ri yin’we.” Ririmi leri tengeke ri katsa ku twisisa ni ku tlangela loku faneleke ka ntiyiso hi Xikwembu ni swikongomelo swa xona. I Yehova ntsena loyi a nga nyikelaka leswi hi moya wa yena wo kwetsima. Ku rhandza ntiyiso ku fanele ku va nsusumeto wo dyondza ririmi leri tengeke, leri ntshunxekeke ethyakeni hinkwaro ra mahanyelo.
Ku tlula kwalaho, ku vulavula ririmi leri tengeke a hi mhaka yo tirhisa marito yo karhi ntsena. Ematshan’wini ya sweswo, ndlela ya hina ya vutomi yi fanele yi pfumelelana ni leswi swi humaka emilon’wini ya hina. Entiyisweni, mpfumawulo wa rito ra hina, xikombiso xa nghohe ni swiendlo na swona i swa nkoka, hikuva swi kombisa leswi hi nga swona endzeni. Leswaku hi fambisana ni ririmi leri tengeke leri ndlandlamukaka, hi fanele ku va ni nongonoko wa dyondzo ya nkarhi na nkarhi ni ku va eminhlanganweni ya bandlha nkarhi na nkarhi.
Ku Dyondza Ririmi Leri Tengeke
Hi laha nkulumo hi Ravumbirhi ni ndzhenga yi tshikileleke ha kona, ku dyondza ririmi leri tengeke swi vula “Ku Endla Nhluvuko Ku Suka Eka Swa Xisekelo Ku Ya Eku Vupfeni.” Ku endla nhluvuko i ka nkoka leswaku hi ta kota ku hambeta hi kula hi tlhelo ra moya. Sweswo swi vula ku tirhisa malunghiselelo hinkwawo hi laha ku humelelaka leswaku hi kula emoyeni ni ku tirhisa misinya ya milawu ya Bibele siku na siku.
Leswaku hi va ni vutshila eka ririmi leri tengeke, hi fanele “Ku Dyondzisiwa Hi Yehova,” nhloko-mhaka ya nxaxamelo hi Ravumune ni mixo. Xivulavuri xo sungula xi kombise ndlela leyi leswi swi ‘Kombisiweke Ha Yona Hi Yesu Kriste.’ Leswaku Yesu a a dyondzisiwa hi Yehova a swi ri erivaleni hi marito ni swiendlo swa yena. Kutani hi fanele ku n’wi tekelela hi laha a dyondziseke ha kona. Naswona hi laha Yesu nkarhi hinkwawo a titsongahateleke ku rhandza ka Tata wa yena ha kona, na hina hi fanele ku endla tano.
Swivulavuri swinharhu leswi landzeleke swi kombise ndlela leyi Yehova a dyondzisaka ha yona hi ku tirhisa minhlangano ni tinhlengeletano. Ha pfuneka eka minhlangano hinkwayo ya ntlhanu ya bandlha naswona a hi fanelanga ku honisa wun’wana wa yona. Nhlangano wun’wana ni wun’wana i wa nkoka eka nhluvuko wa hina wa moya. Yehova nakambe wa hi dyondzisa hi nhlengeletano ya hina ya xifundza, ntsombano wa muganga ni minongonoko ya nhlengeletano wa siku ro hlawuleka. Leswaku hi pfuneka eka leswi, hi fanele ku yingisela hi vukheta kutani hi tirhisa leswi hi swi dyondzeke.
Nxaxamelo lowu wu landzeriwe hi nkulumo leyi nge “Ku Tikarhatela Dyondzo Ya Munhu Hi Xiyexe.” Leswaku hi kuma nkarhi wa yona, hi fanele ku yingisela ndzayo leyi nga ka Vaefesa 5:15, 16 ya ku xava nkarhi eka swilo leswi nga riki swa nkoka.
Pakani leyi landzelaka ya ku dyondza ka hina ririmi leri tengeke i ku tinyiketela ni nkhuvulo. Ntiyiso lowu wu kombisiwe eka nkulumo leyi nge “Nkhuvulo Wa Lava Dyondzaka Ririmi Leri Tengeke.” Ririmi leri ri yisa vo tala eku tinyiketeleni ni nkhuvulo. Hambi swi ri tano, munhu endzhaku ka sweswo u fanele ku ya emahlweni a landzela xikombiso xa Yesu hi ku chumayela mahungu lamanene hi ku chivirika, a ambala munhu lontshwa ni ku tihambanisa ni misava.
Swakudya Swa Moya Leswi Tiyeke
Vatsombani nakambe a va tsakile hi ku amukela swakudya swa moya leswi tiyeke leswi sekeriweke eku hetisekeni ka tidrama ta vuprofeta. Hi Ravumune ni ndzhenga, tinkulumo timbirhi a ti sekeriwe eka nhloko-mhaka leyi tekiweke eka vuprofeta bya Ezekiyele. Yo sungula, “Golonyi Ya Yehova Ya Le Tilweni Yi Ya eMahlweni,” yi hlamusele golonyi ya le tilweni leyikulu, yo kwetsima, leyi chavisaka leyi fambaka tanihi rihati. Yi fanekisela nhlengeletano ya Yehova ya le tilweni, leyi Xikwembu xi yi fambisaka hi leswi xi yi lawulaka hi rirhandzu ni leswi xi yi tirhisaka ku hetisisa swikongomelo swa xona. Ezekiyele u fanekisela masalela lama totiweke hi moya, ngopfu-ngopfu ku sukela hi 1919. Ngopfu-ngopfu ku sukela hi 1935 va joyiniwe hi “ntshungu lowukulu.”—Nhlavutelo 7:9.
Nkulumo leyi landzeleke a yi ku “Fambisana Ni Nhlengeletano Leyi Vonakaka.” A swi kanakanisi leswaku nhlengeletano leyi vonakaka ya Xikwembu yi fambisana ni nhlengeletano ya xona leyi fanaka ni golonyi ya le tilweni. Hi laha Ezekiyele a endleke ha kona, malandza ya Yehova namuntlha ma fanele hi ku yingisa ma hetisisa xileriso xa wona xa vuprofeta ku nga khathariseki ku honisa, ku hlekula kumbe ku kaneta. Ku ya emahlweni swi yisa eka mikateko yo tala sweswi ni vutomi lebyi nga heriki emisaveni leyintshwa leyi tshinelaka hi ku hatlisa ya Xikwembu.
Hi Ravuntlhanu ni mixo, swakudya swa moya leswi tiyeke nakambe swi nyikeriwile hi tinkulumo tinharhu leti sekeriweke eka Esaya ndzima 28. Yo sungula ya tona yi kombisa marito ya matimba leswaku swidakwa swa moya swa Israyele wa khale na Yuda swi fanekisele swidakwa swa moya swa Vujagana. Naswona leswi leswo sungula swi tokoteke ku avanyisa loku vavaka ka Yehova, swi ta va tano hi leswi swa Vujagana.
Nkulumo leyi landzeleke, leyi a yi ku “Vuchavelo Bya Vona—I Vun’wa!” a yi khome xitsundzuxo lexikulu: Ku fana ni leswi ku tshembela ka Yuda wa khale aEgipta ku tikombeke ku ri xichavelo xa hava, swi ta va tano hi vunakulobye bya Vujagana ni matimba ya politiki ya siku ra hina. Nkulumo ya vunharhu ehenhleni ka Esaya ndzima 28, “Hambetani Mi Tsundzuxa Hi Ntirho Wa Yehova Lowu Nga Tolovelekangiki,” a yi kongomisiwe eka vanhu va Xikwembu. Leswi Yehova a nga ta swi endla eka Vujagana swi vitaniwa leswi nga tolovelekangiki hi ku kongoma, hikuva swi ta ta tanihi xihlamariso lexi heleleke eka byona. Namuntlha, Yehova i harhi ya ku dzuneka eka ntlawanyana wa Vakriste lava totiweke ni le ka “tinyimpfu tin’wana” leti tlulaka mune wa timiliyoni. (Yohane 10:16) Xivulavuri xi hetelele hi marito lama nyanyulaka: “Onge ku chivirika ka hina, ku tiyimisela ni ku tshembeka ku nga hlanganyela eku dzuniseni loku nga heriki ka Xikwembu xa hina, Yehova!”
Ku Vulavula Ririmi Leri Tengeke Swi Vula Ku Kombisa Rirhandzu Ra Vumakwerhu
Hi Ravunharhu ni ndzhenga vatsombani va swi twisise kahle leswaku ku vulavula ririmi leri tengeke nakambe swi vula ku ‘Tsundzuka Swisiwana Ni Tinoni eMaxangwini Ya Vona.’ Majaha lama nga riki na vatatana ma nga pfuniwa hi ku amukela ndzetelo wa munhu hi xiyexe. Hi nga kombisa nkhathalelo eka tinoni hi marito lamanene ya xikhutazo, hi ku va katsa emintirhweni ya hina ya Vukriste ni minhlangano yo titsakisa ni ku va nyika mpfuno wa swa nyama loko wu va fanelekela ni loko va pfumala hakunene. Swikombiso swi kombise ndlela leyi swilo leswi a swi endliwa ha yona.
Hi Ravumune ni ndzhenga, nkulumo yin’wana leyi tsakisaka yi kombise “Ndlela Leyi Vakriste Va Khathalelanaka Ha Yona.” Timbhoni ta Yehova ti na rhekhodo leyinene yo khathalelana, ngopfu-ngopfu loko timhangu to fana ni swidzedze ni ku tsekatseka ka misava ti humelela, loko ku ri na xilaveko xo tsalela vatirhela-mfumo, kumbe loko ku ri na swilaveko swa kwalaho. Kambe loko ku nonon’hweriwa ku humelela hikwalaho ka ku nga hetiseki ka vanhu, hi fanele ku tirhisa misinya ya milawu leyi katsekaka eka ndzayo ya Yesu eka Matewu 5:23, 24 na 18:15-17. Ngopfu-ngopfu loko swi ta eka malunghiselelo ya bindzu exikarhi ka vamakwerhu ku na xilaveko xa xichavo lexikulu, ni ku tirhisa nkhathalelo leswaku hambi muthori kumbe muthoriwa a nga tirhisi vuxaka bya moya hi vutianakanyi.
Ku Vulavula Ririmi Leri Tengeke Swi Vula Ku Xiya Ku Tikhoma Ka Hina
Xilaveko xo xiya ku tikhoma ka hina xi tshikileriwe hi ku phindha-phindha. Xisweswo, xivulavuri xo sungula hi Ravumbirhi ni ndzhenga xi vulavule hi xihloko lexi nge “Ku Yingisa Ni Ku Hlayisa Rito Ra Xikwembu.” U kombise leswaku a ku ri na swivangelo swimbirhi leswikulu leswi vangeleke leswaku hi ta emintsombanweni: ku ta teka vutivi lebyi kongomeke ni ku khutaziwa ku endla hi ku ya hi vutivi byebyo.
Nkulumo yo sungula hi Ravunharhu ni mixo yi tlakuse xivutiso lexi kambisisaka “Kriste ‘U Vengile Leswo Homboloka’—Xana Wa Swi Venga?” A swi ringananga ku rhandza vunene. Hi fanele nakambe hi venga vuhomboloki leswaku hi ta va ni ripfalo lerinene, ku hlayisa vuxaka lebyinene na Yehova, ku papalata ku tisa xisandzu evitweni ra yena ni ku papalata ku tshovela mihandzu ya vuhomboloki—ku onhaka ni rifu.
Lexi yelanaka ngopfu ni nhloko-mhaka yoleyo a ku ri nkulumo leyi landzeleke, leyi nge “Ala Mintsako Ya Misava, Landzelela Mintiyiso Ya Mfumo.” Sathana, Evha ni tintsumi leti weke hinkwavo va landzele mintsako eku onheni ka vona. Mintsako ya misava, leyi nga ni milorho ya swa nyama kumbe leyi khumbaka timhaka to homboloka, swi hetelela hi ku hambukisiwa loko ku nga ri xidyoho lexikulu. Leswaku hi hlula mintsako leyi, hi fanela ku landzela mintiyiso ya Mfumo hi dyondzo, xikhongelo, ku va kona eminhlanganweni ni vutirheli bya le rivaleni.
Leswaku hi hanya vutomi lebyinene bya Vukriste, nakambe hi fanele ku yingisela ndzayo leyi nyikeriweke hi Ravunharhu ni ndzhenga eka nkulumo leyi nge “Vakriste—Hanyani Hi Mali Leyi Mi Nga Na Yona.” Ku tsandzeka ku endla leswi swi va ni nkucetelo lowo biha hi tlhelo ra nyama ni ra moya. Ndlela ya vutlhari i ku lawula ku navela ka wena ka vutianakanyi hi ku nga ngheneli xikweleti lexi nga lavekiki na hi ku kunguhata mahlayiselo lama tiyeke ya mali ivi u khomelela eka wona. Minkarhi hinkwayo hi fanele ku hlakulela ku chava Xikwembu. Kun’we ni ku tilawula, lexi i xivangelo xa vuyelo lebyikulu.—1 Timotiya 6:6-8.
Nkoka wa ku xiya vunghana bya hina wu kombisiwe eka nkulumo ya Ravumbirhi leyi nge “Xana Vanghana Va Wena I Vanghana Va Yehova?” Vanghana va hina va fanele ku va Vakriste lava ambaleke vumunhu byo fana ni bya Kriste naswona va chivirika entirhweni wo chumayela. Vanhu va misava a hi vanghana va Xikwembu, naswona a hi nge hlangani na vona va nga hi vavisi. Hambi ku ri exikarhi ka bandlha, hi fanele ku hlawula loko vunghana bya hina byi ta va lebyi akaka.
Ndzayo leyi nga laha henhla leyi khumbaka ku tikhoma yi tshikileriwe kahle hi drama ya manguva lawa. A yi ku “Ku Hlangavetana Na Mintirho Ya Vukanganyisi Ya Diyavulosi.”
Ndzayo Ya Mindyangu Ya Ririmi Leri Tengeke
Lexi a xi laviwa ngopfu a a ku ri nkulumo ya Ravunharhu leyi nge “Vatswari—Hetisisani Mindzhwalo Ya N’wina!” Vatswari hi voxe va fanele ku tiva ku rhandza ka Xikwembu ni ku ku endla hi laha va kotaka ha kona. Nakambe va fanele va nghenisa Rito ra Xikwembu eka vana va vona. Ku tlula kwalaho, a swi ringananga ku yisa vana eminhlaganweni ya Vukriste ni le vutirhelini bya nsimu. Va fanele va dyondzisiwa ku rhandza Yehova ni ku vona vutlhari lebyi tirhaka byo endla swilo swa Xikwembu.
Lexi landzeleke ku te nxaxamelo lowu nge “Ndyangu eSikwini Ra Hina.” Xivulavuri xo sungula xi kombise leswaku ndyangu wu sunguriwe hi Xikwembu. Vatatana va fanele ku vulavula kahle mayelana ni timhaka ta moya. Vamanana va fanele va va vahlayisi lavanene va kaya, naswona vana va fanele va xixima Yehova hi ku khomisana ni vatswari va vona.
Xivulavuri lexi landzeleke xi kombise leswaku ndyangu “Wu Hlaseriwa Hi Valala.” Mintshikilelo ya ikhonomi ya andza. Ndhawu ya ntirho yi tala hi miringo ya ku endla leswi hoxeke, naswona swikombiso swa swifaniso swi tele hi vukari, rimbewu leri nga riki enawini ni swikoka-mahlo swa swilo swa nyama. Vuleteri byi fanele ku hatla byi sungula, naswona ku gingiriteka lokukulu ka laveka leswaku u hlula minkucetelo ya misava. Switirho swa le tilweni leswi nyikeriwaka hi Sosayiti ya Watch Tower swi fanele ku tirhisiwa kahle.
Nkulumo leyi landzeleke, leyi vulavulaka hi ‘Ku Hlayisiwa Ka Ndyangu Leswaku Wu Nghena eMisaveni Leyintshwa,’ nakambe yi kandziyise vutihlamuleri lebyikulu lebyi vatswari va nga na byona. Ku letela vana ku fanele ku endliwa hi ku tiyimisela lokukulu. Ndzayo leyinene yi nyikeriwile mayelana ni tidyondzo ta le makaya ta Bibele ni leswi faneleke ku dyondziwa, hinkwaswo hi xikongomelo xo fikelela timbilu ta vana. Hi kona vatswari ni vana va nga langutelaka ku hlayiseriwa emisaveni leyintshwa tanihi ndyangu.
Ndzayo leyinene leyi chavelelaka ya xiyimo xa ndyangu lexi Timbhoni to tala ti tikumaka ti ri eka xona a ku ri nkulumo leyi nge “Ku Hlangavetana Ni Ndyangu Lowu Avaneke.” Lava va nga le swiyin’weni swo tano va layiwile leswaku va nga lahli ntshembo wa leswaku la nga pfumeriki siku rin’wana a nga va mupfumeri. Heta nkarhi ni munghana la nga pfumeriki kutani u tiyiseka leswaku u fambisana ni hinkwaswo leswi lavekaka eka munghana wa Mukriste. U nga kuma mpfuno eka vakulu kumbexana eka van’wana emindyangwini leyi avaneke.
Ku Vulavula Ririmi Leri Tengeke Eka Van’wana
Leswi fanelekaka ngopfu, nyingiso lowukulu wu nyikeriwile eku tirhiseni ka hina minkarhi yo dyondzisa ririmi leri tengeke eka van’wana. Xisweswo, hi Ravunharhu ni mixo vatsombani va twe nkulumo leyi nge “Tirhisa Nkarhi Wa Wena Wa Nkoka Hi Vutlhari.” Leswaku hi kota ku endla sweswo, hi fanele ku simeka ku rhangisa swilo swa nkoka, hi ku fambisana na Matewu 6:33, leyi nge: “Rhangani mi tilavela Mfumo wa yena ni ku lulama ka yena.” Sweswo swi katsa ku veka nkarhi etlhelweni wa dyondzo ya Bibele ya munhu hi xiyexe, ku va kona eminhlanganweni hinkwayo ni ku va kona nkarhi na nkarhi evutirhelini bya nsimu. Leswi swi lava leswaku hi xava nkarhi eka mintirho yo tsakisa leyi nga riki ya nkoka. Swikombiso swo hambana-hambana swi kombise ndlela leyi van’wana a va endla leswi ha yona.
A hi fanelanga hi rivala leswaku hi Timbhoni ta Yehova. Hi Ravumune ni ndzhenga, swikombiso swo tala swi veke yinhla yoleyo erivaleni eka xihloko lexi nge “Hambetani Mi Vulavula Ririmi Leri Tengeke Nkarhi Hinkwawo.” Swikombiso leswi swi kombise ndlela leyi leswi swi nga endliwaka ha yona eku vekeni ka vumbhoni hi xitarata, vumbhoni bya xitshuketa na hi ku tirhisa riqingho. Rirhandzu ro pfumala vutianakanyi hi Yehova Xikwembu ni muakelani wa hina ri ta hi susumetela ku vulavula ririmi leri tengeke nkarhi hinkwawo.
Lexi yelanaka swinene ni nhloko-mhaka leyi a ku ri nkulumo leyi landzelaka, “Mikateko Ya Lava Va Nga Kokeriki eNdzhaku.” Lexi hambanaka swinene ni Vujagana i nhlengeletano leyi dyondzisaka ya misava hinkwayo ya Timbhoni ta Yehova. Ha un’we-un’we, hi fanele ku sivela mintshikilelo hinkwayo, tanihi ku kaneta ka ximfumo, ku pfumala ku tsakela loku hangalakeke ni swiphiqo swa ikhonomi. Swikombiso leswi sekeriweke ebukwini leyi nge Reasoning From the Scriptures swi kombise ndlela leyi mintshikilelo leyi yi nga hluriwaka ha yona.
Nakambe lexi khutazaka ku chumayela hi ku chivirika a ku ri drama ya Bibele leyi nge Ku Endla Ku Rhandza Ka Xikwembu Hi Ku Hiseka. Yi kombise ndlela leyi Yehu a a chivirika ha yona hikwalaho ka vito ra Yehova ni leswaku i swa nkoka hi ndlela yihi eka hina ku kombisa xivindzi ni ku chivirika loku fanaka eka ntirho wa Xikwembu.
Tibuku Leti Humesiweke Ta Ntsombano
A ku ri na tibuku timbirhi leti xiyekaka hi Xinghezi na Xijarimani entsombanweni lowu. Yo sungula ya tibuku leti yi tivisiwile mayelana ni nkulumo leyi nge “Ku Ponisa Vutomi Bya Wena Hi Ngati—Njhani?” Xivulavuri xo sungula xi hlamusele hi makhombo lama hlanganaka ni mimpompelo ya ngati. U boxe leswaku ku na swikhomela-ndhawu swo tala swa ngati eku siveni ka ku lahlekeriwa hi ngati. Kambe Timbhoni ta Yehova ti papalata ngati hayi hi ku va yi nga ri na rihanyo kambe hikuva ku yi amukela a swi kwetsimanga. Va yi papalata hayi hi leswi ngati yi nga ha vaka yi thyakisiwile, kambe hikuva i ya nkoka eka Xikwembu. Ngati leyi yi ponisaka vutomi hakunene i ngati ya nkutsulo ya Yesu Kriste. Eku heteleleni xivulavuri xi tsakise vayingiseri va xona hinkwavo hi ku humesa broxara ya matluka ya 32 leyi nge Xana Ngati Yi Nga Byi Ponisa Njhani Vutomi Bya Wena?
Buku ya vumbirhi ya nkoka leyi humesiweke yi te mayelana ni nkulumo leyi nge “Lavani Yehova, N’wina Vanhu.” Hakanyingi, vanhu a va lavi Xikwembu. Vukona bya vukhongeri byo tala byo hambana-hambana byi kombisa ndlela leyi ku lava ka munhu Xikwembu ku hambukisiweke ha yona hi ku va a honise Rito ra Xikwembu. Hi laha swi voniweke ha kona hi swiviko swa Xitsundzuxo xa hina lembe na lembe, timiliyoni ti fanele ku pfuniwa ku teka xiyimo xa tona eka Yehova. Esaya 55:6, 7 yi kombisa leswaku Yehova hakunene i Xikwembu xa rirhandzu ni musa, xi tiyimisele ku “[rivalela], ku nga ri hi mpimo.” Tanihi Timbhoni ta yena, hi nyikiwe ririmi leri tengeke leswaku hi kota ku pfuna van’wana ku hlanganyela na hina eku tirheleni Yehova hi vunwe.
Namuntlha, vanhu va Yehova va langutane ni ntlhontlho hikwalaho ka mintlawa yo tala ya vaaki. Hikwalaho, tinxaka hinkwato ta vukhongeri ti nga ha amukeriwa hi vanhu ensin’wini ya hina. Leswaku hi kota ku pfuna Mahindu, Mabudha, Mashinto ni lava va vukhongeri lebyin’wana byo tala, Sosayiti yi nyikele buku leyinene ya matluka ya 384 leyi nge Ku Lavisisa Ka Vanhu Xikwembu. Yi nyikela tidyondzo ta xisekelo ta vukhongeri byo tala lebyi nga riki bya Vujagana hi ku tshembeka. Kambe yi tlhela yi kombisa rhekhodo ya vukhongeri bya mavunwa exikarhi ka Vujagana. Buku leyi yi nga pfula ndlela yo sungula tidyondzo ta Bibele ni vanhu lava tivulelaka leswaku i va vukhongeri byo tala byo hambana-hambana.
Nkulumo Ya Le Rivaleni Ni Marito Yo Dlayelela
“Vanani Lava Hlanganisiweke Hi Ririmi Leri Tengeke” a ku ri nhloko-mhaka ya nkulumo ya le rivaleni ya Ravuntlhanu. Xivulavuri xi kombise leswaku hambi leswi tindzimi to hambana-hamba ta magidi manharhu sweswi ti tirhaka tanihi mindzilakana ya vun’we, ririmi leri tengeke i matimba lamakulu lama hlanganisaka. Ri hlayise Timbhoni ta Yehova eka swihoxo swa Babilona, ri va dyondzise ku xixima ku kwetsima ka vutomi ni ngati, naswona ri va pfune ku hanya hi misinya ya milawu ya Bibele leyi yi va pfunaka hi tlhelo ra moya ni ra nyama. Hinkwavo va fanele ku khumbeka hi ku dyondza ni ku vulavula ririmi leri tengeke, hikuva hi lava endlaka tano ntsena lava nga ta pona Armagedoni. I mhaka ya xihatla ku yingisa xitsundzuxo lexi nga le ka Sofonia 2:1-3.
Endzhaku ka ndzayo yo karhi leyinene ya Matsalwa eka xilaveko xa ku ‘Hiteka Eku Khongeleni,’ ku te switsundzuxo swo dlayelela leswi sekeriweke eka nhloko-mhaka leyi nge “Ku Famba Hi Ku Pfumelelana Ni Ririmi Leri Tengeke.” Nhlayo leyi sweswi yi fambaka hi ku pfumelelana ni ririmi leri tengeke ya engeteleka hakunene. Naswona nyingiso wa ririmi leri tengeke wu kombisiwile hi lava va veke kona emintsombanweni leyi hi ku basa, ku hleleka ni ntwanano wa nhlengeletano ya vona. Tibuku letintshwa leti humesiweke ti ta pfuna Timbhoni ta Yehova hinkwato ku hangalasa ririmi leri tengeke hi laha ku humelelaka swinene.
Xivulavuri xo hetelela xa ntsombano xi tsundzuxe hinkwavo hi xilaveko xa ku tiyisela. U kombise leswaku hikwalaho ka ntsombano, hinkwavo va ta tiyisiwa eku tiyimiseleni ka vona ko ya emahlweni. Kutani u dlayelele hi marito lawa: “Onge hi nga ya emahlweni hi hambeta hi famba hi ku pfumelelana ni ririmi leri tengeke leri hi nyikiweke hi Xikwembu leswaku hi kota ku dzunisa Tata wa hina wa le tilweni, Yehova Xikwembu, sweswi ni hi laha ku nga heriki!”
[Bokisi leri nga eka tluka 26]
Nhlohlorhi ya lava veke kona entsombanweni eWest Berlin a ku ri 44 532, naswona 1 018 va khuvuriwile. Lava khuvuriwaka swi va teke 19 wa timinete ku longoloka va huma eXitediyamu xa Olympia, naswona hi nkarhi lowu a ku ri na ku ba mavoko loku yaka emahlweni. A ku ri na xiphemu lexi hlawulekeke ya vapfhumba lava vulavulaka Xinghezi. Kwalomu ka va 6 000 wa lava va yingisele nongonoko hinkwawo hi ririmi ra vona. Entsombanweni lowu, nakambe a ku ri na 4 500 lava humaka ePoland; hi tiawara timbirhi ta nhlikanhi swirho swa Huvo leyi Fumaka swi nyikele tinkulumo to koma ku va pfuna.
[Swifaniso leswi nga eka tluka 24, 25]
1. Xitediyamu xa Olympia, West Berlin
2. Nongonoko wa ntsombano lowu gandlisiweke
3. Tibazi ta madzana mambirhi ti tise vapfhumba lava humaka aEast Germany
4. Vatsombani va le Poland a va tsakile hi ku kuma tibuku letintshwa leti gandlisiweke
5. Ku sasekisa ka swiluva ku khavise xivono
6. A. D. Schroeder, un’wana wa swirho swa Huvo leyi Fumaka enongonokweni eWest Berlin