Xana I Vutirheli Bya Wena?

YEHOVA u kombise ku hanana ka yena hi ku lunghiselela misava hi ku hetiseka leswaku hi tsakela vutomi. Hi ku hanana u tshike malunghiselelo lawa ma va kona hambi endzhaku ka loko Adamu na Evha va xandzukile. Ku tlula kwalaho, u kombise rirhandzu ra yena lerikulu hi ku rhumela N’wana wakwe ku ta kutsula vanhu lava pfumelaka, ekhombyeni ra xidyoho.—Matewu 5:45; Yohane 3:16.

Hi nga hlamula njhani eka rirhandzu ro tano? Yesu u vule leswaku hi fanele hi rhandza Yehova Xikwembu xa hina hi mbilu, moya-xiviri, mianakanyo ni matimba ya hina hinkwawo. Leswi swi kombisa leswaku hi fanele hi n’wi gandzela ni ku tshembeka eka yena ni leswaku hi fanele hi hanya vutomi bya hina hi ku pfumelelana ni ku rhandza ka yena.—Marka 12:30; 1 Petro 4:2.

Kambe i yini leswi katsekaka eku endleni ka ku rhandza ka Xikwembu? Xana wu kona ntirho lowu hi nga n’wi endlelaka wona—vutirheli lebyi hi faneleke hi hlanganyela eka byona?

Xilaveko Xa Vatirheli

Tikereke ti pfilunganye vanhu va nga tivi leswaku hi yihi ndlela yo gandzela ni ku tirhela Xikwembu. Hambi swi ri tano, Bibele yi kombisa leswaku ku na vukhongeri byin’we ntsena bya ntiyiso, “ku ni Hosi yin’we, ni ku pfumela kun’we, ni nkhuvulo wun’we; ku ni Xikwembu xin’we, Tata wa vanhu hinkwavo.” Yesu u te: “Vagandzeri va xiviri va . . . ta gandzela Tatana hi moya ni ntiyiso.” Hikwalaho va tsundzuxiwaka: “Twananani hinkwenu eku vulavuleni. Ku nga tshuki ku va ni ku avana exikarhi ka n’wina.”—Vaefesa 4:3-6; Yohane 4:23; 1 Vakorinto 1:10.

Mpfilumpfilu wa leswaku vukhongeri bya ntiyiso hi byihi wu sungule aEdeni loko Sathana a tlhotlhe ku faneleka ka vuhosi bya Yehova hi ku nga yi tshembi ndlela ya Xikwembu yo fuma. (Genesa 3:1-6, 13) Sweswi Sathana u tiyisa ku kanetiwa loku ka Xikwembu hi tidyondzo ta mavunwa leti hangalasiwaka hi vafundhisi va vukhongeri lava kanganyisaka lava “tiendla[ka] onge i malandza ya leswo lulama.” Kutani Bibele yi ri: “Varhandziwa, mi nga pfumeleni moya wihi na wihi . . . hikuva vaprofeta va mavunwa va hangalakile ni misava.”—2 Vakorinto 11:14, 15; 1 Yohane 4:1.

Lexi tsakisaka, Xikwembu xi teke magoza yo lulamisa mphikamakaneta leyi ya vulawuri. Hi ku rhumela N’wana wa xona ku ta kutsula vanhu, sweswi xi endle Yesu a va Hosi ya Mfumo wa Xikwembu wa le matilweni, a ri ni matimba yo lovisa Sathana ni vaprofeta kumbe vatirheli vakwe. Leswi swi ta tiyisekisa leswaku ku rhandza ka Xikwembu ku endliwa emisaveni, leswaku ku katekisiwa vanhu lava yingisaka hi laha ku nga heriki.—Daniel 7:13, 14; Vaheveru 2:9.

Sathana u pfale mintiyiso leyi. (2 Vakorinto 4:4) Xisweswo, ku na xilaveko xa leswaku hi tirha tanihi vatirheli va Xikwembu, hi paluxa mavunwa ya Sathana ni ku nyikela vumbhoni bya ntiyiso. Yehova a nga hi susumeteli entirhweni lowu. Tanihi Yesu, u lava leswaku hi tinyikela hi ku swi rhandza hi ku tsakela yena ni leswi a hi endleleke swona.—Psalma 110:3; Vaheveru 12:1-3.

Vutirheli Bya Vukriste

Yesu “a famba hi miti ni swimitana a ri karhi a [chumayela, NW], a twarisa Evhangeli ya Mfumo wa Xikwembu.” (Luka 8:1) Nakambe u letele vadyondzisiwa va yena ku va vatirheli vo fana na yena ni ku va rhuma va ya chumayela. (Matewu 10:1-14, 27) Endzhakunyana, u va lerise leswaku va yisa vutirheli emahlweni ku ya fika emakun’wini ya misava.—Matewu 28:19, 20; Mintirho 1:8.

Ntirho lowu wu le mavokweni ya Vakriste va ntiyiso, naswona moya wa Xikwembu wu va susumeta leswaku va chumayela. Hi laha swi humeleleke ha kona eka Pentekosta ya 33 C.E., hinkwavo lava amukelaka mahungu lamanene va byarha vutihlamuleri byo twarisa ripfumelo ra vona erivaleni.—Mintirho 2:1-4, 16-21; Varhoma 10:9, 13-15.

Hambi swi ri tano, vanhu vo tala a va swi lavi ku va vatirheli. Peter, un’wana wa Timbhoni ta Yehova, u ri: “Vanhu le Jarimani hakanyingi va swi teka swi nga va faneli ku vulavula hi vukhongeri. Va vula leswaku ‘sweswo i swa ku endliwa hi vafundhisi.’” Hi ku ya hi Tony, la nga murhumiwa hi makume ya malembe, vanhu eNghilandi va te: “Leswi u swi vulaka i swinene, naswona ndzi anakanya leswaku Timbhoni ta Yehova i vanhu lavanene. Kambe ku nghena hi muti na muti ndzi chumayela—swona ndzi nga ka ndzi nga swi endli.” Ben u dyondze Bibele nkarhinyana ni munhu wa le Nigeria loyi a nga te eka yena: “A ndzi nge humi ndzi chumayela erivaleni hi yindlu na yindlu; kambe ndzi nga nyikela mali ebandlheni ra n’wina ku pfuna lava tsakelaka ku endla sweswo.” Ina, vanhu vo tala va kayivela ripfumelo ni ntshembo lowu lavekaka wa vutirheli bya Vukriste.

Hambi swi ri tano, ku chumayela erivaleni i vutihlamuleri bya hinkwavo lava nga ebandlheni ra Vukriste, ku nga khathariseki malembe kumbe rimbewu. A hi bya vakulu ni malandza ya vutirheli ntsena, lava ‘rhangelaka,’ kambe ni Vakriste hinkwavo i bya vona. Hinkwavo va khutaziwa: “A hi humeseni hi masiku eka Xikwembu ha Yesu, emagandzelo ya ku dzunisa, yi nga mihandzu ya milomu leyi vulaka vito ra yena. . . . Yingisani varisi va n’wina, mi tiveka ehansi ka vona.”—Vaheveru 13:15, 17, BX.

Loko a vulavula ni ntshungu lowu hlanganeke eDyondzweni ya yena ya le Ntshaveni, Yesu u te: “A hi hinkwavo lava nge ka mina: ‘Hosi, Hosi’ lava nga ta nghena eMfun’weni wa matilo, kambe ku ta nghena la endlaka ku rhandza ka Tata wa mina la nge matilweni.” Eka xiendlakalo xin’wana u kombise leswaku ku endla ku rhandza ka Xikwembu swi katsa ku chumayela eka lava nga riki vapfumeri. Vadyondzisiwa va yena a va n’wi khutaza leswaku a tshika ku chumayela eka Vasamariya vo karhi leswaku a ya dya, kambe u te: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene.”—Matewu 7:21; Yohane 4:27-38.

Xana Byi Fanele Byi Va Ntirho-vutomi Wa Wena?

Hakanyingi vanhu va hlawula ku landzelela swakudya ni rifuwo ra nyama. Kambe eku sunguleni eDyondzweni ya le Ntshaveni, Yesu u tshinye vayingiseri va yena hi ku landzelela swilo swo tano hi ku hiseka. U te: “Kambe tihlengeleteleni xuma etilweni . . . rhangani mi tilavela Mfumo . . . ni ku lulama ka [Xikwembu].”—Matewu 6:20, 33.

Ku lava Mfumo ku sungula swi vula leswaku hi nga pfumeleli swilaveko swin’wana swi sivela vutirheli bya hina. Hambi swi ri tano, ku endla leswi a swi vuli ku papalata xin’wana ni xin’wana. Hi xikombiso, Bibele yi hi khutaza leswaku hi nga honisi mindzhwalo ya xiviri ya ndyangu. Hi rhwala mindzhwalo yo tano ku fana ni vanhu hinkwavo. Ku yi honisa i ku endla hi ndlela leyi lwisanaka ni ripfumelo ra Vukriste. (1 Timotiya 5:8) Hambi swi ri tano, hi fanele hi endla hinkwaswo leswi hi nga swi kotaka evutirhelini hi ri karhi hi tamela vutihlamuleri byin’wana hi ndlela yo ringanisela.

Yesu u te: “Evhangeli leyi ya Mfumo yi ta twarisiwa . . . leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Mongo wa vuprofeta byebyo wu hetiseka esikwini ra hina. Ku sukela hi 1914 mahungu lamanene i ya leswaku Mfumo wu nyikiwa matimba yo lwela vuhosi bya Yehova ni ku lwisana na Sathana ni misava yakwe. (Nhlavutelo 11:15-18) Hi fanele hi anakanyisisa swinene hi nhlamuselo ya leswi. Makumu ma ta fika, naswona hi fanele hi heta ntirho wo chumayela ma nga si fika. Vutomi byi le khombyeni; hi nga pfuna ku ponisa byo tala.

Fanelekela Vutirheli Byo Tala

Vo tala va Timbhoni ta Yehova va nyikela tiawara ta khume kumbe ku tlula n’hweti yin’wana ni yin’wana leswaku va avelana ni van’wana mahungu lamanene. Magidi ma heta tiawara timbirhi kumbe ku tlula hi siku ma chumayela tanihi maphayona ya nkarhinyana, naswona van’wana va tirha nkarhi na nkarhi tanihi maphayona ya nkarhi hinkwawo ni yo hlawuleka. Va twisisa xihatla xa ntirho lowu naswona va lava ku va ni xiphemu xo tala hi laha swi kotekaka ha kona leswaku wu hetiwa makumu ya misava leyi yi nga tsakangiki ma nga si fika.

Xana u yona Mbhoni ya Yehova leyi hisekaka? Kutani ke fanelekela xiphemu xo tala entirhweni. Antswisa vutshila bya wena eku chumayeleni ni le ku dyondziseni, u ringeta ku hetisisa swo tala evutirhelini. Loko u ri exiyin’weni xo va phayona, endla tano. Loko swiyimo swa wena swi nga ku pfumeleli ku endla tano nikatsongo, khutaza lava va nga swi kotaka leswaku va fanelekela ntirho lowu.

Loko u nga ri Mbhoni ya Yehova leyi tinyiketeleke, u nga vuli leswaku vutirheli a hi bya wena. Munhu un’wana la vuriwaka Peter, munjhiniyara wa muchini, u ale hi matimba leswaku nsati wa yena a avelana ni van’wana mahungu lamanene. A a vutisa: “Ndzi nga n’wi tshikisa ku yini nsati wa mina a chumayela hi yindlu na yindlu?” Endzhaku ka malembenyana, loko a xiya ku yima ka yena a tiyile malunghana ni ntiyiso wa Rito ra Xikwembu, na yena u kunguhate ku dyondza Bibele. Sweswi, ku fana ni nsati wa yena, i mutirheli wa mahungu lamanene la tinyiketeleke, la khuvuriweke.

Kutani ke u nga titsoni lunghelo ro tirhela Yehova. Hi ku khutaza leswaku u dyondza Bibele ni ku hlanganyela ni Vakriste va ntiyiso eminhlanganweni ya vona. Leswi swi ta ku pfuna leswaku u aka vutomi bya wena hi ku pfumelelana ni vunene bya Xikwembu ni ku aka ripfumelo leri tiyeke eka swikongomelo swa xona. Loko u endla nhluvuko eka leswi, na wena u ta fanelekela ku va mutirheli wa Xikwembu. Kutani u ta kuma lunghelo ro hlanganyela eku yiseni ka xileriso lexi xa Yesu emahlweni: “Hikwalaho, yanani . . . mi va endla vadyondzisiwa . . . mi va dyondzisa ku hlayisa hinkwaswo leswi ndzi mi leriseke swona.”—Matewu 28:19, 20.

Ina, ku na vutirheli lebyi u nga ha hlanganyelaka eka byona, naswona i swa xihatla swinene leswaku u endla tano ku tlula rini na rini.

[Bokisi leri nga eka tluka 25]

Muongori la khathalaleka ndyangu u ri: “Siku rin’wana ni rin’wana ndzi famba ku tlula awara ku ya exibedlhele laha ndzi tirhaka kona, kutani ndzi anakanye leswaku a ndzi nge swi koti ku phayona nkarhinyana. Kambe ndzi hlele mintirho ya mina hi vukheta leswaku ndzi hlanganyela entirhweni wa nsimu mixo wun’wana ni wun’wana ndzi nga si ya entirhweni, hi minkarhi yo wisa, na hi masiku lawa ndzi nga tirhiki. U nga anakanya ntsako wa mina loko, eku heleni ka n’hweti yin’we, ndzi hete tiawara ta 117 eku chumayeleni! Ndzi fambise timagazini ta 263, swikhokhelo swa timagazini swa 22 naswona ndzi swi kotile ku sungula tidyondzo tinharhu ta Bibele.”

[Bokisi leri nga eka tluka 27]

Michael u na vana lavatsongo va nkombo, naswona u na ntirho wa vutihlamuleri ekholichini ya le Nigeria. Nakambe i nkulu ebandlheni ra Vukriste. U phofula langutelo leri magidi ya Timbhoni ma nga na rona:

“Vutirheli ndzi byi languta tanihi ntirho-vutomi wa mina naswona nkarhi hinkwawo ndzi tsundzuka leswi Pawulo a swi vuleke: ‘Ndzi byarile, Apolosi u cheletile, kambe Xikwembu xi hambete xi swi kurisa.’ Mina ni nsati wa mina hi ‘byala’ hi ku bula nkarhi wo koma hi mahungu lamanene hi yindlu na yindlu. Hi ‘cheleta’ hi ku tlhelela eka lava va tsakelaka leswaku hi va dyondzisa leswi humaka eBibeleni, tanihi leswi Yesu a vuleke leswaku hi fanele hi endla tano. Tidyondzo ta le kaya ta Bibele ta vhiki na vhiki ti pfune vanhu vo tala—kun’wana ti pfune mindyangu hinkwayo—leswaku yi kuma vutivi bya ntiyiso.”