Xiviko Xa Vahuweleri Va Mfumo

Mahungu Lamanene Ya Mfumo Yo Huma Le Hansi-hansi

TANIHI le matikweni man’wana ya 211, mahungu lamanene ya Mfumo ma karhi ma huweleriwa hi ku hiseka hi Timbhoni ta Yehova le hansi-hansi eAustralia. Timbhoni leti tlulaka 49 000 kwalaho ti tiphina hi mikateko leyi fuweke. Vanhu vo tala va tinxaka to hambana va rhurhele kwalaho emalembeni lama hundzeke, lerova sweswi mabandlha ya 58 ya tinxaka to hambana-hambana ya vika ntirho wa nsimu. Mintokoto leyi khutazaka yi hlamuseriwa hi hofisi ya rhavi ra Sosayiti ya Watch Tower.

Mubaleki Wa Le Vietnam

Mubaleki wa le Vietnam, loyi sweswi a tshamaka eAustralia, u kule a ri karhi a gandzela vakokwana, Vuconfucia ni Vubudha, kun’we ni filosofi ya le Vuxeni ni ya le Vupela-dyambu. Ku fikela hi 1975 a a ri socha eka vuthu ra Mavietnam eDzongeni. Hi 1979 voko ra yena ra ximatsi a ri fanele ku tsemiwa hikwalaho ka nyama leyi a yi mirile ehlakaleni ra voko ra yena. Hi ku navela ntshunxeko, u baleke eVietnam hi 1983, kun’we ni vanhu van’wana va 24, hi byatso lebyintsongo. Endzhaku ka ku hlangana ni tinsula-voya loku chavisaka, byatso bya vona byi susumeteriwe eLwandle ra N’walungu wa China swi nga rindzeriwanga hi masiku ya tsevu yo hisa, ku kondza loko eku heteleleni va fika eMalaysia. Endzhaku ko heta tin’hweti ta ntlhanu ekampeni ya vabaleki, u pfumeleriwile ku nghena eAustralia. Endzhakunyana ka tin’hweti tinharhu u kume ntiyiso. Marito ya Yesu eka Yohane 8:32 ya hlamule ku navela ka yena ntshunxeko: “Mi ta tiva ntiyiso, kutani ntiyiso wu ta mi ntshunxa.” Vamakwerhu va n’wi kombe rirhandzu lerikulu. Namuntlha i Mbhoni ya Yehova ni xitirho xo pfuna vanhu van’wana vo tala lava vulavulaka Xivietnam ku dyondza ntiyiso lowu ntshunxaka munhu.

Vanhu Va Kwalaho Va Amukela Ntiyiso

En’walungu vupela-dyambu eAustralia makwerhu lontshwa wa phayona ni munghana wa yena va endzele wansati wa kwalaho endhawini ya mfumo-xivongo leyi vitaniwaka dladla ra wulu. Endzhaku ko twa leswaku ha yini va endzile, wansati u teke xilotlelo lexi nga enhan’wini ya yena kutani a lotlulula bokisi ra yena lerikulu ra nsimbi ra tinguvu. Lexi va hlamariseke, endzeni exikarhi ka swilo swa yena va vone tibroxara timbirhi ta Watch Tower ni kopi ya khale ya Bibele. Loko va tshame ehansi, va swi kotile ku sungula dyondzo va tirhisa yin’wana ya tibroxara. Hambi leswi wansati a nga swi tiviki ku hlaya hambi ku ri ku tsala, entiyisweni u ti teke ti ri ta nkoka tibroxara leti a ti kumeke khale. Sweswi dyondzo ya nkarhi hinkwawo ya fambisiwa, hi ku tsakela ka yena.

Riqingho Leri Biweke Hi Xihoxo

Edoroba-nkulu ra Sydney, leri nga ni vanhu va timiliyoni tinharhu, xinhwanyatana xa malembe manharhu a xi tlanga hi riqingho kutani xi ba nomboro yin’wana swi nga rindzeriwanga. Swi endlekile leswaku nomboro yi va ya Mbhoni. Makwerhu wa xisati u ri hlamurile, naswona eku sunguleni u ehlekete leswaku mubi wa riqingho a ku ri ntukulu wa yena. Manuku u twe rito ra munhu lonkulu. A ku ri mana wa xinhwanyatana, loyi a a kombelela xinhwanyatana xa yena ku rivaleriwa. Bulo ri landzerile, leri eka rona makwerhu wa xisati a vekeke vumbhoni. Wansati u nyanyukile a ku: “A ndzi tshemba leswaku Timbhoni a ti ta tlhela ti ta ekaya ra mina. Ndzi lava ku va un’wana wa Timbhoni ta Yehova!” U ye emahlweni a vula leswaku tin’hweti timbirhi leta ha ku hundzaka, a a endzele ePeru naswona u tsakisiwe hi ndyangu wa hahani wa yena lowu sweswi wu nga Timbhoni ta Yehova. U te: “Vana va maxaka ya mina a va ri swidiyavulosana, kambe sweswi i swintsumana!” Malunghiselelo ya dyondzo ya Bibele ma endliwile, kutani wansati la tsakelaka u ya emahlweni a endla nhluvuko lowunene—leswi hinkwaswo swi hikwalaho ka riqingho leri hoxeke leri biweke hi xinhwanyatana xa yena.