“Khomeka Ngopfu” eVutirhelini Bya Wena

¹ Loko hi hlaya hi ta ntirho wa muapostola Pawulo wa ku endla mintsonga loko a ri eKorinto, hi nga ha gimeta hi ku vula leswaku ntirho lowu a wu kavanyeta nkarhi wa yena wa ku chumayela. Kambe, Mintirho 18:5 yi ri: ‘Pawulo u khomeke ngopfu hi rito, a nyikela vumbhoni eka Vayuda ku tiyisekisa leswaku Yesu i Kreste.’ Hikwalaho ka yini Pawulo a a khomeke swonghasi hi ntirho wa ku chumayela? Hambileswi vanhu vo tala se a va ri vapfumeri eKorinto, Hosi yi tiyisekisile leswaku a ka ha ri ni vanhu vo tala lava a va ta va vadyondzisiwa emutini wolowo. (Mint. 18:8-11) Xana hi ni xivangelo lexi fanaka xa leswaku hi khomeka ngopfu evutirhelini bya hina? Ina. Ka ha ri ni vanhu vo tala lava nga kumiwaka kutani va dyondzisiwa ntiyiso.

² Heta Nkarhi Lowu Engetelekeke eVutirhelini Hi April: Swi nga ha endleka leswaku u tivekele pakani ya ku tshama u khomekile entirhweni wa ku chumayela mahungu lamanene n’hweti yin’wana ni yin’wana. Kambe ku ni tin’hweti tin’wana leti hi ku hlawuleka ti hi nyikaka nkarhi lowu engetelekeke leswaku hi “khomeka ngopfu” entirhweni lowu. Ti katsa n’hweti ya April, leyi hi ku hlawuleka yi nga nguva ya Xitsundzuxo. Xana swiyimo swa wena swa ku pfumelela leswaku u va phayona ra nkarhinyana kumbe leswaku u endla matshalatshala lama engetelekeke evutirhelini? Vahuweleri vo tala lava endleke tano va kume mikateko leyi fuweke. (2 Kor. 9:6) Loko u endla hinkwaswo leswi nga emandleni ya wena, tsundzuka leswaku Yehovha u tsakisiwa hi ntirho wa wena wa mbilu hinkwayo. (Luka 21:2-4) Ku nga khathariseki leswaku hi swihi swiyimo swa wena, tivekele pakani ya ku “khomeka ngopfu” evutirhelini bya wena hi April. Naswona u nga rivali ku tisa xiviko xa wena xa ntirho wa nsimu eka mufambisi wa wena wa dyondzo ya buku eku heleni ka n’hweti, leswaku matshalatshala ya wena ma ta katsiwa ni ya vanhu van’wana va Yehovha.

³ Endzela Vanhu Lavantshwa Lava A Va Tile eXitsundzuxweni: N’wexemu, EAfrika Dzonga ni le matikweni ya vaakelani, lama languteriwaka hi rhavi ra ka hina, a ku ri ni vanhu va 187 588 eXitsundzuxweni. A swi si tiveka leswaku i vangani lava veke kona exitsundzuxweni nan’waka. Kambe, swiviko swi kombisa leswaku swi nga koteka ku va ni “ntshovelo” lowukulu. (Mat. 9:37, 38) Hikwalaho, hi ku hatlisa hilaha u nga kotaka hakona, lunghiselela ku endzela vanhu lavantshwa lava veke kona eXitsundzuxweni, leswaku u va pfuna hi tlhelo ra moya. Ku hlwela ku endzela vanhu volavo swi nga pfulela ‘lowo homboloka leswaku a tsuvula rito ra mfumo leri byariweke etimbilwini ta vona.’ (Mat. 13:19) Ku endza hi xihatla ku ta kombisa leswaku hakunene u ‘khomeke ngopfu’ evutirhelini bya wena.

⁴ Hambeta U Pfuna Lava Holeke: Hi February ku sunguriwe tsima ro hlawuleka ra ku pfuna lava holeke. Loko ka ha ri ni lava va nga si kumaka riendzo ra vurisi, vakulu va ta endla lunghiselelo ra ku va endzela n’hweti ya April ya ha ri eku sunguleni. Vakulu va ta lwela ku vona xiphiqo xa munhu yoloye ni ndlela yo antswa leyi a nga pfuniwaka ha yona leswaku a tlhela a hisekela ku tirhela Yehovha. Mpfuno lowu wa rirhandzu wu kombisa leswaku vakulu va byi tekela enhlokweni vutihlamuleri bya vona bya ku risa “ntlhambi wa Xikwembu.” (1 Pet. 5:2; Mint. 20:28) Nkandziyiso wa Xihondzo xo Rindza wa September 15, 1993, matluka 22-3, wu nyika swiringanyeto leswinene leswi vakulu va nga swi tirhisaka loko va bula hi swiphiqo swo hlawuleka swa ntlhanu, leswi khumbaka vanhu lava holeke. Kunene, van’wana va nga pfuniwa ku tlhela va hisekela vutirheli hi April.

⁵ Pfuna Vanhu Lava Engetelekeke Leswaku Va Va Vahuweleri Lava Nga Khuvuriwangiki: Xana vana va wena se i vahuweleri va mahungu lamanene? Ku vuriwa yini hi lava u dyondzaka Bibele na vona? Loko vakulu va kuma leswaku va faneleka, xana April a yi nge vi n’hweti leyinene eka vona leswaku va sungula ku chumayela? Loko munhu a endla nhluvuko naswona a yi dyondzile broxara leyi nge Leswi Xi Swi Languteleke ni buku leyi nge Vutivi, dyondzo ya Bibele yi nga ha yisiwa emahlweni hi buku ya vumbirhi—ku nga ha va hi buku leyi nge Rito Ra Xikwembu, Ku Rhula Ka Ntiyiso, kumbe leyi nge Vun’we eVugandzerini. Pakani ya wena i ku pfuna xichudeni xi va ni vutivi lebyikulu bya ntiyiso, xi faneleka ku va muhuweleri la nga khuvuriwangiki ni ku va Mbhoni ya Yehovha leyi tinyiketeleke yi tlhela yi khuvuriwa.—Efe. 3:17-19; 1 Tim. 1:12; 1 Pet. 3:21.

⁶ Ku phikelela ka wena ni ku tsakela swichudeni swa wena swa Bibele hi xiviri, ku nga swi pfuna leswaku eku heteleleni swi endla ntiyiso wu va wa swona. Mbhoni yin’wana yi hlangane ni vatekani van’wana lava kuleke, lava swi amukeleke hi mandla mambirhi ku dyondzeriwa Bibele. Kambe vatekani lava va hete mavhiki manharhu hi ku landzelelana va ri karhi va tlherisela dyondzo ya Bibele endzhaku. Eku heteleleni dyondzo yi sunguriwile. Kambe hi vhiki rin’wana ni rin’wana ra vumbirhi, vatekani lava a va vula leswaku a swi nge koteki leswaku va dyondza. Kambe, eku heteleleni, nsati wa kona u endle nhluvuko kukondza a khuvuriwa. Makwerhu loyi u ri: “Endzhaku ka loko wansati loyi a khuvuriwile, u khavaxele mihloti ya ntsako, ku nga leswi endleke leswaku mina ni nkatanga hi huma mihloti ya ntsako.” Ina, ku “khomeka ngopfu” hi ku chumayela mahungu lamanene swi tisa ntsako lowukulu!

⁷ Vuprofeta bya Bibele ni swiendlakalo swa misava swi kombisa leswaku hi hanya ekusuhi ni ku hela ka minkarhi ya makumu. Lowu hi wona nkarhi lowu vanhu va Xikwembu va faneleke va “khomeka ngopfu” hi ku tivisa van’wana mahungu lamanene. Muapostola Pawulo wa hi tiyisekisa leswaku hakunene ntirho wolowo “a hi wa hava eHosini.”—1 Kor. 15:58.