Tshama U Tiyile eRipfumelweni!

Tinhla-nkulu Leti Humaka Eka Petro Wo Sungula

TIMBHONI TA YEHOVA ti hlangavetana ni miringo yo hambana-hambana, kumbe miringo ya ripfumelo ra vona. Ematikweni man’wana, ntirho wa vona wa ku chumayela hi ta Mfumo wu endliwa ehansi ka nxaniso lowukulu. Loyi a hlohlotelaka leswi ni matshalatshala man’wana yo herisa vuxaka bya vona ni Xikwembu, i Sathana Diyavulosi. Kambe a nge humeleli, hikuva Yehova u endla leswaku malandza ya yena ma tiya—ina, ma tiya eripfumelweni.

Muapostola Petro u ve ni lunghelo ro ‘tiyisa vamakwavo’ lava a va “twa ku vava hikwalaho ka miringo ya tinxakanxaka.” (Luka 22:32; 1 Petro 1:6, 7) U endle tano epapileni ra yena ro sungula, leri a ri tsaleke kwalomu ka 62-64 C.E. a ri eBabilona. Eka rona Petro u tsundzuxile, u chavelerile ni ku khutaza Vakriste va Vayuda ni Vamatiko, a va pfuna ku tiyisela mindzhukano ya Sathana ni ku tshama va ‘tiyile eripfumelweni.’ (1 Petro 1:1, 2; 5:8, 9) Sweswi leswi nkarhi wa Diyavulosi wu nga koma ni minhlaselo ya yena yi nga yikulu, hakunene vanhu va Yehova va fanele ku pfuneka hi marito lama huhuteriweke ya Petro.

Ku Tikhoma Loku Sekeriweke Eka Misinya Ya Milawu Ya Xikwembu

Hambi loko ntshembo wa hina wu ri wa le tilweni kumbe wa le misaveni, wu fanele wu hi pfuna ku tiyisela miringo ni ku endla hi ndlela ya Xikwembu. (1:1–2:12) Ntshembo wa ndzhaka ya le tilweni wu endla leswaku vatotiwa va tsaka loko va hlangavetana ni mindzingo, leyi kahle-kahle yi kurisaka ripfumelo ra vona. Tanihi yindlu ya moya leyi akiwaka eka masungulo ya Kriste, va nyikela magandzelo ya moya lama amukeriwaka hi Xikwembu ni ku tikhoma hi ndlela leyinene leyi yi xi nyikaka ku dzuneka.

Ku tirhisana ka hina ni vanhu van’wana swi fanele swi fumiwa hi misinya ya milawu ya Xikwembu. (2:13–3:12) Petro u kombe leswaku hi fanele hi titsongahata eka vafumi va vanhu. Malandza ma fanele ku titsongahata eka vini va vona naswona vavasati eka vavanuna va vona. Hanyelo ra nsati wa Mukriste eka Xikwembu ri fanele ri kokela nuna wa yena la nga pfumeriki eka ripfumelo ra ntiyiso. Naswona wanuna la pfumelaka u fanele ku ‘kombisa xichavo eka nsati wa yena tanihi xibye lexi nga tiyangiki.’ Vakriste hinkwavo va fanele va anakanyelana, va va ni rirhandzu ra vumakwerhu, va endla leswinene ni ku landzelela ku rhula.

Ku Tiyisela Ku Tisa Mikateko

Ku tiyisela nxaniso hi ku tshembeka ka Vakriste va ntiyiso ku ta tisa mikateko. (3:13–4:19) Loko hi xaniseka hikwalaho ka leswinene, hi fanele ku tsaka. Ku tlula kwalaho, tanihi leswi Kriste a xanisekeke enyameni ku hi yisa eka Xikwembu, a hi fanelanga ku hanya hi ku ya hi ku navela ka nyama. Loko hi tiyisela miringo hi ku tshembeka, hi ta hlanganyela eka ntsako lowukulu eku nhlavuteriweni ka Yesu. Ku rhwala ndzhukano wa vito ra Kriste, kumbe tanihi vadyondzisiwa va yena, swi fanele swi hi tsakisa hikuva swi kombisa leswaku hi ni moya wa Yehova. Kutani loko hi xaniseka hi ku pfumelelana ni ku rhandza ka Xikwembu, a hi titshineteni eka xona kutani hi hambeta hi endla leswinene.

Tanihi Vakriste, hi lava ku hetisisa mintirho ya hina hi ku tshembeka kutani hi titsongahata ehansi ka voko ra matimba ra Xikwembu. (5:1-14) Vakulu va fanele va risa ntlhambi wa Xikwembu hi ku swi rhandza, naswona hinkwerhu ka hina hi fanele ku yisa ku vilela ka hina eka Yehova, hi xiya leswaku wa hi khathalela hakunene. Nakambe hi lava ku teka xiyimo xa hina ehenhleni ka Diyavulosi naswona hi nga heli mbilu, hikuva vamakwerhu va hlangavetana ni ku xaniseka loku hi nga na kona. Nkarhi na nkarhi hi tsundzuka leswaku Yehova Xikwembu u ta hi tiyisa naswona u ta hi pfuna leswaku hi tshama hi tiyile eripfumelweni.

[Bokisi/Xifaniso lexi nga eka tluka 30]

Bombo Ra Vavasati: Loko a tsundzuxa vavasati va Vakriste, Petro u te: “Xa n’wina, ku nga vi ku tibombisa hi swa le handle, hi misisi leyi horhiweke, ni ku tisasekisa hi swilo swa nsuku, ni ku ambala tinguvu leto saseka. Ku tibombisa ka n’wina, a ku ve ka vumunhu bya n’wina lebyi nga exihundleni xa mbilu; a ku ve ka moya lowu nga onhakiki wa ku olova ni ku rhula, lowu nga ni nkoka lowukulu emahlweni ka Xikwembu.” (1 Petro 3:3, 4) Enkarhini wa lembe xidzana ro sungula C.E., vavasati va vahedeni hakanyingi a va lehisa misisi, va luka misisi ya vona leyo leha hi minkhaviso yo lava ku voniwa ni ku vekela swingwavila swa nsuku emisisini. Hi ku fanana, vo tala va endla tano hi ku lava ku voniwa—nchumu lowu nga riki wa Vukriste. (1 Timotiya 2:9, 10) Hambi swi ri tano, a hi bombo hinkwaro leri hoxeke, hikuva Petro wa engetela “ku ambala tinguvu leto saseka”—i swinene. Swingwavila a swi tirhisiwa hi malandza ya Xikwembu ya nkarhi wa khale. (Genesa 24:53; Eksoda 3:22; 2 Samuel 1:24; Yeremia 2:32; Luka 15:22) Hambi swi ri tano, wansati wa Mukriste hi vutlhari u papalata swingwavila swo lava ku voniwa ni tinguvu leti kokaka mahlo naswona u fanele ku xiya leswaku ku tirhisiwa kun’wana ni kun’wana ka switolwa hi lokunene. Yinhla ya xitsundzuxo xa muapostola hi leswaku u fanele a kandziyisa swinene ku tibombisa ka le ndzeni, ku nga ri ka le handle. Leswaku a languteka hakunene, u fanele ku ambala hi ndlela leyinene naswona a va ni langutelo lerinene eka lava va chavaka Xikwembu.—Swivuriso 31:30; Mikea 6:8.

[Xihlovo Xa Kona]

Israel Department of Antiquities and Museums; Israel Museum/David Harris