Xixima Yehova—Hikwalaho Ka Yini Naswona Njhani?
“Hikuva nḍi ta ḍunisa la’v̌a nḍi ḍunisaka, kambe la’v̌a nḍi sanḍaka v̌a ta ṭongahatiwa.”—1 SAMUEL 2:30.
1. I vamani lava nyikiwaka masagwadi ya misava lama dumeke ya Nobel, naswona vo tala va ma languta njhani masagwadi lawa?
LEMBE na lembe mavandla ya mune ya le Scandinavia ma nyikela masagwadi ya Nobel eka lava va ‘veke ni xandla eku pfuneni ka vanhu hi lembe leri hundzeke.’ Masagwadi ma nyikiwa eka mintirho ya swivandla swa tsevu swo hambana-hambana. Eka vo tala sagwadi ra Nobel ri tekiwa tanihi xidlodlo lexikulu lexi nga nyikiwaka munhu wihi na wihi.
2. I vamani lava munyiki wa masagwadi ya Nobel a va honisaka, naswona ha yini hi ku hlawuleka a faneriwa hi xichavo?
2 Hambi leswi ku nga riki na xihoxo eku nyikeni ka vanhu xidlodlo lexi va faneleke, xana lava va nyikaka swidlodlo leswi va tshuka va anakanya hi ku dzunisa Munyiki lonkulu wa vanhu? Munyiki yoloye hi loyi a nyikeke vanhu mimpfuno ya ntsandza-vahlayi ku sukela loko a tumbuluxe wanuna ni wansati wo sungula kwalomu ka malembe ya 6 000 lama hundzeke. Ku tsandzeka ku n’wi xixima hi laha ku phikelelaka ku nga ha hi tsundzuxa marito ya Elihu, munghana wa Yobo wa khale, loyi a nga te: “Kambe a v̌a v̌utisi, v̌a ku: Šikwembu, muv̌umbi wa mina o kwihi-ke? Šona le’ši nyikaka munhu ni v̌usiku e tinsimu ta ku ṭaka.” (Yobo 35:10) Munyiki wa hina lonkulu u hambeta a endla ‘leswinene, a nisa mpfula hi le tilweni ni ku tisa tinguva ta mihandzu, a tata swinene timbilu hi swakudya ni ku tsaka.’ (Mintirho 14:16, 17; Matewu 5:45) Yehova hakunene i Munyiki wa “nyiko yin’wana ni yin’wana leyo saseka.”—Yakobo 1:17.
Leswi Ku Xixima Swi Vulaka Swona
3. Hi wahi marito-nkulu ya Xiheveru ni ya Xigriki lama hundzuluxeriweke va ku “xichavo,” naswona hi tihi tinhlamuselo ta wona?
3 Rito-nkulu ra Xiheveru ra ku xixima, ka·vohdhʹ, hi ku kongoma ri vula “ntiko.” Kutani munhu la xiximiwaka u tekiwa tanihi loyi a nga ni ntikelo, la dzunekaka kumbe la vulaka swo karhi. Kambe, rito leri ra Xiheveru, ka·vohdhʹ, hakanyingi eMatsalweni ri hundzuluxeriwa va ku “ku kwetsima,” ri ya emahlweni ri kombisa ndlela leyi munhu loyi a xiximiwaka a dzunekaka kumbe a nga wa nkoka ha yona. Rito rin’wana ra Xiheveru, yeqarʹ, ri hundzuluxeriwa va ku “xichavo” eMatsalweni, nakambe ri hundzuluxeriwa va ku “nkoka” ni “swilo swa nkoka.” Kutani eMatsalweni ya Xiheveru, rito ku dzuneka ri yelana ni ku kwetsima kumbe ku va wa nkoka. Rito ra Xigriki leri hundzuluxeriweke va ku “ku dzuneka” eBibeleni i ti·meʹ, na rona ri kombisa ku xixima, nkoka, risima.
4, 5. (a) Xana swi vula yini ku nyika munhu wo karhi xichavo? (b) Hi xihi xiyimo lexi hlamuseriweke eka Ester 6:1-9 lexi kombisaka leswi katsekaka eku nyikeni ka xichavo?
4 Xisweswo munhu u xixima un’wana hi ku kombisa xichavo lexikulu eka munhu yoloye. Tanihi xikombiso, vona xiyimo lexi hlamuseriweke eBibeleni malunghana na Mordekayi Muyuda wo tshembeka. Eka xiendlakalo xin’wana Mordekayi u paluxe xikungu xo dlaya Hosi Ahasuwerusi ya Peresi wa khale. Endzhakunyana, hi vusiku lebyi hosi a yi nga swi koti ku etlela, goza ra Mordekayi ri fike etindleveni ta hosi. Hi loko yi kombela valanguteri va yona: “Ku ḍuna ni ku nkhensa hi loku yini leŝi Mordekai a ŝi endleriweke e nkarini wolowo?” Va hlamula va ku: “A nga endleriwanga ntšhumu.” Vona ndlela leyi swi khomisaka gome ha yona! Mordekayi u ponise vutomi bya hosi, naswona hosi yi tsandzeke ku kombisa ku tlangela.—Ester 6:1-3.
5 Hi loko, hi nkarhi lowu faneleke a vutisa Hamani, mufumi wakwe, ndlela yo antswa yo xixima loyi hosi yi n’wi tsakelaka swinene. Hi ku hatlisa Hamani embilwini yakwe a ku: “Hosi yi nga ranḍa ku ṭakisa mani, loko nḍi nga ri mina šana?” Hi loko Hamani a vula leswaku munhu loyi u fanele a ambexiwa “šifunengelo ša v̌uhosi” ivi a gada “hantši le’yi khanḍiyaka hi hosi.” A hetelela a ku: “Kutani a fambisiwa hi hantši e nṭenḍeleni wa muti, kutani ku huweleriwa e mahlweni ka yena, v̌a ku: Ku endliwa ŝeŝo e ka munhu loyi hosi yi ranḍaka ku ṅwi ṭakisa!” (Ester 6:4-9) Munhu la endleriwaka leswi u ta xiximiwa hi vanhu hinkwavo.
Mhaka Leyi Yehova A Faneriwaka Hi Xichavo Ha Yona
6. (a) Ehenhla ka van’wana hinkwavo i mani la faneriwaka hi xichavo? (b) Ha yini rito “lonene” ri n’wi hlamusela kahle Yehova?
6 Ematin’wini hinkwawo vanhu a va nyikiwa xichavo, hakanyingi xi nga va fanelanga. (Mintirho 12:21-23) Kambe, i mani eka van’wana hinkwavo la faneriwaka hi xichavo? Kavula, i Yehova Xikwembu! U faneriwa hi xichavo xa hina hi mhaka ya leswi a nga lonene. Hakanyingi rito “lonene” ri tirhisiwa eka yena. I Munhu Lonene, Muvumbi Lonene, Mutumbuluxi Lonene, Hosi Leyinene, Mudyondzisi Lonene, N’wini Lonene. (Psalma 48:2; Eklesiasta 12:1; Esaya 30:20; 42:5; 54:5; Hosea 12:14) I lonene, wo hlamarisa, wa xiximeka, u tlakukile, i wa le henhla, wa vangama naswona wa chaviseka. Yehova a nga pimaniseki, a nga ringani na nchumu, u tlakukile swinene. Yena hi yexe u tiyisa yinhla yoleyo, a ku: “Mi ta nḍi fanisa na mani, mi ta nḍi ringanisa na mani leŝaku hi fanana?”—Esaya 46:5.
7. Xana Yehova Xikwembu a nga vuriwa la hlawulekeke hi tindlela tingani to hambana-hambana, naswona ha yini ku nga ha vuriwaka leswaku a nga pimaniseki hi matimba?
7 Yehova Xikwembu a nga pimaniseki hi kwalomu ka tindlela ta nkombo leti xiyekaka, leti kombisaka swivangelo swo karhi swo n’wi xixima. Yo sungula, Yehova Xikwembu u faneriwa hi xichavo lexikulu hi mhaka ya leswi a nga ringaniki na nchumu hi matimba. Hosi Yehova i Hosi ya Vuako Hinkwabyo— u tlakukile. I Muavanyisi, Munyiki wa Nawu ni Hosi. Vanhu hinkwavo etilweni ni le misaveni va ni vutihlamuleri eka Yena; yena a nga na vutihlamuleri eka munhu. U hlamuseriwa kahle tanihi “Šikwembu le’šikulu, le’ša matimba, ni le’ši tšhav̌isaka.”—Deuteronoma 10:17; Esaya 33:22; Daniel 4:35.
8. Ha yini ku nga vuriwaka leswaku Yehova a nga pimaniseki (a) malunghana ni xikhundla xa yena? (b) malunghana ni vukona bya yena bya hi laha ku nga heriki?
8 Ya vumbirhi, Yehova Xikwembu u faneriwa hi xichavo lexikulu hi mhaka ya leswi a nga ringaniki na munhu hi xikhundlha. Hi “L’a-nge-henhla-henhla,” la Tlakukeke Swinene. U le henhla hi ndlela leyi hlamarisaka eka swivumbiwa swa yena hinkwaswo swa laha misaveni! (Esaya 40:15; 57:15; Psalma 83:18) Ya vunharhu, Yehova Xikwembu u xiximiwa swinene eka hinkwavo hi mhaka ya leswaku a nga ringani na munhu eka vukona bya yena bya hi laha ku nga heriki. Hi yena ntsena a nga riki na masungulo, i wa hi laha ku nga heriki.—Psalma 90:2; 1 Timotiya 1:17.
9. Xana Yehova a nga pimaniseki hi ndlela yihi (a) malunghana ni ku kwetsima ka yena? (b) malunghana ni timfanelo ta yena ta xisekelo?
9 Ya vumune, Yehova Xikwembu u faneriwa hi xichavo lexikulu hi mhaka ya leswi a nga la tlakukeke hi ku kwetsima ka yena. I “Muvumbi wa leswi voningaka.” U vangama swinene lerova a ku na munhu la nga n’wi vonaka ivi a hambeta a hanya. Wa kwetsima hakunene. (Yakobo 1:17; Eksoda 33:22; Psalma 24:10) Ya vuntlhanu, hi kolota xichavo lexikulu eka Yehova Xikwembu hi mhaka ya timfanelo ta yena leti hlamarisaka. I wa matimba hinkwawo; vutlhari bya yena a byi na makumu; u hetisekile hi ku helela hi tlhelo ra vululami; naswona u munhuhata rirhandzu.—Yobo 37:23; Swivuriso 3:19; Daniel 4:37; 1 Yohane 4:8.
10. Xana Yehova a nga ringani na munhu hi ndlela yihi (a) malunghana ni mintirho ya ku tumbuluxa ni vun’wini? (b) malunghana ni vito ni ndhuma yakwe?
10 Ya vutsevu, Yehova Xikwembu u faneriwa hi xichavo lexikulu swinene hikwalaho ka mintirho ya yena ya ku tumbuluxa. Tanihi Mutumbuluxi wa swilo hinkwaswo ematilweni ni le misaveni, hi nkarhi lowu fanaka i N’wini Lonkulu wa swilo hinkwaswo. Eka Psalma 89:11 ha hlaya: “Tilo ni misav̌a i ŝa wena.” Ya vunkombo, Yehova Xikwembu xa hina u faneriwa hi xichavo eka hinkwavo hi mhaka ya leswi a nga ringaniki na munhu hi vito ni ndhuma. Hi yena ntsena a nga ni vito ra Yehova, leswi vulaka leswaku “La Vangelaka Ku Va Kona.”—Vona Genesa 2:4, nhlamuselo ya le hansi.
Ndlela Yo Xixima Yehova
11. (a) Hi tihi tindlela tin’wana leti hi nga xiximaka Yehova ha tona? (b) Xana hi nga swi kombisisa ku yini leswaku hakunene hi xixima Yehova hi ku tshembela eka yena?
11 Hikwalaho ka timfanelo hinkwato ta Yehova, xana hi nga n’wi xiximisa ku yini? Hi laha hi nga ta vona ha kona, hi nga n’wi xixima hi ku n’wi chava, hi ku n’wi yingisa, hi ku n’wi tsundzuka etindleni ta hina hinkwato, hi nyika tinyiko, hi ku n’wi tekelela, ni ku n’wi khongela. Hi nga tlhela hi n’wi xixima hi ku kombisa ripfumelo eka yena, hi ku n’wi tshemba ku nga khathariseki leswi nga humelelaka. Ha komberiwa, “Ṭhemba Yehova hi mbilu ya wena hikwayo.” Xisweswo hi xixima Yehova Xikwembu hi ku hlaya rito ra yena. Hi xikombiso, u ri: “U nga tšhav̌i, nḍi na wena. U nga ṭhuki hikuv̌a nḍi Šikwembu ša wena. Nḍa ku tiyisa, nḍa ku lwela, nḍa ku khoma hi v̌oko ra mina ra šinene le’ri hlulaka.” (Swivuriso 3:5; Esaya 41:10) Ku tsandzeka ku n’wi tshemba ku ta va ku n’wi delela.
12. Hi xihi xiyenge lexi ku yingisa ni xichavo swi xi hetisisaka eku dzunisiweni ka Yehova?
12 Ndlela leyi yelanaka yo xixima Yehova Xikwembu i ku n’wi yingisa. Lexi nga xa nkoka i ku chava Xikwembu, ina, ku chava ku hlundzukisa Xikwembu. Marito ya Yehova eka Abrahama endzhaku ka loko Abrahama hi ku yingisa a ringete ku endla magandzelo hi Isaka, n’wana wakwe, ma kombisa vuxaka exikarhi ka ku chava ni ku yingisa. Yehova u te: “Ŝeŝi nḍa ŝi tiv̌a leŝaku u tšhav̌a Šikwembu.” (Genesa 22:12) Loko a hlamusela leswi vana va swi kolotaka vatswari va vona, muapostola Pawulo na yena u kombise leswaku ku yingisa ni xichavo swa fambisana. (Vaefesa 6:1-3) Kutani ke, hi ku yingisa milawu ya Xikwembu, leyi nga tikiki, hi xixima Yehova. Handle ko kanakana, ku nga yingisi Yehova Xikwembu swi ta vula ku n’wi delela.—1 Yohane 5:3.
13. Ku xixima Xikwembu swi ta hi vangela ku va ni xiyimo xihi xa mianakanyo malunghana ni mintirho ni makungu ya hina?
13 Ku tlula kwalaho, hi nga nyika Yehova Xikwembu xichavo lexi faneleke hi ku yingisa xitsundzuxo eka Swivuriso 3:6: “U ṅwi nghenisa e makungwini ya wena hikwawo [ina, n’wi tsundzuke], o ta lulamisa tindlela ta wena.” Mudyondzisiwa Yakobo u hi nyika xitsundzuxo lexinene emhakeni leyi. Emantshan’weni yo hanya siku na siku hi ku titshemba ngopfu hi hexe, hi tshemba vuswikoti bya hina, hi fanele hi vula hi ku: “Loko [Yehova a] swi rhandza, hi ta pfuka hi ya endla leswo karhi kumbe leswo karhi.” (Yakobo 4:15) Malembe yo tala lama hundzeke a ku ri mukhuva wa Swichudeni swa Bibele swa Matiko Hinkwawo ku engetela eka mhaka yin’wana ni yin’wana leyi nga ya nkarhi lowu taka nkomiso lowu nge D.V., leswi vulaka leswaku Deo volente, hi leswaku “loko Xikwembu xi swi rhandza.”
14. (a) Hi rihi langutelo leri hi faneleke hi va na rona ku pfumelelana ni matshalatshala ya hina loko hi ta dzunisa Xikwembu? (b) Hi rihi langutelo leri kombisiwaka malunghana ni ku humesiwa ka tibuku ta Sosayiti ya Watch Tower?
14 Nakambe hi xixima Yehova Xikwembu hi ku kombisa langutelo ra vutitsongahati, hi dzunisa Xikwembu hi ku hlula kwihi na kwihi loku hi nga ku kuma. Muapostola Pawulo hi laha ku faneleke u vule leswi malunghana ni vutirheli byakwe: “Mina ndzi byarile, Apolosi ú cheletile; kambe Xikwembu hi xona xi miriseke. Hikokwalaho, loyi a byalaka a hi nchumu, hambi loyi a cheletaka, kambe i Xikwembu, hikuva hi xona xi mirisaka.” (1 Vakorinto 3:6, 7) Hakunene, Pawulo a karhateka hi ku nyika Xikwembu xichavo lexi faneleke, hayi eka yena n’wini kumbe munhu wihi na wihi un’wana. Xisweswo, tibuku ta Sosayiti ya Watch Tower namuntlha a ti kombisi loyi a ti tsaleke, naswona vatsari a va va byeli van’wana leswi va swi ngheniseke. Hi ndlela leyi, nyingiso wu ya emhakeni, leyi endleriweke ku xixima Yehova, hayi munhu wo karhi.
15. Hi wihi ntokoto lowu kombisaka ku nonon’hwa loku van’wana va nga na kona eku twisiseni ka ku titsongahata ka Timbhoni ta Yehova?
15 Endlelo leri ra ku yisa nyingiso eka Yehova, xisweswo a xiximiwa, ra hlamarisa eka van’wana. Malembe ma nga ri mangani lama hundzeke, loko ku lulamisiwa fambiselo ra mpfumawulo wa nkulumo yale rivaleni eCentral Park ya Doroba ra New York, Timbhoni a ti tlanga yin’wana ya Tikhasete ta Kingdom Melodies leswaku va kambela fambiselo. Mpatswa lowu ambaleke kahle wu vutise un’wana wa Timbhoni leswaku vuyimbeleri lebyi a ku ri bya yini. Hi ku anakanya leswaku mpatswa lowu a wu ri Timbhoni, u hlamurile: “Leyi i Kingdom Melodies No. 4.” “Ina, kambe i mani la endleke vuyimbeleri lebyi?” va vutisa. Mbhoni yi hlamurile: “Oho, muendli a nga tiviwi.” Mpatswa wu hlamurile: “Vanhu lava endleke vuyimbeleri byebyo a va byi endli va nga tiviwi.” Mbhoni yi hlamurile: “Kambe Timbhoni ta Yehova ta swi endla sweswo.” Ina, va endla leswi hinkwaswo leswaku ku dzuneka hinkwako ku ya eka Yehova Xikwembu!
16. Xana hi nga tirhisa marito ya hina hi tindlela tihi to hambana-hambana leswaku hi yisa ku dzuneka eka Yehova Xikwembu?
16 Ndlela yin’wana yo xixima Yehova i ku tirhisa milomu ya hina ku nyikela vumbhoni ha yena. Loko hi karhateka swinene hi ku n’wi nyika xichavo, kutani hi ta khatalela ku hangalasa mahungu lamanene ya Mfumo. Hi nga endla leswi hi ku famba hi yindlu na yindlu na hi ndlela yihi na yihi yin’wana leyi nga ha kumekaka, hi nga yi honisi minkarhi yo nyikela vumbhoni hi xitshuketa. (Yohane 4:6-26; Mintirho 5:42; 20:20) Ku tlhandlekela kwalaho, hi na minkarhi ya ku dzunisa Xikwembu xa hina hi marito ya hina eminhlanganweni ya Vukriste, hi ku hlamula na hi ku hlanganyela eku yimbeleleni hi mbilu hinkwayo ka tinsimu ta hina ta Mfumo. (Vaheveru 2:12; 10:24, 25) Eka ku vulavurisana ka hina ka siku na siku, hi nga ha xixima Yehova Xikwembu hi milomu ya hina. Hi ku endla matshalatshalanyana, hi nga sungula bulo leri nga vaka mintila leyi akaka hi tlhelo ra moya, naswona leswi swi ta hetelela swi tise ku dzuneka eka Yehova Xikwembu.—Psalma 145:2.
17. (a) Xana ku tikhoma lokunene ku khumbana njhani ni ku dzunisa ka hina Yehova? (b) Ku tikhoma loko biha ku na nkucetelo wihi?
17 Hi laha swi nga swinene ha kona ku dzunisa Yehova Xikwembu hi milomu ya hina, nakambe i swa nkoka ku n’wi xixima hi mahanyelo ya hina. Yesu u avanyise lava, loko va ri karhi va xixima Xikwembu hi milomu ya vona, va nga ni timbilu leti nga ekule swinene na xona. (Marka 7:6) Ku tikhoma loko biha ku ta tisa xisandzu eka Yehova Xikwembu. Hi xikombiso, eka Varhoma 2:23, 24, ha hlaya: “Wena la tidzunisaka hi Nawu, xana a wu sorisi Xikwembu loko u tlula Nawu wolowo ke? Hikuva vito ra Xikwembu ri soriwa exikarhi ka vamatiko hinkwavo hikwalaho ka n’wina.” Eka malembe ya sweswinyana, magidi yo tala ma susiwile emabandlheni ya vanhu va Yehova. Kumbexana, tinhlayo letikulu leti ngheneleke ku tikhoma loku tisaka xisandzu a ti susiwanga hi leswi ti kombiseke langutelo ra ku hundzuka ka ntiyiso. Vanhu lava hinkwavo a a va xixima Yehova hi milomu ya vona, kambe va tsandzekile ku endla tano hi mahanyelo ya vona.
18. (a) Xana lava va hlawulekeke va fanele va khathalela ku endla yini loko va ta dzunisa Yehova? (b) Xana xiyimo xa vaprista van’wana hi siku ra Malakiya xi xi kombisa njhani xilaveko xo xalamuka?
18 Lava va nga bizi etindhawini to hambana-hambana ta ntirho wa nkarhi hinkwawo—ku nga va eBethele, entirhweni wo famba-famba kumbe wa vurhumiwa, kumbe tanihi maphayona—va ni lunghelo lerikulu hi minkarhi ya vona yo nyikela xichavo eka Yehova. Swa vona i ku tinyiketela swinene eka ntirho wihi na wihi lowu va averiweke wona, ‘va tshembeka eka leswintsongo ni leswikulu.’ (Luka 16:10) Hi tindlela tin’wana xiyimo xa vona lexi chavisekaka xi kombisiwile, hambi va nga fanisiwanga hi vaprista ni Valevhi eIsrayeleni wa khale. Hambi swi ri tano, hikwalaho ka ku honisa ka vaprista van’wana esikwini ra Malakiya, Yehova u te eka vona: “Kambe loko nḍi ri tatana, ku kwihi ku ḍunisiwa ka mina šana? ni loko nḍi ri hosi, ku kwihi ku tšhav̌iwa ka mina šana?” (Malakia 1:6) Vaprista volavo a va tisa xisandzu eka vito ra Xikwembu hi ku nyikela swiharhi leswi feke mahlo, leswi lamaleke ni leswi vabyaka tanihi magandzelo. Loko lava va nga eka swiyimo swa ntirho wo hlawuleka namuntlha vo ka va nga tiyimiseli ku endla hi matimba, va ta faneriwa hi ku avanyisa loku Yehova Xikwembu a ku nyikeke vaprista volavo. Va ta kayivela eku xiximeni ka Xikwembu.
19. (a) Hi laha swi vuriweke ha kona eka Swivuriso 3:9, hi yihi ndlela yin’wana ya ku xixima Yehova? (b) Hi yihi ndlela yin’wana ya nkoka ya ku dzunisa Yehova?
19 Ndlela yin’wana leyi hi nga xiximaka Yehova Xikwembu ha yona i ku endla minyikelo ya mali eka ntirho wo chumayela wa misava hinkwawo lowu a wu leriseke. Ha khongoteriwa: “Ḍunisa Yehova hi rifuwo ra wena, ni ŝirangana ŝa hikwaŝo le’ŝi ku taleleke.” (Swivuriso 3:9) Lunghelo ro endla minyikelo yo tano i nkarhi wo xixima Yehova Xikwembu lowu wu nga fanelangiki ku honisiwa. Nakambe hi nga xixima Yehova Xikwembu eswikhongelweni swa hina, hi n’wi dzunisa ni ku n’wi nkhensa. (1 Tikronika 29:10-13) Kahle-kahle, hi mhaka ya leswi hi yaka eka yena hi ku titsongahata na hi xichavo lexikulu, ku khongela ka hina Xikwembu hi koxe i ku xi kombisa xichavo.
20. (a) I vamani lava hi ntolovelo va xiximiwaka hi vanhu va misava, naswona hi ndlela yihi? (b) Hi nga hambeta hi dzunisa Yehova hi ku yingisa nawu wihi?
20 Vanhu vo tala namuntlha, ngopfu-ngopfu vantshwa, va dzunisa lava va va rhandzaka hi ku va tekelela—hi ku vulavula tanihi vona ni ku hanya tanihi vona. Hakanyingi vanhu lava va va tekelelaka i tinghwazi ta mintlango kumbe tingwenya emisaveni ya vuhungasi. Hi ku hambana, tanihi Vakriste, hi fanele hi dzunisa Yehova Xikwembu hi ku tiyimisela ku n’wi tekelela. Muapostola Pawulo u khutaze leswaku hi endla tano, u tsarile: ‘Vanani va tekeleri va Xikwembu, vana lava rhandzekaka, kutani mi hambeta mi famba erirhandzwini.’ (Vaefesa 5:1, 2) Ina, hi ku tiyimisela ku tekelela Yehova, ha n’wi xixima.
21. (a) I yini lexi nga hi hlomiselaka ku dzunisa ni ku chava Yehova? (b) Hi tihi tihakelo leti Yehova a ti nyikaka lava n’wi dzunisaka?
21 Hakunene, ku na tindlela to tala leti hi nga kombisaka ha tona xichavo ni ku dzuneka eka Xikwembu. Hi nga rivaleni leswaku hi ku hambeta hi hlaya Rito ra xona kutani hi ya hi tolovelana swinene na xona, hi ta kota ku xi xixima hi ndlela yo antswa. Hi tihi tihakelo to endla tano? Yehova u ri: “Hikuv̌a nḍi ta ḍunisa la’v̌a nḍi ḍunisaka.” (1 Samuel 2:30) Yehova eku heteleleni u nkhensa lava n’wi gandzelaka hi ku va nyika vutomi lebyi nga heriki ni ntsako, etilweni tanihi vafumi kulobye va N’wana wakwe, Yesu Kriste, kumbe emisaveni ya Paradeyisi.
Wa Tsundzuka Xana?
◻ I vamani lava hi ntolovelelo va xiximiwaka hi vanhu, naswona hi ntolovelo va honisa vamani?
◻ Xana ku xixima munhu swi vula yini, naswona hi tihi tindlela leti swi nga endliwaka ha tona?
◻ Hi swihi swin’wana swa swivangelo swa xisekelo leswi ha swona Yehova Xikwembu a faneriwaka hi xichavo?
◻ Hi tihi tindlela tin’wana leti hi nga xiximaka Yehova ha tona?
◻ Xana Yehova u va hakela hi tindlela tihi lava va n’wi dzunisaka?