Ku Khomeka Swinene Hi Mahungu Lamanene

MUAPOSTOLA Pawulo a a ri exiyin’weni xo nonon’hwa lexi tiviwaka hi Timbhoni ta Yehova leti nga vatirheli va nkarhi hinkwawo—a a kayivela mali. Kutani eKorinto u sungule ntirho wo ka wu nga nyawuli wo endla matende lowu a nga wu dyondza a ha ri muntshwa. Ntirho a wu tika, naswona minkarhi yin’wana mavoko ya yena ma nga ha va ma hume ngati hi ku khoma lapi ro khwaxa ra matende. Mali leyi a yi kuma yi n’wi nyike swakudya ni swiambala ntsena kambe a a eneriseka, hikuva loko ntirho wa yena wo tihanyisa wu herile siku rin’wana ni rin’wana, a a veka switirho swa ntirho wa yena kutani a endla leswi kahle-kahle swi n’wi tiseke eKorinto—a a chumayela mahungu lamanene!—Vafilipiya 4:11, 12.

Hi masiku ya Sabata, Pawulo a a kongoma esinagogeni. I ntiyiso, ro sungula Pawulo u tshinelele vayingiseri va yena va le Korinto a a ri la “tsaneke, ni ku chava, ni ku rhurhumela.” (1 Vakorinto 2:1, 3) Kambe hi ku khutaziwa hi ku hlamula lokunene ka van’wana eka rungula ra yena, Pawulo u yile a ya “hlamulana ni lava a va ri esinagogeni, a ringeta ku khorwisa Vayuda ni Vagriki.”—Mintirho 18:1-4.

Hambi swi ri tano, Pawulo a ta endla leswi antswaka hi nkarhinyana ku tlula ku chumayela swa nkarhinyana. Kutani Silasi na Timotiya va ta va huma hi le Makedoniya va ri ni minyikelo yo tirhandzela yo tala ‘leyi n’wi pfuneke hi leswi a a swi pfumala.’ (2 Vakorinto 11:9; Vafilipiya 4:15) Nakambe, lexi tsakisaka mbilu, a a ku ri timhaka ta leswaku vamakwerhu va le Tesalonika a a va yime va tiyile ku nga khathariseki nxaniso.—1 Vatesalonika 3:6.

Hi byihi vuyelo eka Pawulo? “Pawulo a sungula ku khomeka swinene hi rito [“u nyiketele nkarhi wa yena hinkwawo eku chumayeleni,” The Jerusalem Bible; Today’s English Version] a nyikela vumbhoni eka Vayuda ku kombisa leswaku Yesu i Kriste.” (Mintirho 18:5, NW) Hi ku ntshunxeka swa xinkarhana emintshikilelweni ya swa timali, Pawulo a a nga wisi ku kondza a vuya eku chumayeleni ka nkarhi hinkwawo. A a tlhelela entirhweni wa yena hi ku chivirika ni ku hiseka, hayi ku chumayela eka Vayuda ntsena kambe hambi ku tirhisa nkarhi ku tsala yo sungula ya tiepistola ta yena leti huhuteriweke—papila ro ya eka Vatesalonika!

Xikombiso Xa Hina Namuntlha

Rhekhodo ya ntirho wa matimba wa Pawulo eKorinto yi hlayiseriwe ku khutaza Vakriste hinkwavo ku khomeka swinene hi mahungu lamanene. Pawulo u xiye leswaku Hosi Yesu hi yexe u hundzisele lunghelo lerikulu eka vadyondzisiwa va yena ra ku va “ku vonakala ka misava.” Yesu u va byele leswaku a a va nga fanelanga ku tumbeta ku vonakala loku: “Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” (Matewu 5:14-16) Leswi swi vula ku hlanganyela hi ndlela leyi teleke entirhweni wo chumayela lowu vhumbiweke hi Yesu. (Matewu 24:14; 28:19, 20; Mintirho 1:6-8) Ku chumayela mahungu lawa lamanene ya Mfumo a ku ri xivangelo-nkulu xa ku va kona ka bandlha ra Vukriste.

Vakriste vo sungula, ku fana na Pawulo, va teke ntirho lowu wo chumayela wu ri wa nkoka. Xisweswo, loko valala va Xikwembu va anakanya leswaku va herise ku vonakala ka ntiyiso hi ku dlaya “munyiki wa vutomi” hi tihanyi, valandzeri va yena va ye emahlweni va tirha tanihi ku vonakala ka misava, va chumayela hi ku chivirika. (Mintirho 3:15) Hambi ku ri nxaniso a wu ma herisanga matshalatshala ya vona. Rhekhodo ya Bibele yi ri: “Masiku hinkwawo, a va nga rhuteli ku dyondzisa ni ku twarisa Evhangeli eTempeleni ne mindyangwini ya vanhu, va ku: ‘Mesiya, hi yena Yesu.’” (Mintirho 5:42) Ku hava lexi a xi ta va sivela!

Eminkarhini ya manguva lawa, Vakriste hi ku fanana va khomekile swinene hi ntirho wo nyikela vumbhoni. Ku ya eku heleni ka lembe xidzana ra vu-19, swichudeni leswi hitekaka swa Rito ra Xikwembu swi sungule ku vona xilaveko xo avelana mintiyiso ya Bibele ni van’wana. Zion’s Watch Tower Tract Society—nhlengeletano leyi nga exivonweni xa misava hinkwayo—yi endliwe ya le nawini hi 1884. Swichudeni leswi swa Bibele, leswi tivekaka tanihi Timbhoni ta Yehova ku sukela hi 1931, swi tate misava hi vutivi bya Rito ra Xikwembu hi xiviri. Ntirho wa swona lowukulu wu endle vandla lerikulu ro tiya ro tlula timiliyoni ta mune! Naswona handle ko kanakana nhlayo ya vona yi ta hambeta yi tlakuka ehansi ka nkongomiso wa Yehova.—Esaya 60:22.

Xana Wa Xi Endla Xiphemu Xa Wena?

Yesu u te: “Ntshovelo i wukulu, kambe vatirhi a va talanga.” (Matewu 9:37, 38) Hi 1990 kwalomu ka khume ra timiliyoni ta vanhu va ve kona Exitsundzuxweni xa rifu ra Kriste. Vona ku andza loku hlamarisaka loku humelelaka ka ntshovelo emisaveni hinkwayo! Kambe loko hi ri karhi hi tsakela ku andza loku yaka emahlweni, un’wana ni un’wana u fanele ku tivutisa, ‘xana mina ndzi hlanganyela hi ndlela yihi entirhweni lowu lowukulu? Xana ndzi wu endla nkarhi na nkarhi—vhiki na vhiki loko swi koteka?’

Vakulu va fanele ku rhangela entirhweni lowu va “boxela ntlhambi entila” (1 Petro. 5:3) I ntiyiso, vakulu vo tala va ni mintirho yo tihanyisa. Ku fana na muapostola Pawulo loko a ri eKorinto. Kambe, u veke nkarhi wa ntirho wo chumayela nkarhi na nkarhi etlhelo. Vakulu vo tala namuntlha va khomeke swinene hi mintirho ya moya hi mahelo vhiki. Leswi swi nga va ni vuyelo bya matimba ni lebyi khutazaka eka hinkwavo ebandlheni. Eka tin’hweti tin’wana loko matshalatshala yo hlawuleka ma endliwile, nhlayo ya mabandlha yi va na vahuweleri vo tala entirhweni wa vuphayona. Xihundla hi xihi? Vakulu va rhangela eku chumayeleni ni le ku hleleni ka malunghiselelo ya ntirho wa nsimu.

Malandza ya vutirheli hi ku fanana ma nga va nkucetelo lowunene ebandlheni loko va hlanganyela nkarhi hinkwawo evutirhelini bya nsimu. Tsundzuka, Matsalwa ma lava leswaku va ‘chaviseka, . . . va rhangela hi ndlela leyinene.’ (1 Timotiya 3:8, 13) Ku tshembeka entirhweni wa nsimu swa laveka eka makwerhu wa xinuna leswaku a faneleka tanihi nkulu kumbe nandza wa vutirheli.—Tito 1:8, 9.

Tanihi Pawulo, van’wana va swi kota ku endla switsongo entirhweni wo tihanyisa kutani xisweswo va phayona. Malembe ya khume lama hundzeke ntsena, nhlayo ya maphayona ya nkarhi hinkwawo, yo pfuna ni layo hlawuleka yi tlakuke ku suka eka 137 861 ku ya eka 536 508 hi 1990. Entiyisweni, i mikateko ni ku pfumeleriwa hi Yehova leswi nga tisa leswi. Hambi swi ri tano, maphayona, ma fanele ku va ni vukheta leswaku ma tirhisa nkarhi hi vutlhari, hayi ku chumayela tiawara to tala ntsena leswaku va va ni xiviko lexinene. Maphayona, xana mi lunghekile, ma humelela evutirhelini? Xana ma tikarhata leswaku mi endla nhluvuko lowu yaka emahlweni leswaku vutirheli bya n’wina byi va lebyi tswalaka mihandzu hakunene?

Tihakelo Ta Vutirheli Lebyi Ringaniseriweke

Xana wa ri tlangela rungula leri tiyisaka vutomi leri humesiwaka n’hweti yin’wana ni yin’wana eka Xihondzo xo Rindza ni munghana wa xona, Awake!? Handle ko kanakana wa ri tlangela. Xana ku tlangela ka wena ku ku susumeterile leswaku u hlanganyela eku hangalaseni ka timagazini leti? Makwerhu un’wana wa xisati eBotswana u endla tano. Eku sunguleni a a ala ntiyiso, kambe nuna wa yena a n’wi hlayela timagazini. Endzhaku ka nkarhinyana u hundzule mbilu ya yena kutani a hundzuka Mbhoni. Hambi leswi a nga swi kotiki ku hlaya wa humelela eku fambiseni ka timagazini, hi ku vula leswi: “A ndzi swi koti ku hlaya, kambe nuna wa mina u ndzi hlayela timagazini leti. Ndza ti tsakela, naswona ndza tshemba leswaku na wena u ta titsakela.”

Hikwalaho ka yini u nga hlanganyeli vhiki na vhiki entirhweni lowu wa ku ponisa vutomi? Hi ku hatlisa endzhaku ka loko u kume timfanelo ta moya, bandlha ra Vukriste ri ta tsakela ku ku pfuna leswaku u sungula. Hambi swi ri tano, ku fambisa timagazini ko va xivumbeko xin’wana xa ntirho. Un’wana ni un’wana loyi a khomekeke swinene hi mahungu lamanene u endla matshalatshala yo va ni vutirheli lebyi ringaniseriweke. Hi xikombiso, Sosayiti ya Watch Tower yi humesa timiliyoni ta tibuku to tsindziyela, naswona leti ti nyikeriwa eka vanhu tanihi xihlovo xa nkarhi hinkwawo xa swakudya leswinene swa moya. Xana u hundzuke la nga ni ntokoto lowu aneleke evutirhelini bya wena leswaku u fambisa tibuku, tanihi leyi nge U Nga Hanya Hi Masiku aParadeyisini eMisaveni?

Ku vuriwa yini hi vanhu lava kombisaka ku tsakela? Xana u hlayisa tirhekhodo letinene leswaku u ta endla maendzo yo vuyela eka vona? Maendzo wolawo ma nga yisa eka xivumbeko xa ntirho lexi tisaka ntsako lowukulu eka hinkwavo—ntirho wa dyondzo ya le kaya ya Bibele. Tsundzuka, Yesu eka Matewu 28:19, 20 u hi lerise ku ‘endla vadyondzisiwa ni ku va khuvula.’ Sweswo swi vula ku dyondza na vona Bibele. I ntiyiso, hakanyingi ku sungula dyondzo swi lava matshalatshala lamakulu. Mbhoni yin’wana yi hlangane ni mpatswa lowu kuleke lowu pfumeleke dyondzo ya le kaya ya Bibele hi mbilu hinkwayo. Kambe va tlherisele dyondzo endzhaku mavhiki manharhu hi ku landzelelana. Eku heteleleni dyondzo yi sunguriwile. Kutani, ku ringana nkarhinyana, mpatswa wu sivele dyondzo kwalomu ka vhiki rin’wana ni rin’wana. Hambi swi ri tano, eku heteleleni, wansati u ye emahlweni ku fika eyinhleni ya nkhuvulo. “Endzhaku ko khuvuriwa,” makwerhu wa tsundzuka, “mahlo ya yena a ma tele hi mihloti ya ntsako, leyi tiseke mihloti ya ntsako eka mina ni nsati wa mina.” Ina, hi ku va lava khomekeke swinene hi mahungu lamanene swi tisa ntsako lowu nga hlamuselekiki!

Tiendle La Kumekaka!

Yesu Kriste na muapostola Pawulo va hi vekele swikombiso leswinene swa ku tinyiketela leswaku hi swi tekelela. Naswona hi ni swikombiso swo tala leswinene exikarhi ka Timbhoni ta Yehova eminkarhini ya manguva lawa. Nkarhi hi wona eka hinkwavo lava tivaka mahungu lamanene leswaku va chivirika hi ku helela va ma endla ma tiveka eka van’wana. Bibele ya hi tiyisekisa leswaku ntirho wo tano hinkwawo a wu “nga weli ehansi.”—1 Vakorinto 15:58.

Ku fana na Pawulo, vo tala va ni mindzhwalo ya swa timali leyi va faneleke ku hlangavetana na yona. Hikwalaho ka leswi, vo tala va nga ha tsandzeka ku phayona. Kambe hi mpfuno wa Yehova, hinkwavo va nga landzelela xitsundzuxo lexinene lexi nyikeriweke eka Varhoma 12:11: “Ku chivirika ka n’wina ku nga vohli, kambe mi va ni ku hiseka emoyeni, mi tirhela [Yehova].” Naswona loko swiyimo swi cinca swi pfumelela leswaku nkarhi lowu engetelekeke wu tirhisiwa entirhweni wa Yehova, un’wana ni un’wana la rhandzaka Yehova ni ntiyiso u ta tirhisa nkarhi, tanihi Pawulo. Vana la khomekeke swinene hi mahungu lamanene! Ku endla tano a swi nge tisi mikateko sweswi ntsena kambe enkarhini lowu taka swi ta va vutomi lebyi nga heriki ni ntsako lowu nga heriki!—Matewu 19:28, 29.