Xiviko Xa Vahuweleri Va Mfumo
“Tsalwa Rin’wana Ni Rin’wana Leri A Ri Hlayeke Ri Khumbe Mbilu Ya Mina”
“RITO ra Xikwembu ra hanya, naswona ra tirha,” ku vule muapostola Pawulo. (Vaheveru 4:12) Lowu wu tikombe wu ri ntiyiso evuton’wini bya wansati wa le Vietnam, loyi a kurisiweke a ri Mubudha. Mhaka ya yena hi leyi.
“Vatswari va mina, lava va ha riki eVietnam, i Mabudha hi nomu, kutani ndzi kurisiwe ndzi ri Mubudha kukondza ndzi tekiwa loko ndzi ri na malembe ya 22. Vandyangu wa nuna wa mina va ringete ku ndzi sindzisa leswaku ndzi khuvuriwa eKerekeni ya Khatoliki. Va vula leswaku n’wingi wa mina wa xisati u siveriwa ku ya etilweni hikwalaho ka leswi a ndzi ri Mubudha! Eku sunguleni ndzi arile ku endla tano, kambe endzhaku ndzi khuvuriwile leswaku ndzi va tsakisa. Hambi swi ri tano embilwini ya mina, a a swi ndzi vavisa hikuva a ndzi venga vukanganyisi lebyi nga eKerekeni ya Khatoliki. A yi nga hambanangi ni vukhongeri bya Vubudha. Na yona a yi katseka enyimpini ni le ka tipolitiki, naswona havumbirhi vukhongeri lebyi a byi khutaza ku gandzela vakokwana lava feke.
“Loko a ndzi lo tshama eVietnam, a ndzi ta va ndzi ve ni nkarhi wuntsongo wo dyondza ntiyiso. Ndzi kule hi nkarhi wa minkitsikitsi ya tipolitiki eDzongeni wa Vietnam, naswona a ndzi tshama edoropeni leri ku nga mpfhuka ku suka eSaigon. Kutani a wu ri nkateko ku kota ku balekela eAustralia.
“A ndzi ri un’wana wa lava katekeke vo famba hi byatso. Ndzi tlakule n’wana wa mina wa tin’hweti timbirhi hi vukhale, ndzi boheke ku tsutsuma emunyameni ndzi balekela maphorisa kutani ndzi khandziya byatso lebyintsongo byo phasa tinhlampfi. Endzhaku ka masiku ya nkombo hi ri elwandle, hi fike eMalaysia, laha hi nga tshama tin’hweti ti nga ri tingani ekampeni ya vabaleki hi nga si fika eAustralia.
“Endzhaku ka malembe mambirhi ni hafu ndzi ri eAustralia, ndzi endzeriwe hi Timbhoni ta Yehova loko ti ri entirhweni wa tona wa yindlu na yindlu. Eka riendzo ro sungula, ndzi amukele dyondzo ya Bibele hikuva ndzi kume lowu wu ri nkarhi lowunene wo dyondza Xinghezi. Kambe mahanyelo ya Mbhoni leyi nga ndzi kuma ni ntiyiso lowu a yi ndzi dyondzisa wona swi ndzi khumbe swinene. Tsalwa rin’wana ni rin’wana leri a ri hlayeke ri khumbe mbilu ya mina, naswona a ndzi vonangi vukanganyisi enhlengeletanweni ya Yehova. Endzhaku ko dyondza Bibele ku ringana lembe na hafu, ndzi nyikele vutomi bya mina eka Yehova kutani ndzi khuvuriwa.
“Ndzi nga vula leswaku ntiyiso wu cince langutelo ra mina hinkwaro hi vutomi. Nuna wa mina a hi mupfumeri, kambe Yehova u ndzi pfunile a ndzi tiyisa, swin’we na ndyangu wa mina lowuntsongo. U ve Muleteri wa mina Lonkulu naswona u ndzi dyondzisile ku va wansati ni manana la antswaka. Ndzi ya emahlweni ndzi nkhensa Yehova leswi a ndzi pfuneke ku huma emunyameni wa moya ku ya eku vonakaleni ka ntiyiso wa Bibele.”
Hakunene, Rito ra Xikwembu leri huhuteriweke ri nyikele matimba hi ndlela leyinene emhakeni leyi. Ku dyondza Bibele na ku tirhisa leswi dyondziweke swi nyika nhlamuselo na xikongomelo evuton’wini, naswona swi yisa evuton’wini lebyi nga heriki emisaveni leyintshwa ya Xikwembu. Tanihi leswi Xikwembu xi huhuteleke Muxe ku vula leswi, “hikuva a hi rito r[a] hav̌a e ka ṅwina; kambe i v̌utomi bya ṅwina.”—Deuteronoma 32:47.