Hambetani Mi Famba Eku Vonakaleni Ni Le Rirhandzwini

Tinhla-nkulu Leti Humaka Eka Yohane Wo Sungula

YEHOVA i Xihlovo xa ku vonakala ni rirhandzu. Hi fanele ku titshega hi Xikwembu leswaku hi kuma ku vonakala ka moya. (Psalma 43:3) Naswona rirhandzu ri le xikarhi ka mihandzu ya moya wa xona lowo kwetsima.—Vagalatiya 5:22, 23.

Ku vonakala, rirhandzu, ni timhaka tin’wana swa hlamuseriwa epapileni ro sungula leri huhuteriweke ra muapostola Yohane, leri kumbexana ri tsariweke aEfesa kumbe ekusuhi na kona kwalomu ka 98 C.E. Xivangelo-nkulu xo ri tsala a ku ri ku sirhelela Vakriste eka vagwinehi ni ku va pfuna ku hambeta va famba eku vonakaleni. Tanihi leswi hi hlangavetanaka ni mintlhontlho eka rirhandzu, ripfumelo, ni ku tshembeka ka hina entiyisweni, ku languta papila leri swi nga hi pfuna hakunene.

‘Famba Eku Vonakaleni’

Yohane u swi veke erivaleni leswaku Vakriste lavo tshembeka va fanele ku famba eku vonakaleni ka moya. (1:1–2:29) U te: “Xikwembu i ku vonakala, kutani eka xona ku hava munyama nikutsongo [a ku na vudyoho, ku tikhoma loko biha, vuxisi, kumbe thyaka].” Hikwalaho ka leswi Vakriste lava totiweke hi moya va ‘fambaka eku vonakaleni,’ va ni “xinakulobye” ni Xikwembu, Kriste, ni un’wana ni un’wana. Nakambe va hlantswiwile exidyohweni hi ngati ya Kriste.

Ku nga khathariseki leswaku hi Vakriste lava totiweke lava nga ni ntshembo wa le tilweni kumbe hi langutele vutomi lebyi nga heriki emisaveni, hi ta hambeta hi pfuneka hi gandzelo ra Yesu ntsena loko hi rhandza vamakwerhu hayi misava. Nakambe hi fanele ku papalata ku kuceteriwa hi vagwinehi, tanihi “Nala wa Kriste,” la landzulaka Tatana ni N’wana. Kutani hi nga rivaleni leswaku vutomi lebyi nga heriki byi ta tsakeriwa ntsena hi lava va namarhelaka ntiyiso ni ku kombisa vululami.

Vana Va Xikwembu Va Kombisa Rirhandzu

Kutani Yohane u kombisa vana va Xikwembu. (3:1–4:21) Xo sungula, va endla leswi lulameke. Nakambe va yingisela nawu wa Yehova Xikwembu lowu nge ‘va va ni ripfumelo evitweni ra N’wana, Yesu Kriste, ni ku rhandzana.’

Munhu la ‘tivaka Xikwembu’ u ni vutivi mayelana ni makungu ya Yehova ni hi laha rirhandzu ra Yena ri kombisiwaka ha kona. Leswi swi fanele ku pfuna munhu ku kombisa rirhandzu. Kahle-kahle, “loyi a nga riki na rirhandzu, a nga tivi Xikwembu, hikuva Xikwembu i rirhandzu.” Rirhandzu ra Xikwembu ri kombisiwe loko Xikwembu xi “rhumele N’wana wa xona ku va mhamba ya swidyoho swa hina.” Loko Yehova a hi rhandza ku fikela eka mpimo wolowo, hi boheka ku rhandzana. Ina, wihi na wihi la vulaka leswaku u rhandza Xikwembu u fanele nakambe a rhandza makwavo wakwe wa moya.

Ripfumelo Ri ‘Hlula Misava’

Rirhandzu ri susumetela vana va Xikwembu ku yingisa milawu ya xona, kambe va ‘hlula misava’ hi ripfumelo. (5:1-21) Ripfumelo ra hina eka Xikwembu, Rito ra xona, ni N’wana wa xona ri hi endla hi kota ku ‘hlula misava’ hi ku alela ku anakanya ni tindlela ta yona leti hoxeke ni ku hlayisa milawu ya Yehova. Xikwembu xi nyike lava ‘hlulaka misava’ ntshembo wa vutomi lebyi nga heriki naswona xi yingisela swikhongelo swa vona leswi pfumelelanaka ni ku rhandza ka xona. Hikuva wihi na wihi la “tswariweke hi Xikwembu” a nga tshameli ku dyoha, Sathana a nga swi koti ku khoma munhu wo tano. Kambe vatotiwa ni malandza ya Yehova lama nga ni mintshembo ya la misaveni va fanele ku tsundzuka leswaku ‘misava hinkwayo yi le hansi ka matimba ya lowo biha.’

[Bokisi/Xifaniso lexi nga eka tluka 29]

Gandzelo Leri Faneleke: Yesu i “mhamba ya swidyoho swa hina [lava va valandzeri vakwe lava totiweke], naswona ku nga ri ya swidyoho swa hina ntsena, kambe ni swa vanhu va misava hinkwayo.” (1 Yohane 2:2) Rifu rakwe a a ri ri “ndzivalelo” (Hi Xigriki, hi·la·smosʹ, ri komba “nchumu wo miyeta,” ku nga “ku phahlelana mariyeta”) kambe ku nga ri hi miehleketo yo rhulisa mintlhaveko ya mbilu etlhelweni ra Xikwembu. Ku ri na sweswo, gandzelo ra Yesu ri miyete, kumbe ri enerise, swilaveko swa vululami lebyi hetisekeke bya Xikwembu. Njhani? Hi ku nyikela ku lulama ni swisekelo swo rivalela swidyoho ntsena, leswaku Xikwembu “xi va Xikwembu lexi lulameke, xikan’we ni ku va Xikwembu lexi endlaka munhu [la dyoheke hi ndzhaka] ku va la lulameke loko a pfumela eka Yesu.” (Varhoma 3:23-26; 5:12) Hi ku nyikela ndlela yo basisa swidyoho swa vanhu hi ku helela, gandzelo ra Yesu ri swi endle swi faneleka, kumbe swi koteka leswaku munhu a lava ni ku kuma ku tlheriseriwa eka vuxaka lebyinene na Yehova. (Vaefesa 1:7; Vaheveru 2:17) Mawaku ku nkhensa loku hinkwerhu hi faneleke hi va na kona hi leswi!