Swiendlakalo-nkulu swa n’wexemu

“NDZI ta dzunisa Yehovha loko ndza ha hanya. Ndzi ta yimbelelela Xikwembu xanga miloti loko ntsena ndza ha ri kona.” (Ps. 146:2) Mupisalema a a ta tsaka ngopfu loko o vona ndlela leyi Yehovha a dzunisiwaka ha yona namuntlha! Buku leyi nge Xana Bibele Yi Dyondzisa Yini Hakunene? yi hoxa xandla eku dzuniseni koloko hikuva yi fikelela timbilu ta vanhu vo tala lava lavaka ku tiva ntiyiso hi Xikwembu.—Mint. 17:27.

Leswaku Yehovha a ya emahlweni a dzunisiwa, marhavi yo tala ma endle malunghiselelo ya leswaku ku va ni titlilasi to dyondza tindzimi timbe, leswaku vahuweleri ni maphayona va kota ku fikelela vanhu lava engetelekeke va va byela mahungu lamanene. Kumbexana na wena u nga navela ku ndlandlamuxa ntirho wa wena wo chumayela hi ku dyondza ririmi rin’wana.

Xikombiso xin’wana xa ku dzunisa loku yisiwaka eka Yehovha a ku ri tsima ra mavhiki manharhu leri endliweke emisaveni hinkwayo, ro hangalasa xiphephana xo hlawuleka xo tivisa hi ta Mintsombano ya Muganga leyi nge “Nkutsulo Wu Tshinele!” leyi khomiweke ematikweni ya 155. Vahuweleri va Mfumo va timiliyoni emavandlheni yo tlula 99 000 va hlanganyele etsimeni leri, leri nga ro sungula ku endliwa. Xirho xin’wana xa Komiti ya Ntsombano xi tsale xi ku: “Tsima leri ri susumete vanhu van’wana lava ha ku sungulaka ku chumayela ni van’wana lava a va horile leswaku va tlhela va hisekela ntirho wo chumayela.” Makwerhu un’wana loyi ku hundzeke malembe ya 35 a horile, u kume xiphephana enyangweni wa yindlu yakwe kutani ku sukela hi nkarhi wolowo a nga si tshama a xwa eminhlanganweni. Hi leyi yin’wana ya mintokoto leyi khumbaka tsima leri, leyi humaka emarhavini yo hambana-hambana.

Furwa

Loko wansati un’wana wa Mukhatoliki ni nuna wa yena va endzele xaka ra vona, va vone xiphephana ekaya ra xaka rero kutani va tsakela xivutiso lexi vutisiwaka eka xona. Va ye entsombanweni swin’we ni vana va vona vanharhu. Loko va fika, murindzi u va xewetile, a va nyika Tibibele kutani a va tshamisa ekusuhi ni ndyangu lowu nga Timbhoni, lowu tshamaka mpfhuka wa tikhilomitara tinharhu ekusuhi ni le kaya ra vona! Mindyangu leyi yi hete siku hinkwaro swin’we kutani ndyangu lowa Timbhoni wu endla lunghiselelo ro fambisela lowun’wana dyondzo ya Bibele. Endzhaku ka loko ku hele vhiki ntsombano wu herile, ndyangu lowu tsakelaka wu ve kona enhlanganweni loko vandlha ri endzeriwe hi mulanguteri wa xifundzha.

Indiya

Muhungasi la dumeke la vuriwaka Sunita u ye eCanada leswaku a ya hungasa vanhu. Timbhoni leti hlanganeke na yena kwalaho ti n’wi rhambele enhlanganweni wa Xipunjabi. U xi amukele hi mandla mambirhi xirhambo xexo a tlhela a tiphina enhlanganweni wolowo, ngopfu-ngopfu leswi Bibele a yi tirhisiwa swinene. Loko a nyikiwa xirhambo xa ntsombano, u hatle a herisa malunghiselelo yo ya hungasa vanhu mahelo-vhiki wolawo leswaku a ta va kona entsombanweni, masiku ha manharhu ka wona. Sunita a nga tisolanga hi sweswo. Loko ku hela nongonoko wa siku ro sungula u te: “Lowu i ntiyiso.” Loko a tlhelela eIndiya, u ye eHolweni ya Mfumo swin’we ni mana wa yena ni n’wana wa yena wa jaha swin’we ni n’wana wa makwavo ni munghana wa yena. Loko a ndzeriwe hi khale ka vafundhisi va yena, u va byele leswaku u tiyimisele ku va Mbhoni ya Yehovha. Entiyisweni u va byele leswaku na vona va fanele va ya eHolweni ya Mfumo!

Serbia

Wansati un’wana la nga Muchayina, loyi vito ra yena ku nga Mei Li u tshama eBelgrade. Hi 2006 u sungule ku hlaya Xihondzo xo Rindza hi ririmi ra rikwavo. Loko Mei Li a kuma xirhambo lexi n’wi rhambelaka entsombanweni lowu a wu ta khomiwa hi Xichayina eLeipzig, le Jarimani, u tiyimisele ku va kona hambileswi doroba ra Leipzig ri nga le kule hi tikhilomitara ta kwalomu ka 1 000 ku suka eBelgrade. U kume vhisa ya masiku manharhu kutani a famba hi xihaha-mpfhuka a ya eMunich, ivi a ya eLeipzig hi xitimela, ku nga mpfhuka lowu dyeke muholo wa yena wa tin’hweti timbirhi. Leswi a swi dyondzeke entsombanweni ni mabulo lawa a veke na wona ni lava a va te entsombanweni swi n’wi khumbe mbilu swinene. Loko Mei Li a tlhelela eBelgrade, yena ni mana wa yena va pfumele ku fambiseriwa dyondzo ya le kaya ya Bibele, kutani va sungula ku va kona edyondzweni ya buku leyi fambisiwaka hi Xichayina.

United States

Komiti ya Ntsombano yi ri: “A wu vona vaendzi kun’wana ni kun’wana exikarhi ka vayingiseri emasikwini manharhu ya ntsombano. Un’wana wa vaendzi volavo a ku ri wansati loyi a khongeleke Xikwembu a kombela nkongomiso evuton’wini bya yena ivi hi xamundzuku ka kona a kuma xirhambo lexi. U fambe hi movha wa yena tiawara timbirhi ku ya entsombanweni hi Mugqivela ni hi Sonto kutani a pfumela ku fambiseriwa dyondzo ya Bibele.” Xiviko lexi xi ya emahlweni xi ku: “Wanuna un’wana u tsutsumele makwerhu loyi a siyeke xirhambo eka n’wana wa yena wa jaha. Makwerhu a a nga tivi leswaku wanuna loyi u lava yini kambe u tsakile loko a n’wi kombela leswaku va vuyela endlwini ya yena va ya bula. U vutise swivutiso swo hlayanyana a tamele Bibele ya yena ivi va sungula ku dyondza.”

Makwerhu un’wana u nyike wanuna la tirhaka ekontrakeni xirhambo. Wanuna loyi u vutise a ku: “Xana ndzi nga byela van’wana hi mhaka leyi?”

Makwerhu u te: “Ina!” Kambe a a nga swi tivi leswaku wanuna loyi u ni nongonoko lowu a wu haxaka eka xiya-ni-moya hi Mugqivela nimixo. Hakunene u va byerile van’wana hi ta xirhambo lexi, hi ku va hlayela xona loko nongonoko wu ri karhi wu ya emahlweni! Vanhu vo tala va angule hi ku kombela xirhambo xexo.

Morgan la nga ni malembe ya 12 hi vukhale, i phayona ra nkarhinyana. Loko ka ha sele vhiki leswaku ku sungula tsima leri ro hlawuleka, u hlangane ni wanuna la vutiseke swivutiso swo hlayanyana swa Bibele kutani Morgan a n’wi rhambela eka nkulumo ya le rivaleni eHolweni ya Mfumo ya le mugangeni wolowo. U tile hambileswi a bohekeke ku hatla a famba leswaku a ya exilahlweni. Loko tsima leri ro hlawuleka ri sungula, Morgan u nyike wanuna loyi xirhambo. U te: “Ndzi ta va ndzi tirha hi Ravuntlhanu kambe hi Mugqivela ni hi Sonto ndzi ta va ndzi ri kona hambi ko ba lexi dumaka.” Hiloko a vutisa leswaku Timbhoni ti endla njhani loko ti fanele ti tirha hi siku ra ntsombano. Morgan u te: “Hi ntolovelo ti kombela ku xwa entirhweni kambe minkarhi yin’wana ta wu tshika ntirho.”

Loko Morgan a tlhela a endzela wanuna loyi, u vule leswaku u kombele ku xwa entirhweni hi Ravuntlhanu eka ndhuna ya yena loko swi nga ri tano u ta tshika ntirho. Ndhuna ya yena yi vule leswaku loko o tshika ntirho swilo a swi nge sali swi famba kahle entirhweni kutani a nga xwa hi Ravuntlhanu naswona a nga xwa ni hi Ravumune leswaku a ya tilunghiselela.

Wanuna loyi u ve kona masiku ha manharhu ka wona ya ntsombano kambe a nga tanga yexe. A a ri ni swirho swa ndyangu wa yena swa nhungu ni vanghana va yena va 12 swin’we ni mindyangu ya vona—loko va helerile a va ri 35! Eku sunguleni loko a byela Morgan leswaku u ta ta ni vanhu va kwalomu ka 30, Morgan u te: “Mi tele, a ndzi nge swi koti ku mi hlayisela switulu hinkwenu!”

Wanuna loyi u te: “U nga karhateki. Hi ta tshama kun’wana ni kun’wana.” Nkateko wa kona hinkwavo ka vona va swi kotile ku kuma ndhawu eswitulwini swa kahle.

“BUKU LEYI . . . YI DYONDZISA HILAHA YESU A A DYONDZISA HAKONA”

Swiviko swi kombisa leswaku buku yo pfuna ku twisisa Bibele leyi nge Xana Bibele Yi Dyondzisa Yini Hakunene? i mpfuno lowu fikeke hi nkarhi entirhweni wo chumayela. Xichudeni xin’wana xa Bibele xi te: “Yi pfula mahlo ivi yi enerisa mbilu ni mianakanyo.” Mulanguteri wa muganga u ri: “Buku leyi a yi ku pfumeleli u teka leti ni letiya hikuva yi dyondzisa hilaha Yesu a a dyondzisa hakona. A yi jikajiki, yi ba nhloko ya mhaka naswona yi veka mhaka erivaleni, yi tlhela yi khumba mbilu.” Hi leswi swikombiso swi nga ri swingani.

Australia

Loko makwerhu un’wana a ri karhi a lunghisa yindlu ya wansati un’wana loyi a a vabya, u n’wi byele leswi Mfumo wa Xikwembu wu swi tshembisaka. Endzhakunyana ka masiku ma nga ri mangani u tlhele a n’wi endzela, a famba ni makwerhu wa xisati la nga phayona, wansati loyi u vutise hi ta masiku ya makumu. Timbhoni leti ti n’wi pfulele buku leyi nge Leswi Bibele Yi Swi Dyondzisaka eka ndzima 9, leyi nge “Xana Hi Hanya ‘eMasikwini Yo Hetelela’?” ivi ti bula na yena hi rungula ra ndzima leyi. Wansati loyi u hlamarisiwe hi swilo leswi Bibele yi swi tameleke. U te: “Kereke ya mina yi ndzi tshike ndzi ngungumela emunyameni.”

Makwerhu u ri: “Loko hi vuyela, hi dyondze ndzima 1, leyi nge ‘Hi Yihi Dyondzo Leyi Nga Ntiyiso Malunghana Ni Xikwembu?’ ni rungula leri fambisanaka na yona leri nga eka xiengetelo, leri hlamuselaka xivangelo xo va vito ra Xikwembu ri susiwile eTibibeleni tin’wana. Loko wansati loyi a hlaya eka matluka yo sungula ya Bibele ya yena leswaku vahundzuluxeri va sive vito leri nge ‘Yehovha’ hi xithopo lexi nge ‘Hosi,’ u hlundzukile hikuva vanhu a va n’wi byele leswaku u ni Bibele ya xiyimo xa le henhla ngopfu. U vule leswaku u navela ku ya eminhlanganweni ya Vukreste.

Belgium

Makwerhu la vuriwaka Ingrid u hlangane ni wansati wa la Afrika, loyi a a venge Timbhoni ta Yehovha. Loko Ingrid a n’wi komba buku leyi nge Leswi Bibele Yi Swi Dyondzisaka u vohlile hikuva a a tiyimisele ku twisisa Rito ra Xikwembu. U kale a pfumela ku fambiseriwa dyondzo ya Bibele kambe a sindzisa leswaku ku hlayiwa matsalwa hinkwawo. Wansati loyi u va kona eminhlanganweni naswona u hlamula ko tala nakambe u lava ku va muhuweleri wa Mfumo.

Brazil

Timbhoni ti dyondze Bibele na Paulo loko a ha ku nghena emalembeni ya kondlo-a-ndzi-dyi. Khombo ra kona, loko a ri ni malembe ya 16 hi vukhale, ndyangu wa ka vona wu hahlukile. Leswaku a wundla mana wa yena, u joyine ntlawa wa vuyimbeleri bya samba, kambe ku nga ri khale u hlanganyele eku tikhomeni ko biha a tlhela a nwa ku tlula mpimo. Hambiswiritano, ntiyiso a wu nga humanga hilaha ku heleleke embilwini ya yena. Hi xikombiso, leswi a a swi tiva leswaku vukhongeri bya voodoo byi fambisana ni madimona, u hlundzukile loko a fanele a yimbelela endhawini ya vukhongeri bya voodoo. Nakambe u sungule ku xiya leswaku vutomi bya yena a byi na xikongomelo. Loko hi 2005 makwerhu un’wana la ha riki jaha a n’wi komba buku leyi nge Leswi Bibele Yi Swi Dyondzisaka, Paulo a nga hlwelanga ku tsakela rungula ra yona kutani a sungula ku dyondzeriwa Bibele. Ku nga ri khale, u tshike ku yimbelela ni ntlawa lowu wa vuyimbeleri kutani a ya eminhlanganweni ya Vukreste.

Britain

Loko Marilyn a ri karhi a chumayela hi yindlu ni yindlu, u hlangane na Melanie manana la ha riki muntshwa, loyi a tsakeleke Bibele. Marilyn u n’wi siyele xiphephana kutani a tshembisa leswaku u ta tlhela a vuya. U vuye ko hlayanyana kambe a nga n’wi kumi, nilokoswiritano u hetelele a n’wi kumile siku rin’wana. Marilyn u ri: “Ndzi endle xiboho xo namba ndzi sungula ku n’wi dyondzela hi buku leyi nge Leswi Bibele Yi Swi Dyondzisaka kutani dyondzo yi ya emahlweni. Loko Khisimusi ri ri kusuhi, Melanie u ndzi hlamarisile loko a ndzi byela leswaku i ro hetelela a veka murhi wa Khisimusi ekaya rakwe. A a ri karhi a hlaya swihloko leswin’wana swa buku kutani u dyondze leswaku Khisimusi i dyondzo ya mavunwa.”

Colombia

Consuelo u nyikiwe mpfumelelo wo ya entsombanweni wa muganga hi muungameri wa yena entirhweni. Loko a tlhelela entirhweni, muungameri wa yena u lave ku tiva leswaku a ku ri njhani entsombanweni hiloko va va ni bulo leri tsakisaka. Loko Consuelo a n’wi kombe buku leyi nge Leswi Bibele Yi Swi Dyondzisaka, muungameri wa yena u yi lombile. U yi vuyise endzhaku ka masiku mambirhi a vula leswaku loko wo kala u yi pfula swa tika ku yi veka ehansi. Consuelo u te: “A hi ya ku hlaya ntsena kambe ya dyondzisa,” kutani a n’wi komba ndlela leyi yi dyondziwaka ha yona. Muungameri wa yena u te: “Xana u vula leswaku ndzi nga dyondzisiwa hi buku leyi?” Dyondzo yi sungurile kutani ku nga ri khale, muungameri loyi a sungula ku chumayela swirho swa ndyangu wa yena ni vanghana. U tlhele a sungula ku ya eminhlanganweni ya Vukreste, minkarhi yin’wana a a ta ni n’wana wa yena ni kokwana wa yena.

Guyana

Joseph, la nga phayona ra nkarhi hinkwawo, u sungule dyondzo ya Bibele hi buku leyi nge Leswi Bibele Yi Swi Dyondzisaka ni wanuna loyi a hlanganeke ni Timbhoni emalembeni yo hlayanyana lama hundzeke edorobeni leri nga ntsindza ra Georgetown. Loko Joseph a fika ro sungula leswaku va ta dyondza, u kume wanuna loyi a rindzile ni vana va yena vambirhi va majaha ni vasati va vona. Na vona va ti amukerile tibuku teto. Vhiki leri tlhandlameke, wanuna loyi u vule leswaku mudyondzisi wa le mugangeni wolowo u lombe buku ya yena leyi nge Leswi Bibele Yi Swi Dyondzisaka kutani a yi hlaya. Mudyondzisi u te: “Yi tamele ntiyiso.” Na yena u hlanganyerile loko va ri karhi va dyondza. Nakambe, muakelani u twile hi ta dyondzo leyi kutani na yena a kombela ku va kona loko va dyondza. Hi wona nkarhi wolowo, Joseph u va rhambele eXitsundzuxweni hinkwavo ka vona. Hambileswi wanuna luya wo sungula a nga swi kotangiki ku ta hikwalaho ko vabya, ndyangu wa yena wu ve kona eXitsundzuxweni swin’we ni mudyondzisi ni ndyangu wa yena. Hinkwavo va endla nhluvuko lowunene.

Poland

Loko Lucjan a ri karhi a fambisa timagazini exitarateni, u hlangane na Jan la nga ni malembe ya 50 hi vukhale, ku nga khale ka munghana wa yena wa le xikolweni, kambe se a ku hundze malembe va nga si vonana. Loko va ri karhi va bula, Lucjan u pfe a katsa ni tinhla ta buku leyi nge Leswi Bibele Yi Swi Dyondzisaka, hiloko Jan a vula leswaku u loveriwe hi nsati nileswaku u sungule ku dzaha fole a tlhela a va xindzendzele. Lucjan u ri: “Loko mina ni munghana wa mina hi n’wi endzela nakambe, hi n’wi kume a hi rindzile. U kombele ku fambiseriwa dyondzo ya Bibele hi buku leyi nge Leswi Bibele Yi Swi Dyondzisaka ivi hi namba hi endla tano.” Ntiyiso wu fikelele mbilu ya yena naswona u karhi u lwa ni ku godzomberiwa ni ku lawula mavulavulelo ya yena lama voyameleke eka nhlambha.

Spaniya

Ha yini dokodela la nga ni vutshila hi ta ngati ni swiaki swa yona a tsundzuxe muvabyi la nga ni gome leswaku a dyondza Bibele? Hikuva swirho swimbirhi swa Komiti yo Vulavurisana ni Swibedlhele swi n’wi endzerile kutani swi n’wi fambisela buku leyi nge Leswi Bibele Yi Swi Dyondzisaka. Yena ni muvabyi a va ri ni gome hikwalaho ka mavabyi lama hlwelaka ku hola. Leswi a tsakisiweke hi buku leyi nge Leswi Bibele Yi Swi Dyondzisaka u kombe muvabyi wa yena, a n’wi tiyisekisa leswaku loko o dyondza ni Timbhoni, havumbirhi bya vona va ta kota ku langutela vumundzuku va ri ni ntshembo. Endzhakunyana ka masiku ma nga ri mangani, makwerhu wa xisati la nga phayona a a ri karhi a fambisa timagazini kutani a hlangana ni wansati loyi la nga ni gome ivi a pfumela ku fambiseriwa dyondzo. Dokodela na yena u sungule ku fambiseriwa dyondzo kutani se u va kona eminhlanganweni ya Vukreste.

Zambia

Goliath i ndhuna ya ximutana xo karhi naswona u teke tshengwe nakambe u ni vana va khume, kambe yena ni ndyangu wa yena va teke goza ra nkoka hi tlhelo ra moya. Goliath u cince mahanyelo ya yena endzhaku ka loko a hlaye buku leyi nge Leswi Bibele Yi Swi Dyondzisaka. Hi January 2006, yena ni ndyangu wa yena va sungule ku ya eminhlanganweni ya Vukreste kutani hi February a tshika nsati wa vumbirhi ivi a tsarisa vukati ni lowo sungula. (Mat. 19:4-6; 1 Tim. 3:2) Hi March, u tshike ku va ndhuna ya ximutana kutani hi April yena ni nsati wakwe Esther, va va vahuweleri lava nga khuvuriwangiki. A swi kanakanisi leswaku xiboho xa vona xo lava ku tirhela Yehovha xi hlundzukise madimona kutani ma sungula ku xanisa Esther. Hambiswiritano, u ma kanetile hilaha Yakobo 4:7 yi lerisaka hakona. Vuyelo byi ve byihi? Esther u ri: “Sweswi mina ni nuna wa mina hi ntshunxekile.”

MATSHALATSHALA YO CHUMAYELA HI RIRIMI RIN’WANA

Ematikweni yo tala va tele vahlapfa lava vulavulaka tindzimi timbe, naswona vo tala va vona va huma ematikweni lawa ntirho wo chumayela wu nga endliwiki hi ku ntshunxeka. Hikwalaho ka sweswo, ‘ku pfuleke nyangwa leyikulu leyi yisaka entirhweni,’ naswona vamakwerhu vo tala va tinyiketele ku hoxa xandla entirhweni lowu hi ku dyondza ririmi rin’wana. (1 Kor. 16:9) Ku engetela kwalaho, matiko man’wana ma ni nhlayo leyikulu ya vaaki lava ririmi ra vona ri nga vulavuriwiki hi vanhu vo tala etikweni. Vachumayeri va Mfumo va dyondza tindzimi leti naswona va va ni vuyelo lebyinene ngopfu.

Leswaku ntirho wu ya emahlweni ematikweni wolawo, marhavi yo hlayanyana ma hlele leswaku ku va ni titlilasi to dyondzisa tindzimi timbe. Hakanyingi leswi dyondzisiwaka etitlilasini teto swi dzika eka leswi vahuweleri va hlanganaka na swona ensin’wini, kutani sweswo swi hlayisa nkarhi. Elisa loyi a dyondzaka ririmi ra le Albania u ri: “Khoso ya kona yi ku pfuna leswaku u hatla u dyondza ririmi rero.”

Belgium

Rhavi ri vika leswaku vahuweleri lava tlulaka 300 va hlanganyele etitlilasini ta 17, leti a ti dyondzisa tindzimi ta khume, kutani swichudeni a swi sukela eka malembe ya kaye hi vukhale ku ya eka ya 71. Enora u ri: “Ndzi dyondze ririmi ra le Turkey naswona ndzi rhandza vanhu va kona.” Annelies u dyondza Xichayina naswona muviki un’wana wa mahungu u vulavurisane na yena eka nongonoko wa thelevhixini. A a lava ku vika mahungu hi munhu la endlaka nchumu lowuntshwa evuton’wini bya yena. Annelies u hlamuserile leswaku ha yini a dyondza Xichayina. Endzhaku ka lembe muviki wa mahungu u tlhelele eka yena, kutani Annelies a n’wi byela vuyelo lebyinene lebyi a byi kumeke entirhweni wa yena wo chumayela. Swi tikomba onge muviki loyi wa mahungu u yi tsakerile mhaka leyi hikuva mbulavurisano wolowo wu haxiwe eka thelevhixini hi nkarhi lowu vanhu hinkwavo va vaka va hlalerile, wu tlhela wu kombisa vhidiyo yo koma loko Annelies a ri karhi a chumayela Muchayina laha bazi ri yimaka kona.

Netherlands

Rhavi ri tsale ri ku: “Handle ko endla leswaku vamakwerhu vo tala va hlanganyela entirhweni wo chumayela ensin’wini ya ririmi rimbe, titlilasi ta kona ti pfune vamakwerhu leswaku va rhangela emavandlheni.” Le Netherlands a ku ri ni xilaveko xa xihatla ensin’wini leya ha riki yintshwa ya Xiromania. Rhavi ri hlele leswaku ku hamba ku va ni minhlangano hi ririmi leri kambe a ku ri ni makwerhu un’we ntsena la kotaka ku rhangela naswona a a vabya. Kambe, sweswi titlilasi leti ti pfunile leswaku ku va ni vamakwerhu lava engetelekeke lava rhangelaka. Makwerhu un’wana u fambisa dyondzo ya buku ya vandlha kasi un’wana u fambisa Dyondzo ya Xihondzo xo Rindza ivi wa vunharhu a toloka tinkulumo loko ti nyikeriwa hi Xidachi.

Spaniya

Ku sukela hi 2003, rhavi ri hlele titlilasi ta 48 hi tindzimi ta khume, leswi endleke leswaku nhlayo ya tidyondzo ta Bibele yi andza hi ndlela leyi hlamarisaka yi kondza yi lava ku va 50 000. Juan na Mari va ka Paz lava nga maphayona yo hlawuleka, va rhambiwe endyangwini wun’wana wa Varomania. Ku nga ri khale a va yingisiwe hi vanhu va 16 ku katsa na Mario wa malembe ya 19 hi vukhale, loyi a a rhiye ndleve ku tlula lavan’wana hinkwavo. Hambileswi a a nga xi tivi Xipaniya kasi ni maphayona lawa a ma nga xi tivi Xiromania, Mario u amukele broxara leyi nge Leswi Xi Swi Languteleke hi ririmi ra rikwavo. Vhiki leri tlhandlamaka, Mario u kombele ku dyondzeriwa Bibele naswona u ve kona eka siku ra nhlengeletano yo hlawuleka, hambileswi swo tala swa leswi a swi vuriwa a yo na yi xa. Endzhakunyana ka mavhiki ma nga ri mangani, a a va kona eminhlanganweni hinkwayo ya vandlha naswona u sungule ku hlamula hi Xipaniya. U cince maambalelo ni ndlela leyi a tilunghisaka ha yona kutani a sungula ku byela van’wana hi ta ntshembo wa yena lowuntshwa. Sweswi u fambisa tidyondzo ta Bibele ni mpatswa wa le Romania lowu na wona wu endlaka nhluvuko lowunene.

Hi nkarhi lowu fanaka, Juan na Mari va sungule ku dyondza Xiromania naswona ku nga ri khale se a va fambisa tidyondzo ta Bibele ta 30 hi ririmi leri! Nakambe Juan u fambisa dyondzo ya buku hi Xiromania. Loko dyondzo yi hela, vahuweleri va khume va ya etlilasini yo dyondzisa Xiromania, leyi fambisiwaka hi Mario, xichudeni lexiya xo sungula xa Bibele.

United States

Vanhu vo tlula timiliyoni ta 50 a va vulavuli Xinghezi ekaya, va vulavula tindzimi tin’wana. Eka Timbhoni ta Yehovha, vahuweleri va kwalomu ka 254 000 va hlanganyela emavandlheni ya 3 052 ya Xipaniya ku katsa ni mintlawa ya 53. Kasi vahuweleri van’wana va 26 000 va hlanganyela emavandlheni ya 690 lama vulavulaka ririmi rimbe ni le ka mintlawa yin’wana handle ka ya Xipaniya. Leswaku ntirho lowu lowukulu wu kota ku ya emahlweni ensin’wini leyi ya tindzimi to hambana-hambana, rhavi ri hlele titlilasi leti tlulaka 450 ta tindzimi ta 29. Mulanguteri un’wana wa xifundzha u ri: “Eka malembe mambirhi lama hundzeke ku simekiwe mavandlha ya mune lamantshwa exifundzheni xa hina. Manharhu ya wona ma simekiwe hikwalaho ka leswi ku nga ni titlilasi to dyondzisa Xifurwa.”

Makwerhu la dyondzeke Xipaniya u ri: “A hi nga tshembi leswaku hi ta kala hi swi kota. Se i malembe mina ni nkatanga hi ri karhi hi lava ku va varhumiwa kambe a hi fanele hi kurisa vana vambirhi. Sweswi vana va hina va kurile naswona ndzi tshike ntirho. Kutani etin’hwetini tinharhu leti hundzeke, mina ni nkatanga hi rhurhele evandlheni ra Xipaniya naswona se hi averiwe tinkulumo eXikolweni xa Vutirheli bya le Tilweni. Nakambe hi ni maendzo yo tala yo vuyela ni vanhu va ntlhanu lava swi tshembisaka leswaku va ta va tidyondzo ta Bibele. Mina ndzi ni malembe ya 67 hi vukhale kasi nkatanga u na 64 kambe hi dyondze leswaku hambi se u dyuhele, u nga ri dyondza ririmi rimbe.”

Loko swi tika ku endla vadyondzisiwa lavantshwa ensin’wini ya ka n’wina kambe swiyimo swa wena swi ku pfumelela ku dyondza ririmi rimbe, anakanyisisa hi mhaka leyi hi xikhongelo leswaku u ta rhurhela ensin’wini leyi nga ni vanhu lava vulavulaka ririmi rimbe! Ku teka goza ro tano a ku nge vi ku tlanga hi nkarhi naswona u ta tiphina ngopfu ensin’wini.

Jarimani

Titlilasi to dyondza tindzimi ti sungule emale-mbeni lama tlulaka 30 lama hundzeke etikweni leri, naswona ku leteriwe swichudeni leswi tlulaka 1 000 hi tindzimi ta kaye, tin’wana ta tona i ririmi ra le Albania ni ra le Vietnam. Makwerhu un’wana wa xisati u ri: “Ku dyondza ririmi rin’wana swi antswa ngopfu ku tlula khoso leyi ndzi yi dyondzeleke eyunivhesiti.” Leswi swichudeni swi dyondzaka ndlela leyi vanhu va le matikweni man’wana va anakanyaka ha yona, swi kota ku fikelela timbilu ta vona loko swi va chumayela.

Paula, la nga ni malembe ya 82 hi vukhale, u sungule ku dyondza ririmi ra le Vietnam kutani a famba mpfhuka wa tikhilomitara ta 150 leswaku a ya eminhlanganweni leyi fambisiwaka hi ririmi leri. U ri: “A ndzi na yona nyiko yo dyondza tindzimi tin’wana kambe ndza n’wi nkhensa Yehovha leswi a endleke leswaku ndzi va ni ntsako lowukulu swonghasi.” Paula u dyondze ni ndyangu lowu vulavulaka ririmi ra le Vietnam. Ku rhange nuna a tsakela ntiyiso ivi ku landzela nsati. Havumbirhi bya vona se va khuvuriwile.

Ku sukela loko va khuvuriwile, vona ni n’wana wa vona wa nhwanyana va vone ku hetiseka ka leswi a va swi navela, ku nga ku tirhela Yehovha etikweni ra rikwavo. Va ake yindlu leyi nga ni ndhawu leyi ringaneke ku khomela minhlangano eka yona naswona nuna wa kona i nkulu tlhelo phayona ra nkarhinyana. Nsati i phayona ra nkarhi hinkwawo. Paula a a tsake ngopfu loko a kuma papila leri humaka eka vona ri vula leswaku tatana u khuvule n’wana wa yena wa nhwanyana. Loko n’wana loyi a tsalela Paula, u te: “Eka ‘kokwana.’ Ndza ku kumbuka. Ndzi tshama ndzi ri karhi ndzi anakanya hi wena. U ta tshama u ri kokwa wa mina. Ndza ku rhandza.” Hakunene ntokoto lowu wu n’wi tsakise ngopfu makwerhu loyi la rhandzekaka, loyi a dyondzeke ririmi ro tika se a dyuharile!

Canada

Ku sukela hi 2002 swichudeni swa 554 swi hlanganyele etitlilasini ta 31 emadorobeni ya khume. Paul la lamaleke ku suka exisutini ku ya emilengeni i nkulu naswona u dyondze Ximandarin. Kutani u ni muongori la nga Muchayina, la taka eka yena hi masiku yo karhi a ta n’wi khathalela, loyi vito ra yena ku nga Linda. Leswi kereke ya Linda yi onheke Timbhoni vito, a a nga lavi ku twa nchumu hi rungula ra Mfumo. Siku rin’wana Paul u n’wi kombele leswaku a n’wi yisa eHolweni ya Mfumo leswaku a ta ya yingisela nkulumo ya le rivaleni hi Ximandarin. U pfumerile kambe a nga lavanga ku vulavula na munhu naswona a a nga swi tsakeli leswi vuriwaka. Ku nga ri khale, Linda u yise Paul edyondzweni ya buku. Leswi a nga mutswari la nga yexe, u rhiye ndleve hikuva dyondzo ya kona a yi vulavula hi ndyangu. Endzhaku ka sweswo, makwerhu la nga phayona u kombele ku dyondza Bibele na yena kutani a pfumela. U endle nhluvuko lowunene hi tlhelo ra moya kutani sweswi hi vulavulaka i makwerhu.

Le Canada ku ni vanhu vo tala lava davukeke etikweni rero kambe va vulavulaka tindzimi ta vona vini. Emalembeni ma nga ri mangani lama hundzeke, makwerhu la nga phayona, loyi vito ra yena ku nga Carma, u chumayele wanuna un’wana wa rixaka ra Maindiya lama vuriwaka Mablackfoot. Carma la tshamaka ni vatswari va yena emugangeni wa Mablackfoot u ri: “Loko ndzi ringeta ku n’wi chumayela hi Xinghezi a nga lavanga ku twa nchumu. U vule leswaku mina ndzi nghena kereke ya valungu nileswaku Bibele i buku ya valungu. Hiloko swi ta emianakanyweni ya mina leswaku ‘Loko a ndzi tiva ririmi ra Mablackfoot ni ndhavuko wa wona, kumbexana a a ta ndzi nyika ndleve.’” Carma u endle xiboho xo dyondza ririmi leri kutani hi ku famba ka nkarhi a ri dyondzisa vahuweleri va 23, lava a a va dyondzisa vhiki rin’wana ni rin’wana.

Un’wana wa vahuweleri lava u chumayele mpatswa wa Mablackfoot lowu a wu endzele n’wana wa wona la vabyaka exibedlhele. Mpatswa lowu wu teke adirese ya makwerhu loyi hikuva wu tsakisiwe hi leswi a tinyikeke nkarhi wo dyondza ririmi ra wona. Carma u kume leswaku nuna wa kona hi yena luya a nga tshama a ala ku n’wi yingisa loko a n’wi chumayela enkarhini lowu hundzeke! Hiloko a famba ni muhuweleri loyi loko a ya endla riendzo ro vuyela. Carma u ri: “Mpatswa lowu a wu helelanga hi ku rhiya ndleve ntsena kambe wu tlhele wu pfumela ni leswi Bibele yi swi vulaka. Muhuweleri u wu nyike Bibele ni buku yo pfuna ku dyondza Bibele. Nsati wa kona u veke Bibele ni buku yoleyo exifuveni xa yena a ri karhi a xiririka mihloti kutani nuna wa kona a ri karhi a pfumela hi nhloko. Sweswi nsati u dyondzeriwa Bibele kasi nuna wa kona u tshama na vona a rhiya ndleve.”

Loko rhavi ri hlamusela ndlela leyi titlilasi leti ti pfuneke ha yona ri vika leswaku vanhu va 34 va Mablackfoot va ve kona eXitsundzuxweni xa 2006 lexi a xi fambisiwa hi ririmi ra wona!

Italiya

Vahuweleri va kwalomu ka 7 200 va ve kona etitlilasini leti khomiweke hi tindzimi ta 18. Un’wana wa vahuweleri lava u hlangane na Samson la humaka etikweni leri ntirho wa Mfumo wu yirisiweke. Loko Samson a ri ni malembe ya 24 hi vukhale, u sungule riendzo leri a ri vuleke ra ntshembo, u rhange hi ku tsemakanya kwandzasi ivi a tlutela eItaliya. Loko a ri kwale u hlangane ni makwerhu la dyondzeke ririmi ra Samson. U rhiye ndleve naswona a ya ni le nhlanganweni wa Vukreste. Endzhaku ka loko ku hundze tin’hweti ta khume va lahlekelanile, va tlhele va hlangana kutani makwerhu u sungule ku dyondza Bibele na Samson. A va dyondzela etikhefini, eswitichini swa xitimela lexi fambaka ehansi ka misava ni le tiphakini. Endzhaku ka loko Samson a ye eXitsundzuxweni, u sungule ku cinca mahanyelo ya yena, a tlhela a tshika xigangu xa yena lexi a tshameke na xona lembe. Sweswi i makwerhu.

Nicaragua

Hi lembe ra 2006 vamakwerhu va kote ku va ni nkarhi lowunene wo chumayela ro sungula eka Vamayangna. Vo tala va vona va nghena kereke ya le Moravia ya Maprotestente naswona edorobeni ha rin’we meyara ya kona yo tiveka naswona hi ntolovelo yi va yi ri mufundhisi. Un’wana wa vafundhisi lava u tlule nawu wa ndhavuko wa vona kutani a pfumelela Hamilton na Abner—lava nga maphayona yo hlawuleka—leswaku va tshama edorobeni rero. U tlhele a va kumela ndhawu yo tshama kutani a va nyika Bibele leyi heleleke hi ririmi ra Mayangna. Vamakwerhu va dyondze ririmi leri hi ku hatlisa kutani va sungula tidyondzo to hlayanyana ta Bibele. Entiyisweni, maphayona lawa ma tolokele vanhu va 13 va Mayangna loko va te eminhlanganweni loko va endzeriwe hi mulanguteri wa xifundzha ro sungula, naswona hinkwavo lava veke kona eXitsundzuxweni a va ri 90. Hi ku famba ka nkarhi, vamakwerhu va hundzuluxele tinsimu timbirhi hi ririmi ra Mayangna kutani hinkwavo va yimbelela hi ku hiseka.

Hikwalaho ka ku tsakela konghasi loku nga kona, rhavi ri pfumelele maphayona wolawo leswaku ma nga ha suki exiavelweni xexo. Kambe, xana valawuri va kwalaho a va ta ma pfumelela? Eka nhlangano wun’wana wa vaaki va doroba, van’wana va hehle Timbhoni ta Yehovha hi leswaku ti kaneta Kreste. Hambiswiritano, wanuna un’wana u dyondze ni Timbhoni naswona a a ri xirho xa huvo ya doroba. U te: “Ku sukela loko majaha lawa ma ri laha dorobeni ra hina, a ndzi si tshama ndzi vona munhu ni un’we a va swekela kumbe a va hlantswela. Vo tiendlela xin’wana ni xin’wana. Va kale va dyondza ni ririmi ra hina! Ku tlula kwalaho, va hi dyondzise swilo leswi humaka eBibeleni, leswi a hi nga swi tivi. Loko majaha lawa a ma nga rhumiwanga hi Xikwembu, a ma ta va se ma lan’wile.” Hikwalaho, vamakwerhu va pfumeleriwe ku tshama.

KU HUNDZULUXELELA LAVA FEKE TINDLEVE

United States

Hi 2006, xiyenge xa Bibele lexi nge The Good News According to Matthew xi humesiwe hi Ririmi ra Mavoko ra le Amerika xi ri eka DVD. I ro sungula leswaku vanhu lava feke tindleve va kota ku hlaya tindzima leti heleleke ta Vuhundzuluxeri Bya Misava Leyintshwa hi ririmi ra mavoko. Nkulu un’wana la feke tindleve u te: “Leri i papila ro sungula leri Yehovha a ndzi tsaleleke rona hi ku kongoma.” Un’wana u te: “Sweswi ndzi kota ku vona ndlela leyi ndzimana yin’wana ni yin’wana yi pfumelelanaka ha yona ni mhaka.” Makwerhu un’wana wa xisati loyi a tivekeleke pakani yo hlaya ndzima yin’we hi siku u ri: “Ndzi tshama ndzi ri karhi ndzi siyiwa hi nkarhi hikuva ndzi tikuma ndzi hlaye tindzima ta mune kumbe ta ntlhanu ndzi nga swi xiyanga!”

Brazil

Ntirho wa le nsin’wini ya ririmi ra mavoko wu ya wu andza hi ku hatlisa hi ndlela leyi hlamarisaka. Sweswi hi vulavulaka ku ni mavandlha ya 232 ya ririmi ra mavoko kutani ma vumba swifundzha swa khume ni muganga wun’we. Vakulu ni malandza ya vutirheli lama tlulaka 1 000 swin’we ni maphayona yo hlawuleka ya 146, lawa eka wona ya nhungu ma nga twiki etindleveni, va hlanganyela emavandlheni ya ririmi ra mavoko va tlhela va tirha nsimu ya kona. Eka vakulu ni malandza ya vutirheli, vo tlula dzana va kote ku kula hi tlhelo ra moya hikwalaho ka minkandziyiso leyinene leyi nhlengeletano ya Yehovha yi yi humeselaka lava nga twiki etindleveni. Minkandziyiso leyi yi katsa buku leyi nge Vutivi Lebyi Yisaka eVuton’wini Lebyi Nga Heriki ni leyi nge Xana Bibele Yi Dyondzisa Yini Hakunene? ni broxara leyi nge Tshamani Mi Rindzile! ni leyi nge I Yini Leswi Xikwembu Xi Swi Languteleke Eka Hina? ni Xihondzo xo Rindza. Ku sukela hi lembe ra 2006, ku endliwe lunghiselelo ro fambisa Xikolo xa Vutirheli bya le Tilweni hi ririmi ra mavoko, ku tirhisiwa minkandziyiso leyi nga kona hi ririmi leri.

Mudyondzisi la nga ni malembe ya 30 hi vukhale u ri: “Ndzi ye etikerekeni to hambana-hambana kambe ndzi xiye leswaku Timbhoni ta Yehovha hi tona ntsena leti kotaka ku va dyondzisa Bibele vanhu lava nga twiki etindleveni.” U vule leswaku leswi kereke ya yena yi n’wi dyondziseke swona a swi nga twisiseki naswona a swi nga n’wi pfuni nchumu. Hambileswi vanghana va yena va n’wi kucetelaka leswaku a tshika ku dyondza, u tiyimisele ku hambeta a va kona eminhlanganweni ya Vukreste. Onge Yehovha a nga hambeta a koka vanhu vo tano va timbilu letinene a va kokela eka N’wana wa yena!—Yoh. 6:44; Nhlav. 14:6.

TIMHAKA TA NAWU

Eritrea

Hikwalaho ka leswi vamakwerhu va nga vhotangiki, hi 1994 presidente yi lerise leswaku Timbhoni ta Yehovha ti tekeriwa malunghelo ya tona yo va vaaka-tiko. Vamakwerhu va koke ku tika hi tlhelo ra timali hikwalaho ka xiboho lexi, kutani vo tala va balekile etikweni va ya va vahlapfa ematikweni mambe. Van’wana va sarile ku katsa ni vatswari lava nga ni vana lava nghenaka xikolo. Loko n’wana un’wana ni un’wana wa xikolo a fika eka ntangha kaye—ku nga khathariseki leswaku i mufana kumbe i nhwanyana—u fanele a tsarisa evusocheni. Hikwalaho vantshwa vo tala lava nga Timbhoni va endle xiboho xo tshika xikolo loko va fika eka ntangha nhungu.

Ku ya eminhlanganweni ya vandlha ni ku hlanganyela entirhweni wo chumayela swi ni khombo; maphorisa ma khoma swirho hinkwaswo swa vandlha! Hambiswiritano, vamakwerhu lava nga ni xivindzi va hambeta va “yingisa Xikwembu tanihi mufumi ku tlula vanhu.” (Mint. 5:29) Sweswi hi vulavulaka, vamakwerhu va 31 va xinuna ni va xisati va le khotsweni, ku katsa ni makwerhu la nga ni malembe ya 73 hi vukhale, la humaka eNetherlands. Van’wana va le khotsweni hileswi va aleke ku va masocha. Vamakwerhu vanharhu—ku nga Paulos Eyassu, Isaac Mogos na Negede Teklemariam—hi mpfhuka va pfaleriwa ekhotsweni hi 1994.

Furwa

Hi February 25, 2005, ku endliwe xirilo eka Huvo ya le Yuropa ya Timfanelo ta Vanhu (European Court of Human Rights [ECHR]) hikwalaho ka leswi Nhlangano wa Timbhoni ta Yehovha wu hakerisiwaka xibalo swi nga ri enawini. Vanhu vo tlula 874 000 etikweni hinkwaro va sayine xirilo va vilela hikwalaho ka vuhomboloki lebyi ivi va xi rhumela eHubyeni. Hambiswiritano, hi January 2006, valawuri va ta xibalo va lerise vamakwerhu leswaku va hakela mali leyi saleke leyi va ha yi kolotaka eka xibalo.

Timbhoni ta Yehovha ti hatle ti tivisa Huvo ya le Yuropa ya Timfanelo ta Vanhu leswaku yi ti tivisa hi leswi endlekaka eka nandzu lowu. Huvo yi nambe yi ku milenge mimbirhi, yi kambisisa xikombelo xa vona. Hi May 4, 2006, Huvo yi kombele mfumo wa le Furwa leswaku wu tsala mhaka ya wona ehansi ivi wu yi rhumela ehubyeni. Xikongomelo xo endla tano i ku kumisisa loko ntshunxeko wa vukhongeri wa Timbhoni ta Yehovha wu honisiwile niloko ti khomiwa hi ndlela ya xihlawuhlawu.

Jarimani

Hi February 10, 2006 Huvo leyi Kongomisaka Timhaka ta Tiko eLeipzig yi endle xiboho xa leswaku Mfumo wa Berlin wu amukela Nhlangano wa Vukhongeri wa Timbhoni ta Yehovha eJarimani tanihi nhlangano lowu pfunaka tiko. Leswi swi herise nandzu lowu tekeke malembe ya 15 wu ri karhi wu tlhuvutsiwa ehubyeni. Nhlangano lowu wa Vukhongeri se a wa ha hakerisiwi xibalo naswona wu kuma malunghelo man’wana lawa kumiwaka hi tikereke letikulu. Hi July 5, 2006, Mfumo wa Berlin wu angule ximfumo emhakeni leyi kutani wu nyika swirho swimbirhi swa Komiti ya Rhavi xitifiketi xo amukela Timbhoni tanihi nhlangano lowu pfunaka tiko.

Grikiya

Ku hundze malembe yo tala mpfumelelo wo aka ni ku va ni Holo ya Mfumo wu hlwerisiwa hi vomu kumbe vamakwerhu va nga nyikiwi mpfumelelo hikuva nawu a wu lava leswaku swikombelo swo tano swi tameriwa hi vafundhisi va kereke ya Orthodox ya Magriki. Hi May 30, 2006, palamendhe yi endle xiboho xa leswaku swikombelo swo tano swi tameriwa hi Ndzawulo ya Tiko ya Dyondzo ni Vukhongeri.

Hi July 15, 2005, ndzawulo leyi lawulaka xitediyamu xa tiko lexi pfalekeke xa le Loutraki eKorinto, yi cince xiboho lexi yi xi endleke, lexi a xi pfumelela vamakwerhu leswaku va hirha xitediyamu lexi leswaku va ta khomela ntsombano wa muganga eka xona. Ndzawulo leyi a yi kanakana loko Timbhoni ta Yehovha ti ri “vukhongeri lebyi tivekaka.” Gqweta ra mfumo ri nghenelerile kutani hi February 2006, valawuri va xitediyamu va tshembise ku kambisisa xikombelo lexintshwa loko ntsena ko kumeka leswaku Timbhoni ta Yehovha i vukhongeri lebyi tivekaka.

Nepal

Timbhoni ta Yehovha ti swi kotile ku tsarisiwa tanihi vandla ra vukhongeri hi October 2005. Xin’wana xa swivangelo swo tsarisa nhlengeletano leyi i ku “khutaza vanhu leswaku va dyondzisiwa timhaka ta moya.” Ku tsarisiwa loku ku fanele ku hoxa xandla eku hangalaseni ka mahungu lamanene etikweni leri vanhu vo tala va nga Mahindu.

Romania

Hambileswi Timbhoni ta Yehovha ti tsarisiweke tanihi vukhongeri hi 1990, vito ra tona a ri nga tsariwanga eka nxaxamelo wa Mfumo wa vukhongeri lebyi amukelekaka, lowu humesiweke hi 1997. Hikwalaho ka sweswo, vamakwerhu a va pfumeleriwanga ku aka Tiholo ta Mfumo naswona a va pfumeleriwanga loko va ala ku tsarisa evusocheni—ku nga timfanelo leti nyikiweke vukhongeri lebyi amukelekaka. Huvo leyi Tlakukeke ya le Romania yi lerise mfumo leswaku wu amukela Timbhoni ta Yehovha tanihi vukhongeri, kambe wu hambete wu bakanya xileriso lexi. Hi March 2006, mfumo wu tirhisane ni Huvo ya le Yuropa ya Timfanelo ta Vanhu, kutani wu kombela Timbhoni ta Yehovha leswaku nandzu lowu wu herisiwa kahle hi moya wo rhula, hi ndlela yoleyo se ku herile ku tshwimbirisana ehubyeni loku tekeke kaye wa malembe. Mfumo wu pfumerile leswaku nhlengeletano ya hina yi fanele yi “va ni timfanelo hinkwato leti pfumeleriwaka hi nawu,” leti nyikiwaka vukhongeri lebyi amukelekaka.

Turkey

Endzhaku ka loko rhavi ri endle xikombelo xo tsarisiwa tanihi vukhongeri, mfumo wu vule leswaku a swi nge koteki hambileswi nawu wu lulamisiweke wu pfumelelana ni wa Huvo ya le Yuropa ya Timfanelo ta Vanhu. Xikombelo xi yisiwe ehubyeni ya timhaka ta xikaya kambe swi nga endleka xi hundzela eka Huvo ya le Yuropa ya Timfanelo ta Vanhu.

Xiphiqo xin’wana xi khumba ntirho wa vusocha. Vamakwerhu va vitaniwa ka nharhu kumbe ka mune hi lembe ku fikela loko va hundze malembe ya ku tsariseriwa vusocha. Nkarhi wun’wana ni wun’wana loko va ya ehubyeni va gweviwa. Van’wana va rihisiwe ko tala kasi van’wana va pfaleriwe ekhotsweni. Hi 2004, Yunus Erçep u endle xivilelo eka Huvo ya le Yuropa ya Timfanelo ta Vanhu. Hambileswi Makwerhu Erçep a rihisiweke ko tala, u pfaleriwe ekhotsweni hi October 2005 kutani a ntshunxiwa endzhaku ko heta tin’hweti ta ntlhanu ta xigwevo xa yena xa lembe. Siku leri a ntshunxiweke ha rona, u tlhele a vitaniwa ehubyeni a rihisiwa hikwalaho ka leswi a aleke ku va socha enkarhini lowu hundzeke.

Uzbekistan

Emalembeni ya mune lama hundzeke, vamakwerhu lava tlulaka 1 100 va khomiwile, va pfaleriwa, va rihisiwa ni ku biwa. Vamakwerhu vo tlula 800 eka volavo va khomiwe hi nkarhi wa Xitsundzuxo xa 2005 ni xa 2006. Etindhawini to tala, maphorisa lama tameleke swimoroncisi ma fike hi mabazi kutani ma khoma hinkwavo lava nga kona eXitsundzuxweni. Vo tala va rihisiwile; van’wana va biwe hi ndlela ya tihanyi.

Nilokoswiritano, vamakwerhu va pfulekeriwe hi nkarhi wo chumayela. Xikombiso xin’wana i xa makwerhu wa xinuna ni wa xisati lava hehliweke hi leswaku va ya eminhlanganweni ya vandlha nileswaku va chumayela. Gqweta ra vona ri kombele leswaku tibuku ta vona leti va tekeriweke tona loko va nga si khomiwa, ti kambisisiwa ehubyeni. Buku leyi nge Vutivi ni broxara leyi nge Leswi Xi Swi Languteleke swi hlayiwe swi twiwa hi vayingiseri ehubyeni, muavanyisi na yena a ri karhi a hlaya. Leswi muavanyisi a a tsakela ngopfu ndzima 5 ya buku leyi nge Vutivi, leyi nhloko-mhaka ya yona yi nge “Xana Xikwembu Xi Amukela Vugandzeri Bya Mani?” u lerise leswaku ku nga yiwi ku ya dyiwa swakudya swa ninhlikanhi kambe ku hlayiwa buku leyi.

Loko ku tshahiwa Matewu 28:19, 20, muavanyisi u te, “Mi chumayela hikwalaho ka ndzimana leyi!” Loko a vutise leswaku ha yini mfumo wa Hitler wa Manazi wu xanise Timbhoni ta Yehovha, u nyikiwe tikhasete ta vhidiyo leti nge: Purple Triangles, Jehovah’s Witnesses Stand Firm Against Nazi Assault ni leyi nge The Bible—Accurate History, Reliable Prophecy. Hambileswi vamakwerhu va rihisiweke kambe va kote ku chumayela vatirhela-mfumo va le hubyeni ni maphorisa hi ndlela leyi a va nga yi langutelanga.—Luka 21:12, 13.

Sudan

Ku sukela hi June 2006, Timbhoni ta Yehovha ti tsarisiwe tanihi vukhongeri eswifundzheni swa nhungu. Vamakwerhu va ake Tiholo ta Mfumo eswifundzheni leswi naswona va khome tinhlengeletano letikulu erivaleni. Minkandziyiso ya hina yi rhumeriwa hi ku ntshunxeka naswona vamakwerhu se va ni hofisi eKhartoum.

Rhaxiya

Hi April 12, 2006, vandlha ra vahuweleri va 200 eMoscow a ri ri eXitsundzuxweni emuakweni lowu hirhiweke loko ku fika maphorisa yo tlula 50 lama hlomeke. Ndhuna ya Xitichi xa Maphorisa ya le Lyublino yi yimise Xitsundzuxo, yi vula leswaku ku yirisiwa ka Timbhoni ta Yehovha eMoscow ku yirisa ni minhlangano yo tano. Maphorisa ma lave ku vona mapasi ya lava nga kona, ma va tekela tibuku ta vona kutani ma teka vamakwerhu va 14 ma ya va pfalela exitichini xa maphorisa xa le Lyublino, laha va nga fika va heta tiawara to tlula mune va pfaleriwile. Loko makwerhu un’wana a fika exitichini xa maphorisa leswaku a ta va pfuna etimhakeni ta nawu, maphorisa ma n’wi be ma n’wi lahlela ehansi kutani ma n’wi xungeta hi mukwana. Ma n’wi byele leswaku a nga tshuki a vika mhaka leyi emaphoriseni. Nilokoswiritano, hi April 17, vamakwerhu va mune eka lavaya va 14 va yi vikile mhaka leyi, va hehla Xitichi xa Maphorisa xa le Lyublino.

Nandzu lowu wu sungule ku tengiwa hi May 16 eHubyeni ya Xifundzha xa Lyublino eMoscow, hi Muavanyisi Z. V. Zubkova. A ri nga ri kona ni rin’we ra maphorisa lama khomeke vamakwerhu, a ko va ni magqweta ya wona ntsena. Muavanyisi a nga swi lavanga ku yingisa swihehlo swa 50 leswi tisiweke hi gqweta ra vamakwerhu naswona a nga vulanga xivangelo xa kona, u tlhele a ala ku yingisa swo tala swa leswi vamakwerhu va swi vuleke. Kambe u pfumelele gqweta ra maphorisa loko ri n’wi nyika kopi ya Huvo ya Xifundzha xa le Golovinsky, leyi eka yona yi endleke xiboho xo yirisa Timbhoni ta Yehovha eMoscow ni mavonelo ya mutivi wa mianakanyo L. V. Kulikov, loyi a veke mbhoni ya mavunwa leyi hehleke Timbhoni ta Yehovha eka nandzu wo sungula.

Hi June 15, 2006, muavanyisi u endle xiboho xa leswaku ku pfaleriwa ka vamakwerhu a ku nga ri enawini kambe a nga vulanga nchumu hi ku kavanyetiwa ka Xitsundzuxo. Xiboho xa kona xi tlhele xi vula leswaku muako lowu a wu hirhiwile, a wu nga ri ndhawu leyi faneleke yo khomela nhlangano wa vukhongeri. Timbhoni ta Yehovha ti endle xivilelo eHubyeni ya Doroba ra Moscow hi June 30, 2006, eka swin’wana swa leswi ti vilelaka ha swona ti boxe ndlela leyi Huvo ya Xifundzha ya le Lyublino yi tengeke nandzu wa tona ha yona. Xitsundzuxo xi fambe kahle handle ko kavanyetiwa etindhawini tin’wana ta 22 eMoscow.

Ndzimana yo sungula ya Tinhla-nkulu leti yi boxe ku navela ka mupisalema loko a ku: “Ndzi ta yimbelelela Xikwembu xanga miloti loko ntsena ndza ha ri kona.” (Ps. 146:2) Namuntlha, malandza ya Yehovha ya timiliyoni ma swi veka erivaleni leswaku na wona ma navela ku endla hilaha ku fanaka. Ina, loko ntsena mafambiselo ya sweswi ya swilo ma ha ri kona, onge hi nga tiyimisela leswaku makhumbi ya khotso, swileriso swa nawu kumbe ku nga twani hi ririmi swi nga hi siveli ku dzunisa Tata wa hina la nge matilweni!

[Bokisi/Xifaniso lexi nga eka tluka 9]

A Ku Nga Ri Xirhambo Xa Ntolovelo

Eka xirhambo xa ntsombano a ku ri ni laha munhu a nga tsalaka vito ra yena a kombela dyondzo ya Bibele, buku leyi nge Leswi Bibele Yi Swi Dyondzisaka kumbe a swi kombela ha swimbirhi. A swi tekanga nkarhi leswaku vanhu va sungula ku rhumela swikombelo swa vona emarhavini yo hambana-hambana emisaveni. Rhavi ra le United States ri vika leswaku ri amukele swikombelo leswi laveke ku va 2 000, ku katsa ni swa 300 leswi vanhu va kona a va kombela dyondzo ya Bibele. Swi le rivaleni leswaku ku tikarhata ka vamakwerhu va hangalasa xirhambo lexi ku ta hambeta ku veka mihandzu.

[Bokisi/Swifaniso leswi nga eka tluka 12, 13]

Yi Laviwa Hi Mahlo-ngati Buku Leyi Nge Leswi Bibele Yi Swi Dyondzisaka!

Eku heleni ka July 2006, ku kandziyisiwe kwalomu ka 47 wa timiliyoni ta buku leyi nge Leswi Bibele Yi Swi Dyondzisaka hi tindzimi ta 155, ku nga katsiwi minkandziyiso ya khume ya Braille ya tindzimi tin’wana. Hi n’hweti yin’we ntsena, mavandlha ya le United States ma endle xikombelo xa tibuku ta 42 000 hi xiringaniso, hi siku. Eka tibuku teto, ta 14 000 a ku ri swikombelo swa xihatla. Ndyangu wa Bethele emisaveni hinkwayo wu swi teka ku ri lunghelo ku tirha hi matimba leswaku wu endlela vamakwerhu minkandziyiso yo tano.

[Bokisi/Swifaniso leswi nga eka tluka 28, 29]

Ku Nyiketeriwa Ka Marhavi

Albania

Ntirho wa hina lowu a wu yirisiwe malembe ya 50 wu tlhele wu pfuleriwa hi 1992. Vamakwerhu va 325 lava veke kona loko ku nyiketeriwa rhavi lerintshwa, leri nga ehandle ka doroba ra Tiranë, a va katsa ni vamakwerhu va mune lava dyuhaleke lava a va ri karhi va tirhela Xikwembu emalembeni lawaya loko ntirho wa ha yirisiwile. Nakambe a ku ri ni vapfhumba lava humaka eka matiko mambe ya 32. Loko varhumiwa va fika hi 1992, a ko va ni vahuweleri va kaye ntsena lava khuvuriweke etikweni hinkwaro. Sweswi ku ni vahuweleri va 3 617. Swirho swa Huvo leyi Fumaka, ku nga Theodore Jaracz na Gerrit Lösch swi nyikele tinkulumo loko rhavi leri ri nyiketeriwa hi June 3, 2006. Siku leri tlhandlameke, swi nyikele tinkulumo eka vayingiseri va 5 153 exitediyamu lexi pfulekeke, lava a va rhiye ndleve hambileswi mpfula a yo chuluka kunene.

Croatia

N’wexemu vamakwerhu etikweni leri va katekisiwe kambirhi: va kume Vuhundzuluxeri Bya Misava Leyintshwa Bya Matsalwa Yo Kwetsima hi Xicroatia entsombanweni wa muganga va tlhela va tsakela ku nyiketeriwa ka miako leyi engeteriweke ya rhavi ra vona eZagreb. Hi Ravuntlhanu, August 11, vayingiseri va 142 va rhiye ndleve loko Makwerhu Jaracz a nyikela nkulumo yo nyiketela. Muako wo sungula wu nyiketeriwe eka malembe ya nkombo lama hundzeke hi 1999.

Slovenia

Hi Mugqivela, August 12, Makwerhu Jaracz u nyikele nkulumo yo nyiketela rhavi lerintshwa eKamnik, ku nga doroba leri nga kwalomu ka 20 wa tikhilomitara en’walungwini wa doroba leri nga ntsindza ra Ljubljana, ni leri nga tikhilomitara ta kwalomu ka 130 evupela-dyambu bya Zagreb, eCroatia. Eku sunguleni, ndyangu wa Bethele a wu tshama etindlwini to hambana-hambana entsindza, kutani a wu tsakile loko eku heteleleni wu tshama swin’we tanihi ndyangu! Lava a va yingisele nkulumo yo nyiketela a ku ri vanhu va 144 lava humaka eka matiko ya 20.

[Swifaniso]

Muako wa rhavi ra le Albania

Eka nhlangano wo hlawuleka ku te vanhu va 5 153

Miako leyi engeteriweke ya rhavi ra le Croatia

Rhavi ra le Slovenia

[Xifaniso lexi nga eka tluka 6]

Ku chumayela wansati la nga twiki etindleveni eBrazil

[Xifaniso lexi nga eka tluka 17]

Tlilasi yo sungula hi Xihindi eJarimani

[Xifaniso lexi nga eka tluka 19]

Linda na Paul

[Xifaniso lexi nga eka tluka 19]

Carma a ri karhi a chumayela hi ririmi ra Mablackfoot

[Xifaniso lexi nga eka tluka 20]

Tlilasi ya Xipaniya eRhoma le Italiya

[Xifaniso lexi nga eka tluka 20]

Samson a ri karhi a chumayeriwa

[Xifaniso lexi nga eka tluka 21]

Hamilton na Abner va ri karhi va dyondzisa Bibele hi ririmi ra Mayangna

[Xifaniso lexi nga eka tluka 27]

Holo ya Mfumo edzongeni wa Sudan