Ku Tivula Swidyoho—Xana Ku Na Leswi Hoxeke?

“KU TIVULA i ku tibasisa ka moya, ndlela yo tlhela u sungula, ndlela yo sula xivi xi basa. Ndzi rhandza ku ya eKutivuleni, ndzi byela muprista swidyoho swa mina, a ndzi rivalela ni ku byarha leswi landzelaka.” Ku vula Mukhatoliki un’wana la tinyiketeke.—Bless Me, Father, for I Have Sinned.

Hi ku ya hi New Catholic Encyclopedia, “Kriste u nyike kumbe u byarhise muprista ntsena matimba ya ku boha ni ku ntshunxa, ya ku rivalela ni ku hlayisa” swidyoho. Buku leyi fanaka yo hlamusela yi vula leswaku ku tivula swidyoho ka nkarhi na nkarhi ku endleriwa “ku pfuxeta ku kwetsima ka vutomi loku onhiweke hi xidyoho lexikulu ni . . . ku basisa ripfalo ra munhu.” Hambi swi ri tano, xiyimo xa mahanyelo ematikweni yo tala xi kombisa leswaku, ku tivula ka nkarhi na nkarhi a ku vangeli vo tala lava va ku tirhisaka leswaku va “fularela le’ŝo biha, [va] endla le’ŝinene.” (Psalma 34:14) Kutani ke xana ku na leswi hoxeke?

Xana I Mihiva-hivana Ntsena?

Ku tivula ku nga ha sungula tanihi mihiva-hivana ntsena. Le Ireland, ku tivula ko sungula ku ta hi ku hatlisa emahlweni ka Xitsundzuxo xo sungula. Naswona xana swa hlamarisa leswaku nhwana wa malembe ya nkombo hi vukhale a a ta ehleketa ngopfu hi nguvu ya mutekiwa yo saseka, leyintsongo, leyi a nga ta yi ambala ku tlula ‘ku pfuxeta ku kwetsima ka vutomi lebyi onhiweke hi xidyoho lexikulu’?

“Nchumu lowu wu ndzi nyanyuleke ngopfu a a ku ri nguvu, handle ko kuma mali eka maxaka ya mina,” ku vula Ramona, loyi a nga tivula ro sungula loko a ri na nkombo wa malembe. U ya emahlweni a ku, “exikarhi ka vanhwana hinkwavo lava ndzi va tivaka, a ku nga ri na ntlhaveko wa swa moya. Ku hava ni un’we wa hina loyi a ehleketeke hi Xikwembu hi nkarhi wolowo.”

Entiyisweni, ku hlohlotela vana lavantsongo ku tivula swidyoho nkarhi na nkarhi swi nga yisa eku hetiseni ka nawu ntsena. “A ndzi tirhisa mintila leyi fanaka nkarhi hinkwawo,” ku vula Michael, loyi na yena a sunguleke xiendlo xa ku tivula swidyoho a ri na malembe ya nkombo hi vukhale.

Tinhlamuselo ta Makhatoliki man’wana leti tshahiweke eka buku leyi nge Bless Me, Father, for I Have Sinned ti komba leswaku ku tivula ku ve na nkoka wuntsongo wa moya eka vona hambi loko va kurile. Munhu un’wana u pfumerile a ku, “ku tivula swidyoho ku ku dyondzisa ku hemba, hikuva ku na swilo swin’wana leswi u nga ta ka u nga yi u ya swi byela muprista.” Ku nga tshembeki ka vaprista ku nga ha va xivangelo xa ku hundzuka loku ringaniseriweke. Van’wana va lavisise muyingiseri “lonene” wa swidyoho leswaku va kuma xitsundzuxo lexi a va lava ku xitwa. “Endzhaku ko xava kona ku ringana tin’hweti tinharhu, ndzi kume muyingiseri wa mina. Ndzi n’wi vona n’hweti na n’hweti, hi hlangana hi mahlo ekamareni ro vuyelelana, naswona wa chavisa,” ku vula wansati un’wana lontsongo. Mukhatoliki un’wana u te, “loko a wu sasekile, u kuma muprista loyi a feke tindleve naswona a nga vulavuli Xinghezi handle ka marito lama nge ‘three Hail Marys.’”

Kutani ke, handle ko kanakana ku na leswi hoxeke hi ku tivula tanihi leswi ku endliwaka hi vanhu vo karhi. Kambe Bibele yi kombisa leswaku ku na xilaveko xa ku tivula swidyoho, hikuva yi ri: “L’a fihlaka ŝidyoho ŝa yena, a nga ka a nga kateki, kambe l’a ŝi v̌ulaka, a ṭhika, o ta kuma tintŝalo.”—Swivuriso 28:13.

Xana leswi swi vula leswaku Mukriste u fanele ku tivula swidyoho swa yena hinkwaswo? Loko swi ri tano, eka mani? Xihloko lexi landzelaka xi ta kambisisa swivutiso leswi.

Le Ireland n’wana u tivula swidyoho swakwe ro sungula emahlweni ka Xitsundzuxo xo sungula. A ri na miehleketo yihi?