Xiviko Xa Vahuweleri Va Mfumo

Va Khorwisiwa Le Kathmandu

MUMPFAMPFARHUTI u sungule ku lava ntiyiso eBrittany, le Furwa, hi 1980. U burisane ni Vapentekosta, a dyondza vukhongeri bya le Vuxeni—kambe a nga aneriseki. Kutani u ve na mimbulavurisano yo karhi na un’wana wa Timbhoni ta Yehova kambe hi ku hatlisa a tshika. U hlangane ni mumpfampfarhuti un’wana kutani a sungula ku tirha ni ku tshama na yena.

Endzhakunyana ka leswi, mpatswa lowu wu nga tekanangiki wu kunguhate ku endzela le Nepal. A va tsakisiwe swinene hi ku xonga na ku rhula ka tiko rolero kambe va karhatiwe hi fambiselo ra ku tshama ka vanhu hi mintlawa leswi a swi vonaka swi ri ku pfumaleka ka vululami hi vonelo ra vona ra le Vupela-dyambu.

Endzhaku ko tlhelela le Furwa, wansati u ringanyete eka munghana wa yena leswaku va dyondza Bibele swin’we, naswona lexi n’wi hlamariseke, u pfumerile. Va hlangane na Mbhoni leyi yi tshameke yi bula na yena malembe mambirhi lama hundzeke. Eku sunguleni va tirhise Bibele ntsena, kambe eku heteleleni va pfumerile ku tirhisa buku leyi nge Ntiyiso Lowu Yisaka eVuton’wini Lebyi Nga Heriki kutani endzhaku buku leyi nge U Nga Hanya Hi Masiku aParadeyisini eMisaveni. Ku nga si hela lembe va tshike ku tirhisa swidzidzirisi.

Endzhaku ko endzela le Nepal nakambe ku ringana tin’hweti timbirhi, mpatswa wu tlhelele eFurwa laha wu yeke emahlweni wu dyondza. Va tshike ku dzaha ni ku ya etibarheni ni le ka swihungasi swa vusiku, kutani va sungula ku va kona eka minhlangano ya Timbhoni ta Yehova. Hambi swi ri tano, loko va heta buku leyi nge Hanya Hi Masiku, va kunguhate ku tshika ku dyondza.

Nakambe va ye le Nepal, laha va nga tshama exiyindlwanini ehansi ka Tintshava ta Himalaya. Siku rin’wana mukhalabye, la ambaleke sudu na thayi, a gogondza enyangweni wa vona. Wansati a a ri yexe endlwini, kutani a anakanya leswaku u fanele a ri muxavisi wa swifaniso kutani a a tela ku ta vona swifaniso swa vona. Lexi n’wi hlamariseke a a ri Mbhoni, a a rhumiwe hi munhu loyi a a dyondza na vona eFurwa. Hi ku hatlisa munghana wa yena u vuyile ekaya, kutani bulo ra tiawara timbirhi ri landzerile.

Masiku ma nga ri mangani endzhaku, mpatswa wu ye enhlanganweni wa Timbhoni ta Yehova le Kathmandu naswona a wu khumbekile swinene hi ku vona ndlela leyi lava va nga kona va baseke ha yona. Va xiye rirhandzu ra vumakwerhu na ntsako wo fana ni lowu va wu voneke eminhlanganweni le Furwa. Nakambe va xiye ku twanana ka vanhu va le Nepal lava a va ri kwalaho, hambi leswi a va huma eka mintlawa yo hambana-hambana. Sweswi a va khorwisekile leswaku leyi ku fanele ku ri nhlengeletano ya Yehova.

Endzhaku ka n’hweti va tlhelele eFurwa kutani hi ku hatlisa va pfuxeta dyondzo ya vona ya Bibele ni ku hlanganyela ka vona minhlangano. Va tekanile, va sungula ku hlanganyela entirhweni wo nyikela vumbhoni, kutani eku heteleleni va khuvuriwile. Wanuna wa kona sweswi i nandza wa vutirheli, naswona nsati nkarhi na nkarhi u hlanganyela entirhweni wa vuphayona byo pfuna. Entiyisweni, lava va nga na xiyimo lexinene xa mbilu moya wa Yehova wu ta va pfuna ku endla nhluvuko kutani va hundzuka vagandzeri va yena.—Nhlavutelo 7:15-17.

[Bokisi/Mepe lowu nga eka tluka 9]

NEPAL

Vaaki - 17 712 221

Nhlohlorhi Ya Vahuweleri Ya 1990 - 63

Mpimanyeto, Muhuweleri un’we eka - 281 146

Avhareji Ya Vahuweleri Va Maphayona - 10

Nhlayo Ya Mabandlha - 1

Avhareji Ya Tidyondzo Ta Bibele - 107

Lava Veke Kona eXitsundzuxweni - 220

[Mepe]

(Leswaku u vona rungula leri hleriweke hi ku helela, vona nkandziyiso wa kona)

NEPAL

INDIA

[Xifaniso lexi nga eka tluka 9]

Ndhawu ya le makete le Kathmandu, Nepal