Tivoneleni Eka Vagwinehi!

Tinhla-nkulu Leti Humaka Epapileni Ra Yuda

MALANDZA ya Yehova ma fanele ku ‘venga leswo biha’ kutani ma “namarhela leswinene.” (Varhoma 12:9) Yuda mutsari wa Bibele u pfune van’wana ku endla sweswo epapileni ra yena leri a ri rhumeleke a ri ePalestina kwalomu ka 65 C.E.

Yuda u tivula “nandza wa Yesu Kriste ni makwavo wa Yakobo.” Yakobo loyi hi laha ku twalaka a a tiveka swinene tanihi makwavo wa Yesu Kriste. (Marka 6:3; Mintirho 15:13-21; Vagalatiya 1:19) Xisweswo Yuda hi yexe a a ri makwavo wa Yesu hi manana. Hambi swi ri tano, a nga ha va a vone swi nga fanelangi ku boxa vuxaka lebyi bya nyama, tanihi leswi Kriste nkarhi wolowo a a ri munhu wa moya la kwetsimisiweke etilweni. Papila ra Yuda a a ri pakanisa eku nyikeleni ka ndzayo leyi yi nga hi pfunaka ku “namarhela leswinene” ni ku tivonela vagwinehi.

‘Lwanani Hi Matimba’

Hambi leswi Yuda a a lava ku tsala mayelana ni ku ponisiwa loku Vakriste hinkwavo va nga na kona, u swi kume swi fanerile ku khutaza vahlayi va yena ku “lwela vupfumeri.” (Tindzima 1-4) Hikwalaho ka yini? Hikuva vanhu lava nga chaviki Xikwembu va nghenile ebandlheni kutani va ‘hundzula tintswalo ta Xikwembu va endla swa manyala ha tona.’ Hi laha ku hoxeke va anakanye leswaku va nga tshova milawu ya Xikwembu kambe va tama va ha tshama exikarhi ka vanhu va xona. Onge hi nga ka hi nga yi amukeri mianakanyo yo tano leyo homboloka kambe minkarhi hinkwayo hi landzelela ku lulama, hi tlangela leswi hi ngati ya Yesu, Xikwembu hi tintswalo xi hi hlantsweke eswidyohweni swa hina.—1 Vakorinto 6:9-11; 1 Yohane 1:7.

Switsundzuxo Leswi Vekiweke Emahlweni Ka Hina

I swa nkoka ku tivonela eka malangutelo, ku tikhoma ni vanhu van’wana. (Tindzima 5-16) Hikwalaho ka leswi Vaisrayele van’wana lava ponisiweke aEgipta va pfumaleke ripfumelo, va herisiwile. Tintsumi leti nga hlayisangiki xivandla xa tona xa xiviri ti ‘pfaleriwile hi laha ku nga heriki exinyamini [xa moya] lexi chavisaka ku fikela siku lerikulu ra ku avanyisa.’ Vunghwavava lebyikulu byi tisele Sodoma na Gomora ‘ku biwa ni ku hisiwa hi ndzilo lowu nga heriki.’ Hikwalaho, a hi tsakiseni Xikwembu minkarhi hinkwayo naswona hi nga tshiki “ndlela ya vutomi.”—Psalma 16:11.

Ku hambana na Mikayele ntsumi leyikulu, loyi a nga tisangiki ku avanyisa ehenhla ka Diyavulosi hi marito yo sandza, vanhu lava nga chaviki Xikwembu va sandze “vakwetsimi,” entiyisweni lava nga ni ku kwetsima ko karhi loku va ku byarhisiweke hi Xikwembu na Kriste tanihi vakulu lava totiweke. Hi nga kombisi ku sola vulawuri lebyi nyikiweke hi Xikwembu!

Swikombiso leswo biha swa Kayini, Balaama na Kora swi landzeleriwe hi vanhu lava nga chaviki Xikwembu. Va nyikele nxungeto wa moya lowu fanisiwaka ni maribye lama nga tumbetiwa ehansi ka mati naswona a ma fana ni mapapa lama nga hava mati ni lama feke, mirhi leyi simuriweke leyi nga humesiki nchumu lexi vuyerisaka. Vagwinehi volavo nakambe a va ri lava n’unun’utaka, lava vilelaka, ni ‘lava bumabumelaka van’wana leswaku va ta vuyeriwa.’

Hambetani Mi Lwa

Lexi landzelaka Yuda u nyikele xitsundzuxo xo papalata minkucetelo yo biha. (Tindzimana 17-25) Ku ta va ni vasandzi “eminkarhini leyo hetelela,” kutani namuntlha Vakriste va ntiyiso va fanele va nga tikarhati hi vona ni marito ya vona lama tlhontlhaka. Ku papalata minkucetelo yo tano leyo biha, hi fanele ku tiaka ‘eku pfumeleni ka hina loko kwetsima swinene,’ hi khongela hi moya lowo kwetsima, kutani hi tshama erirhandzwini ra Xikwembu, loko ha ha langutele tintswalo ta Yesu leswaku ti kombisiwa.

Handle ko kanakana, exiphen’wini xa vadyondzisi va mavunwa, vanhu lava nga chaviki Xikwembu va vangela van’wana va va ni ku kanakana. (Ringanisa 2 Petro 2:1-3.) Xana lava kanakanaka a a va lava yini? Phela, a a va lava mpfuno wa moya leswaku va humesiwa “endzilweni,” eku lovisiweni loku nga heriki! (Matewu 18:8, 9) Kambe lava chavaka Xikwembu a va fanelanga ku chava khombo rero, hikuva Yehova u ta va sirhelela ku ‘wela’ exidyohweni ni le ka ndzoviso lowu yimeleke vagwinehi.

[Bokisi leri nga eka tluka 31]

Maribye Lama Tumbetiweke: Yuda u tsundzuxe Vakriste-kulobye mayelana ni ‘maribye lama tumbetiweke ehansi ka mati eminkhubyeni ya vona ya rirhandzu.’ (Yuda 12) Hi rirhandzu ra vunwa eka vapfumeri, vagwinehi volavo a va kotisa maribye yo tontswa lama nga ehansi ka mati lama nga tshovaka swikepe kumbe ku faya ni ku dlaya lava hlambelaka. Minkhuvo ya rirhandzu yi nga ha va yi ve minkhuvo leyi eka yona Vakriste lava fuweke a a va rhamba vapfumeri-kulobye lava pfumalaka. Chrysostom, Tatana wa Kereke (347?–407 C.E.) u te: “Hinkwavo va hlangane enkhubyeni lowu tolovelekeke: lava fuweke va tisa swilo, kutani lava pfumalaka ni lava nga riki na nchumu va rhambiwa, hinkwavo va tsakele nkhuvo swin’we hi ku fanana.” Ku nga khathariseki xivumbeko xa minkhuvo ya rirhandzu ya le ku sunguleni, xitsundzuxo xa Yuda xi pfune vapfumeri ku tivonela eka ‘maribye lama tumbetiweke’ ya vagwinehi lama nga vangelaka rifu ra moya. Hambi leswi Vakriste a a va nga lerisiwanga ku endla minkhuvo ya rirhandzu, naswona a yi endliwi namuntlha, vanhu va Yehova va pfunana hi leswi vonakaka hi minkarhi ya xilaveko naswona va va ni swinkhubyana leswi tsakisaka.