Rhangisa Xikwembu eVuton’wini Bya Wena Bya Ndyangu!

BOB NA JEAN—mpatswa lowu tekaneke lowu kombisiweke eka xihlokwana lexi hundzeke—a va byi dlayanga vukati. Ku ri na sweswo, va vulavurisane hi swihinga swa vona ni mutirheli wa Mukriste. U hatle a xiya leswaku ku nonon’hwa ka vona ngopfu-ngopfu a ku vangiwa hi ku hambana ka makulele ya vona.

Hi xikombiso, tanihi leswi Bob a a huma endyangwini wa van’wamabindzu ni vatirhi vo gingiriteka ni leswi a a tirha ntirho wa mavoko hi yexe, mixo wun’wana ni wun’wana a a lava xifihlulo lexi xiyekaka. Jean, loyi a humaka endyangwini wa vatirhi vo khoma xitsalo, a a n’wi nyika kofi ni xinkwa xo oxiwa ntsena. Hikwalaho ka sweswo mholovo ya xifihlulo yi ve nyimpi leyikulu!

Bob na Jean a va fanele ku antswisa ku vulavurisana ka vona. Hambi swi ri tano, xivangelo xa ntiyiso xa gome ra vona xi ye xi nyanya. Mutirheli u vutisile a ku: “Xana mi langutana hi ku ya hi 1 Vakorinto 13:4?” Tsalwa rero ra Bibele ri hlayekisa xileswi: “Rirhandzu ra tiyisela, naswona ri ni tintswalo; rirhandzu a ri na mavondzo, a ri tinyungubyisi, a ri tikurisi.” Ndzimana leyi landzelaka yi ri rirhandzu “a ri hanyi hi ndlela yo soleka, a ri tilaveri leswi nga swa rona ntsena, a ri na ximbilwa-mbilwana; rirhandzu a ri na xiveketela xa leswo biha.” Jean na Bob havambirhi a a va tilulamisele ku tirhisa marito lawa evuxakeni bya vona.

Swiphiqo swa mpatswa lowu ngopfu-ngopfu a swi lava ntlhantlho wa moya. Leswi Bob na Jean a va lava ku hlayisa vuxaka lebyinene ni Xikwembu, ngopfu-ngopfu a va fanele ku tirhisa misinya ya milawu ya Bibele ni ku xiya leswaku “loko Yehova a nga aki yindlu, la’v̌a yi akaka v̌a tikaratela ŝa hav̌a.” (Psalma 127:1) Tindzimana 3 ku ya ka 5 ti kombetela eku akeni ka ndyangu. Naswona ku humelela lokukulu eku kondleteleni ka ntsako ekaya ku ta hi ku rhangisa Xikwembu evuton’wini bya ndyangu.—Vaefesa 3:14, 15.

Leswi Ku Rhangisa Xikwembu Swi Katsaka Swona

Ku rhangisa Xikwembu evuton’wini bya ndyangu wa wena swi tlula xivulavulelo lexi nge, “Ndyangu lowu khongelaka swin’we wu tshama swin’we.” Hi ku ya hi phepha-hungu ra Family Relations, vo tala va kholwa leswaku “vukhongeri byi olovisa ntirhisano wa ndyangu lowunene ni lowu tsakisaka, ni ku ndlandlamuxa ku eneriseka ka swirho swa wona.” Kambe ku tirhisa vukhongeri ntsena a swi fani ni ku rhangisa Xikwembu. Vo tala va voyamela eku namarheleni ka vukhongeri hikwalaho ka ntolovelo, mukhuva wa ndyangu, kumbe tshamelo lerinene ntsena. Xikwembu xi ni nkucetelo wuntsongo evuton’wini bya vona bya siku na siku. Xa nkoka ngopfu, a hi hinkwabyo “vukhongeri lebyi tengeke, lebyi nga solekiki emahlweni ka Xikwembu.”—Yakobo 1:27.

Leswaku hi rhangisa Xikwembu evuton’wini bya ndyangu wa hina, hina kun’we ni varhandziwa va hina hi fanele ku gandzela Yehova, ‘La-nge-Henhla-henhla ka misava hinkwayo,’ hi ku ya hi swilaveko swakwe. (Psalma 83:18) N’wana wa Xikwembu, Yesu Kriste, u te: “Kambe nkarhi wa ta, ni sweswi wu tile, lowu vagandzeri va xiviri va nga ta gandzela Tatana hi moya ni ntiyiso, hikuva Tatana ú lava vagandzeri lavo tano. Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” (Yohane 4:23, 24) Leswaku hi gandzela Yehova Xikwembu “hi moya,” ntirho wa hina wo kwetsima eka yena wu fanele ku susumetiwa hi mbilu leyi taleke hi rirhandzu ni ripfumelo. (Marka 12:28-31; Vagalatiya 2:16) Ku gandzela Yehova hi “ntiyiso” swi lava leswaku hi alana ni vunwa bya vukhongeri ivi hi fambisana ni ku rhandza ka yena hi laha ku hlavuteriweke ha kona eBibeleni. A hi nge swi koti ku rhangisa Yehova Xikwembu handle ka loko vukhongeri byerhu byo fambisana ni mimpimanyeto ya yena.a Hi yihi yin’wana ya yona? Naswona xana ku yi tirhisa ku nga pfuna ndyangu wa wena hi ndlela yihi?

Ku Rhangisa Yehova Tanihi Wanuna

Eka 1 Vakorinto 11:3, Bibele yi ri: “Kriste i nhloko ya wanuna un’wana ni un’wana, wanuna i nhloko ya wansati, Xikwembu i nhloko ya Kriste.” Loko u ri wanuna, u ni vutihlamuleri lebyi u nyikiweke hi Xikwembu byo va muendli wa xiboho lexi tiyeke endyangwini wa wena. Kambe leswi a swi nyiki wanuna wihi na wihi mpfumelelo wo tshikilela kumbe ku sihalala.

Bibele yi khutaza vavanuna ku lemuka mintlhaveko ya vasati va vona loko va endla swiboho leswi va khumbaka. (Ringanisa Genesa 21:9-14.) I ntiyiso, Matsalwa ma hi khutaza hinkwerhu leswaku ‘hi nga hitekeli swilo swa hina ntsena, kambe hi hitekela ni swilo swa van’wana.’ (Vafilipiya 2:2-4) Laha misinya ya milawu ya Bibele yi nga katsekiki, wanuna wa Mukriste u ta tala ku amukela leswi tsakeriwaka hi nsati. Hi ku va la n’wi tsakelaka, nakambe u ta tiyiseka leswaku a nga byarhisiwi vutihlamuleri byo tika. Hi xikombiso, a nga ha n’wi pfuna hi swintirhwana swa le kaya, ngopfu-ngopfu loko a ri ni ntirho wo tihanyisa.

Muapostola Pawulo u tsarile a ku: “Vavanuna na vona va fanele ku rhandza vasati va vona, hilaha va rhandzaka miri wa vona ha kona. Loyi a rhandzaka nsati wa yena, wa tirhandza, hikuva a ku si tshama ku va ni munhu la vengaka nyama ya yena, kambe wa yi fihluta, wa yi kufumeta, tanihi leswi Kriste na yena a endlelaka [bandlha].” (Vaefesa 5:28, 29) Yesu Kriste u tirhisane ni swirho swa bandlha hi mukhuva lowunene.

Leyi fanelaka i ndzayo ya muapostola Petro: “Na n’wina vavanuna, hanyisanani ni vasati va n’wina hi ku twelelana, hikuva va fana ni swibya leswi nga tiyangiki, naswona mi va xixima, hikuva va ta dya ndzhaka ya tintswalo ni vutomi swin’we na n’wina. Va xiximeni leswaku mikhongelo ya n’wina yi ta kala yi nga siveriwi.” (1 Petro 3:7) Xana a swi khomisi gome ku xiya leswaku ku khoma nsati wakwe hi ndlela yo pfumala rirhandzu swi nga sivela swikhongelo swa wanuna? Ina, wanuna u fanele ku tirhisana ni nsati wakwe hi ndlela ya rirhandzu loko Xikwembu xi ta yingisela ni ku hlamula swikhongelo swa yena.

Nakambe ku rhangisa Xikwembu swi khumba vuxaka bya tatana ni vana va yena. U fanele ku khumbeka ngopfu hi mpfuno wa moya wa vana va yena. Hambi swi ri tano, eka nkambisiso lowukulu wa U.S., ko va hafu ya vavanuna ntsena leyi vuleke leswaku “ku hlanganyela edyondzweni ya Matsalwa kumbe ku burisana hi mintlawa” a a ‘swi ri swa nkoka swinene eku hluvukeni ka mindyangu ya vona hi tlhelo ra moya.’ Lavan’wana hinkwavo va kombise swilo swo tanihi “ku hlalela kumbe ku yingisela vuhaxi bya minongonoko ya vukhongeri” kumbe ‘ku kombetela eka leswi vutomi byi vulaka swona.’

Hambi swi ri tano, Bibele yi byela vatatana yi ku: “Mi nga dyisi vana va n’wina embitsi, kambe mi va kurisa, hi ku va laya ni ku va dyondzisa ta [Yehova].” (Vaefesa 6:4) Exikarhi ka Timbhoni ta Yehova, vatatana va languteriwa ku rhangela evugandzerini bya ndyangu. Hi ku fambisa tidyondzo ta ndyangu ta Bibele nkarhi na nkarhi, ku hlanganyela minhlangano ya Vukriste, ni ku fambisana ni swilaveko swin’wana swa Matsalwa, wanuna wo tano u rhangisa Xikwembu evuton’wini bya ndyangu.

Ku Rhangisa Xikwembu Tanihi Wansati

Loko u ri wansati, u nga rhangisa Xikwembu hi ku pfuneta nuna wa wena entirhweni wa yena tanihi nhloko ya ndyangu. Bibele yi ri: “Vavasati, titsongahateni eka vanuna va n’wina, tanihi leswi swi fanelaka eHosini.” (Vakolosa 3:18, NW) Leswi swi nga nonon’hwa loko wanuna a nga vulavurisani kumbe a loloha ku rhangela evugandzerini bya ndyangu. Ku tshamela ku kombisa swihoxo swakwe kumbe ku tlhandlekela eka swona, ku kanetana na yena, handle ko kanakana swi nga vanga ntshikilelo wa ndyangu.

Swivuriso 14:1 yi ri: “Wansati la tlhariheke u aka yindlu ya yena, kambe wa mihoni wa yi hahlula hi mav̌oko ya yena.” Ndlela yin’wana leyi wansati la tlhariheke hakunene la tekiweke a nga rhangisaka Xikwembu ni ku ‘aka yindlu yakwe’ ha yona, i ku titsongahata eka nuna wakwe. (1 Vakorinto 11:3) Hikwalaho ka ‘nawu wa rirhandzu ra musa lowu nge ririn’wini ra yena,’ u papalata ku xopaxopa nuna wa yena laha swi nga faneriki. (Swivuriso 31:26) Nakambe u tirha ngopfu leswaku a endla swiboho swa nuna swi humelela.

Ndlela yin’wana yo va wansati la tekiweke a rhangisa Xikwembu ha yona i ku va wansati wa migingiriko. Kavula, loko a fanele ku tirha ntirho wo tihanyisa, a nga ha va na nkarhi kumbe matimba lama lavekaka yo hlayisa kaya ra yena hi laha a rhandzaka ha kona. A nga ha lwela ku va la fanaka ni “wansati [la nga ni vuswikoti, NW]” loyi ha yena Bibele yi nge: “O risa yindlu ya yena, a nga dyi v̌uŝa bya v̌ulolo.”—Swivuriso 31:10, 27.

Ku tlula kwalaho, wansati u fanele ku rhangisa vugandzeri bya Xikwembu evuton’wini byakwe. Vo tala lava endzelaka Holo ya Mfumo ya Timbhoni ta Yehova ro sungula, va bumabumela ku basa loku vonakaka eka vana. Ntirho wa wansati i wukulu swinene emhakeni leyi. Kambe u fanele nakambe a tirhela ku hlayisa vumoya byakwe hi ku khongela, ku dyondza ni ku tirhela Xikwembu.

Ku Rhangisa Xikwembu Tanihi Vantshwa

Nhloko-mhaka eka Adolescent Counselor yi ri: “Vana va voyamele eku kuriseni ka malangutelo ni tifilosofi leswi va pfumeleleke ku lawula vatswari va vona. . . . Hi ku va lava paluxekeke eka vandla leri kandziyisaka ni ku dzunisa ntsako ni rifuwo leri vonakaka swa nkarhinyana, vana va kondlo-a-ndzi-dyi va kurisa vonelo ra ‘ndzi swi lava sweswi.’” Loko u ri muntshwa, xana rero i vonelo ra wena?

Vakolosa 3:20 (NW), yi ri: “Vana, yingisani vatswari va n’wina etimhakeni hinkwato, hikuva leswi hi leswi tsakisaka Hosi.” N’wana la langutaka ku yingisa ko tano tanihi loku laviwaka hi Xikwembu u ta tirhisana ni vatswari va yena. Hi xikombiso, a nge va karhati hi ku tihlanganisa ni vanghana va le xikolweni exihundleni lava va nga va laviki, kumbe a ringeta hi mano ku kanganyisa mutswari leswaku a tikumela ndlela ya yena n’wini. (Swivuriso 3:32) Ku ri na sweswo, n’wana un’wana ni un’wana la rhangisaka Xikwembu evuton’wini u ta tinyiketela eka nhlayiso wa rirhandzu wa vatswari.

Rhangisa Xikwembu Minkarhi Hinkwayo!

Ku nga khathariseki leswaku hi ni xikhundla xihi endyangwini, hi fanele ku rhangisa Xikwembu evuton’wini ni ku hlakulela vuxaka lebyi tiyeke na xona. Xana wena ni ndyangu wa wena mi endla tano?

‘Emasikwini lawa ya makumu’ hinkwerhu ka hina hi langutane ni “minkarhi yo nonon’hwa.” (2 Timotiya 3:1-5) Hambi swi ri tano, swa koteka ku hlula hi tlhelo ra moya ivi u pona makumu ya mafambiselo lawa ya swilo. (Matewu 24:3-14) Hi ku famba hi ku pfumelelana ni vutivi lebyi kongomeke bya Bibele, wena ni ndyangu wa wena mi nga va ni ntshembo wa vutomi lebyi nga heriki aparadeyisini emisaveni. (Luka 23:43, NW; Yohane 17:3; Nhlavutelo 21:3, 4) Ina, sweswo swi nga va tano loko u rhangisa Xikwembu evuton’wini bya ndyangu wa wena.

[Nhlamuselo ya le hansi]

[Xifaniso lexi nga eka tluka 5]

Wansati la nga ni vuswikoti wa tlangeriwa swinene

[Xifaniso lexi nga eka tluka 7]

Bibele yi khutaza vavanuna ku rhangela evugandzerini bya ndyangu